Yonguwan—Meki Gado Wortu tiri unu
Yonguwan—Meki Gado Wortu tiri unu
„Kisi koni. Kisi frustan.”—ODO 4:5.
1, 2. (a) San ben yepi na apostel Paulus di a ben musu feti nanga ensrefi? (b) Fa yu kan kisi koni nanga frustan?
„TE MI wani du bun, dan mi e du ogri.” Yu sabi suma ben taki a sani disi? Na a apostel Paulus ben taki en. Aladi Paulus ben lobi Yehovah, toku a ben feni en muilek son leisi fu du san bun. Fa a ben e denki fu a feti di a ben musu feti nanga ensrefi? A ben skrifi: „Ke, pôti fu mi!” (Rom. 7:21-24) Yu e frustan fa Paulus ben e firi? Yu feni en muilek son leisi fu du san bun? Yu e firi brokosaka neleki Paulus? Efu dati de so, dan no bruya. Aladi Paulus ben musu feti nanga ensrefi, toku a ben wini den tyalensi di ben miti en. Yu kan du dati tu.
2 Paulus ben abi bun bakapisi, fu di a ben meki ’den bun sani di a ben leri’ tiri en (2 Tim. 1:13, 14). Na so a kisi a koni nanga a frustan di a ben abi fanowdu fu du san bun te a ben e kisi fu du nanga problema, èn te a ben musu teki bosroiti. Yehovah Gado kan yepi yu fu kisi koni nanga frustan (Odo 4:5). Na ini en Wortu, Bijbel, a e gi wi a moro bun rai di wi ben kan kisi. (Leisi 2 Timoteyus 3:16, 17.) Wi o luku fa den gronprakseri na ini Bijbel o yepi yu fu handri na wan yoisti fasi nanga yu papa nanga mama, a o leri yu fa fu gebroiki yu moni, èn fa fu tyari yusrefi te yu de yu wawan.
Gado Wortu kan tiri yu na ini na osofamiri
3, 4. Fu san ede yu ben kan feni en muilek fu hori yusrefi na den wet di yu papa nanga mama e poti gi yu, ma fu san ede papa nanga mama e poti den wet dati?
3 Yu feni en muilek fu hori yusrefi na den wet di yu papa nanga mama e poti gi yu? Fu san ede dati ben kan de so? Wan reide na taki yu wani de moro fri fu du san yu wani. Disi na wan sani di furu yonguwan wani. A e kon fu di den e gro kon tron bigisma. Ma efu yu e tan ete nanga yu papa nanga mama, dan yu de fruplekti fu gi yesi na den.—Ef. 6:1-3.
4 Te yu e kon frustan fu san ede yu papa nanga mama e poti wet gi yu, dan dati kan meki en moro makriki gi yu fu hori yusrefi na den wet dati. A tru taki son leisi yu ben kan firi neleki Brielle * di abi 18 yari. A ben taki fu en papa nanga mama: „Den no sabi srefisrefi moro san a wani taki fu abi 18 yari. Mi no mag taki, mi no mag teki mi eigi bosroiti, èn mi no mag kon bigi.” Neleki Brielle, yu ben kan feni taki yu papa nanga mama e poti tumusi furu wet gi yu. Ma a prenspari reide fu san ede yu papa nanga mama e poti wet gi yu, na fu di den e broko den ede nanga yu. Boiti dati, Kresten papa nanga mama sabi taki den musu sorgu bun gi yu, bika den sa musu gi frantwortu na Yehovah.—1 Tim. 5:8.
5. Sortu wini yu kan kisi te yu e gi yesi na yu papa nanga mama?
5 Fu tru, a gi di yu e gi yesi na yu papa nanga mama, de neleki te yu e pai wan moni di yu leni na bangi. O moro yu e pai a moni dati, o moro a bangi o de klariklari fu leni yu moro moni. Na so a de tu taki yu de fruplekti fu sori lespeki gi yu papa nanga mama èn fu gi yesi na den. (Leisi Odo 1:8.) O moro yu e gi yesi na den, o moro den sa gi yu okasi fu du san yu wani du (Luk. 16:10). A no de fu taki dati te yu e trangayesi yu papa nanga mama, dan a no musu fruwondru yu te den e poti moro wet gi yu. Kande den no o gi yu nowan enkri okasi moro fu du san yu wani du.
6. Fa papa nanga mama kan yepi yonguwan fu gi yesi na den?
6 Wán fasi fa papa nanga mama kan yepi den yonguwan fu den fu hori densrefi na den wet di den poti, na te den srefi na wan bun eksempre. Te papa nanga mama de klariklari fu gi yesi na Yehovah, dan dati o sori den pikin taki den wet fu Yehovah bun. Na so yonguwan o feni en moro makriki fu gi yesi na den wet di den papa nanga mama e poti gi den (1 Yoh. 5:3). Boiti dati, Bijbel e taki srefi dati na difrenti okasi, Yehovah gi den futuboi fu en okasi fu taki fa den ben e denki fu spesrutu sani (Gen. 18:22-32; 1 Kow. 22:19-22). Kande a ben o bun tu te papa nanga mama e gi den pikin fu den okasi son leisi fu taki fa den e denki fu sani, a no so?
7, 8. (a) Nanga sortu problema son yonguwan e kisi fu du? (b) San yu musu frustan fu man kisi wini fu trangaleri?
7 Kande son yonguwan feni taki den papa nanga mama no e krutu den na wan reti fasi. Kande yu ben e firi leki Craig son leisi. A yonguman disi ben taki: „Mi mama e du neleki en na wan skowtu. Heri dei a e suku okasi fu krutu mi.”
8 Nofo tron sma e krutu wi te den wani gi wi piri-ai noso trangaleri. Bijbel e sori taki a no switi fu kisi trangaleri, awansi a fiti taki wi e kisi en (Hebr. 12:11). San kan yepi yu fu kisi wini fu a trangaleri di trawan e gi yu? Wán prenspari sani di yu musu hori na prakseri, na taki nofo tron yu papa nanga mama e gi yu trangaleri fu di den lobi yu (Odo 3:12). Den no wani taki yu e kisi takru gwenti, èn fu dati ede den e yepi yu fu kweki bunwan. Yu papa nanga mama sabi taki efu den no gi yu piri-ai, dan fu taki en leti, den no e sori lobi gi yu! (Leisi Odo 13:24.) Boiti dati, yu musu frustan taki yu o meki fowtu te yu e teki leri. Sobun, te yu e kisi piri-ai, dan a ben o bun fu pruberi fu teki leri fu den sani dati. Bijbel e taki: „Te wan sma abi koni leki gudu, dan dati moro bun leki fu abi solfru leki gudu. Te wan sma abi furu koni, dan dati moro bun leki gowtu.”—Odo 3:13, 14.
9. Na presi taki yonguwan e tan denki taki den papa nanga mama no handri bun nanga den, dan san den kan du?
9 Ma a tru taki papa nanga mama e meki fowtu (Yak. 3:2). Son leisi te den e gi yu trangaleri, dan a kan taki den e taki sondro fu denki (Odo 12:18). San ben kan meki taki den e du so? Kande den abi tumusi furu sani na den ede, noso kande den feni taki den fowtu di yu e meki e sori taki den no kweki yu bun. Na presi taki yu e tan nanga a denki taki den no handri bun nanga yu, a ben o moro bun fu de nanga tangi gi a tranga muiti di den e du fu yepi yu, a no so? Te yu e leri fu teki trangaleri, dan yu o kisi wini fu dati te yu kon moro bigi.
10. San o yepi yu fu kisi wini fu den wet fu yu papa nanga mama, èn fu a piri-ai di den e gi yu?
10 Yu wani leri fu gi yesi na den wet di yu papa nanga mama e poti èn yu wani kisi wini fu a piri-ai di den e gi yu? Efu dati de so, dan yu musu leri fu taki moro bun nanga den. Fa yu kan du dati? A fosi sani di yu musu du, na taki yu musu arki te den e taki nanga yu. Bijbel e taki: „Ibri sma musu gaw fu yere, ma a no musu gaw fu taki, èn a no musu atibron esi-esi” (Yak. 1:19). No hasti yusrefi fu opo taki gi yusrefi, ma pruberi fu hori yusrefi èn fu frustan san yu papa nanga mama wani taigi yu. No poti prakseri na a fasi fa den e taki nanga yu, ma poti prakseri na san den e taigi yu. Baka dati, taigi yu papa nanga mama na ini yu eigi wortu san den taigi yu, èn du dati na wan lespeki fasi. Te yu e du disi, dan dati o gi den a dyaranti taki yu yere san den taigi yu. Ma fa a de te yu wani fruklari gi den fu san ede yu taki noso du wan sani? Nofo tron a moro bun fu ’hori yu mofo’ èn fu du fosi san yu papa nanga mama wani taki yu musu du (Odo 10:19). Te yu papa nanga mama e si taki yu gi yesi na den, dan den o wani arki san yu abi fu taki. Te yu e tyari yusrefi na a fasi dati, dan dati e sori taki yu e kon lepi èn taki yu e meki Gado Wortu tiri yu.
Gado Wortu kan tiri yu te yu e gebroiki moni
11, 12. (a) Sortu rai Gado Wortu e gi wi te a abi fu du nanga moni, èn fu san ede wi e kisi a rai dati? (b) Fa yu papa nanga mama kan yepi yu fu gebroiki moni na wan koni fasi?
11 Bijbel e taki: „Moni e kibri sma.” Ma a srefi vers disi e sori taki koni warti moro moni (Preik. 7:12). Gado Wortu e gi wi deki-ati fu no lobi moni, ma fu abi a yoisti denki fu en. Fu san ede a no bun fu lobi moni? Luku na agersitori disi: Wan bun boriman sabi fa fu gebroiki wan srapu nefi. Ma wan sma di no sabi fa fu wroko nanga a nefi, kan gi ensrefi noso trawan bigi mankeri. Na so a de tu nanga moni. Te wi sabi gebroiki moni na wan koni fasi, dan a kan tyari furu wini kon gi wi. Ma den sma di „wani kon gudu nomonomo”, nofo tron no e broko den ede efu dati sa meki taki den lasi mati, noso taki den nanga den famiri e pori. Den no e broko den ede srefi efu a matifasi di den abi nanga Yehovah e pori. Na so den e gi densrefi „furu sari nanga pen”.—Leisi 1 Timoteyus 6:9, 10.
12 Fa yu kan leri fu gebroiki moni na wan koni fasi? Fu san ede yu no e aksi yu papa nanga mama fu leri yu fa yu musu gebroiki yu moni? Salomo ben skrifi: „Wan koni sma o arki èn a o wani teki moro leri. Wan sma di abi frustan o wani teki den bun rai di trawan e gi en” (Odo 1:5). Wan yongu uma di nen Anna ben aksi en papa nanga mama rai. A e taki: „Mi papa leri mi fa mi musu gebroiki mi moni, èn a sori mi o prenspari a de fu sabi san mi e du nanga mi moni.” Anna en mama ben gi en wan tu bun rai tu. Anna e taki: „A sori mi taki fosi mi bai wan sani, mi musu luku bun efu mi kan bai en moro bunkopu na wan tra presi. Fa Anna kisi wini fu den rai disi? A e piki: „Now mi sabi fa fu gebroiki mi moni. Mi e luku bun taki mi no e bai sani di mi no abi fanowdu trutru, èn na so mi no abi fu broko mi ede nanga paiman.”
13. Fa yu kan dwengi yusrefi te a abi fu du nanga a fasi fa yu e gebroiki moni?
13 Kande yu e si taki yu e meki paiman esi-esi fu di yu e bai sani sondro fu denki, noso fu di yu wani meki bigi na den mati fu yu. San kan yepi yu fu no fadon na ini den trapu disi? Te a abi fu du nanga a fasi fa yu e gebroiki moni, dan yu musu leri fu dwengi yusrefi. Luku san Ellena, wan yongu uma di abi 20 yari, e du. A e taki: „Te mi e go na wan presi nanga den mati fu mi, dan mi e bosroiti na fesi omeni moni mi o gebroiki. . . . Mi si tu taki a moro bun fu go na foto soso nanga mati di no e gebroiki den moni fu bai ala sortu sani, èn di sa gi mi deki-ati fu luku bun fosi mi bai wan sani.”
14. Fu san ede yu musu luku bun nanga „a bedrigifasi fu gudu”?
14 A de prenspari taki wan sma e wroko moni èn taki a sabi gebroiki moni na wan koni fasi. Ma Yesus ben taki dati sma o de koloku trutru te den „sabi taki den de na nowtu na yeye fasi” (Mat. 5:3). A ben warskow taki sani soleki „a bedrigifasi fu gudu”, kan meki taki wan sma no e poti prakseri moro na sani di abi fu du nanga na anbegi fu en (Mark. 4:19). Dati meki a prenspari srefisrefi taki yu e meki Gado Wortu tiri yu, so taki yu e tan abi a yoisti denki fu moni!
Gado Wortu kan tiri yu te yu de yu wawan
15. O ten yu denki taki a o moro muilek gi yu fu gi yesi na Gado?
15 O ten yu denki taki a o moro muilek gi yu fu gi yesi na Gado? Na te yu de nanga trawan, noso na te yu de yu wawan? We, te yu de na skoro noso na wroko, dan a no de fu taki dati yu de na ai fu sorgu taki nowan sani e pori a matifasi di yu abi nanga Yehovah. Na te yu e bro yu ede pikinso èn yu no e fruwakti taki yu o kisi tesi, dan a kan pasa moro makriki taki yu e du wan sani di no bun.
16. Fu san ede yu musu gi yesi na Yehovah srefi te yu de yu wawan?
16 Fu san ede yu musu gi yesi na Yehovah, awansi yu de yu wawan? Hori a sani disi na prakseri: Yu kan meki Yehovah ati sari, noso yu kan meki en ati prisiri (Gen. 6:5, 6; Odo 27:11). A fasi fa yu e handri prenspari gi Yehovah, fu di a „e broko en ede nanga yu” (1 Petr. 5:7). A wani taki yu gi yesi na en so taki sani kan waka bun nanga yu (Yes. 48:17, 18). Di wan tu fu den owruten futuboi fu Yehovah ben trangayesi en, dan en ati ben sari (Ps. 78:40, 41). Ma tra fasi leki dati, wan engel ben taki dati a profeiti Danièl ben de „wan man di Gado lobi srefisrefi” (Dan. 10:11). Fu san ede dati ben de so? Danièl ben tan gi yesi na Gado, èn a no du dati soso te a ben de na mindri tra sma, ma sosrefi te a ben de en wawan.—Leisi Danièl 6:10.
17. Sortu sani yu musu aksi yusrefi te yu e bosroiti fa yu o abi prisiriten?
17 Fu man tan gi yesi na Gado te yu de yu wawan, dan yu musu ’leri fa fu gebroiki yu frustan fu man si sani krin, so taki yu kan sabi san bun èn san no bun’ (Hebr. 5:14). Fu eksempre, te yu musu bosroiti sortu poku yu o arki, sortu felem yu o luku, noso tapu sortu website yu o go, dan a bun fu aksi yusrefi den sani disi di e kon now. Disi sa yepi yu fu kon sabi san bun èn san no bun. Aksi yusrefi: ’A sani disi o gi mi deki-ati fu sori lobi gi trawan, noso a o meki taki mi „breiti te ogri e miti trawan”?’ (Odo 17:5) ’A o yepi mi fu „lobi san bun”, noso a o meki en muilek gi mi fu no „lobi ogri kwetikweti”?’ (Amos 5:15) Den sani di yu e du te yu de yu wawan e sori sortu sani prenspari trutru gi yu.—Luk. 6:45.
18. San yu musu du efu kibrikibri yu du wan sondu, èn fu san ede dati de fanowdu?
18 San yu musu du efu kibrikibri yu ben e du sani di yu sabi taki den no bun? Hori na prakseri taki „sani no o waka bun gi a sma di e kibri den sondu fu en, ma Gado o sori sari-ati gi wan sma te a e taki krin sortu sondu a du èn te a no e du den moro” (Odo 28:13). A no ben o de wan koni sani srefisrefi fu tan du san no bun èn fu „meki Gado en santa yeye sari”! (Ef. 4:30) Efu yu du wan sondu, dan yu abi a plekti fu taigi Gado nanga yu papa nanga mama. Te yu e du dati, dan yusrefi o kisi wini. Na ini den sortu situwâsi disi, „den owru man fu a gemeente” kan de wan bigi yepi gi yu. A disipel Yakobus ben taki: „Meki den begi gi [a sma di du wan sondu] èn lobi oli gi en na ini a nen fu Yehovah. Te den e begi nanga bribi, dan a sma di siki sa kon betre, èn Yehovah sa opo en. Sosrefi, efu a du sondu, dan a sa kisi pardon fu dati” (Yak. 5:14, 15). A tru taki a sani disi kan meki yu firi syen, èn kande yu sa kisi wan tu takru bakapisi. Ma efu yu e teki a deki-ati fu suku yepi, dan sani no o kon moro ogri, èn yu o firi frulekti fu di yu abi wan krin konsensi.—Ps. 32:1-5.
Meki Yehovah ati prisiri
19, 20. San Yehovah wani gi yu, ma san yu musu du?
19 Yehovah na „a koloku Gado”, èn a wani taki yu musu de koloku (1 Tim. 1:11). A wani trutru taki sani e waka bun nanga yu. Awansi nowan sma e si a muiti di yu e meki fu du san bun, toku A e si dati. Noti no kibri gi Yehovah. A no e luku wi fu suku fowtu na wi, ma fu yepi wi te wi e pruberi fu du san bun. Gado „e luku heri grontapu fu si san e pasa, so taki a kan sori a krakti fu en fu yepi den wan di e dini en nanga den heri ati”.—2 Kron. 16:9.
20 Sobun, meki Gado Wortu tiri yu, èn gi yesi na a rai di skrifi na ini. Na so yu o kisi a koni nanga a frustan di yu abi fanowdu fu sabi san fu du te yu e kisi bigi problema, èn fu teki muilek bosroiti. Boiti taki yu o plisi yu papa nanga mama, nanga Yehovah, yu sa abi sosrefi wan trutru koloku libi.
[Futuwortu]
^ paragraaf 4 Wi kenki den nen.
San yu ben sa piki?
• San yonguwan kan du fu kisi wini fu den wet di den papa nanga mama e poti gi den, èn fu a piri-ai di den e kisi?
• Fu san ede a prenspari fu abi a yoisti denki fu moni?
• Fa yu kan tan gi yesi na Yehovah, awansi yu de yu wawan?
[Aksi fu a tori disi]
[Prenki na tapu bladzijde 6]
Yu sa tan gi yesi na Gado te yu de yu wawan?