San yu pikin ben o taki?

PAPA NANGA MAMA: Na ini A Waktitoren fu 15 yanuari 2010, bladzijde 16-20, wi ben gi unu a rai fu oefen wan tu sani nanga den pikin fu unu. Na artikel disi e taki fu wan tu fasi fa unu kan yepi a yongu pikin fu unu fu sreka ensrefi gi tyalensi di o miti en na skoro. A bun fu oefen den sani disi nanga yu pikin te yu e hori na Osofamiri Anbegi.

FURU tesi e miti pikin di de Yehovah Kotoigi. Nofo tron pikin na skoro e aksi den fu san ede den no e du spesrutu sani. Fu eksempre, kande den e aksi den fu san ede den no e singi a singi fu a kondre, fu san ede den no e hori friyari-oso, èn fu san ede den no e teki prati na sani di abi fu du nanga spesrutu fesadei. Efu sma e aksi yu manpikin noso yu umapikin den sortu sani dati, dan san yu pikin o piki?

Son pikin di de Kresten ben taki nomo: „Mi no kan du dati, fu di mi na wan Yehovah Kotoigi.” A no de fu taki dati den pikin disi musu kisi prèise fu di den opo taki gi a bribi fu den. Kande a piki di den gi sa tapu trawan fu poti moro aksi gi den. Ma Bijbel e gi wi deki-ati fu ’de srekasreka fu opo taki gi wisrefi na fesi ala sma di e aksi wi’ fu san ede wi e bribi den sani di wi e bribi (1 Petr. 3:15). Ma fu man du dati, dan wi no kan taki nomo: „Mi no kan du dati.” Awansi son sma no e agri nanga wi, toku a kan taki trawan wani kon sabi fu san ede wi no e du spesrutu sani.

Furu Kotoigi yonguwan fruteri den pikin na skoro Bijbel tori, èn den gebroiki publikâsi soleki a buku Teki leri fu a bigi leriman. Den tori disi kan yepi wi fu fruklari fu san ede pikin fu Kotoigi e du son sani, èn fu san ede den no e du son sani. Son skoropikin e poti yesi arki den Bijbel tori disi, èn den Kotoigi bigin furu Bijbelstudie na a fasi dati. Kande tra skoropikin no wani arki wan heri Bijbel tori. Efu den Kotoigi no e fruklari spesrutu Bijbel tori gi den, dan kande den skoropikin no o man frustan den tori dati. Luku na eksempre fu Minhee di abi 11 yari. Di wan mati fu en gi en wan kari fu kon na a friyari-oso fu en, dan Minhee piki en: „Bijbel no e taki dati wi musu hori friyari-oso. Sma ben kiri Yohanes, wan man na ini Bijbel, na wan friyari-oso.” Ma Minhee e memre taki a mati fu en no ben frustan san a ben taigi en.

Son leisi a e yepi te wan Kotoigi e sori wan tra skoropikin wan prenki noso wan tori na ini wan fu den buku fu wi. Ma fa a de te den driktoro fu a skoro no feni en bun taki pikin na skoro e gi trawan buku di abi fu du nanga a bribi fu den? Den pikin fu yu kan gi bun kotoigi, awansi den no abi buku na den? Fa yu kan yepi yu pikin fu opo taki gi a bribi fu den?

Oefen spesrutu sani nanga den

A e yepi te yu e oefen spesrutu sani nanga den pikin fu yu te den de na oso. Papa nanga mama kan du neleki den na skoropikin. Te pikin e pruberi fu opo taki gi a bribi fu den, dan a bun taki papa nanga mama e prèise den gi dati. A bun tu fu sori den fa den kan taki-go-taki-kon moro bun nanga trawan, èn fu san ede dati de fanowdu. Fu eksempre, meki den gebroiki wortu di skoropikin di owru neleki den, gwenti gebroiki. Joshua, wan boi di abi  neigi yari, e taki dati den pikin na en skoro no e frustan wortu soleki „konsensi” nanga „getrowfasi”. Dati meki te a ben e taki-go-taki-kon nanga den, dan a ben musu gebroiki wortu di den ben kan frustan moro makriki.—1 Kor. 14:9.

Kande son skoropikin di e poti wan aksi, no sa tan arki te a piki langa tumusi. Te Kotoigi yonguwan e gi tra skoropikin okasi fu taki fa den e denki èn te den e taki-go-taki-kon nanga den, dan na so den pikin o wani kon sabi moro. Haneul, wan umapikin di abi tin yari, e taki: „Den pikin na mi skoro lobi taki tori, ma den no lobi te sma e fruklari wan lo sani gi den.” Te yu wani taki tori nanga tra yonguwan, dan yu musu poti aksi gi den, èn yu musu arki bun te den e taki.

Den eksempre na ini a faki na ondrosei e sori fa Kresten pikin kan taki-go-taki-kon nanga den pikin na skoro. A no de fanowdu fu leri den eksempre disi na ede, fu di ala pikin de tra fasi, èn a no ala ten sani e waka na a srefi fasi. Fu dati ede, wan Kotoigi pikin musu frustan san a musu taki, èn a musu du dati nanga en eigi wortu. Boiti dati, a musu taki na wan fasi di fiti gi a situwâsi,  èn na wan fasi di den pikin na skoro o man frustan. Efu yu abi pikin di e go na skoro, dan pruberi fu oefen den eksempre disi nanga den.

A e teki ten nanga muiti fu gi pikin leri. Kresten papa nanga mama musu leri den pikin fu den Bijbel gronprakseri ibri tron baka, èn den musu gi den deki-ati fu hori densrefi na den gronprakseri dati.—Deut. 6:7; 2 Tim. 3:14.

A tra leisi te yu e hori na Osofamiri Anbegi, dan pruberi fu oefen den eksempre na ini a faki, makandra nanga den pikin fu yu. Luku fa dati kan yepi den. Hori a sani disi na prakseri: Den no musu pruberi nomo fu leri na ede san den o piki sma. Fu taki en leti, kande yu kan oefen wan eksempre difrenti leisi, aladi yu e piki den na difrenti fasi fu si san den o taki. Te den e pruberi fu fruklari gi trawan fu san ede den e bribi den sani di den e bribi, dan yepi den fu sori lespeki gi a fasi fa trawan e denki èn fu gi piki na wan fasi di fiti. Baka wan pisi ten, yu sa leri den pikin fu yu fa den kan opo taki gi den sani di den e bribi, na fesi skoropikin, birtisma, nanga leriman.

[Faki/​Prenki na tapu bladzijde 4, 5]

FRIYARI-OSO

Mary: Eeh, John, yu wani kon na a fesa fu mi?

John: Mi breiti taki yu prakseri mi. Ma sortu fesa yu o hori?

Mary: Mi friyari, èn mi o hori wan moi friyari-oso.

John: We, yu no musu mandi, ma mi no o man kon fu di mi no e hori friyari-oso.

Mary: Fu san ede? A switi fu hori fesa, yèrè!

John: Misrefi lobi fesa. Ma wi leki Yehovah Kotoigi wani teki na eksempre fu Yesus, èn Yesus no ben e hori friyari-oso. Na fu dati ede mi no e hori friyari-oso.

Mary: Ma yu no kan kon na a fesa? Yu no abi fu fristeri mi, èn yu no abi fu tyari wan kado.

John: Nôno, mi no kan du dati. A prenspari gi mi fu du san Bijbel e taki. Èn Bijbel e taki dati den bakaman fu Yesus no ben e hori friyari-oso èn den no ben e go na friyari-oso tu.

Mary: Yu wani taigi mi taki mi no musu hori mi friyari-oso?

John: Dati yu srefi musu sabi. Ma mi nanga mi famiri no e hori friyari-oso.

Mary: Dan yu no e kisi kado fu yu papa nanga mama?

John: Iya, mi e kisi. Ma mi papa nanga mama no e wakti teleki mi friyari fu gi mi kado. Den e gi mi kado iniwan leisi te den e firi fu du dati. Ma yu no wani sabi fa a du kon taki sma bigin hori friyari-oso?

Mary: Yu o fruteri mi?

John: We, tamara mi o fruteri yu wan moi tori di abi fu du nanga wan friyari-oso di ben hori langa ten pasa.

A SINGI FU A KONDRE

Gail: Fu san ede yu no e singi a singi fu a kondre?

Claire: Mi kan taigi yu, ma taigi mi fosi fu san ede yu e singi en?

Gail: Fu di mi lobi mi kondre.

Claire: Mi srefi lobi mi kondre. Ma a sani dati wani taki dati tra kondre no bun?

Gail: Iya, den bun tu.

Claire: Wi no e opo tanapu fu singi gi iniwan sma nanga iniwan sani di wi lobi, tòk?

Gail: Nôno, wi no e du dati. We, fu taki en leti, mi no sabi fu san ede mi e singi a kondre singi. Kande na fu di tra sma e du dati.

Claire: Furu sma e denki taki a kondre fu den na a moro bunwan na grontapu. Den de klariklari fu du iniwan sani gi a kondre fu den. Ma mi no e denki so. Noiti mi ben o feti na ini wan orloku èn noiti mi ben o gi mi libi gi mi kondre. Gado no lobi feti èn a no lobi te sma e si a kondre fu den leki a moro bunwan. Na so mi e denki tu. Sobun, aladi mi lobi mi kondre, toku mi bosroiti fu no singi a singi fu a kondre.

Gail: Oh, mi e frustan san yu e taki.

Claire: A bun Gail, mi breiti taki yu taki fu a tori disi. Èn efu yu wani sabi fu san ede mi e du spesrutu sani noso fu san ede mi no e du spesrutu sani, dan yu kan aksi mi. Ma yu sabi taki Bijbel e taki dati langa ten pasa, wan kownu fu Babilon ben gi sma a komando fu boigi gi wan popki? Son sma no ben wani boigi, aladi den ben kan lasi den libi.

Gail: Tru? San pasa nanga den?

Claire: Mi o fruteri yu na ini a pauze.

FA YU E DENKI FU POLITIEK

Filip: Max, efu yu ben mag stem, dan tapu suma yu ben o stem?

Max: Nowan sma.

Filip: Fu san ede?

Max: Mi stem kaba.

Filip: Ma yu no mag stem ete.

Max: Ma disi na tra fasi. Mi stem gi a moro bun tirimakti di de.

Filip: Sortu tirimakti na dati?

Max: A tirimakti fu Yesus. Mi denki taki en na a moro bun tiriman. Yu wani sabi fu san ede?

Filip: No, kande wan tra leisi.

Max: We efu oiti yu wani sabi, dan mi o taigi yu.

[Prenki]

„Eeh John, mi wani gi yu wan kari fu kon na a friyari-oso fu mi”

[Prenki na tapu bladzijde 3]

„Fu san ede yu no e singi a singi fu a kondre?”