Yu e memre disi ete?

Yu prisiri fu leisi den Waktitoren di kon na doro no so langa pasa? We, luku efu yu kan gi piki tapu den aksi di e kon now:

• Yehovah Kotoigi e moksi nanga tra bribi?

Nôno. Den fosi Kresten ben e libi na ini wan grontapu pe sma fu difrenti kulturu ben de èn pe difrenti sortu bribi ben de. Ma di Paulus ben skrifi fu a moksi di sma e moksi nanga tra bribi, dan a aksi: „San wan sma di de na bribi abi fu du nanga wan sma di no de na bribi?” Baka dati a warskow den Kresten fu „komoto na den mindri” (2 Kor. 6:15, 17). A de krin taki Paulus no ben taki bun fu a moksi di sma e moksi nanga tra bribi.—1/7, bladzijde 11.

• Suma na den aiti Bijbel skrifiman di e fruteri wi furu sani fu Yesus?

Den nen na Mateyus, Markus, Lukas, nanga Yohanes. Den tra fo skrifiman na Petrus, Yakobus, Yudas, nanga Paulus. Ala den skrifiman disi ben e libi na ini a ten fu Yesus, èn den e fruteri wi san a ben e leri sma.—1/7, bladzijde 26, 27.

• Di Gado ben tyari den Israelsma komoto na Egepte, dan sortuwan fu den engel a ben seni na den fesi? (Ex. 23:20, 21)

Wi kan bribi taki na engel disi di ben e ’du sani na ini Yehovah nen’, ben de a fosi Manpikin fu Gado. Bakaten, na engel dati ben tron Yesus.—15/9, bladzijde 21.

• Fu san ede Yesus no ben hasti ensrefi fu go na Lasarus di ben kon siki?

Yesus ben gi sma wan opobaka kaba, ma den sma disi ben dede wan tu yuru nomo, di Yesus meki den kon na libi baka (Luk. 7:11-17, 22; 8:49-56). Ma a dedeskin fu Lasarus ben de na ini a grebi wan tu dei kaba. Ala sma ben de seiker taki a ben dede trutru! Yesus ben sabi taki te a ben o wakti, dan a ben o man gi wan moro bun kotoigi fu en Tata, Yehovah. Boiti dati, fu di a ben luku san na a moro bun ten fu du dati, meki furu sma ben poti bribi na ini Gado (Yoh. 11:45).—1/10, bladzijde 18, 19.

• Sortu sani sma no musu gebroiki leki reide fu no gi yesi na den komando fu Gado?

’A muilek tumusi. Mi no wani. Mi no abi ten. Mi no bun nofo. Wan sma du wan hati sani nanga mi.’ Wi no musu gebroiki den sani dati leki reide fu no gi yesi na den komando fu Gado.—15/10, bladzijde 12-15.

• San na wan tu fasi fa yu kan sorgu taki yu nanga trawan e kisi wini fu den Kresten konmakandra?

Sreka yusrefi. Go na den konmakandra doronomo. Doro biten. Abi ala den buku na yu. No meki sani puru yu prakseri. Abi wan prati na den konmakandra. Gi syatu piki. Du den frantwortu fu yu. Prèise den wan di ben abi wan prati na a konmakandra. Abi demakandra nanga trawan bifo èn baka a konmakandra.—15/10, bladzijde 22.

• Fa yu kan yepi wan mati di siki?

A moro prenspari sani di de fanowdu na taki yu musu pruberi fu prakseri fa a ben o de efu yu ben de na ini a situwâsi fu a sma. Boiti dati, pruberi fu kon sabi san a sma wani trutru èn san a abi fanowdu fu yu. Arki bun te a e taki. Sori taki yu e firi gi en. Hori a sma na prakseri èn gi en deki-ati. Yepi a sma nanga spesrutu sani. Tan krosibei fu yu mati di siki.—1/10, bladzijde 14-17.

• San wi kan leri fu a tori fu Aron di ben du wan sondu fu di trawan dwengi en fu du dati?

Di Moses ben go na tapu Sinaibergi, dan den Israelsma dwengi Aron fu meki wan gado gi den. Te fu kaba Aron brokokindi, èn a du san den aksi fu en. Disi e sori taki a no yonguwan nomo e kisi fu du nanga sma di e dwengi den fu du san no bun. Srefi bigi sma di wani du san bun e kisi fu du nanga tra bigi sma di e dwengi den fu du san no bun. Wi musu kakafutu gi den sortu sma disi.—15/11, bladzijde 8.

• Sortu prenspari sani o meki taki wi de koloku?

Efu wi wani tan na libi, dan wi musu hari blo, wi musu dringi, èn wi musu nyan. Na so meti e du tu. Ma efu wi wani de koloku, dan wi abi wan sani fanowdu di meti no abi. Iya, a de fanowdu taki wi e frustan fu san ede wi de na libi. Na a Mekiman wawan kan sorgu gi dati. Fu dati ede, Yesus ben taki: „Sma no musu libi fu brede wawan, ma fu ibri wortu di Yehovah mofo taki” (Mat. 4:4). Den sma di sabi taki den de na nowtu na yeye fasi, de koloku fu di den e kon krosibei na Yehovah, „a koloku Gado”, èn a e gi den wan sani di de tumusi prenspari fu meki den de koloku. A sani dati na howpu.—1/10, bladzijde 24.