Kisi wini fu a trow di yu no trow

„Efu wan sma kan tan sondro fu trow, dan meki a du so.”​—MAT. 19:12.

1, 2. (a) Fa Yesus, Paulus, nanga trawan ben e si a trow di sma no trow? (b) Fu san ede son sma di no trow no e si a sani disi leki wan presenti?

A NO de fu taki dati a trowlibi na wan fu den moro warti presenti di Gado gi libisma (Odo 19:14). Ma furu Kresten di no trow abi furu fu du, èn den de koloku trutru. Harold, wan brada di abi 95 yari èn di noiti no trow, e taki: „Aladi mi lobi fu abi demakandra nanga trawan èn fu gi den wan switikon, toku mi noiti no e firi sari te mi de mi wawan. Mi e si taki mi de koloku trutru aladi mi no trow.”

² Iya, Yesus Krestes nanga na apostel Paulus ben taki dati neleki fa a trowlibi de wan presenti fu Gado, na so a trow di wan sma no trow na wan presenti tu. (Leisi Mateyus 19:11, 12;  1 Korentesma 7:7.) Ma a tru taki a no ala ten te wan sma no trow, dan dati e kon fu di a sma srefi ben wani dati. Son leisi a muilek fu feni wan bun trowpatna. Noso baka te son sma ben trow furu yari langa, dan sondro taki den fruwakti dati, den kon de den wawan fu di a patna fu den broko trow nanga den, noso fu di a dede. Na sortu fasi a trow di wan sma no trow kan de leki wan presenti? Èn fa Kresten di no trow e kisi wini fu a situwâsi fu den?

Wan tumusi moi presenti

3. Sortu wini Kresten di no trow e kisi furu tron?

³ Nofo tron wan sma di no trow abi moro ten leki wan sma di trow, èn a moro makriki gi en fu du san a wani (1 Kor. 7:32-35). A kan gebroiki den moi okasi disi fu du moro na ini a diniwroko, fu sori lobi gi moro sma, èn fu kon moro krosibei na Yehovah. Dati meki furu Kresten kon si sortu wini a e tyari kon te den no trow, èn den bosroiti fu „tan sondro fu trow”, awansi na gi wan pisi ten nomo. Kande trawan no ben abi na prakseri fosi fu tan sondro fu trow, ma di sani no waka soleki fa den ben fruwakti, dan den begi Yehovah fu yepi den fu fiti densrefi na a nyun situwâsi fu den. Na so den bosroiti fu tan sondro fu trow.​—1 Kor. 7:37, 38.

4. Fu san ede Kresten di no trow kan abi a dyaranti taki Gado e warderi a wroko fu den?

⁴ Kresten di no trow sabi taki Yehovah nanga na organisâsi fu en e warderi den, awansi den no abi trowpatna. Gado e sori lobi gi ibriwan fu wi (Mat. 10:29-31). Nowan sma nanga nowan sani kan puru wi fu a lobi fu Gado (Rom. 8:38, 39). Awansi wi trow, noso awansi wi no trow, toku wi kan abi a dyaranti taki Gado e warderi a wroko di wi e du gi en.

5. San wi musu du fu man kisi wini dorodoro fu a trow di wi no trow?

⁵ Neleki fa wan sma musu oefen fu man prei poku bun noso fu man prei wan sport bun, na so wan Kresten di no trow musu du muiti fu kisi wini fu a situwâsi fu en. Soleki fa wi si kaba, dan son Kresten di no trow na brada noso sisa, yonguwan noso owruwan, sma di bosroiti fu no trow, noso sma di no man yepi taki den no abi trowpatna. Fa den Kresten disi kan kisi wini fu a situwâsi fu den? Wi sa go luku na eksempre fu wan tu sma fu a fosi Kresten gemeente, fu si san wi kan leri fu den.

Yonguwan di no trow

6, 7. (a) Sortu grani den umapikin fu Filipus ben kisi na ini a diniwroko fu Gado? (b) Na sortu fasi Timoteyus ben kisi wini fu a trow di a no ben trow? Sortu blesi a kisi fu di a ben de klariklari fu dini Gado na ini den yongu yari fu en?

⁶ Na evangelie preikiman Filipus, ben abi fo umapikin di ben de nyunwenke, èn neleki den papa den ben de fayafaya na ini a diniwroko (Tori. 21:8, 9). A taki di sma ben e taki profeititori ben de wan fu den presenti di sma ben kisi na wan wondru fasi nanga yepi fu santa yeye. Den  yongu uma disi ben e gebroiki a presenti disi, soleki fa Bijbel ben taki na Yoèl 2:28, 29.

⁷ Timoteyus ben de wan yonkuman di ben e kisi wini fu a trow di a no ben trow. Sensi di a ben pikin, en mama, Enise, nanga en granmama Lois, ben gi en leri fu den „santa buku” (2 Tim. 1:5; 3:14, 15). Ma a kan taki den ben teki a Kresten bribi a fosi leisi di Paulus ben kon na Listra, a presi pe den ben e tan. Dati ben de na a ten fu a yari 47. Tu yari baka dati, di Paulus go drape fu a di fu tu leisi, dan a kan taki Timoteyus ben abi sowan 20 yari. Aladi a ben yongu ete èn a no ben de so langa na ini a tru anbegi, toku den Kresten owruman fu Listra, nanga Ikonium di ben de krosibei fu drape, „ben e taki soso bun sani fu en” (Tori. 16:1, 2). Dati meki Paulus aksi Timoteyus fu go du zendeling wroko makandra nanga en (1 Tim. 1:18; 4:14). Wi no sabi seiker efu oiti Timoteyus ben trow. Ma wi sabi taki leki yonkuman, a ben breiti fu go dini makandra nanga Paulus, èn furu yari baka dati, a ben prisiri fu dini leki zendeling nanga kring-opziener, aladi a no ben trow.​—Fil. 2:20-22.

8. San meki taki Yohanes Markus bigin du muiti fu go na fesi na ini a tru anbegi? Sortu blesi a kisi fu di a du dati?

⁸ Di Yohanes Markus ben yongu, dan a kisi wini tu fu a trow di a no ben trow. En nanga en mama, Maria, èn sosrefi en neef Barnabas, ben de memre fu a Kresten gemeente fu Yerusalem. A kan taki a famiri fu Markus ben abi en bun, fu di den ben abi den eigi oso na ini a foto, èn den ben abi wan umasrafu (Tori. 12:12, 13). Aladi Markus ben abi ala den sani disi di a ben yongu, toku a no ben e suku nomo fu plisi en eigi lostu, èn a no ben e denki ensrefi nomo. A no ben e prakseri tu fu seti wan osofamiri èn fu libi wan switi libi. A kan taki na fu di a ben gwenti fu abi demakandra nanga den apostel fosi, meki a kisi na angri fu go du zendelingwroko. Na so a ben breiti fu go wroko makandra nanga Paulus nanga Barnabas a fosi leisi di den go du zendelingwroko, èn a ben e yepi den nanga a wroko fu den (Tori. 13:5). Bakaten, a go dini makandra nanga Barnabas, èn wan pisi ten baka dati, a ben e dini makandra nanga Petrus na ini Babilon (Tori. 15:39; 1 Petr. 5:13). Wi no sabi o langa Markus tan sondro fu trow. Ma a de wan bun eksempre gi wi fu di a ben de wan sma di ben de klariklari fu dini trawan èn fu du moro na ini a diniwroko fu Gado.

9, 10. Sortu okasi yongu Kresten di no trow abi fu du moro na ini a diniwroko? Gi wan eksempre.

⁹ Na ini a ten disi, furu Kresten yonguwan di no trow e prisiri fu gebroiki a libi fu den fu du moro na ini a diniwroko fu Gado. Neleki Markus nanga Timoteyus den e frustan taki fu di den no trow, dan dati e gi den okasi fu ’dini Masra doronomo sondro taki sani puru den prakseri’ (1 Kor. 7:35). A sani disi e tyari wini kon trutru. Furu okasi de gi den sma disi fu pionier, fu dini pe moro Kownukondre preikiman de fanowdu, fu leri wan tra tongo, fu yepi bow Kownukondre zaal noso bijkantoro, fu go na a Dinariskoro, èn fu dini na Bethel. Efu yu yongu ete èn yu no trow, dan yu e kisi wini fu a situwâsi fu yu?

¹⁰ Wan brada di nen Mark, bigin pionier di a ben abi sowan 20 yari. A go na a Dinariskoro, èn a du difrenti sortu diniwroko na heri grontapu. Disi na san a abi fu taki fu den 25 yari di a de na ini a furuten diniwroko: „Mi pruberi fu wroko nanga ala sma na ini a gemeente, mi wroko makandra nanga den na ini a diniwroko, mi go luku den na oso, èn mi kari den fu kon nyan na mi oso. Iya, mi seti sani tu fu abi pisiri demakandra nanga den, fu tranga a bribi fu den. Ala den sani disi gi mi furu prisiri.” Soleki fa den sani di Mark taki e sori, dan wan sma sa de moro koloku te a e gi sani. Èn te a abi furu fu du na ini a santa diniwroko, dan dati e gi en furu okasi fu gi trawan sani (Tori. 20:35). Na ini a ten disi, yonguwan abi furu fu du na ini a wroko fu Masra, awansi sortu marki den abi na ini a libi, awansi sortu koni den abi, èn awansi san den ondrofeni na ini den libi.​—1 Kor. 15:58.

11. Sortu wini a e tyari kon te wan sma no e hasti ensrefi fu trow?

¹¹ Aladi furu yonguwan ben o wani trow te fu kaba, toku bun reide de fu san ede den no musu hasti densrefi fu go trow. Paulus e gi yonguwan deki-ati fu wakti teleki den „pasa den yongu yari” fu den te den seks firi fu den tranga  srefisrefi (1 Kor. 7:36). A e teki ten fu kon sabi yusrefi èn fu kon abi nofo ondrofeni fu man teki wan bun trowpatna. Te sma e trow, dan dati na wan seryusu bosroiti, èn a sani dati de fu ala ten.​—Preik. 5:2-5.

Bigisma di no abi trowpatna

12. (a) San Ana di ben lasi en masra na ini dede, du di a situwâsi fu en kenki? (b) Sortu grani a kisi?

¹² A kan taki Ana di kari na ini na Evangelietori fu Lukas, ben e sari srefisrefi di en masra dede sondro taki a ben fruwakti dati, baka di den ben trow seibi yari nomo. Wi no sabi efu den ben abi pikin, noso efu oiti a ben prakseri fu trow baka. Ma Bijbel e taki dati di Ana ben abi 84 yari, a ben de ete sondro masra. Te wi e luku san Bijbel e taki, dan wi kan bribi taki Ana ben gebroiki a nyun situwâsi fu en fu kon moro krosibei na Yehovah. „Noiti a pasa taki a no ben de na ini a tempel, ma dei nanga neti a ben e dini drape aladi a ben e faste èn a ben begi fayafaya” (Luk. 2:36, 37). Sobun, na anbegi fu en ben de na a fosi presi na ini en libi. A no de fu taki dati a ben musu tan du furu muiti fu hori ensrefi na a bosroiti fu en, ma a kisi bigi blesi. A kisi a grani fu si a yongu pikin Yesus èn fu fruteri trawan fu a frulusu di den ben o kisi nanga yepi fu a Mesias disi di ben o kon.

13. (a) San e sori taki Dorkas ben e du furu sani gi a gemeente? (b) Sortu blesi Dorkas kisi fu di a ben abi bun-ati nanga switifasi?

¹³ Wan uma di nen Dorkas, noso Tabita, ben e libi na ini Yope, wan owruten foto di ben abi wan lanpe. A foto disi ben de na a noord-westsei fu Yerusalem. Fu di Bijbel no e taki dati a ben abi wan masra, meki a kan taki a no ben trow na a ten dati. Dorkas „ben du furu bun sani èn a ben du bun gi pôtisma”. Soleki fa a sori, dan a ben meki furu krosi gi pôti uma di ben lasi den masra na ini dede èn gi tra sma sosrefi. A sani disi meki taki den kon lobi en srefisrefi. Sobun, di a kon siki wantronso èn a dede, dan a heri gemeente seni sma fu begi Petrus fu kon gi a lobi sisa fu den wan opobaka. Di sma na ini Yope kon yere taki a ben kisi wan opobaka, dan furu fu den tron bribiman (Tori. 9:36-42). Kande Dorkas srefi ben yepi sonwan fu den sma disi fu di a ben de wan sma di ben abi switifasi.

14. San e meki taki Kresten di no trow e kon moro krosibei na Yehovah?

¹⁴ Neleki Ana nanga Dorkas, furu sma na ini den gemeente fu a ten disi, no abi wan trowpatna ete, èn trawan fu den e kon de sondro trowpatna. Kande sonwan fu den no feni wan bun trowpatna. Trawan fu den brokotrow, noso a patna fu den kon dede. Fu di den Kresten disi no abi wan trowpatna di den kan fruteri san de na tapu den ati, meki nofo tron den e leri fu frutrow moro tapu Yehovah (Odo 16:3). Silvia, wan sisa di e dini na Bethel moro leki 38 yari, e si en leki wan blesi taki a no trow. A e taki: „Son leisi mi e firi neleki na mi wawan musu gi trawan deki-ati. Mi e aksi misrefi: ’Suma o gi mi deki-ati?’” Ma dan a e taki moro fara: „Mi abi a frutrow taki Yehovah sabi moro bun leki mi san mi abi fanowdu, èn dati yepi mi fu kon moro krosibei na en. Èn mi e kisi deki-ati ala ten, èn son leisi na wan fasi di mi no ben fruwakti.” Te wi e kon moro krosibei na Yehovah, dan ala ten a e yepi wi na wan lobi-ati fasi èn na wan fasi di e gi wi deki-ati trutru.

15. Fa Kresten di no trow kan ’opo den ati’ fu sori lobi gi trawan?

¹⁵ Te sma no trow, dan dati e gi den moro okasi fu ’opo den ati’ fu sori lobi gi trawan. (Leisi 2 Korentesma 6:11-13.) Jolene, wan sisa di no trow èn di e du furuten diniwroko 34 yari langa kaba, e taki: „Mi du tranga muiti fu kon abi wan bun matifasi nanga trawan, èn a no soso nanga sma di owru neleki mi, ma nanga ala sortu sma. Te wan sma no trow, dan dati na wan moi okasi fu du sani gi Yehovah, gi en famiri, gi en Kresten brada nanga sisa, èn gi den birtisma fu en. O moro mi e kon owru, o moro mi e si en leki wan blesi taki mi no trow.” Kresten di no trow, de klariklari fu yepi trawan na ini a gemeente, sondro taki den e suku den eigi bun. A no de fu taki dati den owruwan, den sikiwan, papa noso mama di e kweki den pikin den wawan, nanga trawan e warderi a yepi disi. Iya, te wi e sori lobi gi trawan, dan wi e firi moro koloku. Kande yusrefi kan ’opo yu ati’ tu fu sori moro lobi gi trawan.

 Sma di bosroiti fu no trow noiti

16. (a) Fu san ede Yesus noiti no trow? (b) Fa Paulus kisi wini fu a trow di a no ben trow?

¹⁶ Yesus no ben trow. A ben musu sreka ensrefi gi a diniwroko di a ben musu du, èn a gebroiki en ten fu du a wroko dati. A teki waka go na furu difrenti presi, a ben e wroko fu fruku mamanten te lati neti, èn te fu kaba a gi en libi leki wan srakti-ofrandi. A ben man du furu sani fu di a no ben trow. Na apostel Paulus ben teki waka dusundusun kilometer fu go na spesrutu presi, èn bigi tesi miti en na ini a diniwroko fu en (2 Kor. 11:23-27). Aladi a kan taki Paulus ben trow fosi, toku a bosroiti fu tan sondro trowpatna baka di a tron wan apostel (1 Kor. 7:7; 9:5). Yesus nanga Paulus ben gi trawan deki-ati fu teki na eksempre fu den èn fu tan sondro fu trow efu dati ben kan, so taki den ben kan gebroiki moro ten gi a diniwroko. Ma nowan fu den sori taki futuboi fu Gado de fruplekti fu tan sondro fu trow.​—1 Tim. 4:1-3.

17. Fa son Kresten na ini a ten disi teki na eksempre fu Yesus nanga Paulus, èn fu san ede wi kan de seiker taki Yehovah e warderi den wan di e teki den bosroiti disi fu a bun fu a diniwroko?

¹⁷ Son sma na ini a ten disi teki a bosroiti tu fu no trow, so taki den kan du a diniwroko fu den moro bun. Harold di ben kari na a bigin fu na artikel, e dini na Bethel moro leki 56 yari kaba. A e taki: „Di mi ben de tin yari na Bethel, dan mi si taki furu trowpaar gowe libi Bethel fu di wan fu den patna ben siki, noso fu di den ben musu go sorgu gi den papa noso mama di ben kon owru. Mi papa nanga mama ben dede kaba. Ma mi ben lobi Bethel so te taki mi no ben wani lasi a grani dati, èn fu dati ede mi no trow.” Na so a de tu nanga Margaret, wan sisa di e pionier furu yari kaba. Wan tu yari pasa a ben taki: „Mi kisi furu okasi fu trow, ma mi ben abi so furu fu du na ini a diniwroko, taki mi no ben e prakseri a sani dati srefi. Na presi fu dati, mi ben abi moro okasi fu du san mi wani, èn mi gebroiki na okasi dati fu du furu na ini a diniwroko. A sani disi meki taki mi de koloku trutru.” A no de fu taki dati Yehovah noiti no sa frigiti den wan di no e suku den eigi bun, ma di e poti a tru anbegi na a fosi presi na ini den libi.​—Leisi Yesaya 56:4, 5.

Kisi wini fu a situwâsi fu yu

18. Fa trawan kan gi tra Kresten di no trow deki-ati, èn fa den kan yepi den?

¹⁸ Ala Kresten di no trow èn di e du ala san den man fu dini Yehovah, warti fu kisi prèise nanga deki-ati. Wi lobi den leki fa den de èn fu di den e du furu fu yepi a gemeente. Efu trutru wi de leki ’brada, sisa, mama, nanga pikin’ gi den, dan noiti den sa firi leki den de den wawan.​—Leisi Markus 10:28-30.

19. San yu kan du fu kisi wini fu a trow di yu no trow?

¹⁹ Kande yu bosroiti fu no trow, noso kande yu no man yepi taki yu no trow. Awansi fa a no fa, meki den eksempre disi fu Bijbel ten èn fu a ten disi, gi yu a dyaranti taki yu kan de koloku èn taki yu kan du furu na ini a diniwroko. Son leisi sma e angri fu kisi presenti, ma tra presenti den e kisi sondro taki den ben e fruwakti dati. Son presenti den lobi wantewante, ma tra presenti den e leri warderi baka wan pisi ten. Na a fasi fa wan sma e si wan presenti sa sori fa a o handri nanga en. San yu kan du fu kisi wini fu a trow di yu no trow? Kon moro krosibei na Yehovah, abi furu fu du na ini a diniwroko fu Gado, èn opo yu ati fu sori moro lobi gi trawan. Neleki fa a de nanga a trowlibi, na so wi kan kisi wini fu wi libi te wi no trow, te wi e si sani soleki fa Gado e si sani, èn te wi e gebroiki a presenti disi na wan koni fasi.

Yu e memre disi ete?

• Na sortu fasi Kresten kan kisi wini fu a trow di den no trow?

• Fa yonguwan di no trow kan kisi blesi fu a situwâsi fu den?

• Sortu okasi Kresten di no trow abi fu kon moro krosibei na Yehovah èn fu opo den ati fu sori moro lobi gi trawan?

[Aksi fu a tori disi]

[Prenki na tapu bladzijde 18]

Yu e kisi wini fu den okasi di yu abi fu du moro na ini a diniwroko fu Gado?