Si a trowlibi leki wan presenti fu Gado

„Dati na fu san ede wan man o gowe libi en papa nanga en mama. A musu tai hori na en wefi èn den musu tron wán skin.”​—GEN. 2:24.

1. Fu san ede Yehovah e frudini en taki wi e sori lespeki gi en?

A NO de fu taki dati Yehovah Gado, a Sma di seti a trowlibi, e frudini en taki wi e sori lespeki gi en. Fu di Yehovah na wi Mekiman, wi Tiriman, nanga wi hemel Tata, meki a fiti taki Bijbel e kari en a Sma di e gi „ibri bun presenti nanga ibri volmaakti kado” (Yak. 1:17; Openb. 4:11). A sani disi e sori taki a abi furu lobi gi wi (1 Yoh. 4:8). Iniwan sani di a leri wi, ibri sani di a e aksi fu wi, èn ibri sani di a gi wi, ben de soso gi wi eigi bun.​—Yes. 48:17.

2. Sortu rai Yehovah ben gi a fosi trowpaar?

² Bijbel e sori taki a trowlibi na wan fu den „bun” presenti di Gado gi libisma (Rut 1:9; 2:12). Di Yehovah trow den fosi tu sma, Adam nanga Eva, dan a taigi den krin san den ben musu du efu den ben wani taki sani waka bun nanga den. (Leisi Mateyus 19:4-6.) Efu den ben gi yesi na den rai fu Gado, dan den ben o de koloku fu têgo. Ma den meki a fowtu fu no du san Gado ben taigi den fu du, èn sani no waka bun gi den.​—Gen. 3:6-13, 16-19, 23.

3, 4. (a) Fa furu sma na ini a ten disi e sori taki den no abi lespeki gi a trowlibi èn gi Yehovah Gado? (b) Sortu eksempre wi o luku na ini na artikel disi?

³ Neleki a fosi trowpaar dati, furu trowpaar na ini a ten disi e teki bosroiti sondro fu poti prakseri na den rai fu Yehovah. Son sma e weigri fu trow, ma tra sma e trow aladi den abi den eigi denki fu a trowlibi, èn den e suku soso den eigi bun (Rom. 1:24-32; 2 Tim. 3:1-5). Den no e hori na prakseri taki a trowlibi na wan presenti fu Gado, èn fu di den no abi lespeki gi a presenti dati, meki den no e sori lespeki tu gi Yehovah Gado, a Sma di gi libisma a presenti.

⁴ Son leisi, srefi wan tu anbegiman fu Yehovah e frigiti fa Yehovah e si a trowlibi. Son Kresten trowpaar e bosroiti fu prati, noso den e brokotrow aladi Bijbel no e gi pasi taki den du dati. Fa wi kan sorgu taki disi no e pasa? Fa a rai di Gado e gi wi na Genesis 2:24 kan yepi Kresten di trow fu kon abi wan moro bun trowlibi? Èn fa den wan di e prakseri fu trow kan sreka densrefi gi a trowlibi? Wi sa poti prakseri na dri trowpaar na ini Bijbel ten di ben abi wan bun trowlibi. Den eksempre disi o sori wi fu san ede trowpaar musu abi lespeki gi Yehovah efu den wani taki a trowlibi fu den e tan waka bun.

Leri fu tan horibaka gi makandra

5, 6. Sortu situwâsi ben kan de wan tesi gi Sakaria nanga Elisabet, èn fa Gado blesi den fu di den tan horibaka gi makandra?

⁵ Sakaria nanga Elisabet ben e du sani soifri soleki fa Gado wani. Den ala tu ben e dini Yehovah fayafaya di den trow nanga makandra. Sakaria ben e du a priesterwroko fu en nanga en heri ati, èn en nanga en wefi ben e du ala san den man fu hori densrefi na a Wet fu Gado. A no de fu taki dati den ben abi furu reide fu de nanga tangi. Ma toku, efu yu ben go na den oso, dan yu ben o si heri esi taki wan sani ben e mankeri. Den no ben abi pikin. Elisabet no ben man hori bere, èn den ala tu ben kon owru kaba.​—Luk. 1:5-7.

⁶ Na ini owruten Israel, sma ben e si en leki wan prenspari sani taki wan uma ben e kisi pikin, èn nofo tron den osofamiri ben bigi (1 Sam. 1:2, 6, 10; Ps. 128:3, 4). Na ini a ten dati, a ben de so taki te wan uma na ini Israel no ben man kisi pikin, dan son leisi a masra fu en ben e suku wan fasi fu broko a trow, aladi dati no ben de wan lobi-ati sani fu du. Ma Sakaria no du dati nanga  Elisabet. A no suku wan fasi fu broko a trow, èn en wefi no du dati tu. Aladi den ben e sari fu di den no ben abi pikin, toku den tan horibaka gi makandra, èn den ben e dini Yehovah fayafaya. Baka wan pisi ten, Yehovah blesi den na wan wondru fasi, fu di den kisi wan pikin tapu den owrudei.​—Luk. 1:8-14.

7. Na sortu tra fasi Elisabet tan horibaka gi a masra fu en?

⁷ Ete wan fasi de fa Elisabet sori taki a ben e tan horibaka gi en masra. Di Yohanes, a manpikin fu en gebore, dan Sakaria no ben man taki fu di a no ben wani bribi a boskopu di na engel fu Gado ben tyari kon gi en. A sani dati meki taki Gado strafu en, èn a no ben man taki wan pisi ten. Ma a ben musu de so taki Sakaria ben feni wan fasi fu meki a wefi fu en kon sabi taki na engel fu Yehovah ben taigi en taki a boi ben musu nen „Yohanes”. Den birtisma nanga den famiriman fu den ben wani gi a boi a nen fu en papa. Ma Elisabet du san en masra ben taigi en fu du. A taki: „Nôno! A musu nen Yohanes.”​—Luk. 1:59-63.

8, 9. (a) Te trowpatna e horibaka gi makandra, dan fa dati e yepi den fu abi wan moro bun trowlibi? (b) San na wan tu fasi fa wan masra nanga wan wefi kan horibaka gi makandra?

⁸ Neleki Sakaria nanga Elisabet, trowpaar na ini a ten disi e kisi fu du tu nanga sari sani èn nanga tra sortu problema. Te trowpatna no e horibaka gi makandra, dan te fu kaba a trowlibi no sa waka bun. Son trowpatna e freiri nanga trawan, den e luku porno, den e du sutadu, èn den e du tra sani di kan tyari problema kon na ini a trowlibi. A sani disi kan meki taki den trowpatna fu den no sa frutrow den moro. Èn te trowpatna no e frutrow makandra moro, dan a lobi di den abi gi makandra sa kon swaki. Te yu e luku en bun, dan na agersi fasi trowpatna, e bow wan skotu lontu na oso fu den, te den e horibaka gi makandra. Na so fasi, sma di den no wani leki fisitiman no o man kon na den oso makriki. Na agersi skotu disi e kibri na osofamiri tu gi tra ogri. Sobun, te wan masra nanga en wefi e tan horibaka gi makandra, dan den o man tan makandra sondro fu frede taki a trowlibi fu den o pori. Boiti dati, den kan fruteri makandra krin san de na tapu den ati, so taki a lobi di den abi gi makandra e kon moro tranga. Iya, trowpatna musu tan horibaka gi makandra.

⁹ Yehovah ben taigi Adam: „Wan man o gowe libi en papa nanga en mama. A musu tai hori na en wefi” (Gen. 2:24). San a tekst disi wani taki? Te tu sma trow, dan den sa musu tyari wan tu kenki kon na ini a fasi fa den e libi nanga den mati nanga den famiriman fu den. Ibri trowpatna musu meki ten fosi gi a trowpatna fu en. Den no kan gi pasi moro taki mati nanga famiriman e kon na a fosi presi na ini den libi, aladi den no e poti prakseri na makandra. Den no musu gi pasi tu taki den papa nanga mama e kon bumui nanga den bosroiti di den e teki leki trowpaar, noso na ini den kesekese fu den. Fu di den de wan trowpaar, meki den musu tai hori na makandra now. Na dati Gado taki.

10. Fa trowpatna kan leri fu tan horibaka gi makandra?

¹⁰ Srefi na ini osofamiri pe wan fu den patna no de na bribi, a e tyari wini kon te den patna e tan horibaka gi makandra. Wan sisa di abi wan trowpatna di no de na bribi, e taki: „Mi de nanga tangi srefisrefi taki Yehovah e leri mi fa mi musu saka misrefi na ondro mi masra, èn fa mi musu sori bigi lespeki gi en. Fu di mi tan horibaka gi mi masra, meki 47 yari kaba wi e sori lobi nanga lespeki gi makandra” (1 Kor. 7:10, 11; 1 Petr. 3:1, 2). Sobun, du tranga muiti fu gi yu trowpatna a dyaranti taki yu sa tan horibaka gi en. Taki èn du sani di e gi yu trowpatna a dyaranti taki en na a moro prenspari sma gi yu na heri grontapu. Du ala san yu man fu sorgu taki nowan sma èn nowan sani e kon na mindri yu nanga yu trowpatna. (Leisi Odo 5:15-20.) Ron nanga Jeannette di de wan koloku trowpaar 35 yari langa kaba, e taki: „Fu di wi e tan du san Gado e aksi fu wi, meki wi abi wan koloku trowlibi.”

Trowpatna di abi a srefi marki na ini a libi sa de koloku

11, 12. Fa Akwila nanga Preskela ben e wroko makandra (a) na oso, (b) na ini a grontapuwroko fu den, èn (c) na ini a Kresten diniwroko?

¹¹ Te na apostel Paulus ben e taki fu Akwila nanga  Preskela, den bun mati fu en, dan noiti a ben e taki fu a wan sondro fu kari a trawan. Na eksempre fu a trowpaar disi e sori krin san Gado ben abi na prakseri di a taki dati wan masra nanga en wefi musu tron „wán skin” (Gen. 2:24). Den ben e wroko makandra doronomo na oso, na ini a grontapuwroko fu den, èn na ini a Kresten diniwroko. Fu eksempre, a fosi leisi di Paulus ben doro na ini Korente, dan Akwila nanga Preskela ben kari en kon tan na den oso. A kan taki na drape Paulus ben e tan wan pisi ten, di a ben e du a diniwroko fu en. Bakaten di den ben de na ini Efeise, dan den gebroiki na oso fu den fu hori gemeente konmakandra, èn den ben e wroko makandra fu yepi nyunwan soleki Apolos, fu kon frustan a tru bribi moro bun (Tori. 18:2, 18-26). Baka dati, a trowpaar disi di ben e wroko fayafaya, go na Rome, pe den gi sma okasi baka fu hori gemeente konmakandra na ini na oso fu den. Bakaten, den drai go baka na Efeise, pe den gi den brada nanga sisa deki-ati.​—Rom. 16:3-5.

¹² Wan pisi ten, Akwila nanga Preskela ben e wroko makandra nanga Paulus fu meki tenti, so taki den ben kan sorgu gi den srefi. A trowpaar ben e wroko makandra sondro fu strei nanga makandra (Tori. 18:3). Ma a no de fu taki dati na fu di den ben e wroko makandra na ini a Kresten diniwroko, meki den ben tan si a diniwroko leki a moro prenspari sani na ini den libi. Dati yepi den fu kon abi wan koloku trowlibi. Awansi den ben de na ini Korente, Efeise, noso Rome, sma na ala sei kon sabi den leki ’sma di ben e wroko makandra leki dinari fu Krestes Yesus’ (Rom. 16:3). Den ben e wroko makandra fu horibaka gi a Kownukondre preikiwroko, awansi pe den ben e go dini.

13, 14. (a) Sortu situwâsi kan meki taki trowpatna no e wroko makandra leki wán man? (b) San na wan tu sani di trowpatna kan du fu kon tron „wán skin”?

¹³ Iya, te trowpatna abi den srefi marki na ini a libi, èn te den e du den srefi sani, dan dati e yepi den fu kon abi wan bun trowlibi (Preik. 4:9, 10). Ma a sari fu taki dati furu trowpaar na ini a ten disi no e meki nofo ten gi makandra. Furu trowpatna abi den eigi wroko, èn den e wroko omeni yuru langa wan dei. Trawan fu den musu go na tra kondre furu leisi gi a wroko fu den, noso den musu froisi go tan na tra kondre sondro a patna fu den, fu di den musu wroko fu seni moni gi na osofamiri fu den. Srefi te son trowpatna de na oso, dan den no e meki ten gi makandra, fu di den e gebroiki furu ten fu luku telefisi, fu du sani di den lobi, fu du sport, fu prei video game, noso fu luku sani tapu Internet. Na so a de tu na ini yu osofamiri? Efu dati de so, dan kande yu kan tyari wan tu kenki kon so taki unu kan abi moro ten gi makandra. Fu san ede unu no e du wan tu aladei sani makandra? Iya, kande unu kan bori nyanyan makandra, kande unu kan wasi dotisani makandra, noso kande unu kan wroko makandra tapu a dyari. Tra sani di unu kan du makandra, na fu sorgu gi den pikin, noso fu yepi un papa nanga mama di kon owru kaba.

¹⁴ San moro prenspari, na taki un musu teki prati doronomo na sani di abi fu du nanga na anbegi fu Yehovah. Te unu e taki fu a deitekst leki osofamiri èn te unu e teki prati na a osofamiri anbegi, dan dati sa yepi unu fu tan abi a srefi denki fu sani èn a srefi marki na ini a libi. Wroko makandra tu na ini a preikiwroko. Efu a kan, dan pruberi fu pionier makandra, awansi yu man du dati wán mun nomo noso wán yari  nomo. (Leisi 1 Korentesma 15:58.) Wan sisa di ben pionier nanga en masra e taki: „A preikiwroko ben e gi wi okasi fu de furu nanga makandra èn fu abi bun takimakandra. Fu di wi ala tu ben wani yepi den wan di wi ben e miti na ini a preikiwroko, meki mi ben e firi taki wi ben e wroko makandra leki wán man. Mi kon moro krosibei na mi masra, èn wi tron bun mati tu.” Te yu nanga yu trowpatna e wroko makandra fu doro bun marki na ini a libi, dan safrisafri unu o wani du den srefi sani, den srefi sani o prenspari gi unu, èn unu o kon abi den srefi gwenti. Te fu kaba, unu sa denki, firi, èn handri leki „wán skin”, soleki fa a ben de nanga Akwila nanga Preskela.

Poti Gado na a fosi presi na ini yu trowlibi

15. San na a moro prenspari sani di trowpatna musu du efu den wani taki a trowlibi fu den waka bun? Fruklari dati.

¹⁵ Yesus ben sabi o prenspari a de taki trowpatna e poti Gado na a fosi presi na ini a trowlibi fu den. A ben si fa Yehovah trow den fosi tu sma. A ben si o koloku Adam nanga Eva ben de, solanga den ben gi yesi na Gado. A ben si tu nanga en eigi ai sortu takru bakapisi den ben kisi fu di den no ben gi yesi na Gado. Sobun, te Yesus ben e gi sma leri, dan a ben e gi sma a srefi rai baka di en Tata ben gi na Genesis 2:24. A ben taki sosrefi: „Nowan sma musu prati san Gado poti na ondro wán tyatyari” (Mat. 19:6). Dati meki a prenspari srefisrefi taki trowpatna abi bigi lespeki gi Yehovah efu den wani de koloku, èn efu den wani taki a trowlibi fu den waka bun. Te a abi fu du nanga a tori disi, dan Yosef nanga Maria, a papa nanga mama fu Yesus na grontapu, de wan heri bun eksempre gi wi.

16. Fa Yosef nanga Maria sori taki den ben e poti Gado na a fosi presi na ini a trowlibi fu den?

¹⁶ Yosef ben sori switifasi gi Maria, èn a ben e handri na wan lespeki fasi nanga en. Di a kon sabi taki Maria de nanga bere, dan a ben wani sori sari-ati gi en, srefi bifo na engel fu Gado ben taigi en san ben pasa nanga Maria (Mat. 1:18-20). Leki trowpaar, den ben e gi yesi na den wet fu Caesar, èn den ben e hori den srefi finifini na a Wet fu Moses (Luk. 2:1-5, 21, 22). A ben de so taki mansma wawan ben abi a frantwortu fu go na den bigi fesa di ben abi fu du nanga na anbegi, èn di ben e hori ibri yari na ini Yerusalem. Ma toku Yosef nanga Maria ben e go ibri yari, makandra nanga tra memre fu den famiri (Deut. 16:16; Luk. 2:41). Na den fasi disi èn sosrefi na tra fasi, a trowpaar disi di ben lobi Yehovah, du muiti fu plisi en èn fu sori bigi lespeki gi sani di ben abi fu du nanga na anbegi. Dati meki a no e fruwondru wi taki Yehovah teki den tu sma disi fu sorgu gi a Manpikin fu en di a ben yongu.

17, 18. (a) Na sortu fasi wan trowpaar kan poti Gado na a fosi presi na ini a trowlibi fu den? (b) Fa a sani disi o tyari wini kon gi den?

¹⁷ Unu e poti Gado na a fosi presi tu na ini un osofamiri libi? Fu eksempre, te unu musu teki prenspari bosroiti, dan unu e luku fosi sortu Bijbel gronprakseri e fiti na ini a tori, unu e begi fu a tori, èn unu e suku rai na lepi Kresten? Noso unu abi a gwenti fu lusu problema soleki fa unu srefi feni bun, noso soleki fa famiri nanga mati wani unu fu du dati? Unu e du muiti fu fiti den someni bun rai di a getrow srafu tyari kon na doro, èn di abi fu du nanga a trowlibi nanga na osofamiri libi? A de so nomo taki yu e hori yusrefi na gwenti fu a kontren pe yu kweki, noso yu e teki den rai fu grontapusma. Unu e begi èn e studeri doronomo nanga makandra? Unu e poti marki fu doro na ini na anbegi, èn unu e  taki fu den sani di prenspari gi unu leki osofamiri?

¹⁸ Ray di abi wan koloku trowlibi 50 yari langa kaba, e taki: „Wi noiti ben abi wan problema di wi no ben man lusu, fu di wi tan si Yehovah leki wan pisi fu den ’dri titei di frekti kon na wán.’” (Leisi Preikiman 4:12.) Danny nanga Trina e agri nanga a tori dati. Den e taki: „Fu di wi dini Gado makandra, meki wi kon abi wan moro bun trowlibi.” Den de wan koloku trowpaar moro leki 34 yari. Efu unu e poti Yehovah na a fosi presi na ini un trowlibi, dan a o yepi unu fu abi wan bun trowlibi, èn a sa blesi unu bogobogo.​—Ps. 127:1.

Tan sori lespeki gi a presenti fu Gado

19. Fu san ede Gado gi wi a trowlibi leki wan presenti?

¹⁹ Furu trowpaar na ini a ten disi e prakseri densrefi nomo, èn den no e broko den ede efu a patna fu den de koloku. Ma futuboi fu Yehovah no e denki so. Den sabi taki Gado gi libisma a trowlibi leki wan presenti fu du san A abi na prakseri (Gen. 1:26-28). Efu Adam nanga Eva ben abi lespeki gi a presenti dati, dan heri grontapu ben o tron wan paradijs di lai nanga reti-ati futuboi fu Gado di de koloku.

20, 21. (a) Fu san ede wi musu si a trowlibi leki wan santa sani? (b) Na sortu presenti wi o poti prakseri tra wiki?

²⁰ Ma san moro prenspari, na taki den futuboi fu Gado e si a trowlibi leki wan okasi fu gi glori na Yehovah. (Leisi 1 Korentesma 10:31.) Soleki fa wi si, dan trowpatna di wani abi wan bun trowlibi, musu tan horibaka gi makandra, den musu de wán, èn den musu poti Gado na a fosi presi na a ini den libi. Sobun, efu wi e sreka wisrefi fu trow, efu wi e du muiti fu abi wan moro koloku trowlibi, noso efu wi e pruberi fu meki sani waka bun baka na ini a trowlibi, dan wi musu hori na prakseri fosi taki a trowlibi na wan santa seti di e komoto fu Gado. Te wi e tan hori a sani dati na prakseri, dan dati o gi wi deki-ati fu tan du ala san wi man fu meki Gado Wortu tiri wi te wi e teki bosroiti na ini a trowlibi. Na so wi e sori taki wi abi lespeki gi a presenti fu a trowlibi èn sosrefi gi Yehovah Gado, a Sma di gi wi a presenti disi.

²¹ A no de fu taki dati a trowlibi a no a wan-enkri presenti di Yehovah gi wi. A no de a wan-enkri fasi tu fa sma kan de koloku. Na ini a tra artikel wi o poti prakseri na ete wan warti presenti di Gado gi wi. Dati na a trow di wan sma no trow.

San yu ben sa piki?

• Fu san ede Kresten trowpaar musu horibaka gi makandra?

• Fu san ede trowpatna di e wroko leki wán man sa abi wan moro bun trowlibi?

• San na wan tu fasi fa trowpaar kan poti Gado na a fosi presi na ini den libi?

• Fa wi kan sori lespeki gi Yehovah, a Sma di seti a trowlibi?

[Aksi fu a tori disi]

[Prenki na tapu bladzijde 15]

Te trowpatna e wroko makandra, dan dati e yepi den fu de wán