Tan prakseri den sani di Yehovah du gi yu

SYATU baka di Yesus ben kisi wan opobaka, dan tu fu den disipel fu en ben e waka fu Yerusalem go na Ema-us. Na Evangelie fu Lukas e taki: „Den ben e taki ete fu a tori, di Yesus kon na den èn a bigin waka nanga den; ma den no ben man si taki na en.” Yesus taigi den: „’Fu sortu tori unu e taki so fayafaya nanga makandra?’ Ne den tan tanapu nanga wan sari fesi.” Fu san ede den ben e sari? Den disipel ben e denki taki na a ten dati Yesus ben o frulusu Israel fu den trakondre sma di ben e tiri den, ma dati no ben pasa. Na presi fu dati, den sma kiri Yesus. Na fu dati ede den ben e sari.​—Luk. 24:15-21; Tori. 1:6.

Yesus ben taki-go-taki-kon nanga den disipel. „A bigin taki fu den buku fu Moses èn fu a leri fu ala den Profeiti fu tyari kon na krin gi den san na den sani di skrifi fu en na ini Gado Buku.” Iya, furu prenspari sani ben pasa na a ten di Yesus ben e du a diniwroko fu en, èn a no de fu taki dati den sani dati ben tranga a bribi fu den disipel. Di den disipel arki san Yesus taigi den, dan den no ben e sari moro, ma den ben e firi prisiri. Moro lati a neti dati, den taki: „A no dati meki wi ati ben prisiri trutru di a ben e taki nanga wi di wi ben de na pasi, èn sosrefi di a ben meki wi frustan finifini san skrifi na ini Gado Buku?” (Luk. 24:27, 32) San wi e leri te wi e luku fa den disipel kenki a fasi fa den ben e si sani?

Sortu krakti a abi na wi tapu te sani no e waka soleki fa wi ben fruwakti?

Den tu disipel di ben e go na Ema-us ben e firi sari fu di den sani di den ben fruwakti no ben pasa. Den ben ondrofeni a sani disi di skrifi na Odo 13:12: „Te wan sma no man kisi san a e fruwakti, dan en ati o kon siki.” Kande sonwan fu wi di e dini Yehovah fayafaya furu yari kaba, ben e denki tu taki a „bigi banawtu” ben o pasa langa ten kaba (Mat. 24:21; Openb. 7:14). A no de fu taki dati wi ben kan firi sari fu di sani no waka soleki fa wi ben fruwakti.

Ma hori na prakseri taki den tu disipel ben e firi prisiri baka, di Yesus yepi den fu poti prakseri na profeititori di kon tru kaba,  srefi na ini a ten fu den. Wi kan du a srefi te wi e firi sari, èn na so wi sa tan firi koloku. Wan lepi Kresten owruman di nen Michael, ben taki: „No poti prakseri soso na sani di Yehovah no du ete. Na presi fu dati, poti prakseri na den sani di a du kaba.” Dati na bun rai trutru!

Den sani di Yehovah du kaba

Luku wan tu fu den tumusi moi sani di Yehovah du kaba. Yesus ben taki: „A sma di e bribi na ini mi, o du den wroko tu di mi e du; a o du moro bigi wroko leki den wroko disi” (Yoh. 14:12). Na ini a ten disi, den futuboi fu Gado e du a moro bigi wroko di Kresten du oiti. Moro leki seibi milyun sma abi a howpu fu pasa a bigi banawtu libilibi. Denki a tori! Noiti ete so furu futuboi fu Yehovah wroko so fayafaya na ini someni kondre na heri grontapu! Na ini wan profeititori, Yesus ben taki fu „moro bigi wroko leki den wroko disi”, èn Yehovah meki den wortu dati kon tru.

Sortu tra sani Yehovah du gi wi? A seti sani so taki sma kan komoto na ini na ogri grontapu, fu go na ini na agersi paradijs di a seti (2 Kor. 12:1-4). Teki ten fu poti prakseri na wan tu fu den sani fu na agersi paradijs di e tyari wini kon gi wi nownow kaba. Fu eksempre, luku den buku di yu abi, noso den wan na ini a Kownukondre zaal. Luku den bladzijde fu a Watch Tower Publications Index, noso luku san de na tapu a CD-ROM fu a Watchtower Library. Arki wan CD fu wan Bijbel drama. Prakseri den sani baka di yu ben si èn ben yere na a kongres di pasa. Boiti dati, prakseri a bun demakandra di yu ben abi nanga yu Kresten brada nanga sisa. A no de fu taki dati Yehovah gi wi bogobogo yeye nyanyan èn sosrefi lobi-ati brada nanga sisa. Na agersi fasi, dati na wan paradijs trutru!

A psalm skrifiman David ben taki: „Yehovah mi Gado, yu du furu sani. Iya, yu du kefalek moi sani gi wi èn ala ten baka yu e prakseri wi” (Ps. 40:5). Iya, te wi e tan prakseri den tumusi moi sani di Yehovah du kaba gi wi, èn te wi e prakseri a lobi-ati fasi fa a e denki fu wi, dan wi e kisi nyun krakti fu tan horidoro na ini a diniwroko di wi e du nanga wi heri ati gi wi hemel Tata, Yehovah.​—Mat. 24:13.

[Prenki na tapu bladzijde 31]

Yesus ben yepi den disipel fu en fu prakseri den sani di Yehovah ben du kaba gi den

[Prenki na tapu bladzijde 32]

Prakseri den sani di yu ben si èn ben yere na a kongres di pasa