Wi e kisi krakti fu pasa iniwan tesi

„Mi man du ala sani nanga yepi fu a sma di e gi mi krakti.”​—FIL. 4:13.

1. Fu san ede a pipel fu Yehovah e kisi furu tesi?

A PIPEL fu Yehovah e kisi furu difrenti tesi. Son tesi e kon fu di wi abi swakifasi, noso fu di wi e libi na ini wan ogri sistema. Tra tesi di wi leki anbegiman fu Gado e kisi, e kon fu di den wan di no e dini Gado abi bita-ati gi wi (Gen. 3:15). Sensi a bigin fu a historia, Gado yepi den reti-ati futuboi fu en fu kakafutu gi sma di ben e frufolgu den fu a bribi fu den ede. Gado yepi den tu fu kakafutu gi speri di ben e dwengi den fu du san no bun, èn a yepi den tu fu pasa iniwan tra tesi. A santa yeye fu Gado kan gi wi a krakti fu du a srefi.

A santa yeye e yepi wi fu kakafutu gi sma di e frufolgu wi

2. San na a marki fu sma di e frufolgu trawan fu a bribi fu den ede, èn na sortu fasi wi ben kan kisi frufolgu?

² Son leisi sma e frufolgu trawan fu a bribi fu den ede, èn den e du ogri nanga den. Den e du dati fu di den wani tyari wan kaba kon na a bribi dati, fu di den no wani taki tra sma teki a bribi dati, noso fu di den wani taki den sma dati e drai baka gi a bribi fu den. Wi kan kisi frufolgu langalanga, noso na wan triki fasi. Bijbel e agersi a fasi fa Satan e kon na wi tapu, nanga a fasi fa wan yongu lew nanga wan kobra sneki e kiri tra meti.​—Leisi Psalm 91:13.

3. Fa Satan e kon na wi tapu leki wan lew èn leki wan kobra sneki?

³ Nofo tron Satan kon na wi tapu leki wan ogri-ati lew, fu di a meki sma du ogri nanga wi, a meki sma poti wi na strafu-oso, noso a meki lanti tapu a wroko fu wi (Ps. 94:20). Den Yaribuku abi furu tori na ini di e sori taki Yehovah Kotoigi na ini a ten disi kisi fu du nanga sma di du den sortu sani dati nanga den. Na furu kondre, grupu sma di no ben e hori  densrefi na wet, du ogri-ati sani nanga a pipel fu Gado, èn son leisi kerki fesiman nanga fayafaya politiekman ben e teki fesi gi den grupu dati. Den sani disi meki taki son sma tapu fu dini Yehovah. Didibri e kon na sma tapu leki wan kobra sneki tu fu di a e tesi sma na wan triki fasi, soso fu pori a denki fu den so taki den e du san a wani. A e tesi wi na a fasi disi fu di a wani swaki a bribi fu wi, noso fu di a wani meki wi lasi bribi. Ma nanga yepi fu a santa yeye fu Gado, wi kan kakafutu gi ala tu fasi fa Satan e frufolgu wi.

4, 5. San na a moro bun fasi fa wi kan sreka wisrefi gi frufolgu, èn fu san ede dati de so? Gi wan eksempre.

⁴ Te wi wani sreka wisrefi gi tesi di ben kan miti wi, dan a no ben o de wan koni sani fu sidon prakseri sortu tesi ben kan miti wi na ini a ten di e kon. Fu taki en leti, wi no kan sabi den sani dati na fesi. Sobun, a no o tyari wini kon gi wi te wi ben o broko wi ede nanga sani di kande noiti no o pasa. Ma toku wan fasi de fa wi kan sreka wisrefi. Furu sma ben man horidoro di sma ben e frufolgu den, fu di den ben e denki dipi fu eksempre fu sma na ini Bijbel di tan gi yesi na Yehovah. Den ben e denki dipi tu fu den leri fu Yesus èn fu na eksempre fu en. Disi yepi den fu kon abi moro lobi gi Yehovah. A lobi dati yepi den fu kakafutu gi iniwan tesi di kon na den tapu.

⁵ Luku na eksempre fu tu sisa fu wi na ini Malawi. Fu di wan grupu ogri-ati man ben wani dwengi den fu bai karta fu wan politiek partij, meki den fon den, den puru ala den krosi na den skin, èn den tapu skreki gi den taki den ben o abi seks nanga den. Den man ben lei gi den sisa taki srefi memre fu a Bethelfamiri ben bai den partij karta. San den sisa piki den? Den taki: „Wi e dini Yehovah Gado wawan. Sobun, awinsi den brada fu a bijkantoro bai partij karta, toku wi no sa bai den. Wi no sa gi abra, awinsi unu kiri wi!” Baka di den sisa handri na so wan deki-ati fasi, dan den man libi den meki den gowe.

6, 7. Fa Yehovah e gi den futuboi fu en a krakti fu horidoro te den e kisi frufolgu?

⁶ Na apostel Paulus ben taki dati den Kresten na ini Tesalonika ben teki a tru bribi ’aladi furu pina ben miti den’, èn den du dati „nanga a prisiri di a santa yeye e gi” (1 Tes. 1:6). Iya, furu Kresten fu fosi èn fu a ten disi, kisi frufolgu èn den ben man horidoro. Den Kresten disi e fruteri taki di a tesi ben hebi srefisrefi, den ben abi vrede na ini den ati, èn vrede na wan pisi fu a froktu fu a santa yeye fu Gado (Gal. 5:22). A vrede dati yepi den fu kibri den ati nanga den frustan. Iya, Yehovah e gebroiki a santa yeye fu en fu gi den futuboi fu en a krakti fu horidoro te den e kisi tesi, èn fu handri na wan koni fasi te problema e miti den. *

⁷ Sma di e luku a pipel fu Gado no man bribi te den e si a fasti bosroiti di den abi fu tan gi yesi na Gado, awinsi den e kisi hebi frufolgu. A gersi leki den Kotoigi abi bun furu krakti, èn fu taki en leti, dati de so trutru. Na apostel Petrus e gi wi a dyaranti disi: „Efu sma e kosi unu fu Krestes nen ede, dan unu de koloku, bika a yeye di e gi sma glori, iya, a yeye fu Gado, de na un tapu” (1 Petr. 4:14). A frufolgu di wi e kisi fu di wi e hori wisrefi na regtfardiki markitiki, e sori taki Gado feni wi bun (Mat. 5:10-12; Yoh. 15:20). A sani disi e gi wi furu prisiri!

Wi e kisi yepi fu kakafutu gi speri

8. (a) Fa a du kon taki Yosua nanga Kaleb ben man kakafutu gi speri? (b) San wi kan leri fu na eksempre fu Yosua nanga Kaleb?

⁸ Wan moro triki fasi fa Kresten e kisi tesi, na taki speri e dwengi den fu du sani di no bun. Ma fu di a yeye fu Yehovah krakti moro a yeye fu grontapu, meki wi man kakafutu gi  sma di e spotu wi, di e fruteri lei fu wi, noso di e pruberi fu dwengi wi fu de leki den. Fu eksempre, fa a du kon taki Yosua nanga Kaleb ben man sori taki den no ben agri nanga den tra tin spion di ben musu go luku a kondre Kanan? Santa yeye meki taki den ben kisi wan heri tra „denki”.​—Leisi Numeri 13:30; 14:6-10, 24.

9. Fu san ede Kresten musu de klariklari fu de tra fasi leki furu sma?

⁹ Santa yeye ben gi den apostel fu Yesus a krakti tu fu gi yesi na Gado, na presi fu gi yesi na den wan di furu sma ben e si leki leriman fu a tru bribi (Tori. 4:21, 31; 5:29, 32). Furu sma feni en moro makriki fu du san trawan e du, fu di den no wani kisi problema noso trobi nanga trawan. Ma nofo tron tru Kresten musu abi a deki-ati fu du san reti. Èn fu di den e kisi krakti fu a santa yeye, meki den no e frede fu de tra fasi leki tra sma (2 Tim. 1:7). Meki wi go luku wan situwâsi pe wi musu kakafutu gi speri di e dwengi wi fu du san no bun.

10. Sortu problema ben kan miti son Kresten?

¹⁰ Son leisi, yonguwan e kon sabi taki wan mati fu den tyari ensrefi na wan fasi di no fiti. Kande den yonguwan disi no sabi san fu du na ini a situwâsi dati. Kande den e prakseri taki te den o go na den owruman fu suku yepi gi a mati fu den, dan a mati dati no o frutrow den moro. Fu dati ede, den e bosroiti fu no fruteri trawan a tori, fu di den e denki taki den e yepi a mati na a fasi dati. Wan yonguwan di du wan sondu, ben kan dwengi en mati srefi fu no fruteri nowan sma fu a sondu di a du. A no de fu taki, dati a no soso yonguwan e kisi fu du nanga a problema disi. Kande son bigisma feni en muilek tu fu go fruteri den gemeente owruman taki wan mati noso wan famiriman fu den du wan sondu. Ma san tru Kresten musu du te den de na ini a situwâsi disi?

11, 12. San na a moro bun sani fu du te wan memre fu a gemeente e taigi yu fu no fruteri trawan fu a sondu di a du? Fu san ede dati na a moro bun sani fu du?

¹¹ Luku a situwâsi disi. Kon meki wi taki dati Alex, wan yongu brada, kon sabi taki Steve, wan mati fu en na ini a gemeente, abi a gwenti fu luku porno. Alex e taigi Steve taki a e broko en ede nanga a sani di a e du. Ma Steve no e gi yesi. Te Alex e gi en mati deki-ati fu go taki nanga den owruman, dan Steve e taigi en taki efu Alex na wan trutru mati, dan a no o taigi den owruman. Alex musu frede taki a o lasi a mati fu en? Kande a e aksi ensrefi suma den owruman ben o bribi efu Steve ben o taki dati den sani no tru. Ma a situwâsi no o kenki efu Alex no e fruteri den owruman. Iya, efu Steve e tan nanga a gwenti fu en, dan a kan lasi a matifasi di a abi nanga Yehovah. A ben o bun te Alex ben o hori na prakseri taki ’te sma frede libisma, dan dati o de wan trapu gi den, ma a sma di e frutrow tapu Yehovah, o kisi kibri’ (Odo 29:25). Sortu tra sani Alex ben kan du? A ben  kan go baka na Steve fu taki na wan lobi-ati fasi nanga en fu sori en taki a sani di a e du no bun. A ben o abi deki-ati fanowdu fu du dati. Ma kande Steve sa kisi na okasi now fu taki fu a problema fu en. Alex musu gi Steve deki-ati baka fu taki nanga den owruman, èn a musu taigi en taki efu a no e du dati baka wan spesrutu pisi ten, dan Alex srefi ben o taigi den.​—Lef. 5:1.

¹² Efu oiti yu de na ini so wan situwâsi, dan kande a mati fu yu no sa warderi a muiti di yu e meki fu yepi en. Ma kande a sa kon si te fu kaba taki yu ben abi a bun fu en na prakseri. Efu a sma di du wan sondu e kisi yepi èn e teki a yepi dati, dan fu ala ten a sa de nanga tangi fu di yu teki a deki-ati fu yepi en, èn fu di yu no drai baka gi en. Ma efu a e mandi na yu tapu, dan yu musu aksi yusrefi efu trutru yu wani abi so wan sma leki mati. A moro bun sani fu du ala ten, na fu plisi Yehovah, a moro bun Mati fu yu. Te wi e poti Yehovah na a fosi presi, dan den wan di lobi en o lespeki wi fu di wi e tan gi yesi na En, èn den sa tron trutru mati fu wi. Noiti wi musu gi Didibri okasi fu pori a gemeente. Te wi ben o du dati, dan a no de fu taki dati wi ben o meki a santa yeye fu Yehovah sari. Ma wi e wroko makandra nanga a yeye dati so taki a Kresten gemeente e tan krin.​—Ef. 4:27, 30.

Wi e kisi krakti fu horidoro awansi sortu tesi wi e kisi

13. Sortu tesi e miti a pipel fu Yehovah, èn fu san ede den sani disi e pasa so furu?

¹³ Wi kan kisi tesi na difrenti fasi. Iya wi kan kisi moni problema, wi kan lasi a wroko fu wi, wan rampu kan miti wi, wan lobiwan fu wi kan lasi en libi, wi kan kon siki, èn so moro fara. Fu di wi e libi na ini „muilek ten”, meki wi kan fruwakti taki te fu kaba wi alamala sa kisi tesi (2 Tim. 3:1). Te dati pasa, dan a de prenspari taki wi no e bruya. A santa yeye kan gi wi a krakti fu pasa iniwan tesi.

14. San yepi Yob fu horidoro di a ben e kisi tesi?

¹⁴ Yob ben kisi a wán tesi baka a trawan. A lasi ala den sani fu en, en pikin, en mati, a kon siki, èn a wefi fu en lasi frutrow na ini Yehovah (Yob 1:13-19; 2:7-9). Ma Yob kisi trowstu fu Elihu. Den sani di a taigi Yob, èn sosrefi a moro prenspari sani di Yehovah ben taki, na disi: „Tan pî èn poti prakseri na den kefalek sani di Gado e du” (Yob 37:14). San yepi Yob fu horidoro di a ben kisi tesi? Èn san kan yepi wi fu horidoro te wi e kisi tesi? Wi musu denki dipi fu den difrenti fasi fa Yehovah sori en santa yeye nanga en makti (Yob 38:1-41; 42:1, 2). Kande wi e memre den leisi di wisrefi ondrofeni fa Gado yepi wi. A de klariklari ete fu du dati.

15. San yepi na apostel Paulus fu horidoro di a ben e kisi tesi?

¹⁵ Na apostel Paulus ben kisi furu tesi fu di a ben de wan Kresten, èn a ben kan lasi en libi srefi (2 Kor. 11:23-28). San yepi en fu no lasi bribi èn fu no bruya? A ben e frutrow tapu Yehovah èn a ben e begi Yehovah fu yepi en. Paulus tan kisi tesi, èn te fu kaba sma kiri en. Fosi dati pasa, dan Paulus ben skrifi: „Masra tan na mi sei èn a gi mi krakti, so taki mi ben  kan du a preikiwroko dorodoro èn ala pipel ben kan yere a boskopu disi; a ben puru mi na ini a mofo fu a lew” (2 Tim. 4:17). Dati meki Paulus ben kan gi tra Kresten brada nanga sisa a dyaranti taki den no ben abi fu ’broko den ede nanga nowan sani’.​—Leisi Filipisma 4:6, 7, 13.

16, 17. Gi wan eksempre fu sori fa Yehovah e gi a pipel fu en krakti so taki den kan horidoro te den e kisi tesi na ini a ten disi.

¹⁶ Wan pionier sisa di nen Roxana ondrofeni fa Yehovah e sorgu gi a pipel fu en. Di a aksi a basi fu en fu gi en wan tu dei fri so taki a ben kan go na wan fu den kongres fu wi, dan a basi bari en taki efu a ben o go, dan a no ben abi fu wroko moro gi en. Ma toku Roxana go na a kongres, èn a begi Gado fayafaya fu yepi en so taki a no lasi a wroko. Baka dati, a ben e firi korostu. Ma a munde baka a kongres, a basi fu en yagi en soleki fa a ben taki dati a ben o du. Roxana bigin broko en ede fu di a ben abi a wroko fanowdu fu yepi sorgu en famiri, awansi a wroko no ben e pai furu. A begi Gado baka, èn a prakseri taki efu Gado ben kan gi en leri na a kongres so taki a ben kan tan abi wan tranga bribi, dan a no de fu taki dati a ben o man sorgu tu gi en. Di Roxana ben e waka go na oso, dan a si wan bord pe ben skrifi na tapu dati wan wrokopresi ben abi wrokoman fanowdu. Den ben abi sma fanowdu di ben man wroko nanga bigi nai-masyin. Roxana go taigi den sma taki a wani a wroko. A basi fu a wrokopresi kon si taki a noiti no ben du a wroko dati ete, ma toku a gi en a wroko. Boiti dati, a ben o pai Roxana pikinmoro tu tron so furu leki san a ben e meki na a tra wroko fu en. Roxana ben e firi taki Gado ben piki den begi fu en. Ma a moro bigi blesi di a kisi, na taki a ben man prati a bun nyunsu nanga wan tu fu den sma di ben e wroko drape. Feifi fu den, sosrefi a wrokobasi, teki a tru bribi èn den teki dopu.

¹⁷ Son leisi, a ben kan gersi leki Gado no e piki den begi fu wi, fu di a no e piki den wantewante, noso na wan fasi di wi ben fruwakti. Efu dati de so, dan wan bun reide musu de gi dati. Yehovah sabi fu san ede a e du dati, ma kande wi o kon sabi dati bakaten. Ma wi kan abi a dyaranti taki Gado no e drai baka gi den wan di e tan gi yesi na en.​—Hebr. 6:10.

Wi e kisi yepi fu pasa problema nanga tesi

18, 19. (a) Fu san ede wi kan fruwakti taki wi o kisi tesi nanga problema? (b) San kan yepi yu fu horidoro te yu e kisi tesi?

¹⁸ A pipel fu Yehovah no e fruwondru taki den e kisi tesi, taki den e firi brokosaka, taki sma e frufolgu den, èn taki speri e dwengi den fu du san no bun. Nofo tron a de so taki grontapusma no lobi wi (Yoh. 15:17-19). Ma santa yeye kan yepi wi fu pasa iniwan tesi di wi ben kan kisi na ini a diniwroko fu Gado. Yehovah no sa gi pasi taki wi e kisi tesi moro leki san wi man frudrage (1 Kor. 10:13). Noiti a sa gowe libi wi (Hebr. 13:5). Te wi e gi yesi na a Wortu fu en di skrifi nanga yepi fu santa yeye, dan wi sa kisi kibri nanga krakti. Boiti dati, Gado en santa yeye kan gi Kresten brada nanga sisa deki-ati fu yepi trawan te den abi yepi tranga fanowdu.

¹⁹ Meki wi alamala tan begi èn tan studeri Bijbel so taki wi kan kisi a santa yeye. Meki wi tan du den sani disi so taki ’a bigi makti fu Gado e gi wi ala krakti di wi abi fanowdu fu man horidoro ondro ala sani, èn fu man abi langa pasensi nanga prisiri’.​—Kol. 1:11.

[Futuwortu]

San yu ben sa piki?

• Fa yu kan sreka yusrefi gi frufolgu?

• San yu musu du te wan sma e taigi yu fu no fruteri trawan taki a du wan sondu?

• Sortu dyaranti yu kan abi te yu e kisi tesi?

[Aksi fu a tori disi]

[Prenki na tapu bladzijde 28]

San wi kan leri fu Yosua nanga Kaleb?

[Prenki na tapu bladzijde 29]

Fa yu kan yepi wan mati di du wan sondu?