„A moro bun fu gi yesi, leki fu tyari ofrandi”

A FOSI kownu fu owruten Israel ben de Saul. Aladi na a tru Gado srefi ben poti en leki kownu, toku Saul kon trangayesi te fu kaba.

Sortu sondu Saul du? A ben kan wai pasi gi den sondu dati? San wi kan leri fu na eksempre fu en?

Yehovah e meki sma kon sabi suma a teki leki kownu

Fosi Saul ben tron kownu, a profeiti Samuel ben e teki presi gi Gado na ini Israel. Now Samuel ben kon owru, èn den manpikin fu en no ben e gi yesi na Gado. Na a srefi ten, feanti ben wani kon feti nanga a pipel. Di den owru man fu Israel aksi Samuel fu poti wan sma leki kownu gi den di ben kan krutu den èn di ben kan teki fesi na ini feti, dan Yehovah taigi a profeiti fu salfu Saul leki tiriman. Yehovah ben taki: „Na en o frulusu mi pipel fu den Filisteasma.”​—1 Sam. 8:4-7, 20; 9:16.

Saul ben de „wan moi yongu boi”. Ma Saul ben abi tra moi fasi tu. A ben de wan man di ben abi sakafasi. Fu eksempre, Saul ben aksi Samuel: „Mi na wan man fu a lo fu Benyamin, a moro pikin lo na ini Israel. Boiti dati, mi famiri no de so prenspari leki den tra famiri na ini a lo fu Benyamin. Sobun, fu san ede yu e taigi mi den sani disi?” Saul no ben e denki tumusi furu fu ensrefi nanga en famiri, aladi en papa, Kes, ben de „wan prenspari man di ben gudu srefisrefi”.​—1 Sam. 9:1, 2, 21.

Luku sosrefi san Saul du di Samuel meki bekènti suma Yehovah ben teki leki kownu gi Israel. Di den ben de den wawan, dan Samuel salfu Saul èn a taigi en: „Du san yu man du, bika a tru Gado de nanga yu.” Baka dati, a profeiti kari a pipel kon na wan fu meki den kon sabi suma Yehovah ben poti leki kownu. Ma di a kon na krin taki na Saul Gado ben teki, dan sma no ben man feni Saul. Saul ben go kibri fu di a ben e syensyen. Yehovah sori a pipel pe Saul ben de èn den poti en leki kownu.—1 Sam. 10:7, 20-24.

Na ini a feti

Son sma no ben feni taki Saul ben bun nofo fu tron kownu. Ma heri esi Saul sori den taki den no ben abi reide fu denki so. Di den Amonsma ben wani broko kon na ini wan foto fu den Israelsma, dan „a yeye fu Gado kon na [Saul] tapu”. A gi komando taki den fetiman fu en kon na wán, a orga den, èn a teki fesi na ini a feti so taki den wini a feanti fu den. Ma Saul sori taki na Yehovah ben meki a  wini a feti. A ben taki: „Yehovah frulusu Israel tide.”​—1 Sam. 11:1-13.

Saul ben abi bun fasi èn Gado ben e blesi en. A ben sabi tu taki na Yehovah ben e gi en krakti. Ma efu den Israelsma nanga a kownu fu den ben wani taki sani tan waka bun nanga den, dan den ben o abi fu du wan tumusi prenspari sani. Samuel ben taigi a pipel fu Israel: „Efu unu abi bigi lespeki gi Yehovah èn unu dini en, efu unu gi yesi na en èn unu no trangayesi a komando fu Yehovah, dan unu nanga a kownu di o tiri unu, o sori krin taki unu na bakaman fu Yehovah un Gado.” Sortu dyaranti den Israelsma ben kan abi efu den ben e tan gi yesi na Gado? Samuel ben taki: „Yehovah no sa gowe libi en pipel, fu di a e prakseri a bigi nen fu en. Na Yehovah srefi teki a bosroiti fu meki unu tron en pipel.”​—1 Sam. 12:14, 22.

Wan sma di ben wani taki Gado feni en bun, ben musu gi yesi na En, èn na so a de te now ete. Te den futuboi fu Yehovah e gi yesi na den komando fu en, dan a e blesi den. Ma fa a de te den e trangayesi Yehovah?

„Yu du wan don sani”

Bakaten, Saul du wan sani nanga den Filisteasma, èn a sani dati meki taki den atibron srefisrefi. Fu dati ede, wan legre „di ben furu leki den ai-santi na sesyoro” opo go feti nanga Saul. Bijbel e taki: „Den man fu Israel kon si taki den ben de na bigi nowtu, fu di den feanti fu den ben wani kon feti nanga a pipel. Dati meki a pipel go kibri na ini bergi-olo, na den olo-olo presi fu den stonbergi, na den bigi ston, na ini ston-olo na ondro gron, èn na ini watrapeti” (1 Sam. 13:5, 6). San Saul ben o du?

Samuel ben taigi Saul fu miti en na Gilgal, pe a profeiti ben o tyari ofrandi gi Yehovah. Saul go wakti en, ma Samuel ben tan langa, èn den fetiman fu Saul ben e gowe libi en. Sobun, Saul bosroiti fu tyari ofrandi ensrefi. Ma fa Saul kaba bron na bron-ofrandi, Samuel doro. Baka di Samuel yere san Saul ben du, dan a taigi en: „Yu du wan don sani. Yu no gi yesi na a komando di Yehovah yu Gado ben gi yu. Efu yu ben gi yesi na Yehovah, dan a ben o meki taki ala ten wan bakapikin fu yu ben o tiri Israel. Ma now nowan kownu o komoto na ini yu famiri moro. Yehovah o suku wan tra sma di a lobi, dan Yehovah o poti en leki tiriman fu en pipel, bika yu no gi yesi na a komando di Yehovah gi yu.”​—1 Sam. 10:8; 13:8, 13, 14.

Fu di Saul no ben abi bribi, meki a prefuru fu trangayesi a komando di Gado ben gi en fu wakti teleki Samuel ben doro fu tyari na ofrandi. A no de fu taki dati Saul handri heri tra fasi leki Gideon, wan man di ben de legre-edeman fu Israel fosi! Yehovah ben taigi Gideon fu teki 300 man nomo fu den 32.000 srudati fu en èn Gideon du dati. Fu san ede? Fu di Gideon ben abi bribi na ini Yehovah. Nanga yepi fu Gado, a wini den 135.000 fetiman di ben broko kon na ini a foto (Krut. 7:1-7, 17-22; 8:10). Yehovah ben o yepi Saul tu. Ma fu di Saul ben trangayesi Gado, meki den Filisteasma fufuru omeni sani tyari gowe na ini Israel.​—1 Sam. 13:17, 18.

Te problema e miti wi, dan fa wi e teki bosroiti? Wan sma di no abi bribi, ben kan feni taki a moro bun fu no poti prakseri na den gronprakseri fu Gado. Di Samuel no ben de nanga Saul, dan a kan taki Saul ben denki taki a ben handri nanga koni. Ma te sma wani trutru taki Gado feni den bun, dan a wan-enkri bun sani fu du, na fu fiti Bijbel gronprakseri di abi fu du nanga a problema fu den.

Yehovah no feni Saul bun moro

Di Saul ben go feti nanga den Amaleksma, dan a du ete wan seryusu sondu. Gado ben krutu den Amaleksma fu di den ben go feti nanga den Israelsma baka di den ben komoto na Egepte, aladi den Israelsma no ben du den noti (Ex. 17:8; Deut. 25:17, 18). Boiti dati, di tra pipel go feti nanga a pipel fu Gado na a ten fu den Krutuman, dan den Amaleksma teki prati baka na a feti dati (Krut. 3:12, 13; 6:1-3, 33).  Yehovah ben aksi frantwortu fu den Amaleksma, èn a gi Saul a komando fu strafu den.​—1 Sam. 15:1-3.

Na presi taki Saul gi yesi na a komando di Yehovah ben gi en fu kiri ala den trangayesi Amaleksma èn fu pori den gudu fu den, a teki a kownu fu den leki katiboman, èn a teki sosrefi den moro bun meti fu den. San Saul du di Samuel krutu en fu a tori disi ede? Saul pruberi fu gi trawan a fowtu, fu di a taki: „Den srudati teki den moro bun skapu nanga kaw fu den Amalèksma, fu di den no ben wani kiri den. Den ben abi na prakseri fu tyari den meti leki ofrandi gi Yehovah.” Kande Saul ben prakseri trutru fu tyari den meti leki ofrandi. Ma awansi fa a no fa, Saul ben trangayesi Gado. Fosi, Saul ’no ben si ensrefi leki wan prenspari sma’, ma dati ben de tra fasi now. Fu dati ede, a profeiti fu Gado sori Saul taki a ben trangayesi Gado. Samuel taki: „Yu denki taki bron-ofrandi nanga tra ofrandi e plisi Yehovah, moro leki te sma e gi yesi na Yehovah? Luku, a moro bun fu gi yesi, leki fu tyari ofrandi . . . Fu di yu no wani du san Yehovah taigi yu, meki ensrefi no wani yu moro leki kownu tu.”​—1 Sam. 15:15, 17, 22, 23.

Di Yehovah puru en santa yeye nanga en blesi na Saul tapu, dan „takru prakseri” bigin abi krakti tapu a fosi kownu fu Israel. Saul bigin denki takru fu David, wan man di Yehovah ben o poti leki kownu bakaten, èn a bigin dyarusu na en tapu. Moro leki wán leisi a pruberi fu kiri David. Bijbel e taki dati fu di Saul ben e si taki „Yehovah ben de nanga David”, meki „sensi a ten dati a tron wan feanti fu David”. Saul ben de nomonomo fu kiri David èn a meki sma kiri 85 priester nanga tra sma. Dati meki a no e fruwondru wi taki Yehovah drai baka gi Saul!​—1 Sam. 16:14; 18:11, 25, 28, 29; 19:10, 11; 20:32, 33; 22:16-19.

Di den Filisteasma go feti baka nanga Israel, dan Saul go du afkodrei fu suku yepi, ma a no feni yepi. A dei baka dati, a kisi bigi mankeri na ini a feti, èn a kiri ensrefi (1 Sam. 28:4-8; 31:3, 4). Luku san Bijbel e taki fu a fosi kownu di ben trangayesi Gado: „Na so Saul dede, fu di a no gi yesi na Gado. A dede tu, fu di a no ben poti bribi na Yehovah, fu di a no du san Yehovah ben taigi en fu du, èn fu di a ben go aksi wan bonuman san fu du. Sobun, Saul no go aksi Yehovah san fu du.”​—1 Kron. 10:13, 14.

A takru eksempre fu Saul e sori krin taki a moro bun fu gi yesi na Yehovah leki fu tyari ofrandi gi en. Na apostel Yohanes ben skrifi: „Bika disi na san a lobi fu Gado wani taki, dati wi e hori wisrefi na den komando fu en; ma toku den komando fu en no de wan hebi” (1 Yoh. 5:3). Meki wi noiti no frigiti a prenspari tru tori disi: Efu wi wani tan bun mati fu Gado, dan wi musu tan gi yesi na en.

[Prenki na tapu bladzijde 21]

Na a bigin, Saul ben de wan tiriman di ben abi sakafasi

[Prenki na tapu bladzijde 23]

Fu san ede Samuel taigi Saul taki „a moro bun fu gi yesi, leki fu tyari ofrandi”?