Aksi fu leisiman

Baka di Nadab nanga Abihu, den manpikin fu Aron dede, dan Moses atibron nanga Eleasar nanga Itamar, den brada fu den. Fu san ede Moses ben atibron nanga den, èn san meki taki en ati kon kowru?—Lef. 10:16-20.

Syatu baka di a priestergrupu ben seti, Yehovah kiri Nadab nanga Abihu, den manpikin fu Aron. Yehovah ben du dati fu di den ben bron switismeri gi En aladi den no ben abi primisi fu du dati (Lef. 10:1, 2). Moses taigi den manpikin fu Aron di ben tan na libi, fu no sari fu di den brada dede. Syatu baka dati, Moses atibron nanga Eleasar nanga Itamar, fu di den no ben nyan a bokoboko fu a sondu-ofrandi (Lef. 9:3). Fu san ede Moses ben atibron?

Den wet di Yehovah ben gi Moses, ben e sori krin taki a priester di ben e tyari wan sondu-ofrandi, ben musu nyan wan pisi fu na ofrandi dati na ini a dyari fu a konmakandra-tenti. Na so a ben e tyari frantwortu gi den sondu fu den sma di ben e tyari na sondu-ofrandi dati. Ma efu den priester ben e tyari pikinso fu a brudu fu na ofrandi go na ini a Santa Presi, noso a fosi pisi fu a tabernakel, dan den no ben mag nyan na ofrandi. Na presi fu dati, den ben musu bron en.​—Lef. 6:24-26, 30.

Soleki fa a sori, dan baka di den sari sani ben pasa na a dei dati, Moses ben feni en fanowdu fu luku bun taki den priester ben e gi yesi na ala den komando fu Yehovah. Di a kon sabi taki den ben bron a bokoboko fu a sondu-ofrandi, dan a atibron èn a aksi Eleasar nanga Itamar fu san ede den no ben nyan en soleki fa Gado ben taki. A ben fruwakti taki den du dati, fu di a priester no ben tyari a brudu fu a bokoboko disi na fesi Yehovah na ini a Santa Presi.​—Lef. 10:17, 18.

Aron piki na aksi fu Moses fu di a ben de krin taki a ben feni a sani bun di den priester di ben tan na libi ben du. Fu di tu fu den manpikin fu Aron ben kisi dedestrafu, meki Aron ben kan aksi ensrefi efu a ben fiti taki den priester ben e nyan fu a sondu-ofrandi a dei dati. Kande a ben e denki taki Yehovah no ben o feni en bun te den ben o nyan fu na ofrandi, aladi densrefi no ben de frantwortu gi a fowtu di Nadab nanga Abihu ben meki.​—Lef. 10:19.

Kande Aron ben feni tu taki na a dei te den memre fu en osofamiri ben de den fosiwan di ben e tyari den frantwortu leki priester, dan den ben musu luku bun taki den ben e du srefi pikinpikin sani na a fasi fa Gado ben wani. Ma Nadab nanga Abihu no ben sori lespeki gi a nen fu Yehovah, èn Yehovah puru atibron na den tapu. Sobun, a kan taki Aron ben denki taki te wan priester ben du a sondu dati, dan den memre fu a famiri fu en no ben musu teki prati na wan santa ofrandi.

Soleki fa a sori, dan Moses ben feni a piki fu en brada bun, fu di Bijbel e taki: „Di Moses yere disi, dan en ati kon kowru” (Lef. 10:20). A de krin taki Yehovah srefi ben feni a piki fu Aron bun.