Wi sa kisi têgo libi te Gado feni wi bun

„Yu, Yehovah, o blesi ibriwan sma di e du san reti. Fu di yu lobi den meki yu o kibri den, leki fa wan bigi skelt e kibri wan sma.”​—PS. 5:12.

1, 2. San Elia ben aksi na uma fu Sarfat, èn sortu dyaranti a gi na uma?

ANGRI ben e kiri na uma fu Sarfat, en manpikin, èn sosrefi a profeiti fu Gado. Na uma disi en masra ben dede. Di a bigin seti wan faya fu bori nyanyan, dan a profeiti Elia aksi en pikinso watra nanga wan pisi brede. A ben de klariklari fu gi en watra fu dringi, ma ala san a ben abi fu nyan ben de „pikinso blon na ini wan bigi prapi, nanga pikinso oli na ini wan pikin batra”. Na uma ben feni taki a no ben abi nyanyan fu gi a profeiti, èn a taigi en dati tu.​—1 Kow. 17:8-12.

² Elia taigi na uma: „Meki wan pikin lontu brede gi mi, dan yu musu tyari en kon gi mi. Baka dati yu kan meki wan sani gi yu nanga yu manpikin, bika Yehovah, a Gado fu Israel, taki: ’Solanga Yehovah no meki alen fadon, a blon na ini a bigi prapi, èn na oli na ini a pikin batra no o kaba.’”​—1 Kow. 17:13, 14.

3. Sortu prenspari bosroiti wi musu teki?

³ A bosroiti di na uma disi ben musu teki, no ben abi fu du nomo nanga san a ben o du nanga a pikinso nyanyan di a ben abi ete. Na uma disi ben o abi a frutrow taki Yehovah ben o yepi en nanga en manpikin? A ben o feni en moro prenspari fu abi nyanyan, noso a ben o sorgu taki Gado feni en bun èn taki a tron wan mati fu En? Wi alamala musu teki wan srefi sortu bosroiti. Wi sa broko wi ede moro nanga den sani di wi abi fanowdu na ini wi libi, noso wi o si en leki wan moro prenspari sani fu sorgu taki Gado feni wi bun? Wi abi ala reide fu frutrow tapu Gado èn fu dini en. Èn wan tu sani de di wi kan du fu sorgu taki a feni wi bun.

’Yu warti fu kisi glori nanga grani’

4. Fu san ede wi musu anbegi Yehovah?

⁴ Yehovah abi a reti fu fruwakti taki sma anbegi en na wan fasi di a feni bun. Wan grupu futuboi fu en na hemel ben agri nanga a sani dati, èn den taki: „Na yu, Yehovah, iya, wi Gado, warti fu kisi glori, grani nanga makti, bika na yu meki ala sani; den ben kon de èn yu meki den, fu di yu ben wani” (Openb.  4:11). Fu di Yehovah na wi Mekiman, meki wi musu anbegi en.

5. Fu san ede a lobi di Gado abi gi wi musu gi wi deki-ati fu dini en?

⁵ Wan tra reide fu san ede wi musu anbegi Yehovah, na taki a abi bigi lobi gi wi. Bijbel e taki: „Gado meki libisma leki wan prenki fu ensrefi. Soleki fa Gado de, na so a meki libisma. A meki wan man nanga wan uma” (Gen. 1:27). Gado meki libisma na so wan fasi taki den man gebroiki den frustan fu teki den eigi bosroiti. Fu di Yehovah gi wi libi, meki a tron wi Tata (Luk. 3:38). Neleki ibri bun papa, Yehovah gi den manpikin nanga den umapikin fu en ala san den abi fanowdu fu man nyan bun fu a libi. „A e meki a son fu en opo” èn „a e meki alen fadon” so taki wi abi bogobogo nyanyan na ini wan kefalek moi grontapu.​—Mat. 5:45.

6, 7. (a) Sortu takru bakapisi Adam tyari kon na tapu den bakapikin fu en? (b) San a srakti-ofrandi fu Krestes o du gi den wan di e du muiti fu sorgu taki Gado feni den bun?

⁶ Yehovah frulusu wi tu fu den takru bakapisi fu sondu. Fu di Adam sondu, meki a kon de leki wan papa di dòbel, èn di no gebroiki a moni fu en fu sorgu gi en osofamiri. Fu taki en leti, a papa disi fufuru sani fu en osofamiri. Di Adam opo ensrefi teige Yehovah, dan a meki den pikin fu en lasi a howpu di den ben abi, namku têgo libi. Fu di Adam ben e denki ensrefi nomo, meki a seri a libisma famiri leki srafu fu sondu. Na so a du kon taki ala libisma e kon siki, den e sari, èn te fu kaba den e dede. Wan sma di wani fri wan srafu, musu pai gi en, èn na dati Yehovah du fu frulusu wi fu den takru bakapisi dati. (Leisi Romesma 5:21.) Yesus Krestes du san en Papa ben wani, èn a gi „en sili leki wan lusu-paiman fu frulusu furu sma” (Mat. 20:28). Heri esi den sma di Gado feni bun sa kisi wini dorodoro fu a lusu-paiman dati.

⁷ Moro leki iniwan sma, wi Mekiman Yehovah, du san ben de fanowdu so taki wi kan de koloku, èn so taki wi kan abi wan marki na ini a libi. Te Gado feni wi bun, dan wi o man si fa a sa tyari wan kaba kon na ala den takru bakapisi di e miti a libisma famiri. Yehovah o tan sori ibriwan fu wi fa a o „pai den sma di e suku en fayafaya”.​—Hebr. 11:6.

„A pipel fu yu o de klariklari fu” dini yu

8. San a tori fu Yesaya e leri wi fu a dini di wi musu dini Gado?

⁸ Efu wi wani taki Gado feni wi bun, dan wi musu gebroiki a grani di wi abi fu teki wi eigi bosroiti, na wan bun fasi. Dati de so fu di Yehovah no e dwengi nowan sma fu dini en. Na ini a ten fu Yesaya, Gado ben aksi: „Suma sa de wi boskopuman? Suma mi sa seni?” Yehovah hori na prakseri taki a profeiti ben abi a reti fu bosroiti san a ben o du, èn na so a sori lespeki gi en. Wi kan frustan taki Yesaya ben lobi a sani dati, fu di a piki: „Dya mi de! Seni mi.”​—Yes. 6:8.

9, 10. (a) Nanga sortu denki wi musu dini Gado? (b) Fu san ede a fiti taki wi e dini Yehovah nanga wi heri ati?

⁹ Libisma de fri fu bosroiti efu den o dini Gado, noso efu den no o du dati. Yehovah wani taki wi e dini en nanga wi heri ati. (Leisi Yosua 24:15.) Te wan sma e weigri fu anbegi Gado, dan Gado no sa feni a sma dati bun. Èn te sma e anbegi en soso fu plisi trawan, dan a no sa feni na anbegi dati bun tu (Kol. 3:22). Efu wi no de „klariklari” fu du santa diniwroko gi Gado, fu di grontapu sani e hari wi, dan a no o feni wi bun (Ex. 22:29). Yehovah sabi taki a o tyari wini kon gi wi te wi e dini en nanga wi heri ati. Moses ben taigi den Israelsma taki den ben o tan na libi ’efu den ben o lobi Yehovah, a Gado fu den, efu den ben o arki en sten, èn efu den ben o tai hori na en’.​—Deut. 30:19, 20.

¹⁰ Kownu David fu owruten Israel ben singi gi Yehovah: „Na a dei di yu o tyari a legre fu yu go na feti, a pipel fu yu o de klariklari fu go tu. Wan grupu yongu sma o horibaka gi yu. Den o de neleki den dowdropu na musudei.  Den o sori fa a santafasi fu yu moi” (Ps. 110:3). Furu sma na ini a ten disi e libi soso fu meki moni èn fu meki prisiri. Ma gi den sma di lobi Yehovah, a santa diniwroko fu Gado na a moro prenspari sani na ini den libi. Te wi e luku fa den e preiki a bun nyunsu so fayafaya, dan dati e sori san moro prenspari gi den. Den abi ala frutrow taki Yehovah kan gi den san den abi fanowdu ibri dei.​—Mat. 6:33, 34.

Ofrandi di Gado feni bun

11. Sortu wini den Israelsma ben howpu fu kisi te den ben e tyari ofrandi gi Yehovah?

¹¹ Di a pipel fu Gado ben de na ondro a Wet frubontu, dan den ben e tyari bun ofrandi so taki Gado ben kan feni den bun. Lefitikus 19:5 e taki: „Efu unu e tyari wan vrede-ofrandi gi Yehovah, dan un musu du dati na so wan fasi taki Gado feni unu bun.” A srefi Bijbel buku dati e taki: „Te unu o tyari wan srakti-ofrandi fu taki Yehovah tangi, dan un musu du dati na so wan fasi taki Gado feni unu bun” (Lef. 22:29). Te den Israelsma ben e tyari bun meti leki ofrandi na tapu na altari fu Yehovah, dan a smoko di ben opo go na loktu ben de leki wan „switi smeri” gi a tru Gado (Lef. 1:9, 13). Gado ben e firi bun te a ben e yere fa a pipel fu en ben e taki fa den lobi en (Gen. 8:21). Den tori disi di skrifi na ini a Wet, e leri wi wan prenspari sani. Te sma e tyari bun ofrandi gi Yehovah, dan a sa feni den sma dati bun. Sortu ofrandi a feni bun? Wi sa poti prakseri na tu sani: A fasi fa wi e tyari wisrefi èn den sani di wi e taki.

12. Sortu sani di wi ben o du, ben o meki taki ’Gado no ben o feni a skin fu wi bun di wi e gi leki ofrandi’?

¹² Na ini a brifi di na apostel Paulus ben skrifi gi den Romesma, a ben taki: „Gi un skin na Gado leki wan srakti-ofrandi di e libi, di de santa èn di Gado feni bun. Na so fasi unu sa man du santa diniwroko gi en nanga un frustan” (Rom. 12:1). Efu wan sma wani taki Gado feni en bun, dan a musu tan tyari ensrefi na wan krin fasi. Efu a sma dati ben o gebroiki tabaka, efu a ben o kaw pinangnoto, efu a ben o gebroiki drugs, noso efu a ben o dringi tumusi furu sopi, dan a no sa de krin moro èn Gado no sa feni na ofrandi fu en bun moro (2 Kor. 7:1). Boiti dati, wan „sma di gwenti du hurudu, e sondu teige en eigi skin”. Sobun, te wan sma no e tyari ensrefi na wan fasi di fiti, dan Yehovah no sa feni na ofrandi fu en bun kwetikweti (1 Kor. 6:18). Efu wan sma wani plisi Gado, dan a musu ’kon santa na ini ala san a e du’.​—1 Petr. 1:14-16.

13. Fu san ede a fiti taki wi e prèise Yehovah?

¹³ Wan tra ofrandi di Yehovah lobi abi fu du nanga den sani di wi e taki. Ala ten den sma di lobi Yehovah e taki bun sani fu en na publiki èn te den de na oso. (Leisi Psalm 34:1-3.) Leisi Psalm 148-150, èn luku omeni leisi den dri psalm disi e gi wi deki-ati fu prèise  Yehovah. Fu tru, „a fiti taki den krin-ati sma e gi en glori” (Ps. 33:1). Èn Yesus Krestes, na Eksempre fu wi, e sori o prenspari a de fu preiki a bun nyunsu so taki Gado e kisi prèise.​—Luk. 4:18, 43, 44.

14, 15. Sortu ofrandi den Israelsma ben musu tyari, soleki fa Hosea ben taigi den? Èn fa Yehovah ben feni den sma dati?

¹⁴ Te wi e preiki fayafaya, dan dati e sori taki wi lobi Yehovah, èn taki wi wani trutru taki a feni wi bun. Fu eksempre, luku sortu rai a profeiti Hosea ben gi den Israelsma di Gado no ben feni bun moro fu di den ben bigin anbegi falsi gado (Hos. 13:1-3). Hosea ben taigi den fu begi: „Gi wi pardon fu wi sondu. Teki den bun sani fu wi, dan wi o prèise yu. Meki den wortu fu wi mofo de leki yongu mankaw di wi e tyari leki srakti-ofrandi gi yu.”​—Hos. 14:1, 2.

¹⁵ A moro diri meti di wan Israelsma ben kan tyari leki ofrandi gi Yehovah, ben de wan mankaw. Sobun, di Hosea ben taki dati ’den wortu fu wi mofo musu de leki yongu mankaw’, dan a ben sori taki wi musu taki bun sani fu prèise a tru Gado èn wi musu du dati nanga wan krin ati. Fa Yehovah ben feni en te sma ben e tyari den ofrandi dati? A ben taki: „Mi o lobi den, fu di misrefi wani dati” (Hos. 14:4). Te sma ben e tyari den ofrandi dati fu prèise Yehovah, dan a ben e gi den pardon, a ben feni den bun, èn a ben teki den leki en mati.

16, 17. Te wan sma e bigin preiki a bun nyunsu fu di a e bribi na ini Gado, dan fa Yehovah sa feni en taki a sma e prèise en na a fasi dati?

¹⁶ Na ini a tru anbegi a ben de prenspari ala ten fu prèise Yehovah na publiki. A psalm skrifiman ben si en leki wan tumusi prenspari sani fu gi glori na a tru Gado, èn dati meki a ben begi en: „Yehovah, mi e begi yu, prisiri nanga den ofrandi fu mi mofo, di mi e tyari leki presenti gi yu” (Ps. 119:108). Fa a de na ini a ten disi? Yesaya ben taki wan profeititori di abi fu du nanga wan bigi ipi sma na ini a ten disi. A ben taki: „Den o prèise Yehovah na ala sei. . . . Mi [Gado] o teki den [presenti fu den] na tapu mi altari” (Yes. 60:6, 7). Leki wan kontru fu a profeititori dati, milyunmilyun sma e tyari ’wan srakti-ofrandi fu prèise Gado, namku den froktu fu a mofo di e meki en nen bekènti na trawan’.​—Hebr. 13:15.

¹⁷ Fa a de nanga yu? Yu e tyari ofrandi di Gado feni bun? Efu yu no e du dati, dan yu o tyari kenki kon di de fanowdu, èn yu o bigin prèise Yehovah na publiki? Te yu e bigin preiki a bun nyunsu fu di yu abi bribi, dan ’Yehovah sa prisiri nanga yu moro leki te sma ben o tyari wan mankaw leki ofrandi gi en’ (Leisi Psalm 69:30, 31). Yu kan abi a dyaranti taki a prèise di yu e prèise Yehovah sa de leki wan „switi smeri” gi en, èn yu kan de seiker taki a sa feni yu bun (Esek. 20:41). Yu sa de koloku trutru.

’Yehovah srefi o blesi ibriwan sma di e du san reti’

18, 19. (a) Fa furu sma na ini a ten disi e denki fu a dini di wi musu dini Gado? (b) San na a bakapisi te wi lasi a matifasi di wi abi nanga Gado?

¹⁸ Furu sma na ini a ten disi abi a srefi denki leki wan tu sma na ini a ten fu Maleaki. Den sma dati ben taki: „Na fu soso wi e dini Gado. Sortu wini wi kisi di wi du san a taki?” (Mal. 3:14) Fu di den sma dati e feti baka gudu, meki den e denki taki Gado no o man du san  a abi na prakseri, èn taki den wet fu en no de gi a ten disi. Den sma disi e si en leki lasi ten fu preiki a bun nyunsu, èn den e atibron te sma e du a wroko disi.

¹⁹ Sma bigin abi den sortu denki disi sensi na ini a dyari fu Eden. Na Satan ben kori Eva so taki a lasi warderi gi a tumusi moi libi di Yehovah ben gi en, èn fu wisiwasi Yehovah. Na ini a ten disi, Satan e gi sma deki-ati doronomo fu bribi taki a no sa tyari wini kon gi den te den e du a wani fu Gado. Ma Eva nanga a masra fu en kon si taki a lasi di den lasi a matifasi di den ben abi nanga Gado, ben o tyari dede kon gi den. Den sma di e teki a takru eksempre fu den, heri esi sa kon frustan taki a srefi hati sani dati o pasa nanga den.​—Gen. 3:1-7, 17-19.

20, 21. (a) San na uma fu Sarfat du, èn fa sani ben waka nanga en bakaten? (b) Fa wi kan teki na eksempre fu na uma fu Sarfat, èn fu san ede wi musu teki na eksempre fu en?

²⁰ Te wi e luku a sari sani di pasa nanga Adam nanga Eva, dan wi si taki sani waka heri tra fasi nanga na uma fu Sarfat di Elia ben aksi nyanyan. Baka di Elia gi na uma disi deki-ati, dan na uma bigin baka brede èn a gi a profeiti wan pisi brede fu nyan fosi, aladi a no ben abi furu. Baka dati Yehovah meki a sani kon tru di a ben meki Elia pramisi na uma. Bijbel e taki: „Ibri dei en nanga en osofamiri, makandra nanga Elia ben abi wan sani fu nyan. A blon na ini a bigi prapi èn na oli na ini a pikin batra no ben e kaba. Na dati Yehovah ben taigi Elia fu fruteri na uma.”​—1 Kow. 17:15, 16.

²¹ Na uma fu Sarfat ben du wan sani di wan tu sma nomo fu den milyardmilyard sma di de na libi ben o wani du. A ben poti ala en frutrow na ini a Gado di e frulusu sma, èn Gado yepi en. A Bijbel tori disi nanga trawan sosrefi e sori krin taki Yehovah e frudini en taki wi e frutrow na en tapu. (Leisi Yosua 21:43-45; 23:14.) A libi fu Yehovah Kotoigi na ini a ten disi e sori tu taki Yehovah noiti no sa gowe libi den wan di a feni bun.​—Ps. 34:6, 7, 17-19. *

22. Fu san ede wi no musu draidrai fu sorgu taki Gado feni wi bun?

²² A dei te Gado o krutu „ala den sma di e libi na grontapu” e kon krosibei moro nanga moro (Luk. 21:34, 35). Wi no kan wai pasi gi en. Nowan enkri sortu gudu warti moro leki fu yere fa a Krutuman di Gado poti e taigi wi: „Un kon, unu di mi Tata blesi, èn teki a kownukondre di sreka gi unu sensi a ten di grontapu seti” (Mat. 25:34). Iya, ’Yehovah, srefi o blesi ibriwan sma di e du san reti. Fu di a lobi den meki a o kibri den, leki fa wan bigi skelt e kibri wan sma’ (Ps. 5:12). A no de fu taki dati wi musu sorgu taki Gado feni wi bun.

[Futuwortu]

Yu e memre disi ete?

• Fu san ede wi musu dini Yehovah nanga wi heri ati?

• Sortu ofrandi Yehovah e teki na ini a ten disi?

• San Hosea ben wani taki nanga ’den wortu fu wi mofo di de leki yongu mankaw’, èn fu san ede wi musu tyari den ofrandi dati gi Yehovah?

• Fu san ede wi musu sorgu taki Gado feni wi bun?

[Aksi fu a tori disi]

[Prenki na tapu bladzijde 13]

Sortu prenspari sani a profeiti fu Gado ben aksi fu wan pôti mama?

[Prenki na tapu bladzijde 15]

Sortu wini wi sa kisi te wi e tyari wan ofrandi fu prèise Yehovah?

[Prenki na tapu bladzijde 17]

Noiti yu o sari taki yu poti ala yu frutrow tapu Yehovah.