Yu e tegu gi kruktudu?

„Yu [Yesus] no ben lobi kruktudu kwetikweti.”​—HEBR. 1:9.

1. San Yesus ben leri den disipel fu en te a abi fu du nanga lobi?

FU DI Yesus Krestes ben wani sori den disipel fu en o prenspari a de fu sori lobi, meki a taigi den: „Mi e gi unu wan nyun komando, taki un musu lobi makandra; neleki fa mi lobi unu, na so un musu lobi makandra tu. Na a fasi disi ala sma o sabi taki unu na mi disipel, te unu lobi makandra” (Yoh. 13:34, 35). Yesus ben gi den bakaman fu en a komando fu sori trutru lobi gi makandra. Efu den ben o sori a lobi dati, dan sma ben o sabi taki den na trutru Kresten. Yesus ben gi den a rai disi tu: „Tan lobi un feanti èn tan begi gi den sma di e frufolgu unu.”​—Mat. 5:44.

2. Sortu sani bakaman fu Krestes musu leri fu tegu gi?

² Ma boiti taki Yesus ben leri den disipel fu en fu sori lobi gi makandra, a ben leri den tu sortu sani den no ben musu lobi kwetikweti. Bijbel e taki fu Yesus: „Yu ben lobi regtfardikifasi, èn yu no ben lobi kruktudu [ogridu] kwetikweti” (Hebr. 1:9; Ps. 45:7). Disi e sori taki wi no musu kon abi lobi gi regtfardikifasi nomo, ma wi musu leri tu fu tegu gi sondu, noso kruktudu. A moi fu sabi taki na apostel Yohanes ben taki krin: „Ibri sma di abi a gwenti fu du sondu, e du kruktudu sosrefi, èn dati meki sondu na kruktudu.”​—1 Yoh. 3:4.

3. San na den fo sani di wi sa luku na ini na artikel disi?

³ Fu dati ede, wi leki Kresten musu aksi wisrefi den sani disi: ’Mi e tegu gi kruktudu?’ Meki wi luku fa wi kan sori taki wi e tegu gi san ogri. Wi sa poti prakseri na den fo sani  disi: (1) A fasi fa wi e si a dringi di sma e dringi sopi pasa marki, (2) a fasi fa wi e si afkodrei (3) a fasi fa wi e si hurudu, èn (4) a fasi fa wi e si sma di lobi kruktudu.

No dringi sopi pasa marki

4. Fu san ede Yesus ben kan taki fri te a ben e warskow sma fu no dringi sopi pasa marki?

⁴ Wanwan leisi, Yesus ben e dringi win, fu di a ben sabi taki win na wan presenti fu Gado (Ps. 104:14, 15). Ma noiti a ben e dringi win pasa marki (Odo 23:29-33). Dati meki Yesus ben kan taki fri te a ben e gi sma rai fu den sortu tori disi. (Leisi Lukas 21:34.) Te wan sma e dringi sopi pasa marki, dan dati kan meki taki a du tra seryusu sondu. Fu dati ede na apostel Paulus ben skrifi: „No dringi win teleki unu kon drungu, bika dati e meki sma libi wan yayolibi, ma un musu tan meki a yeye de na un tapu” (Ef. 5:18). A ben gi den owru uma na ini a gemeente a rai tu fu no „lobi dringi furu win”.​—Tit. 2:3.

5. Sortu sani den sma di e bosroiti fu dringi sopi, musu aksi densrefi?

⁵ Efu yu e bosroiti fu dringi win, biri, noso tra sortu sopi, dan a ben o bun fu aksi yusrefi: ’Mi abi a srefi denki leki Yesus te a abi fu du nanga a dringi di sma e dringi sopi pasa marki? Efu mi musu gi tra sma rai fu a tori disi, dan mi o man taki fri? Mi e dringi sopi soso fu no prakseri den broko-ede fu mi? O furu sopi mi e dringi ibri wiki? Fa mi ben o feni en te wan sma ben o taigi mi taki mi e dringi tumusi furu sopi? Mi e bigin strei nanga a sma, noso mi e atibron?’ Te wi ben o teki en leki wan gwenti fu dringi furu sopi, dan dati kan meki taki wi no o man denki krin moro, èn wi no o man teki koni bosroiti. Bakaman fu Krestes ala ten e luku bun taki den de nanga den krin frustan.​—Odo 3:21, 22.

Wai pasi gi afkodrei

6, 7. (a) San Yesus du nanga Satan nanga den ogri yeye? (b) Fu san ede sma na ala sei e du afkodrei na ini a ten disi?

⁶ Di Yesus ben de na grontapu, a kakafutu fayafaya gi Satan nanga den ogri yeye. A no ben brokokindi di Satan ben wani taki a trangayesi Gado (Luk. 4:1-13). A ben man si tu te Satan ben wani kori en fu denki èn fu handri na wan fasi di no fiti, èn a kakafutu gi Satan (Mat. 16:21-23). Yesus ben yepi reti-ati sma fu komoto na ondro a makti fu den ogri yeye di ben e pina den.​—Mark. 5:2, 8, 12-15; 9:20, 25-27.

⁷ Baka di Yesus tron Kownu na ini 1914, a puru Satan nanga den ogri yeye na hemel, fu di den ben e tyari prati kon. Na so a du kon taki now, moro leki iniwan ten bifo, Satan de nomonomo fu „kori sma na heri grontapu” (Openb. 12:9, 10). Fu dati ede a no musu fruwondru wi taki moro nanga moro sma na heri grontapu e kon lobi afkodrei. San wi kan du fu kibri wisrefi gi afkodrei?

8. San wi musu aksi wisrefi te a abi fu du nanga a prisiriten di wi abi?

⁸ Bijbel e warskow wi krin gi den takru bakapisi fu afkodrei. (Leisi Deuteronomium 18:10-12.) Na ini a ten disi, Satan nanga den ogri yeye abi krakti na tapu a denki fu sma nanga yepi fu felem, buku, nanga video game di e gi sma deki-ati fu du afkodrei. Fu  dati ede, te wi e bosroiti sortu prisiriten wi o abi, dan ibriwan fu wi musu aksi ensrefi: ’Na ini den mun di pasa, mi luku felem noso telefisi programa di abi fu du nanga afkodrei? Mi prei video game, noso mi leisi buku di abi fu du nanga den sortu sani dati? Mi e frustan o prenspari a de fu wai pasi gi afkodrei, noso mi feni taki a sani dati no o tyari takru bakapisi kon gi mi? Oiti mi prakseri fa Yehovah e denki fu a prisiriten di mi abi? Efu mi bigin poti prakseri na sani di abi fu du nanga afkodrei, dan a lobi di mi abi gi Yehovah èn gi den regtfardiki markitiki fu en o meki taki mi tapu wantewante nanga den sani dati?’​—Tori. 19:19, 20.

Gi yesi na a warskow di Yesus gi wi fu wai pasi gi hurudu

9. Fa wan sma ben kan kon abi wan lobi gi kruktudu?

⁹ Yesus ben e leri sma den markitiki fu Yehovah di abi fu du nanga seks. A ben taki: „Unu no leisi taki a sma di meki den na a bigin, meki den leki man nanga uma? Unu no leisi tu taki a ben taki: ’Dati meki wan man sa gowe libi en papa nanga mama èn a sa tan nanga en wefi, èn a man nanga en wefi sa de wán skin’? Sobun, den no de tu skin moro, ma wán skin. Fu dati ede, nowan sma musu prati san Gado poti na ondro wán tyatyari” (Mat. 19:4-6). Yesus ben sabi taki den sani di wi e si kan abi krakti na tapu wi ati. Dati meki a ben taki na ini a Bergitaki fu en: „Un yere taki den taki: ’No du sutadu.’ Ma mi e taigi unu taki iniwan sma di e tan luku wan uma fu kisi tranga lostu gi en, du sutadu nanga en kaba na ini en ati” (Mat. 5:27, 28). Fu taki en leti, sma di no e gi yesi na a warskow fu Yesus, e kweki lobi gi kruktudu.

10. Fruteri wan ondrofenitori di e sori fa wan sma ben kan tapu nanga porno.

¹⁰ Nanga yepi fu porno Satan e gi sma deki-ati fu du hurudu. A grontapu disi lai nanga porno. Den sma di e luku porno feni en muilek fu puru den doti tori dati na ini den prakseri. Te fu kaba den no o man tapu fu luku porno. Luku san ben pasa nanga wan Kresten. A e taki: „Mi ben e luku porno kibrikibri. Mi ben e kori misrefi taki a sani dati no ben o abi krakti na tapu a diniwroko di mi ben e du gi Yehovah. Mi ben sabi taki mi no ben e du wan bun sani, ma mi ben taigi misrefi taki Gado ben feni a diniwroko fu mi bun ete.” San meki taki a brada disi kon si sani tra fasi? A e taki: „Mi bosroiti fu taigi den owruman fu a problema fu mi, aladi dati ben de a moro muilek sani di mi du.” Te fu kaba a brada disi ben man tapu nanga a takru gwenti di a ben abi. A brada e taki: „Baka di mi tapu nanga a sondu disi, mi ben firi taki mi ben kon abi wan krin konsensi trutru.” Den sma di e tegu gi kruktudu musu leri fu tegu gi porno.

11, 12. Te a abi fu du nanga den poku di wi e arki, dan fa wi kan sori taki wi e tegu gi kruktudu?

¹¹ Poku nanga den wortu fu poku kan abi furu krakti na tapu den firi fu wi, èn sosrefi na tapu na ati fu wi. Fu taki en leti, poku na wan presenti fu Gado, èn langa ten kaba a de wan prenspari sani na ini a tru anbegi (Ex. 15:20, 21; Ef. 5:19). Ma na ogri grontapu fu Satan e gi sma deki-ati fu lobi poku di abi fu du nanga hurudu (1 Yoh. 5:19). Fa yu kan sabi efu den poku di yu e arki, e pori a denki fu yu?

 ¹² Kande yu kan bigin aksi yusrefi a sani disi: ’Den poku di mi e arki e leri sma taki a bun fu kiri trawan, fu du sutadu, fu du hurudu, èn fu taki ogri fu Gado? Efu mi ben o leisi den wortu fu son singi gi wan sma, dan a sma dati ben o kisi a denki taki mi e tegu gi kruktudu, noso den wortu ben o sori taki mi ati doti?’ Wi no kan taki dati wi e tegu gi kruktudu, aladi wi e arki poku di e gi sma deki-ati fu du den sortu sani dati. Yesus ben taki: „San e komoto fu a mofo, e kon fu na ati, èn na dati e doti wan sma. Fu eksempre, disi na den sani di e kon fu na ati: ogri prakseri, kiri, sutadu, hurudu, fufuru, leitori, a taki di wan sma e taki ogri fu trawan.”​—Mat. 15:18, 19; luku Yakobus 3:10, 11.

Kon abi a srefi denki di Yesus ben abi fu sma di lobi kruktudu

13. Fa Yesus ben e si sma di ben e tan du sondu?

¹³ Yesus ben taki dati a ben kon fu gi sondari, noso sma di e du kruktudu, a kari fu sori berow (Luk. 5:30-32). Ma fa a ben e si sma di ben e tan du sondu? Yesus ben gi sma seryusu warskow fu luku bun nanga den sortu sma dati (Mat. 23:15, 23-26). A ben taki krin tu: „A no ala sma di e taigi mi: ’Masra, Masra’, sa go na ini a kownukondre fu hemel, ma na a sma di e du a wani fu mi Tata na hemel, sa go na ini. Furu sma sa taigi mi na a dei dati [te Gado o strafu sma]: ’Masra, Masra, a no na ini yu nen wi ben taki profeititori? A no na ini yu nen wi ben puru ogri yeye na sma tapu? A no na ini yu nen wi ben du furu bigi wondru?’” Ma a no sa feni den sma bun di e du kruktudu èn di no abi berow. A sa taigi den: „Komoto na mi fesi” (Mat. 7:21-23). Fu san ede a o taigi den sma a sani dati? Fu di den sortu sma dati e gi Gado porinen, èn den ogri di den e du e tyari takru bakapisi kon gi trawan.

14. Fu san ede den brada musu puru sma di no abi berow fu a gemeente?

¹⁴ Gado Wortu e gi wi a komando taki te wan sma no abi berow fu den sondu fu en, dan den brada musu puru en fu a gemeente. (Leisi 1 Korentesma 5:9-13.) Dri reide de fu san ede a sani disi de fanowdu: (1) fu sorgu taki Yehovah no e kisi porinen, (2) fu sorgu taki a gemeente e tan krin, èn (3) fu yepi sma di e du sondu fu sori berow efu den wani dati.

15. Efu wi wani tan gi yesi na Gado, dan sortu prenspari sani wi musu aksi wisrefi?

¹⁵ Te sma e teki en leki wan gwenti fu du kruktudu, dan wi e si den sma dati soleki fa Yesus e si den? Wi musu poti prakseri na den aksi disi: ’Mi ben o abi demakandra doronomo nanga wan sma di den puru fu a gemeente, noso di hari ensrefi puru fu a Kresten gemeente? Fa a de te a sma dati na wan famiriman di no e libi moro nanga wi na ini wan oso?’ A situwâsi dati kan de wan bigi tesi gi wi, fu di wi sa musu sori efu wi lobi regtfardikifasi èn efu wi sa tan gi yesi na Gado. *

16, 17. Sortu tesi ben miti wan Kresten mama, èn san yepi en fu hori ensrefi na a seti di Gado poti fu puru sma fu a gemeente te den no e sori berow?

¹⁶ Luku na ondrofenitori fu wan sisa di abi wan manpikin di fosi ben lobi Yehovah. Ma di a manpikin disi kon bigi, dan a bigin du kruktudu èn a no sori berow. Fu dati ede den  brada puru en fu a gemeente. A sisa fu wi ben lobi Yehovah, ma a ben lobi en manpikin tu. Fu dati ede a ben muilek srefisrefi gi en fu gi yesi na a komando di Bijbel e gi fu no abi demakandra nanga en.

¹⁷ Sortu rai yu ben o gi a sisa disi? Wan owruman yepi en fu kon si taki Yehovah ben sabi fa a ben e firi. A brada aksi en fu prakseri fa Yehovah ben e sari di wan tu fu den engel manpikin fu en opo densrefi teige en. Na owruman taigi en taki aladi Yehovah sabi fa wi kan sari te a sani disi miti wi, toku a wani taki den brada puru sma fu a gemeente, te den no e sori berow. A sisa gi yesi na den rai di a brada ben gi en, èn a hori ensrefi na a seti di Gado poti fu puru sma fu a gemeente te den no wani sori berow. * Yehovah e prisiri te sma e gi yesi na en na a fasi disi.​—Odo 27:11.

18, 19. (a) Te wi e tapu fu abi demakandra nanga wan sma di e du kruktudu, dan san dati e sori? (b) San kan de a bakapisi te wi e tan gi yesi na Gado èn na a seti fu en?

¹⁸ Efu wan srefi sortu situwâsi e miti yu, dan hori na prakseri taki Yehovah e frustan fa yu e firi. Te yu e tapu fu abi demakandra nanga a sma di den puru fu a gemeente, noso di hari ensrefi puru fu a gemeente, dan yu e sori taki yu e tegu gi a denki fu a sma èn gi den sani di a du. Ma yu e sori tu taki na fu di yu lobi a sma di du ogri, meki yu wani du san bun gi en. Te yu e tan gi yesi na Yehovah, dan dati kan meki taki a sma di kisi trangaleri e sori berow èn e drai kon baka na Yehovah.

¹⁹ Wan sma di den brada ben puru fu a gemeente, èn di tron wan memre baka fu a gemeente, ben skrifi: „Mi breiti taki na fu di Yehovah lobi a pipel fu en, meki a e sorgu taki na organisâsi fu en e tan krin. Aladi trawan e si a sani disi leki wan hati sani, toku a de fanowdu trutru, èn a de wan lobi-ati seti tu.” Yu denki taki a sma disi ben o kon abi a denki disi efu memre fu a gemeente, sosrefi famiriman fu en ben e tan abi demakandra nanga en di den brada ben puru en fu a gemeente? Te wi e horibaka gi a seti di Gado poti fu puru sma fu a gemeente, dan dati e sori taki wi lobi regtfardikifasi èn taki wi e bribi taki Yehovah abi a reti fu taigi wi fa wi musu tyari wisrefi.

’No lobi ogri sani kwetikweti’

20, 21. Fu san ede wi musu leri fu tegu gi kruktudu?

²⁰ Na apostel Petrus e gi wi a warskow disi: „Tan nanga krin frustan, de na ai.” Fu san ede? Fu di „Didibri, a feanti fu unu, e waka lontu leki wan lew di e bari, fu di a e suku fu swari wan sma” (1 Petr. 5:8). Yu o meki Satan swari yu? Dati no abi fu pasa te yu e leri fu tegu gi kruktudu.

²¹ A no makriki fu tegu gi san ogri. Wi gebore leki sondusma, èn wi e libi na ini wan grontapu di e gi sma deki-ati fu plisi den sondu firi fu en (1 Yoh. 2:15-17). Ma te wi e teki na eksempre fu Yesus Krestes, èn te wi e kon abi tranga lobi gi Yehovah Gado, dan wi o man tegu gi kruktudu. Meki wi abi a fasti bosroiti fu ’no lobi ogri sani kwetikweti’, èn meki wi abi ala frutrow taki Yehovah „e kibri . . . den wan di e tai hori na en. A e frulusu den puru na a anu fu den ogriwan”.​—Ps. 97:10.

[Futuwortu]

Fa yu ben sa piki?

• Fa wi kan kon sabi efu wi abi a yoisti denki fu sopi?

• San wi kan du fu wai pasi gi afkodrei?

• Fu san ede a no bun kwetikweti fu luku porno?

• Te den puru wan lobiwan fu wi fu a gemeente, dan fa wi kan sori taki wi e tegu gi kruktudu?

[Aksi fu a tori disi]

[Prenki na tapu bladzijde 29]

Efu yu e bosroiti fu dringi win, biri, nanga tra sortu sopi, dan san yu musu hori na prakseri?

[Prenki na tapu bladzijde 30]

Luku bun nanga prisiriten di abi fu du nanga afkodrei

[Prenki na tapu bladzijde 31]

Te wan sma e luku porno, dan gi sortu sani a e kweki lobi?