Yu e warderi den blesi fu yu trutru?

NA A bigin di den manpikin fu Israel ben komoto na wan wondru fasi na ini katibo na Egepte, dan den ben breiti srefisrefi taki den ben kan anbegi Yehovah fri (Ex. 14:29–15:1, 20, 21). Ma syatu baka dati, den bigin si sani tra fasi. Den bigin kragi fu a situwâsi fu den. Fu san ede? Fu di den no tan poti prakseri na den sani di Yehovah ben du gi den, ma na presi fu dati, den ben bigin broko den ede nanga den problema di den ben abi na ini a sabana. Den ben taigi Moses: „Fu san ede unu puru wi na Egepte fu kon dede na ini a sabana? Nowan brede èn nowan watra no de. Wi e tegu fu a fisti nyanyan [mana] disi.”​—Num. 21:5.

Hondrohondro yari baka dati, Kownu David fu owruten Israel ben singi: „Mi sabi taki yu o du bun gi mi. Meki mi ati prisiri, fu di yu frulusu mi. Mi o singi gi Yehovah fu di a blesi mi” (Ps. 13:5, 6). David no ben frigiti den bun sani di Yehovah ben du gi en. Na presi fu dati, a ben e prakseri den sani dati doronomo (Ps 103:2). Yehovah blesi wi tu, èn fu dati ede a de wan koni sani fu sori warderi gi den sani di a du gi wi. Fu dati ede, meki wi poti prakseri na wan tu fu den blesi di wi e kisi fu Gado na ini a ten disi.

’Wi na bun mati fu Yehovah’

A psalm skrifiman ben singi: „Soso den wan di abi bigi lespeki gi Yehovah kan de bun mati fu en” (Ps. 25:14). A no de fu taki dati a de wan bigi grani taki sondu libisma kan abi wan bun matifasi nanga Yehovah! Ma fa a ben o de efu wi ben o poti so furu prakseri na den afersi fu na aladei libi, taki wi no e begi so furu moro? Prakseri san ben o pasa nanga a bun matifasi di wi abi nanga Yehovah. Fu di Yehovah na wi mati, meki a e fruwakti fu wi taki wi e frutrow en èn taki wi e taigi en na ini begi san de na tapu wi ati. Iya, wi musu fruteri en fu den winsi fu wi, èn fu den sani di e gi  wi broko-ede (Odo 3:5, 6; Fil. 4:6, 7). Disi e sori taki wi musu poti prakseri na den begi fu wi fu si efu den bun nofo, a no so?

Wan yongu Kotoigi di nen Paul, ben poti prakseri na den begi fu en, èn a kon si taki a ben musu tyari wan tu kenki kon. * A ben taki: „Mi ben kon abi a gwenti fu taki den srefi sani ibri tron baka, te mi ben e begi Yehovah.” Fu kon sabi san na a yoisti fasi fu begi, dan Paul go ondrosuku sani na ini na Index van Wachttoren-publicaties. A kon si taki sowan 180 begi de fu feni na ini Bijbel. Na ini den begi disi, den fositen futuboi fu Yehovah ben e taki fu den dipi firi fu den. Paul ben taki: „Fu di mi ben denki dipi fu den begi dati di de na ini Bijbel, meki mi leri fu taki sani krin te mi e begi.” A sani disi yepi mi fu opo mi ati gi Yehovah. Now a e gi mi prisiri fu kon krosibei na en na ini begi.

„Nyanyan na a reti ten”

Wan tra blesi di wi kisi fu Yehovah, na den sani di wi leri fu Bijbel. Fu di wi e kisi wini fu a yeye nyanyan di a e gi wi bogobogo, meki wi abi reide fu ’bari fu prisiri fu di wi abi wan bun ati’ (Yes. 65:13, 14). Ma wi no musu gi pasi taki sani di no fiti e kon abi krakti na wi tapu, so taki wi e lasi a faya di wi abi gi a tru bribi. Fu eksempre, te wi ben o poti prakseri na sani di sma di fadon komoto na bribi skrifi, dan dati kan pori a denki fu wi. A sani dati kan meki tu taki wi e lasi warderi gi a yeye „nyanyan” di Yehovah e gi wi „na a reti ten”, nanga yepi fu „a getrow èn koni srafu”.​—Mat. 24:45-47.

André, di ben e dini Yehovah furu yari kaba, ben gowe libi a tru anbegi fu di a ben meki sma di fadon komoto na bribi kori en nanga a denki fu den. A no de fu taki dati a sani dati tyari takru bakapisi kon gi en. A ben e denki taki noti no ben o pasa nanga en te a ben o luku syatu san de na tapu wan Website fu wan sma di fadon komoto na bribi. A e taki: „Na a bigin, den tori di den sma di fadon komoto na bribi ben skrifi ben e hari mi, fu di mi ben denki taki den ben de tru tori. O moro mi ben e leisi den sani di den ben e taki, o moro mi ben e denki taki mi ben abi leti fu gowe libi na organisâsi fu Yehovah. Ma bakaten, di mi ondrosuku wan tu fu den sani di den sma di fadon komoto na bribi e taki fu Yehovah Kotoigi, dan mi kon si a trikifasi fu den falsi leriman disi. Den ben e krutu wi taki wi ben e leri sma sani di no tru, ma fu taki en leti, den ben e drai den tori di wi skrifi, soso fu meki sma tweifri. Sobun, mi bigin baka fu leisi den publikâsi fu wi, èn mi bigin go baka na den konmakandra. Heri esi mi kon si o furu mi ben misi.” Koloku taki André drai kon baka na a gemeente.

’Ala wi brada nanga sisa na heri grontapu’

Den lobi brada nanga sisa fu wi na wan blesi fu Yehovah (Ps. 133:1). Na apostel Petrus ben abi bun reide fu skrifi: „Lobi ala brada” (1 Petr. 2:17). Fu di wi na memre fu wan famiri fu Kresten brada nanga sisa, meki wi e kisi  wini fu a lobi fu den èn fu a yepi di den e gi wi. Iya, den sma disi de leki papa, mama, brada, nanga sisa gi wi.​—Mark. 10:29, 30.

Ma son leisi, difrenti sortu situwâsi kan pori a matifasi di wi abi nanga wi Kresten brada nanga sisa. Fu eksempre, a makriki fu luku den fowtu di wan sma e meki èn fu krutu a sma dati. Efu dati ben o pasa, dan a ben o bun fu hori na prakseri taki Yehovah lobi den futuboi fu en, aladi den abi fowtu. Boiti dati, „efu wi e taki: ’Wi no abi sondu’ dan wi e kori wisrefi èn a waarheid no de na ini wi” (1 Yoh. 1:8). Fu taki en leti, wi musu du tranga muiti fu ’tan frudrage makandra èn wi musu gi makandra pardon nanga wi heri ati’.​—Kol. 3:13.

Wan yongu uma di nen Ann, leri nanga tranga o prenspari a de fu abi demakandra nanga tra Kresten. Te yu luku en bun, dan a ben handri leki a lasi manpikin fu na agersi tori fu Yesus, fu di a ben drai baka gi a Kresten gemeente. Bakaten, a kisi ensrefi èn a drai kon baka na a tru anbegi (Luk. 15:11-24). San Ann leri fu a sani disi? A e fruteri: „Now di mi drai kon baka na Yehovah en organisâsi, mi e warderi ala den brada nanga sisa fu mi, aladi den abi swakifasi. Fosi, mi ben de gaw fu krutu den. Ma now mi abi a fasti bosroiti fu no meki nowan enkri sani tapu pasi gi den blesi di mi e kisi na mindri den brada nanga sisa fu mi. Noiti mi no wani lasi den blesi dati, fu di noti na grontapu warti moro leki dati.”

De nanga tangi ala ten gi den blesi fu yu

A howpu di wi abi taki a Kownukondre fu Gado o lusu ala den problema fu libisma, na wan tumusi prenspari howpu. A no de fu taki dati wi ati ben furu nanga warderi a fosi leisi di wi yere fu a howpu disi. Wi ben e firi leki a bisnisman na ini na agersitori fu Yesus, di „seri ala den sani di a ben abi” fu man bai „wán peri di ben warti furu” (Mat. 13:45, 46). Yesus no e taki dati a bisnisman disi lasi warderi gi a peri dati bakaten. Na so a de tu taki wi noiti no musu lasi warderi gi a tumusi moi howpu fu wi.​—1 Tes. 5:8; Hebr. 6:19.

Luku na eksempre fu Jean, di e dini Yehovah moro leki 60 yari kaba. A e taki: „A sani di yepi mi fu tan hori a Kownukondre fu Gado na prakseri, na a fruteri di mi fruteri sma fu en. Te mi e si fa den sma den fesi e kenki te den e kon frustan san na a Kownukondre, dan dati e meki mi firi bun. Te mi e si fa a Kownukondre boskopu e kenki a libi fu wan Bijbel studenti, dan dati e meki mi denki: ’Den tru tori di mi abi fu fruteri sma, moi fu tru!’”

Wi abi bun reide fu de nanga tangi gi den someni blesi di wi e kisi fu Gado. Aladi wi e kisi fu du nanga gens, siki, owrudei, broko-ede, sari sani, nanga moni problema, toku wi sabi taki den sani disi na fu wan pisi ten nomo. Te a Kownukondre fu Gado o tiri, dan boiti den blesi di wi e kisi kaba, wi o kisi tra blesi tu. Iya, ala pina di wi e ondrofeni now sa kon na wan kaba na ini a nyun sistema.​—Opb. 21:4.

Ma fosi a ten dati doro, dan meki wi de nanga tangi gi den blesi di Gado e gi wi, èn meki wi sori warderi neleki a psalm skrifiman di ben singi: „Yehovah mi Gado, yu du furu sani. Iya, yu du kefalek moi sani gi wi èn ala ten baka yu e prakseri wi. Nowan sma de leki yu. Awinsi mi ben sa wani fruteri sma fu ala den sani di yu du, toku mi no ben o man, bika den furu so te, taki mi no man teri den.”​—Ps. 40:5

[Futuwortu]

[Prenki na tapu bladzijde 18]

A yepi di wi e kisi fu wi Kresten brada nanga sisa na ini muilek ten de wan blesi