Noiti no gowe libi den Kresten brada nanga sisa fu yu

„TIN yari langa a bisnis libi fu wi ben e puru wi prakseri na a anbegi fu wi. Wi ben lobi a libi dati trutru, èn wi ben gudu srefisrefi. Aladi wi ben kweki na ini a tru anbegi, toku wi ben drifi gowe fu Yehovah èn wi ben e firi taki wi no ben abi a krakti fu drai go baka na en”, na so Jarosław nanga en wefi Beata e fruteri. *

Wan tra brada di nen Marek, e memre: „Fu di kenki kon na ini a libimakandra èn na ini a politiek fu Polen, meki mi lasi a wan wroko baka a trawan. Mi no ben sabi moro san fu du. Mi ben e frede fu bigin mi eigi bisnis, fu di mi no ben de wan bisnisman. Te fu kaba, mi bosroiti fu bigin wan bisnis, fu di mi ben e denki taki dati ben o yepi mi fu sorgu moro bun gi mi osofamiri. Mi ben e denki tu taki a bosroiti fu mi no ben o abi krakti tapu a matifasi di mi ben abi nanga Yehovah. Baka wan pisi ten mi kon si taki mi ben teki wan don bosroiti.”

Fu di a libi e kon diri moro nanga moro, èn fu di moro nanga moro sma e lasi den wroko, meki son sma e bruya. A sani dati e meki taki den e teki don bosroiti. Furu Kresten brada bosroiti fu wroko moro langa, fu teki ete wan wroko, noso fu bigin den eigi bisnis aladi den no sabi fa fu drai wan bisnis. Den e denki taki te den e meki moro moni, dan den o man sorgu moro bun gi den osofamiri. Den e denki tu taki a sani disi no sa abi krakti tapu a matifasi di den abi nanga Yehovah. Ma awansi wi e sreka sani bun na fesi, toku a swaki ekonomia kan meki taki sani no e waka soleki fa wi ben fruwakti, èn wi kan lasi a matifasi di wi abi nanga Gado. Na so a du kon  taki son Kresten di ben gridi fu meki moni fadon na ini wan trapu, èn a sani dati meki taki den no e teki prati so furu moro na a anbegi fu Yehovah.​—Preik. 9:11, 12.

Son brada nanga sisa e poti so furu prakseri na grontapu sani, taki den no abi ten moro fu studeri Gado Wortu, fu go na den konmakandra, noso fu teki prati na a preikiwroko. A de krin taki te Kresten no e du den sani dati moro, dan dati sa abi krakti tapu na anbegi fu den èn tapu a matifasi di den abi nanga Yehovah. Kande den sa lasi warderi tu gi wan tra prenspari matifasi di den abi. Dati na a banti di den abi nanga den wan di de ’na ini a srefi bribi leki den’ (Gal. 6:10). Son Kresten safrisafri e hari densrefi puru fu den Kresten brada nanga sisa. Wi o poti seryusu prakseri na a tori disi.

A frantwortu di wi abi fu yepi wi Kresten brada nanga sisa

Leki Kresten brada nanga sisa, wi abi furu okasi fu sori lobi gi makandra (Rom. 13:8). A kan taki a gemeente fu yu abi ’mofinawan di e bari suku yepi’ (Yob 29:12). Kande sonwan fu den na pôtisma. Na apostel Yohanes ben memre wi taki disi e gi wi moi okasi fu yepi den. A ben taki: „Efu wan sma abi grontapu gudu èn a e si taki en brada de na nowtu, ma a no wani abi sari-ati gi en, dan fa a lobi fu Gado e tan na ini en?”​—1 Yoh. 3:17.

Kande yu ben de klariklari fu yepi den wan di ben abi den nowtu dati. Ma wi no e suku nomo fu gi wi Kresten brada nanga sisa sani di den abi fanowdu. Kande sonwan fu den e bari suku yepi fu di den de den wawan, noso fu di den lasi-ati. Kande den e firi leki den no warti noti, kande den abi wan seryusu siki, noso kande wan lobiwan fu den dede. Ma wan fasi fa wi kan gi den deki-ati, na te wi e arki den èn te wi e taki nanga den. Na so wi o man trowstu den èn wi o man yepi den fu tan abi wan bun matifasi nanga Gado (1 Tes. 5:14). A sani disi e meki furu tron taki wi e kon abi moro lobi gi wi brada nanga sisa.

Spesrutu den owruman abi na okasi fu arki den sma disi na wan lobi-ati fasi, fu sori den taki den e frustan fa den e firi, èn fu gebroiki Bijbel fu gi den rai na wan lobi-ati fasi (Tori. 20:28). Na so owruman kan teki na eksempre fu na apostel Paulus di ben abi „dipi firi” gi den Kresten brada nanga sisa fu en.​—1 Tes. 2:7, 8.

Ma efu wan Kresten e drifi gowe fu na ipi, dan fa a o man de wan yepi gi den Kresten brada nanga sisa fu en? Srefi owruman kan brokokindi gi a tesi di den e kisi fu feti baka gudu. Fa a de te wan Kresten e broko kindi gi so wan tesi?

Te den broko-ede fu a libi e meki wi lasi-ati

Soleki fa wi si kaba, dan a bribi fu wi kan kon swaki te wi e broko wi ede tumusi nanga den sorgu fu a libi (Mat. 13:22). Marek, di ben kari kaba na ini na artikel disi, e taki: „Di mi lasi a bisnis fu mi, dan mi bosroiti fu go na wan tra kondre pe mi ben kan feni wan wroko di ben e pai bun. Mi  gowe dri mun nomo, baka dati mi gowe ete dri mun, èn so moro fara. Te mi ben e drai go baka na oso, dan mi ben e tan wan syatu pisi ten nomo. A sani disi no ben bun gi a wefi fu mi di no de na bribi.”

Na osofamiri libi no ben de a wan-enkri sani di ben e go na baka. Marek e fruteri moro fara: „Boiti taki mi ben musu wroko langa yuru na ini wan faya presi, mi ben musu wroko nanga sma di no ben abi maniri, èn di ben e suku nomo fu kori trawan. Den ben e du leki ogriman. Mi ben e firi brokosaka èn mi no ben man nanga den sma disi. Fu di mi no ben man feni ten fu sorgu misrefi bun, meki mi bigin tweifri efu mi ben o man dini trawan.”

Den sari bakapisi fu den bosroiti di Marek ben teki musu gi wi deki-ati fu denki bun fosi wi e teki bosroiti. Kande a gersi leki yu no sa abi moni problema moro te yu e froisi go na wan tra kondre, ma yu denki taki yu no sa kisi fu du nanga tra problema? Fu eksempre, sortu krakti a bosroiti di wi teki o abi tapu a matifasi di wi abi nanga Yehovah? Sortu krakti a o abi tapu wi? Wi ben o tan abi demakandra nanga a gemeente? Wi ben o tan warderi a grani di wi abi fu dini wi Kresten brada nanga sisa?​—1 Tim. 3:2-5.

Ma soleki fa yu sabi kande, dan a no soso sma di e wroko na ini wan tra kondre, e poti tumusi furu prakseri na a grontapuwroko fu den. Luku na eksempre fu Jarosław nanga Beata. Jarosław e taki: „Na ini a bigin, ala sani ben e waka bun. Syatu baka di wi trow, wi bigin wan pikin bisnis. Wi ben e tanapu na strati nanga wan wagi e seri brede, èn wi ben e tanapu na wan presi pe furu sma ben e waka. Fu di wi bigin meki furu moni, meki wi bosroiti fu meki a bisnis fu wi kon moro bigi. Ma a sani dati meki taki wi no ben abi furu ten moro. Sobun wi bigin misi den Kresten konmakandra. Fosi yu denki, mi tapu fu pionier èn fu dini leki dinari ini a diniwroko. Fu di wi ben breiti taki wi ben e meki furu moni, meki wi opo wan bigi wenkri èn wi go wroko makandra nanga wan sma di no de na bribi. Heri esi mi bigin go na tra kondre fu teken kontrakti di ben o gi mi okasi fu meki milyunmilyun dala. Mi no ben de na oso furu èn mi, mi wefi, nanga mi umapikin no ben e libi moro leki osofamiri. Te fu kaba a bisnis fu wi di ben e waka bun, meki taki safrisafri wi tapu fu dini Yehovah. Fu di wi no ben e go moro na a gemeente, meki wi no ben e prakseri den Kresten brada nanga sisa fu wi srefisrefi.”

San wi e leri fu a tori disi? Wan Kresten di e angri fu seti en eigi „paradijs”, kan fadon na ini trapu, èn a kan bigin denki taki en libi seti kaba. Iya, a sma disi kan lasi sosrefi den „krosi” fu en, noso a grani di a abi fu de wan Kresten (Openb. 16:15). Dati kan meki taki wi no abi demakandra moro nanga den Kresten brada nanga sisa di wi ben man yepi fosi.

Ondrosuku a situwâsi fu yu nanga wan krin ati

Kande wi sa taki: ’A sani dati no o pasa nanga mi.’ Ma a bun te wi alamala e denki seryusu omeni sani wi abi fanowdu trutru na ini a libi. Paulus ben skrifi: „Wi no tyari noti kon na grontapu èn wi no man teki noti fu en tyari gowe tu. Fu dati ede, efu wi abi nyanyan, krosi nanga wan presi fu tan, dan wi musu de tevrede nanga den sani disi” (1 Tim. 6:7, 8). A tru taki na ini ala kondre a libi de tra fasi. San sma e si leki wan pôti libi na ini wan gudu kondre, sma na ini furu pôti kondre ben kan si leki wan gudu libi.

Awansi fa a libi de na ini a kondre pe wi e tan, a bun fu poti prakseri na den wortu di Paulus e taki moro fara: „Den sma di wani kon gudu nomonomo e kisi tesi èn den e go na ini wan trapu; den e kisi wan lo dondon èn takru lostu di e tyari den go pori krinkrin” (1 Tim. 6:9). Wan meti no man si wan trapu wantewante. A trapu meki fu kisi a meti sondro taki a ben fruwakti dati. Fa wi kan sorgu taki „takru lostu” no e tron wan trapu gi wi?

Te wi e luku san na den moro prenspari sani na ini a libi, dan dati o yepi wi fu gebroiki moro ten gi Kownukondre afersi, èn wi sa gebroiki moro ten tu fu studeri Gado Wortu. Te wan Kresten e studeri Gado Wortu èn te a e begi Gado, dan dati kan yepi en fu tron wan sma di ’bun dorodoro èn di de srekasreka’ fu yepi trawan.​—2 Tim. 2:15; 3:17.

Lobi-ati owruman du muiti wan tu yari langa  fu gi Jarosław deki-ati èn fu tranga a bribi fu en. A sani dati yepi en fu tyari bigi kenki kon. A e taki: „Wan leisi di den owruman ben e taki nanga mi, dan den poti prakseri na wan tori na ini Bijbel di naki mi ati trutru. A tori dati abi fu du nanga wan gudu yonkuman di ben wani libi fu têgo, ma di no ben wani drai baka gi den gudu fu en. Baka dati den brada aksi mi na wan switi fasi san mi ben e leri fu a tori dati. A sani dati opo mi ai wantewante!”​—Odo 11:28; Mark. 10:17-22.

Jarosław ben luku a situwâsi fu en nanga wan krin ati èn a bosroiti fu no abi so wan bigi bisnis moro. Na ini wan pisi ten fu tu yari, en nanga en osofamiri kon abi wan bun matifasi baka nanga Gado. Now a e dini den brada fu en leki wan owruman. Jarosław e taki: „Te Kresten brada e bigin poti so furu prakseri na a bisnis fu den taki a matifasi di den abi nanga Yehovah e kon swaki, dan mi e gebroiki mi eigi ondrofenitori fu sori den taki a no de wan koni sani kwetikweti fu kon na ondro a srefi tyatyari nanga sma di no de na bribi. A no makriki fu libi den okasi di yu e kisi fu meki moro moni, èn a kan pasa makriki tu taki yu e bigin handri na wan krukafasi.”​—2 Kor. 6:14.

Marek kon leri nanga tranga tu. Aladi a ben man sorgu en osofamiri nanga a bun wroko di a ben abi na ini wan tra kondre, toku a matifasi di a ben abi nanga Gado èn nanga den Kresten brada nanga sisa fu en kon swaki. Baka wan pisi ten, a go luku san ben musu de den moro prenspari sani na ini a libi fu en. A e taki: „Na ini den yari di pasa, a libi fu mi ben gersi a di fu Baruk fu owruten di ben ’tan suku bigi sani gi ensrefi’. Te fu kaba, mi begi Yehovah fu fruteri en fu den broko-ede fu mi, èn now mi e firi taki a bribi fu mi kon tranga baka” (Yer. 45:1-5). Now Marek e meki muiti fu doro den markitiki fu du wan „tumusi bun wroko”, namku fu dini leki owruman na ini a gemeente.​—1 Tim. 3:1.

Luku a warskow di Marek e gi den wan di e prakseri fu go na wan tra kondre fu feni wan wroko di e pai moro moni: „Te yu de na ini wan tra kondre, dan a makriki fu fadon na ini a trapu fu na ogri grontapu disi. Te yu no sabi taki a tongo fu den sma drape, dan yu no o man taki nanga den. Kande yu e drai go baka na oso nanga moni, ma a bribi fu yu kan kon swaki tu, èn a kan teki wan heri pisi ten fosi yu e kisi wan bun matifasi baka nanga Gado.”

Te wi no e meki a grontapuwroko fu wi tapu wi fu tyari a frantwortu di wi abi fu yepi wi Kresten brada nanga sisa, dan dati o yepi wi fu plisi Yehovah. Boiti dati, wi sa de wan eksempre gi trawan èn dati o yepi den fu teki wan bun bosroiti. Den wan di e firi brokosaka abi yepi fanowdu fu den Kresten brada nanga sisa fu den. Wi musu sori taki wi e firi gi den, èn wi musu de wan bun eksempre gi den. Gemeente owruman nanga tra lepi Kresten kan yepi Kresten brada nanga sisa fu tan abi wan bun matifasi nanga Gado, èn fu no broko den ede tumusi nanga den sorgu fu a libi.—Hebr. 13:7.

Iya, meki wi noiti no poti so furu prakseri na a grontapuwroko fu wi taki wi e gowe libi den Kresten brada nanga sisa fu wi (Fil. 1:10). Na presi fu dati, meki wi poti Kownukondre afersi na a fosi presi na ini wi libi, so taki wi kan de sma di „gudu na ini Gado ai”.​—Luk. 12:21.

[Futuwortu]

[Prenki na tapu bladzijde 21]

A grontapuwroko fu yu e tapu yu fu go na den gemeente konmakandra?

[Prenki na tapu bladzijde 23]

Yu e warderi den okasi di yu abi fu yepi yu Kresten brada nanga sisa?