Tan na ai neleki Yeremia

„Mi [Yehovah] o tan na ai, bika mi o du nomonomo san mi taki.”​—YER. 1:12.

1, 2. San a tan di Yehovah e „tan na ai” abi fu du nanga na amandrabon?

A PISI TEN fu yanuari nanga februari, na wan kowru pisi ten na ini Libanon nanga Israel. Na a ten dati den bon no e kisi bromki ete. Ma dati no de so nanga na amandrabon. A bon disi abi moi rediredi nanga weti bromki. Na amandrabon na wan fu den fosi bon di e kisi bromki, fosi a weer e kon moro waran. Dati meki a Hebrew nen fu a bon disi trutru wani taki „a wan di e wiki”.

² Di Yehovah poti Yeremia leki profeiti, dan a ben fiti taki a gebroiki a sani disi fu na amandrabon fu prenki wan prenspari tru tori. Na a bigin fu a diniwroko fu en, a profeiti ben kisi wan fisyun pe a ben si wan sproiti fu na amandrabon dati. San a fisyun dati ben wani taki? Yehovah ben fruklari: „Mi o tan na ai, bika mi o du nomonomo san mi taki” (Yer. 1:11, 12). Neleki fa na amandrabon ben e „wiki” fruku, na so Yehovah ben e „opo fruku” tu fu seni en profeiti fu warskow a pipel fu en gi den takru bakapisi di den ben o kisi te den ben o trangayesi Gado (Yer. 7:25). Èn a no ben o rostu, ma a ben o „tan na ai” teleki a profeiti wortu fu en ben kon tru. Na ini 607 bifo Krestes, na a reti ten, Yehovah strafu a pipel fu Yuda di ben drai baka gi a tru anbegi.

3. Sortu dyaranti wi kan abi te a abi fu du nanga Yehovah?

³ Na ini a ten disi, Yehovah e tan na ai tu fu du a wani fu en. A de nomonomo fu du san a taki. Sortu krakti dati abi na yu tapu? Yu e bribi taki nownowde na ini 2011 Yehovah ’de na ai’ fu du san a pramisi? Te wi e tweifri efu den pramisi fu Yehovah o kon tru, dan disi na a  ten gi wi fu wiki (Rom. 13:11). Leki profeiti fu Yehovah, Yeremia sorgu taki a tan na ai. Te wi e ondrosuku fa Yeremia tan na ai fu du a wroko di Gado ben gi en fu du, èn fu san ede a ben du dati, dan dati o yepi wi fu si fa wi kan tan du a wroko di Yehovah gi wi fu du.

Wan tumusi prenspari boskopu

4. Sortu sani ben o meki en muilek gi Yeremia fu tyari a boskopu fu en, èn fu san ede a boskopu dati ben de wan tumusi prenspariwan?

⁴ Yeremia ben kan abi sowan 25 yari di Yehovah poti en na wroko leki waktiman (Yer. 1:1, 2). Ma a ben feni taki a ben de wan boi nomo di no ben sabi srefisrefi fa fu taki nanga den owru man fu a pipel di ben de lepilepi man di ben abi hei posisi (Yer. 1:6). A ben musu tyari seryusu krutuboskopu gi den sma, èn den boskopu dati ben e sori taki tumusi takru sani ben o miti den. Den boskopu dati ben de spesrutu gi den priester, den falsi profeiti, den tiriman, nanga den wan di ’ben e lon go du san trawan ben e du’ èn di ben e tan „trangayesi” Gado (Yer. 6:13; 8:5, 6). A tumusi moi tempel fu Kownu Salomo di ben de a moro prenspari presi pe sma ben e anbegi a tru Gado pikinmoro fo hondro yari langa, ben o kisi pori te fu kaba. Yerusalem nanga Yuda ben o tron wan brokopresi, èn den sma fu den foto disi ben o tron katiboman. A de krin taki a boskopu di Yeremia ben musu tyari, ben de wan tumusi prenspari boskopu!

5, 6. (a) Fa Yehovah e gebroiki a Yeremia-grupu na ini a ten disi? (b) Na sortu sani na artikel disi o poti prakseri?

⁵ Na ini a ten disi, Yehovah sorgu na wan lobi-ati fasi taki wan grupu salfu Kresten di de leki waktiman, e warskow libisma taki Gado o krutu grontapu. Furu tenti yari kaba, a Yeremia-grupu e gi sma deki-ati fu poti prakseri na a ten di wi e libi na ini (Yer. 6:17). Bijbel e sori krin taki Yehovah no e draidrai. A dei fu en o kon na a yoisti ten, na wan ten di libisma no sa fruwakti.​—Sef. 3:8; Mark. 13:33; 2 Petr. 3:9, 10.

⁶ Hori na prakseri taki Yehovah de na ai èn taki a o tyari a nyun grontapu fu en kon na a yoisti ten. A sani dati musu gi den memre fu a Yeremia-grupu deki-ati. Boiti dati, a musu yepi den kompe fu den di e dini Gado fayafaya, fu tan hori na prakseri taki a boskopu fu den e kon moro prenspari dei fu dei. Sortu krakti dati abi na yu tapu? Yesus ben sori taki ala sma musu bosroiti efu den o dini Yehovah. Wi o poti prakseri na dri sani di yepi Yeremia fu tan na ai fu du a wroko di a ben kisi fu du. Na so wi o man teki na eksempre fu en.

Yeremia ben lobi sma

7. Fruklari fa a lobi di Yeremia ben abi gi sma, meki taki a preiki a boskopu gi den aladi tesi ben e miti en.

⁷ San ben gi Yeremia deki-ati fu preiki a boskopu fu en, aladi a ben kisi fu du nanga tesi? Na a lobi di a ben abi gi sma. Yeremia ben sabi taki moro furu na falsi skapuman ben de frantwortu gi den problema di ben e miti a pipel (Yer. 23:1, 2). Fu di a ben sabi dati, meki a sori lobi nanga sari-ati gi den sma. A ben wani a pipel fu yere san Gado ben taki so taki den ben kan tan na libi. A ben e broko en ede so te, taki a krei fu di rampu ben o miti den. (Leisi Yeremia 8:21; 9:1.) A buku Kragisingi e fruteri finifini fa Yeremia ben lobi Yehovah nanga a pipel fu en (Krag. 4:6, 9). Te yu e si taki sma na ini a ten disi ’e pina èn e waka bruyabruya leki skapu di no abi skapuman’, dan yu no e angri fu fruteri den a bun nyunsu fu Gado Kownukondre fu trowstu den?​—Mat. 9:36.

8. San e sori taki Yeremia no kisi bita-ati aladi a ben nyan pina?

⁸ Den srefi sma di Yeremia ben wani yepi ben e pina en, ma a no suku fu pai ogri nanga ogri, èn a no kisi bita-ati. A ben abi langa pasensi nanga switifasi srefi gi a takru kownu Sedekia! Aladi Sedekia gi en abra na sma meki den kiri en, toku Yeremia begi en fu gi yesi na a sten fu Yehovah (Yer. 38:4, 5, 19, 20). Wi lobi trawan na a srefi fasi fa Yeremia ben lobi sma?

 Gado ben gi en deki-ati

9. Fa wi du sabi taki a deki-ati di Yeremia ben abi ben e komoto fu Gado?

⁹ Di Yehovah taki nanga Yeremia fu a fosi leisi, dan Yeremia ben e suku wan fasi fu no du a wroko di a ben kisi fu du. Disi e sori taki a deki-ati di Yeremia ben sori di a ben du a wroko fu en, no ben kon fu ensrefi. Fu taki en leti, a bigi krakti di a ben sori na a ten di a ben e dini leki profeiti, ben e kon fu di a ben e frutrow dorodoro tapu Gado. A tru taki Yehovah ben e horibaka gi a profeiti „leki wan tranga fetiman”, fu di a ben e yepi en, èn fu di a tranga en fu du a wroko di a ben musu du (Yer. 20:11). Sma ben sabi Yeremia leki wan man di ben abi so furu deki-ati, taki di Yesus ben e du a diniwroko fu en na grontapu, den ben denki taki na Yeremia ben kisi wan opobaka!​—Mat. 16:13, 14.

10. Fu san ede wi kan taki dati den salfuwan di de na grontapu ete abi a frantwortu fu krutu „den pipel nanga den kownukondre”?

¹⁰ Leki „Kownu fu den pipel”, Yehovah ben gi Yeremia a wroko fu tyari wan krutu boskopu gi den pipel èn gi den kownukondre (Yer. 10:6, 7). Ma fu san ede wi kan taki dati den salfuwan di de ete na grontapu abi a frantwortu fu krutu „den pipel nanga den kownukondre”? (Yer. 1:10) Neleki fa a ben de nanga a profeiti fu owruten, na so a Moro Hei Masra fu hemel nanga grontapu gi a Yeremia-grupu wan wroko fu du. Sobun, den salfu futuboi fu Gado abi a frantwortu fu meki krutuboskopu bekènti na ala pipel nanga kownukondre na heri grontapu. Fu dati ede, a Yeremia-grupu e gebroiki a Wortu fu en di makriki fu frustan, fu meki bekènti taki den pipel nanga den kownukondre o rutu puru èn taki den o kisi pori na wan ten di Gado feni bun. Den e meki bekènti tu taki Gado o du den sani disi na a fasi fa a bosroiti fu du dati (Yer. 18:7-10; Openb. 11:18). A Yeremia-grupu abi a fasti bosroiti fu no draidrai fu du a wroko di Gado gi den fu meki den krutuboskopu fu en bekènti na heri grontapu.

11. San o yepi wi fu tan preiki doronomo te wi de na ini muilek situwâsi?

¹¹ A no e fruwondru wi taki son sma e lasi-ati son leisi te den e kisi gens, te trawan no wani arki a boskopu fu den, noso te den de na ini muilek situwâsi (2 Kor. 1:8). Ma neleki Yeremia wi musu tan horidoro. No lasi-ati. Meki ibriwan fu wi tan begi Gado, meki wi frutrow na en tapu, èn meki wi teki „deki-ati” aladi wi e suku yepi na en (1 Tes. 2:2). Fu di wi na tru anbegiman, meki wi musu tan na ai fu tyari den frantwortu di Gado gi wi. Wi musu abi a fasti bosroiti fu tan preiki doronomo taki Krestenhèit o kisi pori, soleki fa dati ben pasa kaba nanga Yerusalem di ben drai baka gi Gado. Boiti taki a Yeremia-grupu e fruteri ala sma fu „a yari fu Yehovah en bun-ati”, den e fruteri den tu fu „a dei fu wi Gado en atibron”.​—Yes. 61:1, 2; 2 Kor. 6:2.

Yeremia ben e prisiri srefisrefi

12. Fu san ede wi kan taki dati Yeremia ben tan nanga prisiri, èn sortu prenspari sani yepi en fu du dati?

¹² A wroko di Yeremia ben e du ben e gi en prisiri. A ben taigi Yehovah: „Di mi feni den wortu fu yu, mi nyan den. Dan mi ati bigin prisiri. Iya, mi e prisiri srefisrefi, bika mi e tyari a nen fu yu, Yehovah” (Yer. 15:16). Yeremia ben e si en leki wan grani fu teki presi gi a tru Gado èn fu preiki a wortu fu en. A moi fu sabi taki di Yeremia ben e poti prakseri na den sma di ben e spotu en, dan a lasi a prisiri fu en. Di a bigin prakseri fa a boskopu fu en ben moi èn fa a ben prenspari, dan a kisi prisiri baka.—Yer. 20:8, 9.

13. Fu san ede wi musu poti prakseri na den dipi tru tori fu Bijbel fu man tan nanga prisiri?

¹³ Fu man tan kisi prisiri fu a preikiwroko na ini a ten disi, dan wi musu nyan „tranga nyanyan”, noso wi musu kon sabi den dipi tru tori fu Gado Wortu (Hebr. 5:14). Te wi e studeri Gado Wortu finifini, dan dati e tranga a bribi fu wi (Kol. 2:6, 7). A e meki wi kon frustan fa den sani di wi e du e meki Yehovah firi.  Te a muilek gi wi fu feni ten fu leisi èn fu studeri Bijbel, dan wi musu tyari wan tu kenki kon. Te wi e teki awansi wan tu miniti nomo wan dei fu studeri èn fu denki dipi fu sani, dan dati o tyari wi moro krosibei na Yehovah. A o yepi wi tu fu „prisiri srefisrefi”, neleki Yeremia.

14, 15. (a) Sortu fasi Yeremia ben kweki fu di a ben tan du a wroko di a ben kisi fu du? (b) Te a abi fu du nanga a preikiwroko, dan san a pipel fu Gado na ini a ten disi e frustan?

¹⁴ Yeremia trutru tan fruteri sma den warskow fu Yehovah èn a tan meki den krutuboskopu bekènti. Ma toku a moro prenspari sani gi en ben de a wroko di a ben kisi fu „bow èn [fu] prani” (Yer. 1:10). A wroko di a ben kisi fu bow èn fu prani ben tyari bun bakapisi kon. Son Dyu nanga son sma di no ben de Israelsma ben tan na libi baka di Yerusalem kisi pori na ini 607 bifo Krestes. Wi sabi fu den Rekabsma, fu Ebed-Meilek, èn fu Baruk (Yer. 35:19; 39:15-18; 43:5-7). Den mati disi fu Yeremia di ben e tan anbegi Gado fayafaya èn di ben abi frede gi En, e prenki den wan di abi a howpu fu libi na grontapu, èn di de mati fu a Yeremia-grupu. A Yeremia-grupu breiti srefisrefi taki den man tranga a „bigi ipi” disi (Openb. 7:9). Na so a de tu taki den bun  kompe disi fu den salfuwan e prisiri srefisrefi fu yepi reti-ati sma fu kon sabi den tru tori fu Bijbel.

¹⁵ A pipel fu Gado e frustan taki a preikiwroko di den e du, a no soso fu a bun fu den sma di e yere en. A de sosrefi wan fasi fa wi e anbegi a Gado fu wi. Awansi sma e arki wi noso awansi den no e arki, wi e kisi bigi prisiri fu di wi e du santa diniwroko gi Yehovah nanga yepi fu a preikiwroko fu wi.​—Ps. 71:23; leisi Romesma 1:9.

„Tan na ai” fu du a wroko di yu kisi fu du!

16, 17. Fa Openbaring 17:10 nanga Habakuk 2:3 e sori taki a ten kon syatu?

¹⁶ Te wi e luku a profeititori di skrifi na Openbaring 17:10, dan wi e si krin taki a ten kon syatu. A di fu seibi kownu, noso na Anglo-Amerkan Grontapumakti, kon de na ini a ten fu wi. Luku san Bijbel e taki fu a grontapumakti dati: „Te a [di fu seibi kownu] kon, dan a musu tan wan syatu pisi ten nomo.” Nownowde a musu fu de so taki a „syatu pisi ten” dati e kon na wan kaba. Te a abi fu du nanga na ogri sistema disi, dan a profeiti Habakuk e gi wi a dyaranti disi: „A fisyun o kon tru na wan spesrutu ten . . . Un musu tan fruwakti en awinsi a no pasa ete, bika a o kon tru nomonomo A no o kon lati.”​—Hab. 2:3.

¹⁷ Aksi yusrefi a sani disi: ’A fasi fa mi e libi e sori taki mi sabi trutru taki a ten kon syatu? A e sori taki mi e fruwakti taki a kaba o kon heri esi? Fa a de nanga den bosroiti di mi e teki èn nanga den sani di prenspari gi mi? Den sani dati e sori taki mi no e fruwakti taki a kaba o kon heri esi, noso den e sori taki mi no sabi seiker efu a kaba o kon?’

18, 19. Fu san ede now a no a ten fu teki en moro safri?

¹⁸ Ma a wroko fu a waktiman-grupu no kaba ete. (Leisi Yeremia 1:17-19.) A e gi prisiri trutru taki den salfuwan di de ete na grontapu e tanapu kánkan neleki „wan isri postu” nanga „wan tranga foto”! Den ’weri a waarheid leki wan banti na den mindribere’ fu di den e meki a Wortu fu Gado tranga den teleki den klari a wroko di Gado gi den fu du (Ef. 6:14). Nanga a srefi fasti bosroiti dati, den wan fu a bigi ipi e yepi a Yeremia-grupu fu du a wroko di Gado gi den.

¹⁹ Now a no a ten fu teki en moro safri na ini a Kownukondre preikiwroko, ma wi musu poti prakseri na a sani di skrifi na Yeremia 12:5. (Leisi en.) Wi alamala musu horidoro na ondro tesi. Wi kan agersi den tesi disi nanga ’sma di e lon wan streilon’ makandra nanga wi. Ma fu di a „bigi banawtu” e kon moro krosibei, dan wi kan fruwakti taki wi o kisi moro tesi (Mat. 24:21). Wi kan agersi a muiti di wi e meki fu pasa den tesi di o miti wi, nanga a strei di wi e „strei lon nanga asi”. Wan sma di ben o strei lon nanga asi, ben o abi moro krakti fanowdu fu man horidoro. Dati meki a bun te wi e horidoro na ondro den tesi di wi e kisi now, fu di dati kan sreka wi fu horidoro te problema miti wi na ini a ten di e kon.

20. Sortu fasti bosroiti yu abi?

²⁰ Neleki Yeremia, wi alamala kan abi bun bakapisi na ini a wroko di wi kisi fu preiki! Fu di Yeremia ben abi lobi, deki-ati, nanga prisiri, meki a ben man du a diniwroko fu en 67 yari langa, èn a du dati nanga en heri ati. A tumusi moi amandrabon e memre wi taki Yehovah o „tan na ai” fu man du san a ben taki. Fu dati ede, wi abi bun reide fu du a srefi. Yeremia ben „tan na ai”, èn wi kan du dati tu.

Yu e memre disi ete?

• Fa a lobi di Yeremia ben abi, yepi en fu „tan na ai” fu du a wroko fu en?

• Fu san ede wi abi a deki-ati fu Gado fanowdu?

• San yepi Yeremia fu tan nanga prisiri?

• Fu san ede yu wani „tan na ai”?

[Aksi fu a tori disi]

[Prenki na tapu bladzijde 31]

Yu o tan preiki awansi yu e kisi gens?