Yu abi reide fu prisiri

A NO de fu taki dati Gado meki sani na wan orga fasi. Wi kan si dati te wi e luku a moro pikin libisani, te go miti den bun bigi stari sistema di seti na ini grupu èn na ini moro bigi grupu. A sani disi no e fruwondru wi kwetikweti, fu di wi Mekiman „a no wan Gado fu bruya” (1 Kor. 14:33). A fasi fa Gado orga a pipel fu en so taki den kan anbegi en, e naki wi ati tu. Luku san Yehovah du. A seti wan organisâsi di abi hondrohondro milyun memre na hemel èn na grontapu. Den memre disi na engel nanga libisma di abi a grani fu teki den eigi bosroiti, èn den alamala e dini Gado na ini wánfasi. Dati na wan moi sani trutru!

Na ini Israel fu owruten, Yerusalem ben e prenki a pisi fu Gado en organisâsi na grontapu. Drape a tempel fu Yehovah ben de, èn na drape a kownu di a ben salfu ben e tan tu. Luku san wan Israelsma di ben de wan katiboman na ini Babilon, ben taki fu a santa foto dati: „Efu mi ben o frigiti yu, iya, efu mi no ben o si Yerusalem leki a moro prenspari sani di musu gi mi prisiri, dan moro betre mi tongo fasi na tapusei na ini mi mofo.”​—Ps. 137:6.

Na so yu e denki fu na organisâsi fu Gado na ini a ten disi? A e gi yu prisiri moro leki iniwan tra sani? Den pikin fu yu sabi na historia fu a pisi fu Gado en organisâsi na grontapu? Den sabi fa na organisâsi disi e wroko? Den e frustan taki den na memre fu na organisâsi fu Yehovah Kotoigi di de na heri grontapu? (1 Petr. 2:17) Na ini na artikel disi wi sa poti prakseri na wan tu sani di abi fu du nanga na organisâsi fu Yehovah. A ben o bun fu taki fu den sani dati te yu e hori na Osofamiri Anbegi fu yu. Dati kan yepi yu osofamiri fu kon sabi moro fu na organisâsi fu Yehovah, èn fu kon abi moro warderi gi na organisâsi disi.

Prakseri den sani di Gado du „langa ten pasa”

Ibri yari, osofamiri na ini Israel ben e kon makandra fu hori a Paskafesa. Di a fesa disi ben seti, dan Moses taigi a pipel: „Efu yu manpikin aksi yu bakaten: ’Fu san ede unu e du den sani disi?’, dan un musu taigi en: ’Nanga a krakti fu en anu, Yehovah ben puru wi fu Egepte pe wi ben de na ini katibo’” (Ex. 13:14). Den Israelsma no ben musu frigiti san Yehovah ben du gi den. A no de fu taki dati furu papa na ini Israel ben gi yesi na a komando di Moses ben gi den. Furu yari baka dati, wan Israelsma ben begi: „Gado, wi yere fu yu. Den afo fu wi fruteri wi san yu du na ini a ten fu den, iya, san yu du langa ten pasa kaba.”​—Ps. 44:1.

Wan yonguwan na ini a ten disi ben kan si a historia fu Yehovah Kotoigi na ini den 100 yari di pasa, leki sani fu „bun langa ten pasa”. Fa yu kan yepi den pikin fu yu fu kon si den tori disi leki sani di pasa trutru? Fu man du dati, dan son papa nanga mama gebroiki a buku Jehovah’s Getuigen — Verkondigers van Gods Koninkrijk, a Jaarboek, sosrefi ondrofenitori di kon na doro na ini den tijdschrift fu wi, nanga tra publikâsi di e fruteri fa sani waka na ini na organisâsi fu wi na ini a ten di pasa. Son papa nanga mama e gebroiki sosrefi a nyun DVD fu wi di abi fu du nanga a pipel fu Gado na ini a ten disi. Te osofamiri e luku video di e fruteri fa sma frufolgu wi Kresten brada nanga sisa na ini Sovjet Unie èn na ini Doisrikondre na a ten fu a Nazi tirimakti, dan dati o leri den fu frutrow na tapu Yehovah te den e kisi tesi. Gebroiki den sani dati te yu e hori na Osofamiri Anbegi. Dati sa tranga a bribi fu den pikin fu yu, so taki den kan tan gi yesi na Gado te den e kisi tesi.

Ma te yu e fruteri yonguwan langabere tori di abi fu du nanga a historia fu na organisâsi, dan den kan fuga makriki. Fu dati ede, gi den na okasi fu teki prati na a Osofamiri Anbegi. Fu eksempre, yu kan aksi a manpikin fu yu fu taki sortu kondre e hari en prakseri. Meki a ondrosuku a historia fu a pipel fu Gado na ini kondre dati, èn meki a fruteri na osofamiri wan tu fu den sani di a kon sabi. Yu abi Kresten brada nanga sisa na ini  yu gemeente di e dini Gado nanga den heri ati furu yari langa kaba? Kande yu kan aksi den wan leisi fu kon na yu oso te unu o hori na Osofamiri Anbegi. Yu kan meki na umapikin fu yu poti aksi gi den so taki den kan fruteri den ondrofenitori fu den. Noso yu kan meki yu pikin meki prenki di abi fu du nanga prenspari sani di pasa na ini na organisâsi. Fu eksempre, den kan teken fa sma ben e bow wan bijkantoro, den kan teken brada nanga sisa di de na wan internationaal kongres, noso den kan teken fa brada nanga sisa ben e gebroiki a gramofon na ini na oso-fu-oso preikiwroko.

Leri fa ’ibri pisi e wroko’

Na apostel Paulus ben agersi a Kresten gemeente nanga ’a heri skin di e meki taki a kan gro kon tranga fu di a abi lobi; a skin man du disi fu di a de wán, èn fu di ala den pisi fu en e wroko makandra nanga yepi fu ibri skrufu fu a skin di e du san de fanowdu, aladi ibri pisi fu a skin e wroko na a yoisti fasi’ (Ef. 4:16). Te wi e kon sabi fa a libisma skin e wroko, dan wi e kon abi moro warderi nanga lespeki gi a Mekiman fu wi. Na so a de tu taki te wi e ondrosuku fa na organisâsi fu wi di de na heri grontapu e wroko, dan a e naki wi ati fu sabi taki „Gado e sori koni na furu difrenti fasi”.​—Ef. 3:10.

Yehovah e sori fa na organisâsi fu en, sosrefi a pisi di de na hemel, e wroko. Fu eksempre, a e fruteri wi taki a ben gi Yesus Krestes wan boskopu fosi, èn baka dati Yesus „seni en engel go fu sori Yohanes di de a srafu fu Gado, na openbaring disi nanga yepi fu marki; Yohanes kotoigi fu den sani” dati (Openb. 1:1, 2). Efu Gado e sori wi fa a pisi fu en organisâsi na hemel e wroko, dan yu no denki taki a ben o wani wi fu frustan fa ’ibri pisi na grontapu e wroko’?

Fu eksempre, efu heri esi a kring-opziener o kon na yu gemeente, dan a ben o bun te yu nanga yu osofamiri ben o taki fu den frantwortu di kring-opziener abi, èn fu den blesi di a wroko dati e tyari kon gi den. Fa ibriwan fu wi e kisi wini fu den sani di a kring-opziener e du? Unu kan poti prakseri tu na den aksi disi: Fu san ede a de fanowdu taki wi e meki wan preikiwroko raportu? Pe a moni fu na organisâsi fu Gado e komoto? Fa a Tiri Skin orga, èn fa den e gi wi yeye nyanyan?

Te wi e frustan fa a pipel fu Yehovah orga, dan wi sa kisi wini na dri fasi: Wi sa kisi moro warderi gi den wan di e wroko fu a bun fu wi (1 Tes. 5:12, 13). Wi sa kisi deki-ati fu horibaka gi den seti fu na organisâsi (Tori. 16:4, 5). Leki lasti, wi sa kisi moro frutrow na ini den wan di e teki fesi, te wi e si taki den bosroiti di den e teki èn den sani di den seti e kruderi nanga Bijbel.​—Hebr. 13:7.

„Ondrosuku den fortresi fu en”

„Un pipel, un waka lontu Sion. Teri omeni toren a abi. Poti prakseri na a tranga skotu fu a foto disi. Ondrosuku den fortresi fu en, so taki unu kan fruteri den bakapikin fu unu san unu si” (Ps. 48:12, 13). Na ini a tekst disi, a psalm skrifiman e gi den Israelsma deki-ati fu go luku Yerusalem fu krosibei. Te den Israelsma ben e kon na a santa foto fu hori den alayari fesa, dan den ben e si a tempel di ben moi srefisrefi. Yu kan frustan taki den ben abi wan lo moi tori fu fruteri makandra. A musu fu de so taki den sani dati gi den deki-ati fu ’fruteri den bakapikin fu den san den ben si’.

Prakseri a tori fu na umakownu fu Skeba di no ben wani bribi den sani di a ben yere fu a tumusi bun tiri fu Salomo èn fu a bigi koni fu en. San overtoigi en taki den sani di a ben yere ben de tru tori? A e taki: „Mi no ben wani bribi den sani di sma ben e taki. Dati meki mi kon fu si nanga mi eigi ai efu den sani disi tru” (2 Kron. 9:6). Iya, den sani di wi e si nanga wi „eigi ai” kan naki wi ati trutru.

Fa yu kan yepi den pikin fu yu fu si den wondru sani fu Yehovah en organisâsi nanga den „eigi ai”? Efu wan bijkantoro fu Yehovah Kotoigi de krosibei fu yu oso, dan meki muiti fu go luku a presi. Fu eksempre, Mandy nanga Bethany ben e tan sowan 1500 kilometer fara fu a Bethel-oso na ini a kondre fu den. Ma toku a papa nanga mama fu den ben seti sani furu leisi fu go luku a presi, spesrutu na a pisi ten di den pikin ben e gro kon bigi. Den umapikin disi e fruteri: „Bifo wi ben go luku Bethel, wi ben denki taki a ben soi èn taki a ben de soso gi owru  sma. Ma di wi go drape, wi miti yonguwan di ben e wroko tranga gi Yehovah èn di ben du a wroko dati nanga prisiri! Wi si taki na organisâsi fu Yehovah bigi furu tron moro leki san wi ben e denki, èn ibri leisi te wi ben e go na Bethel, dan dati ben e gi wi moro deki-ati fu dini Yehovah.” Fu di Mandy nanga Bethany si Gado en organisâsi fu krosibei, meki den bigin pionier, èn den kisi a kari srefi fu go yepi wan pisi ten nanga a wroko na Bethel.

Wan tra fasi de fa wi kan „si” na organisâsi fu Yehovah. Israel fu owruten no ben abi a grani dati. Na ini den yari di pasa, a pipel fu Gado kisi video nanga DVD di e poti prakseri na difrenti tori di abi fu du nanga na organisâsi fu Gado. Wan tu fu den na: Jehovah’s Getuigen — Georganiseerd om het goede nieuws te prediken, Onze gehele gemeenschap van broeders, Tot de einden der aarde, èn Verenigd door Goddelijk onderwijs. Den video nanga den DVD disi e fruteri fu brada nanga sisa di e wroko na Bethel, fu Kresten di e go yepi sma di kisi fu du nanga rampu, fu zendeling, èn fu brada di e sreka èn e orga kongres. Te wi e si a tranga wroko di den brada nanga sisa disi e du, dan a no de fu taki dati wi sa kisi moro warderi gi na organisâsi fu wi di de na heri grontapu.

Ibri gemeente fu a pipel fu Gado e yepi na wan prenspari fasi fu preiki a bun nyunsu, èn fu yepi Kresten di e tan na ini a kontren drape. Ma toku a bun fu meki ten so taki yu nanga yu osofamiri kan poti prakseri na „ala den brada fu unu na heri grontapu”. Disi o yepi yu nanga den pikin fu yu fu tan abi „wan tranga bribi”, èn unu sa si taki unu abi reide fu prisiri.​—1 Petr. 5:9.

 [Faki/​Prenki na tapu bladzijde 18]

Na organisâsi fu Gado​—Wan tori di bun fu studeri

Wi abi bun furu sani di e yepi wi alamala fu kon sabi moro fu a historia fu na organisâsi fu Yehovah, èn fu kon sabi fa na organisâsi disi e wroko. Den aksi di e kon now kan yepi yu nanga a sani dati:

☞ Fa a wroko fu den kring-opziener nanga den distrikt-opziener ben bigin?​—De Wachttoren fu 15 november 1996, bladzijde 10-15.

☞ San na wan moi sani fu a „Kinderdag” (A dei fu den Pikin) di ben hori na wan bigi konmakandra na ini 1941?​—A Waktitoren fu 15 yuli 2001, bladzijde 8.

☞ Fa a Tiri Skin e teki bosroiti?​—„Gi kotoigi finifini” fu a Kownukondre fu Gado, bladzijde 108-114.