Mi ondrofeni furu bun sani

Soleki fa Arthur Bonno fruteri

NA INI 1951, mi nanga mi wefi Edith ben de na wan distrikt kongres di den brada meki bekènti taki wan konmakandra ben o hori gi den sma di wani dini leki zendeling.

Mi bari gi mi wefi: „Meki wi go arki!”

Edith piki mi: „Art, a sani dati a no gi wi!”

„Meki wi go Edie, na arki wi o go arki nomo.”

Baka a konmakandra, den brada prati papira gi den sma drape fu poti den nen fu go na Gileadskoro.

Mi taigi Edith: „Meki wi poti wi nen fu go na a skoro.”

„Ma Art, fa wi o du nanga den famiri fu wi?”

Pikinmoro wán nanga afu yari baka a kongres dati, wi go na Gileadskoro èn wi kisi a grani fu dini na ini Ekwador, na Zuid-Amerika.

Soleki fa yu kan si, dan a fasi fa mi ben e taki nanga mi wefi na a kongres ben e sori taki mi ben de wan sma di ben e taki krin san a wani, èn mi ben e bribi taki mi ben man du iniwan sani di mi wani. Ma Edith abi safri-ati èn a no ben e denki tumusi furu fu ensrefi. Edith kweki na ini a pikin foto Elizabeth, na ini Pennsylvania, na Amerkankondre. Noiti a ben go farawe fu pe a ben e tan, èn noiti a ben miti sma fu tra kondre. A ben muilek gi en fu gowe libi den famiri fu en. Toku, a ben de klariklari fu go dini na ini wan tra kondre. Na ini 1954 wi doro na ini Ekwador, èn te nanga now wi e dini drape leki zendeling. Na ini den yari di pasa, wi ondrofeni furu bun sani. Yu wani yere fu wan tu fu den?

Moi sani di wi ben ondrofeni

A fosi presi pe wi ben musu go dini, ben de a mamafoto Quito, di ben de sowan 2850 meter hei, na tapu den Andesbergi. Wi gowe libi a foto Guayaquil, èn a teki wi tu dei fu doro Quito nanga loko èn nanga truck. Now a e teki 30 miniti nomo fu doro drape nanga opolani! Wi dini fo yari na ini Quito, èn noiti wi sa frigiti a ten dati. Baka dati, na ini 1958, wi ondrofeni ete wan bun sani: Wi kisi a kari fu go du kringwroko.

Na a ten dati, tu pikin kring nomo ben de  na ini a heri kondre. Sobun, boiti taki wi ben e fisiti den gemeente, wi ben e preiki furu wiki na ini a yari na ini Ingi foto pe nowan Kotoigi ben e libi. Nofo tron, den presi pe wi ben e tan na ini den foto dati, ben de pikin kamra sondro fensre, di ben abi soso wan bedi na ini. Wi ben e tyari wan udu kisi nanga wi, èn na ini a kisi wi ben abi wan karsinoli stoof, wan patu, preti, wan wasibeki, bedi krosi, wan maskita nèt, krosi, owru koranti, nanga wan tu tra sani. Wi ben gebroiki den koranti fu tapu den olo na ini na oso, fu meki en moro muilek gi den alata fu kon na ini.

Aladi den kamra dati ben dungru èn den ben dotidoti, toku wi ben lobi den moi takimakandra di wi ben abi te neti, te wi ben sidon na tapu a bedi. Na den ten dati, wi ben e nyan pikinso nyanyan di wi ben bori na tapu a karsinoli stoof fu wi. Mi ben de wan man di ben lobi fu taki sani fosi mi denki. Dati meki te wi ben e sidon makandra te neti, dan son leisi mi wefi ben e gebroiki den okasi dati fu sori mi na wan lespeki fasi fa mi ben kan taki moro bun nanga den brada nanga sisa di wi ben e go luku. Mi ben e arki en, èn dati yepi mi fu gi den brada nanga sisa moro deki-ati. Boiti dati, te mi ben de gaw fu taki takru fu wan tra sma, dan noiti mi wefi ben wani taki fu den sani dati. Na so mi leri fu tan abi wan bun denki fu den brada nanga sisa. Ma te wi ben e sidon taki nanga makandra te neti, dan nofo tron wi ben e taki fu den moi sani di wi ben leri fu den artikel na ini A Waktitoren, èn fu den sani di wi ben ondrofeni na ini a preikiwroko a dei dati. Èn wi ondrofeni moi sani trutru!

A fasi fa wi feni Carlos

Di wi ben de na ini a foto Jipijapa, na a westsei fu Ekwador, dan sma gi wi a nen fu wan man di ben wani sabi moro fu Bijbel. Den gi wi soso en nen, namku Carlos Mejía, ma den no taigi wi pe a ben e tan. A mamanten dati, wi gowe libi a kamra di wi ben e yuru, èn fu di wi no ben sabi pe wi ben musu go suku Carlos, meki wi bigin waka. Wi ben musu luku bun nanga wan lo tokotoko olo di ben de na ini a santi pasi, fu di hebi alen ben fadon a neti na fesi. Mi ben e waka na fesi mi wefi, di wantronso mi yere a bari kari mi nen „Art!” Mi drai, èn mi si taki Edie ben tanapu te na en kindi na ini blaka tokotoko. Mi ben wani lafu, ma fu di mi si taki a ben wani krei, dan mi no du dati.

Mi ben man hari en puru na ini a tokotoko, ma den susu fu en tan fasi na ini. Wan boi nanga wan meisje ben tanapu e luku, sobun mi taigi den: „Mi o gi unu wan moni efu unu puru den susu na ini a tokotoko.” Fosi yu denki, den pikin feni den susu, ma Edie ben musu feni wan presi fu wasi en futu. A mama fu den pikin ben e luku san ben pasa, èn a kari wi kon na en oso. A yepi mi wefi fu wasi en futu, aladi den pikin ben e krin den doti susu. Fosi wi gowe, wan moi sani pasa. Mi aksi na uma efu a ben sabi pe wi ben kan feni wan man di nen Carlos Mejía. Na uma fruwondru, èn a taigi wi: „Na mi masra.” Baka wan pisi ten, wi bigin studeri Bijbel nanga a heri osofamiri, èn te fu kaba den alamala teki dopu. Furu yari baka dati, Carlos, en wefi, nanga tu pikin fu den tron spesrutu pionier.

Problema miti wi na pasi, ma brada nanga sisa sori switifasi gi wi

Di wi ben e du a kringwroko, dan wi kisi furu tyalensi. Wi go na den presi nanga yepi fu bus, loko, truck, kruyara, nanga pikin opolani. Wan leisi, distrikt-opziener John McLenachan nanga en wefi Dorothy, go preiki makandra nanga wi na ini fisiman dorpu krosibei fu Kolombia. Wi go na ini wan kruyara di ben abi wan masyin. Sarki di ben bigi leki a kruyara srefi ben e swen leti na sei a boto! Srefi a botoman di sabi tyari a boto skreki di a si fa den sarki bigi, èn esi-esi a tyari a boto go moro krosibei na a syoro.

Ma den tyalensi di wi kisi na ini a kringwroko,  tyari wini kon gi wi trutru. Wi kon sabi brada nanga sisa di ben abi switifasi. Nofo tron den famiri di wi ben tan nanga den, ben de nomonomo taki wi ben e nyan dri leisi wan dei, aladi den ben e nyan wán leisi nomo. Noso den ben e meki wi sribi na ini a wan-enkri bedi di ben de na ini na oso, aladi den ben sribi na tapu a gron. Nofo tron mi wefi ben taki: „Den lobi brada nanga sisa disi yepi mi fu si taki wi no abi furu fanowdu na ini a libi.”

„Wi de klariklari fu du iniwan sani”

Na ini 1960, wi ondrofeni wan tra moi sani; wi kisi a kari fu go dini na a bijkantoro fu Guayaquil. Mi ben e du kantorowroko aladi Edie ben e teki prati na a preikiwroko, makandra nanga wan gemeente krosibei fu a bijkantoro. Noiti mi ben si misrefi leki wan kantorosma, èn mi ben e tweifri pikinso efu mi ben o man du a wroko bun. Ma soleki fa Hebrewsma 13:21 e sori, dan Gado e gi wi ’ala bun sani, so taki wi kan du en wani’. Tu yari baka dati, mi kisi kari fu go teki leri tin mun langa na Gileadskoro. A skoro disi ben o hori na Bethel na ini Brooklyn, na New York. Na a ten dati den wefi fu den brada no ben mag go nanga den. Mi wefi kisi wan brifi di ben komoto na Brooklyn. Den brada drape aksi en fu denki bun efu a ben o man tan tin mun langa sondro en masra.

Edith skrifi den brada: „Mi de seiker taki a sani disi no o de wan makriki sani fu du kwetikweti, ma mi sabi taki Yehovah o yepi wi fu pasa iniwan tyalensi di e miti wi.  . . Wi de klariklari fu teki iniwan grani di wi kan kisi èn wi wani teki sosrefi iniwan okasi di wi kan kisi fu leri tyari den frantwortu fu wi moro bun.” Na a ten di mi ben de na Brooklyn, mi wefi ben e seni wan brifi gi mi ibri wiki.

Wi e dini makandra nanga reti-ati brada nanga sisa

Na ini 1966, mi kon siki èn fu dati ede mi nanga Edith drai go baka na Quito pe wi go doro nanga zendelingwroko makandra nanga den brada nanga sisa fu drape. Den ben e tan gi yesi na Gado trutru!

Wan reti-ati sisa ben abi wan masra di no de na bribi, èn a masra ben gwenti fon en. Wan dei, siksi yuru mamanten, wan sma bèl fu fruteri wi taki a man ben naki a sisa baka. Mi hasti misrefi go drape. Mi no ben man bribi san mi si. A sisa ben didon na tapu a bedi, en heri fesi ben sweri èn en heri skin ben lai nanga soro. En masra ben fon en nanga wan sisibi tiki teleki a tiki broko na tu pisi. Moro lati a dei dati, mi miti en na en oso èn mi taigi en taki a sani di a ben du ben de wan lagi sani. A aksi pardon na ala fasi.

Syatu baka 1970, a gosontu fu mi kon moro bun èn wi bigin baka nanga a kringwroko. A foto Ibarra ben de tu na ini a kring fu wi. Di wi go na a foto dati wan pisi ten bifo 1960, dan tu Kotoigi nomo ben de drape, namku wan zendeling nanga wan brada fu a kontren drape. Fu dati ede, wi ben e angri fu miti den nyun brada nanga sisa di ben tron memre fu a gemeente.

 A fosi leisi di wi go na a konmakandra drape, Brada Rodrigo Vaca ben tanapu na tapu a podium e hori wan aksi-nanga-piki takimakandra. Ibri leisi te a ben e poti wan aksi, dan den sma na ini a zaal ben e bari „Yo, yo!” („Mi, Mi!”) na presi taki den ben e opo den anu go na loktu. Mi nanga Edith luku makandra nanga opo mofo. ’San e pasa dyaso?’, na so mi ben denki. Bakaten, mi kon frustan taki Brada Vaca ben breni, ma te den sma na ini a gemeente ben e bari kari en, dan a ben sabi ibriwan fu den sten. A brada disi na trutru wan skapuman di sabi den skapu fu en! A sani disi meki wi prakseri den sani di Yesus e taki na Yohanes 10:3, 4, 14, pe skrifi taki a Bun Skapuman nanga den skapu sabi makandra heri bun. Na ini a ten disi, Ibarra abi siksi Spanyorotongo gemeente, wán Quichuatongo gemeente, nanga wán dofusma-tongo gemeente. Brada Vaca e tan dini leki wan owruman èn leki spesrutu pionier. *

Wi de nanga tangi gi den bun sani di Yehovah du gi wi

Na ini 1974 Yehovah du ete wan bun gi wi, fu di wi kisi a kari fu go dini baka na Bethel. Drape mi ben musu du kantorowroko, èn bakaten mi tron wan memre fu a Bijkantoro komte. Na a bigin, Edith ben e wroko na ini a kukru, ma bakaten a go wroko na kantoro pe a e dini ete te na a dei fu tide.

Na ini den yari di pasa, wi ben abi a grani fu gi wan switikon na hondrohondro zendeling di kisi leri na Gileadskoro. Den zendeling disi di lepi èn di e wroko fayafaya, de wan eksempre gi den gemeente pe den e go dini. Wi e kisi deki-ati tu fu den dusundusun brada nanga sisa di komoto fu moro leki 30 difrenti kondre, fu dini na ini a kondre disi. A naki wi ati fu si fa den sma disi de klariklari fu libi sani na baka, soso fu dini trawan! Sonwan fu den seri den oso nanga den bisnis fu man kon dyaso fu dini na ini kontren pe moro Kownukondre preikiman de fanowdu. Den bai wagi fu man go preiki na den farawe kontren, den seti nyun gemeente, èn den yepi bow Kownukondre zaal. Furu sisa di no trow, komoto fu tra kondre fu pionier dyaso. Èn a no de fu taki dati den de fayafaya, èn taki den man du a wroko bun!

Fu tru, mi ondrofeni furu bun sani na ini den yari di mi e dini Gado. A moro prenspari blesi di mi abi, na taki mi abi wan bun matifasi nanga Yehovah. Ma mi de nanga tangi tu taki Yehovah gi mi wan wefi ’di e yepi mi’ (Gen. 2:18). Te mi e luku den 69 yari di wi dini Gado makandra leki masra nanga wefi, dan mi e prakseri den wortu fu Odo 18:22, pe skrifi: „Efu wan sma feni wan bun wefi, dan a feni wan bun sani.” A e gi mi prisiri fu de makandra nanga Edith. A yepi mi na someni fasi. A ben lobi en mama srefisrefi tu. Sensi a ten di wi doro na ini Ekwador, mi wefi seni en mama wan brifi ibri wiki teleki 1990, di en mama dede. Na a ten dati, en mama ben abi 97 yari.

Now mi abi 90 yari èn Edith abi 89. A gi wi furu prisiri fu yepi sowan 70 sma fu kon sabi Yehovah. Wi breiti srefisrefi taki wi ben poti wi nen fu go na Gileadskoro, 60 yari pasa. Fu di wi ben teki a bosroiti dati, meki wi ondrofeni furu bun sani na ini wi libi.

[Futuwortu]

[Prenki na tapu bladzijde 29]

Wi de na ini Yankee Stadion, na New York, makandra nanga tra zendeling fu a Gileadklas fu wi, na ini 1958

[Prenki na tapu bladzijde 31]

Wi de na wan Kotoigi osofamiri na a ten di wi ben de na ini a kringwroko, na ini 1959

[Prenki na tapu bladzijde 32]

Wi de na a bijkantoro na ini Ekwador, na ini 2002