Tan du san reti na ini wan grontapu pe furu sma e bedrigi trawan

NELEKI fa a loktu di wi e bro de na ala sei, na so sma di e bedrigi trawan de na ala sei tu. Sma e lei, den e meki trawan pai tumusi furu gi sani, den e fufuru, den no e pai den paiman fu den, èn den e meki bigi fa den e meki moni na wan kruka fasi. Fu di wi e libi na mindri den sortu sma disi, meki nofo tron wi e kisi fu du nanga situwâsi di e meki en muilek gi wi fu tan du san reti. Fa wi kan tan kakafutu gi a firi di wi kan kisi fu bedrigi trawan? Meki wi poti prakseri na dri sani di kan yepi wi. Dati na te wi abi frede gi Yehovah, te wi abi wan konsensi di e wroko bun, èn te wi de tevrede nanga san wi abi.

Wi musu abi frede gi Yehovah

A profeiti Yesaya ben skrifi: „Yehovah na wi Krutuman, Yehovah na a sma di e gi wi wèt, Yehovah na wi Kownu” (Yes. 33:22). Te wi e frustan fa Yehovah hei èn fa a makti, dan dati e yepi wi fu kon abi frede gi en. A frede di wi abi gi en sa gi wi deki-ati fu no bedrigi trawan. Odo 16:6 e taki: „Te sma abi frede gi Yehovah, dan den no sa du ogri.” Te wi abi frede gi Yehovah, dan dati no wani taki dati wi frede taki a o strafu wi. Nôno, a frede dati wani taki dati wi no wani du nowan enkri sani di wi hemel Tata no feni bun, fu di a wani trutru taki sani waka bun nanga wi.​—1 Petr. 3:12.

Wan ondrofenitori e sori wi sortu bun bakapisi a e tyari kon te wi abi a frede dati. Ricardo nanga en wefi Fernanda ben go teki sowan seibi hondro Amerkan dala na bangi. * Fernanda poti a moni wantewante na ini a portmoni fu en, sondro fu teri en. Den go pai den paiman fu den, ma di den doro oso, dan den fruwondru fu si taki pikinmoro a srefi moni di den ben teki na bangi, ben de ete na ini a portmoni fu Fernanda. Den ben denki: „A musu fu de so taki a sma na bangi gi wi tumusi furu moni.” Na a bigin, den prakseri fu hori a moni fu di den ben abi furu tra paiman. Ricardo e taki: „Wi begi Yehovah fu gi wi a krakti fu tyari a moni go baka. Fu di wi ben wani plisi en trutru, soleki fa a e aksi wi na Odo 27:11, meki wi ben wani tyari a moni go baka.”

Wan konsensi di e wroko bun

Wi kan kon abi wan konsensi di e wroko bun, te wi e studeri Bijbel èn te wi e pruberi fu du san wi leri. Na so fasi ’a wortu fu Gado di de na libi èn di abi krakti’ no sa doro soso wi frustan, ma a sa doro wi ati tu. Disi sa gi wi deki-ati fu „du ala sani na wan opregti fasi”.​—Hebr. 4:12; 13:18.

Luku a tori fu João. A ben meki wan bigi paiman fu sowan feifi dusun Amerkan dala. Baka dati, a froisi go na wan tra foto, sondro fu pai a paiman. Aiti yari baka dati, João kon sabi den tru tori fu Bijbel. Fu di a konsensi fu en ben e wroko bun now, meki a go a suku a man di a ben musu pai, èn a pai a paiman fu en! Ma João ben musu sorgu gi en wefi nanga fo pikin nanga a pikinso moni di a ben kisi fu a wroko fu en. Dati meki a man di a ben musu pai taigi en taki a ben kan pai en pikinpikin, ibri mun.

Wi musu de tevrede nanga san wi abi

Na apostel Paulus ben skrifi: „A no de fu taki dati wan sma e kisi furu wini te a e dini Gado na wan getrow fasi, efu a de tevrede nanga san a abi. . . . Efu wi abi nyanyan, krosi nanga wan presi fu tan, dan wi musu de tevrede nanga den  sani disi” (1 Tim. 6:6-8). Te wi e gi yesi na a koni rai disi, dan dati o yepi wi fu no du kruka bisnis soso fu di wi abi bigi-ai, èn wi no sa du ala sortu kruka sani soso fu kon gudu esi-esi (Odo 28:20). Te wi e gi yesi na a rai fu Paulus, dan dati o yepi wi fu poti a Kownukondre fu Gado na a fosi presi, èn wi sa abi a frutrow taki Gado sa gi wi den sani di wi abi fanowdu fu tan na libi.​—Mat. 6:25-34.

Ma fu di wi sabi taki ’gudu abi bedrigi fasi’, meki noiti wi musu denki taki wi no kan abi bigi-ai (Mat. 13:22). Prakseri a tori fu Akan. A si fa den Israelsma ben abra Yordan-liba na wan wondru fasi. Toku a kisi bigi-ai, èn a no basi a firi di a ben abi fu fufuru pikinso fu a solfru nanga a gowtu, èn sosrefi wan diri krosi fu den gudu di den ben tyari kon fu Yerikow. A sani dati meki taki a lasi en libi (Yos. 7:1, 20-26). Dati meki a no e fruwondru wi taki hondrohondro yari baka dati, Yesus gi wi a warskow disi: „Tan na ai èn luku bun taki unu no kisi bigi-ai na nowan fasi.”​—Luk. 12:15.

Du san reti te yu de na yu wrokope

Meki wi poti prakseri na wan tu situwâsi di kan meki en muilek gi wi fu tan du san reti ala ten. Te wi e du san reti na wi wrokope, dan dati wani taki dati wi ’no e fufuru’, awinsi ala sma gwenti fu du dati (Tit. 2:9, 10). Jurandir, di e wroko gi lanti, ben e go na tra kondre gi a wroko fu en. Ala ten a ben e skrifi soifri omeni kostu a ben e meki. Ma den tra sma na a wrokope fu en ben e skrifi moro kostu leki san den ben e meki trutru. Den ben man du dati, fu di a fesiman fu na afdeling fu den ben e horibaka gi den. Fu taki en leti, a srefi sma dati piri-ai gi Jurandir fu di a ben e du san reti, èn a no ben seni en go moro na tra kondre fu du bisnis. Ma bakaten, lanti ondrosuku den moni afersi fu a wrokope dati, èn den prèise Jurandir fu di a ben de wan reti-ati sma. Boiti dati, a kisi wan moro hei posisi.

André na wan brada di e seri sani gi wan bedrijf. A basi fu en ben taigi en fu kori den klanti fu en, so taki den e pai tu tron so furu gi den kostu di den ben e meki na a bedrijf. A brada fu wi begi Yehovah fu gi en deki-ati fu hori ensrefi na Bijbel gronprakseri (Ps. 145:18-20). A pruberi tu fu taigi a basi fu en fu san ede a no ben kan du san a ben aksi fu en, ma dati no yepi. Dati meki, André bosroiti fu libi a bunbun wroko fu en. Ma pikinmoro wán yari baka dati, na owru basi fu en kari en baka fu kon wroko gi en. A gi André a dyaranti taki a no ben e kori den klanti fu en moro. A meki André tron fesiman.

Pai den paiman di yu meki

Na apostel Paulus ben gi Kresten a rai disi: „Un no musu abi nowan paiman na nowan sma” (Rom. 13:8). Kande wi feni taki wi no abi fu pai wan paiman, fu di wi denki taki a sma di  wi musu pai abi en bun, èn taki a no abi a moni fanowdu. Ma Bijbel e gi wi a warskow disi: „Den ogriwan lobi leni sondro fu pai baka.”​—Ps. 37:21.

Ma fa a de te ’wan sani di wi no ben fruwakti’ e meki taki wi no man pai den paiman fu wi? (Preik. 9:11) Francisco ben leni seibi dusun Amerkan dala fu Alfredo, fu kan pai gi na oso fu en. Ma fu di a bisnis fu en no ben e waka bun, meki a no ben man pai a paiman dati biten. Francisco teki a bosroiti fu go taki nanga Alfredo, èn Alfredo ben feni en bun taki a ben e pai a moni pikinpikin.

No du sma ai sani

Prakseri a takru eksempre fu Ananias nanga Safira, wan trowpaar na ini a Kresten gemeente fu a fosi yarihondro. Den ben seri wan gron fu den, ma den tyari pikinso nomo fu a moni gi den apostel, aladi den fruteri den taki dati ben de ala moni di den ben kisi gi a gron. Den ben du neleki den ben de klariklari fu gi sma sani, soso fu sma ai. Ma nanga yepi fu a santa yeye fu Gado, na apostel Petrus tyari a bedrigi fasi fu den kon na krin, èn Yehovah kiri den wantewante.​—Tori. 5:1-11.

Tra fasi leki Ananias nanga Safira, den Bijbel skrifiman ben e taki krin fa sani ben waka, èn den no ben e kori sma. Moses ben fruteri krin taki a ben lasi ensrefi, èn taki a sani dati meki taki a no kisi primisi fu go na ini a Pramisi Kondre (Num. 20:7-13). Yona ben taki krin tu fu den fowtu di a meki fosi a ben go preiki gi den sma fu Ninefei, èn a ben taki tu fu den wan di a ben meki baka dati. A ben skrifi ala den sani disi finifini.​—Yona 1:1-3; 4:1-3.

A no de fu taki dati wi abi deki-ati fanowdu fu taki san tru, awinsi dati o tyari takru bakapisi kon gi wi. Na dati ben pasa nanga Nathalia, wan meisje fu 14 yari. Di a ben de na skoro, dan a luku den sani baka di a ben skrifi na wan eksamen. A kon si taki wan fu den piki di a skoromeester ben si leki wan bunwan, ben fowtu. Nathalia ben sabi taki a ben o kisi wan moro lagi cijfer te a ben o taigi a skoromeester san pasa, ma toku a no draidrai fu taigi en. Nathalia e taki: „Mi papa nanga mama ala ten leri mi taki mi no musu bedrigi sma, efu mi wani taki Yehovah feni mi bun. Efu mi no ben taigi a skoromeester fu mi, dan mi konsensi ben o trobi mi.” A skoromeester ben breiti taki Nathalia ben du san reti.

Wi sa gi glori na Yehovah te wi no e bedrigi trawan

Giselle, wan meisje fu 17 yari, ben feni wan portmoni di ben abi wan tu papira na ini, nanga 35 Amerkan dala. A tyari a portmoni gi den sma na skoro, so taki den ben kan sorgu taki a sma di ben abi en, kisi en baka. Wan mun baka dati, wan fu den edeman fu a skoro leisi wan brifi gi a heri klas, èn na ini a brifi dati a prèise Giselle fu di a ben du san reti. A prèise a famiri fu en tu fu di den ben kweki en na wan bun fasi, èn fu di den ben gi en leri fu Bijbel. Den ’bun sani di a du’ meki taki Yehovah kisi glori.​—Mat. 5:14-16.

A no makriki fu du san reti, fu di wi e libi na mindri sma ’di lobi densrefi, di lobi moni, di e denki tumusi furu fu densrefi, di abi heimemre, èn di no de loyaal’ (2 Tim. 3:2). Ma te wi abi frede gi Yehovah, te a konsensi fu wi e wroko bun, èn te wi de tevrede nanga san wi abi, dan dati o yepi wi fu tan du san reti na ini a grontapu disi pe furu sma e bedrigi trawan. Wi sa kon abi wan moro bun matifasi tu nanga Yehovah, di ’de wan Gado fu retidu, èn di lobi sma di e du san reti’.​—Ps. 11:7.

[Futuwortu]

[Prenki na tapu bladzijde 7]

Te wi abi frede gi Yehovah, dan dati o gi wi deki-ati fu no bedrigi trawan

[Prenki na tapu bladzijde 8]

Te wi e tyari wisrefi na wan reti fasi, dan Yehovah o kisi glori