Yu e memre disi ete?

Yu ben prisiri fu leisi den Waktitoren di kon na doro no so langa pasa? Luku efu yu kan gi piki tapu den aksi di e kon now:

• Fu san ede wi kan bribi taki a dyari fu Eden ben de wan trutru presi?

Bijbel e sori taki a ben de wan trutru presi, èn a e sori finifini pe a dyari ben de. Tu fu den liba di kari na ini a tori fu Genesis, de ete na ini a ten disi. Nofo tron, anansitori no e taki finifini fu presi di de ete na ini a ten disi. Yesus, a moro prenspari Kotoigi di de fu frutrow, ben sori taki Adam nanga Eva ben de trutru sma.​—1/1, bladzijde 5, 6, nanga 9.

• Gado ben sabi taki Adam nanga Eva ben o sondu?

Nôno. Yehovah ben gi den frustan, èn a ben gi den a grani tu fu teki den eigi bosroiti. Na so den ben kan bosroiti srefi efu den ben o gi yesi na en, noso efu den no ben o du dati. Aladi Gado man kon sabi sani na fesi, toku ensrefi kan bosroiti san a wani kon sabi.​—1/1, bladzijde 13-15.

• A de so taki tru Kresten e gebroiki a nen fu Gado leki wan tapu?

Son sma e si wan spesrutu sani leki wan tapu di kan kibri den gi ogri, ma a pipel fu Gado no e si a nen fu en leki wan tapu. Den e poti bribi na ini Yehovah, èn den e pruberi fu du a wani fu en. Na so den e suku kibri na a nen fu en (Sef. 3:12, 13).​—15/1, bladzijde 5, 6.

• Suma ben e kisi wini fu a seti di ben e gi sma na ini Israel okasi fu piki nyanyan di ben tan abra baka a kotiwroko?

Ala den Israelsma ben e kisi wini fu a seti disi. A seti disi ben e gi pôtisma deki-ati fu wroko tranga, fu di densrefi ben musu go piki a nyanyan. Tra sma ben e kisi wini, fu di a seti disi ben e gi den deki-ati fu de klariklari fu prati sani nanga trawan, èn fu abi a frutrow taki Gado ben o blesi den.​—1/2, bladzijde 15.

• Fu san ede Yehovah no ben feni Kownu Saul bun moro?

Saul ben musu wakti teleki a profeiti fu Gado ben kon fu tyari wan ofrandi, ma a kownu trangayesi Gado èn ensrefi tyari na ofrandi. Bakaten, a no gi yesi na a komando di a ben kisi fu kiri ala sma fu wan pipel di ben de feanti fu den Israelsma.​—15/2, bladzijde 22, 23.

• Fa wi kan sori taki wi e tegu gi kruktudu?

Wi no sa dringi sopi pasa marki, wi no sa du afkodrei, èn wi sa gi yesi na a warskow di Yesus gi wi fu wai pasi gi hurudu. Fu eksempre, wi no sa luku porno, èn wi no sa prakseri den sortu sani dati tu (Mat. 5:27, 28). Boiti dati, wi no sa abi demakandra nanga sma di puru fu a gemeente.​—15/2, bladzijde 29-32.

• San na wan moi sani di wi musu sabi fu den onigodo fu owruten di sabiman feni na ini Israel?

Sabiman feni moro leki 30 onigodo, èn den e denki taki den onigodo ben e gi sowan 500 kilo oni ibri yari. Disi e sori taki sma ben e kweki wasiwasi na ini a kondre di Gado ben taki fu en dati a „lai merki nanga oni” (Ex. 3:8)​—1/3, bladzijde 15.

• Fa Yeremia ben de leki wan bon „di prani na sei watra èn di sutu en rutu go na wan liba”? (Yer. 17:7, 8)

A noiti no tapu fu gi froktu noso fu kweki bun fasi, èn a no ben gi pasi taki spotuman broko en saka. Na presi fu dati, a tan krosibei fu a Sma di e gi watra di e gi libi, fu di a ben du san Gado ben taigi en.​—15/3, bladzijde 14.

• San Yesus ben wani leri Marta di a taigi en taki wan tu sani nomo de fanowdu, iya, wán sani nomo? (Luk. 10:41, 42)

Yesus no ben wani taigi Marta taki a ben abi bigi-ai fu di a ben e sreka furu sani fu nyan. Èn Yesus no ben wani taigi en tu taki na fu soso a ben e wroko so tranga. Na presi fu dati, a ben wani sori en taki a ben musu poti den moro prenspari sani na a fosi presi. Yesus ben wani sori Marta taki a no ben e kisi wini fu na okasi di a ben abi fu tranga a bribi fu en.​—1/4, bladzijde 12, 13.

• Na sortu fasi sma pasa a wet di den tyari Yesus go na fesi krutubangi?

A krutubangi no gi Yesus na okasi fu sori taki a no ben du nowan ogri. Den ben kari falsi kotoigi kon fu taki. Den ben hori a krutu na neti. A krutu hori na ini wán dei nomo.​—1/4, bladzijde 20.