Yu man si taki Gado e tiri a pipel fu en?

DEN Israelsma nanga den Egeptesma noiti no ben si so wan sani ete. Di den Israelsma ben e komoto na ini Egepte, dan wan wolku di ben de leki wan pilari ben de na tapusei fu den, èn a ben de nanga den doronomo. Te neti a ben e tron wan pilari fu faya. Dati ben de wan wondru sani trutru! Ma pe a wolku dati ben komoto? Fu san ede a ben de na den loktu? Disi na wan tori fu sowan 3500 yari pasa. Ma san wi na ini a ten disi kan leri fu a fasi fa den Israelsma ben e si „a pilari fu faya nanga a wolku”?​—Ex. 14:24.

Gado Wortu e sori fu pe a pilari ben komoto, èn fu san ede a ben de na loktu. A e taki: „Yehovah ben de na den fesi fu sori den a pasi. Na deiten a ben e tyari den nanga wan wolku di gersi wan pilari, èn na neti a ben meki wan pilari fu faya skèin leti gi den. Na so fasi den ben man waka dei nanga neti” (Ex. 13:21, 22). Yehovah Gado ben gebroiki a wolku nanga a pilari fu faya fu tyari a pipel fu en komoto na ini Egepte, èn fu tyari den pasa na ini a gran sabana. Den ben o abi fu de klariklari fu hari gowe fu man waka baka a pilari. Di a legre fu Egepte ben de fu go feti nanga a pipel fu Gado, dan a pilari skoifi go na mindri den tu grupu, èn a ben e kibri den Israelsma (Ex. 14:19, 20). Aladi a pilari no ben e sori den a moro syatu pasi, toku den Israelsma ben musu waka na en baka efu den ben wani doro a Pramisi Kondre, fu di tra fasi no ben de.

Fu di a pipel fu Gado ben e si a pilari, meki den ben abi a dyaranti taki Yehovah ben de nanga den. A pilari ben sori taki Yehovah ben e tiri den, èn son leisi Yehovah ben taki komoto fu en (Num. 14:14; Ps. 99:7). Boiti dati, a wolku ben sori taki Yehovah ben poti Moses fu tiri a pipel (Ex. 33:9). Nanga yepi fu a wolku, Yehovah ben sori tu taki a ben poti Yosua fu tiri a pipel, baka di Moses dede. Disi na a lasti leisi di Bijbel e taki fu a wolku (Deut. 31:14, 15). Iya, efu den Israelsma ben wani taki sani waka bun nanga den di den ben e komoto na ini Egepte, dan den ben o abi fu frustan taki Gado ben e tiri den, èn den ben o abi fu teki a tiri dati.

Den no ben e si moro taki Gado ben e tiri den

Di den Israelsma ben si a pilari fu a fosi leisi, dan a ben musu fu de so taki den no ben man bribi san den ben e si. Ma aladi den Israelsma ben si a wondru sani dati doronomo, toku dati no ben naki den ati nofo fu meki den tan frutrow tapu Yehovah. Difrenti leisi den krutu a fasi fa Gado ben e tiri den. Di a legre fu Egepte ben kon na den baka, dan den no ben abi a frutrow taki Yehovah ben o man frulusu den. Na presi fu dati, den ben feni taki Moses, a futuboi fu Gado, ben tyari den fu go dede (Ex. 14:10-12). Baka di Yehovah ben tyari den pasa a Redi Se libilibi, dan den krutu Moses, Aron, nanga Yehovah fu di den ben feni taki den no ben abi nofo nyanyan nanga watra (Ex. 15:22-24; 16:1-3; 17:1-3, 7). Èn wan tu wiki baka dati, den dwengi Aron fu meki wan gowtu pikin kaw gi den. Denki a tori! Na a wan sei fu a kampu, den Israelsma ben man si a wolku nanga a pilari fu faya di ben de a tumusi moi buweisi taki a Sma di ben tyari den komoto na ini Egepte ben de nanga den. Ma a no fara fu drape den bigin anbegi wan popki di no ben abi libi. Den ben e taki: „Israel, disi na yu Gado di tyari yu komoto na ini a kondre Egepte.” A no de fu taki dati ’den no ben abi nowan lespeki’!​—Ex. 32:4; Neh. 9:18.

 Na opo di den Israelsma ben opo densrefi teige Yehovah, e sori taki den no ben abi nowan enkri lespeki gi a tiri fu en. A no de so taki den no ben man si sani nanga den ai, ma na frustan den no ben man frustan taki Yehovah ben e tiri den. Den ben man si a pilari, ma den no ben e frustan moro san dati ben wani taki. Aladi „den ben meki a Santawan fu Israel firi sari”, toku Yehovah sori sari-ati gi den, èn a tan tiri den nanga yepi fu a pilari, teleki den doro a Pramisi Kondre.​—Ps. 78:40-42, 52-54; Neh. 9:19.

Yu man si taki Gado e tiri a pipel fu en na ini a ten disi?

Na ini a ten disi a de so tu taki Yehovah noiti no libi a pipel fu en sondro fu sori den krin taki a e tiri den. Yehovah no ben fruwakti taki den Israelsma ben musu suku den eigi pasi go na a Pramisi Kondre. Na so Yehovah no e fruwakti tu taki wi na ini a ten disi e suku wi eigi pasi go na a nyun grontapu di a pramisi wi. Yesus Krestes na a Sma di a poti fu tiri a gemeente (Mat. 23:10; Ef. 5:23). A gi wan getrow srafu-grupu wan tu frantwortu, èn a srafu dati na wan grupu reti-ati Kresten di salfu nanga santa yeye. A srafu dati fu en sei e poti brada fu dini leki owruman na ini a Kresten gemeente.​—Mat. 24:45-47; Tit. 1:5-9.

Fa wi kan sabi krin suma na a srafu disi? Luku san Yesus srefi ben taki fu a srafu disi: „Suma na trutru a getrow futuboi, a koniwan, di en masra sa poti fu luku ala den futuboi fu en, so taki a kan tan gi den a nyanyan fu den na a reti ten? Koloku fu a srafu te en masra doro èn a si taki a srafu e du dati!”​—Luk. 12:42, 43.

A srafu-grupu de „getrow”, fu di noiti a e drai baka gi Yehovah, gi Yesus, gi den tru tori fu Bijbel, noso gi a pipel fu Gado. Fu di a srafu-grupu „koni”, meki a e handri na wan koni fasi te a e tiri a tumusi prenspari wroko di wi abi fu preiki ’a bun nyunsu fu a kownukondre’ èn fu ’meki sma fu ala kondre tron disipel’ (Mat. 24:14; 28:19, 20). A srafu-grupu e prati bun yeye nyanyan „na a reti ten”, soleki fa Yesus ben taigi den fu du. Yu kan si taki Yehovah feni a wroko fu den bun, fu di moro nanga moro sma e kon na ini a tru anbegi, fu di a e tiri den te den musu teki prenspari bosroiti, fu di a e yepi den fu frustan den tru tori fu Bijbel moro bun, fu di a e kibri den gi den feanti fu den di wani puru den na pasi, èn fu di a e gi den wan korostu firi.​—Yes. 54:17; Fil. 4:7.

Teki a tiri fu Gado

Fa wi kan sori taki wi e warderi a tiri di wi e kisi fu Gado? Na apostel Paulus ben taki: „Gi yesi na den wan di e teki fesi na un mindri èn saka unsrefi na den ondro” (Hebr. 13:17). A no ala ten dati makriki. Luku na eksempre disi: Kon meki wi taki dati yu ben de wan Israelsma di ben e libi na ini a ten fu Moses. Baka di yu waka wan heri pisi ten, dan a pilari e tan na wán presi. O langa a o tan drape? Wán dei? Wan wiki? Wan tu mun? Yu e aksi yusrefi: ’Mi musu puru ala den sani baka di mi ben poti gowe kaba?’ Kande yu e bigin puru soso den sani di yu abi tranga fanowdu. Ma baka wan tu dei, yu e bigin fruferi taki yu musu sukusuku na ini den sani fu yu, èn te fu kaba yu e bigin puru ala sani. Ma a no teki langa di yu puru ala sani, dan yu e si a pilari e opo go na loktu. Now yu abi fu poti ala sani gowe baka! A sani dati no ben o de wan makriki sani. Toku, den Israelsma ben musu ’sreka sani wantewante fu gowe’.​—Num. 9:17-22.

San wi e du te wi e kisi rai fu Gado? Wi e pruberi fu fiti den rai dati „wantewante”? Noso wi e tan du sani soleki fa wi ben gwenti? Yu sabi den nyun rai di wi kisi fu Yehovah? Iya, yu sabi fa wi musu hori Bijbelstudie? Yu sabi fa wi musu preiki gi sma di e taki wan tra tongo? Yu sabi fa wi teki prati na a Osofamiri Anbegi? Yu sabi fa wi musu wroko makandra nanga na Ati-oso Kontakti Komte? Èn yu sabi fa wi musu tyari wisrefi te wi de na den kongres? Wi e sori warderi tu gi a tiri fu Gado te wi e gi yesi na rai di wi e kisi. Te wi musu teki prenspari bosroiti, dan wi no musu frutrow tapu wi eigi koni, ma wi musu suku a tiri fu Yehovah èn fu en organisâsi.  Èn neleki fa wan pikin e suku kibri na en papa nanga mama te wan bigi sibibusi e wai, na so wi e suku kibri na a organisâsi fu Yehovah te den problema fu a grontapu disi e kon na wi tapu leki wan bigi sibibusi.

A no de fu taki dati den wan di e teki fesi na ini a pisi fu Gado en organisâsi na grontapu, no de volmaakti. Ma Moses no ben de volmaakti tu. Toku a pilari ben e sori a pipel doronomo taki Gado ben poti Moses leki a fesiman fu den, èn taki A ben feni Moses bun. Hori na prakseri tu taki a no ibri Israelsma ben kan bosroiti o ten den ben o hari gowe. Na presi fu dati, a pipel ben hari gowe te „Yehovah ben taigi Moses” fu du dati (Num. 9:23). Sobun, a ben musu fu de so taki na Moses, a sma di Gado ben gebroiki fu tiri a pipel, ben taigi den sma o ten den ben musu hari gowe.

Na ini a ten disi, a srafu-grupu fu Yehovah e sori wi krin o ten wi musu handri. Fa a srafu e du dati? A e du dati nanga yepi fu artikel na ini A Waktitoren èn na ini Wi Kownukondre diniwroko. A e du dati tu nanga yepi fu nyun publikâsi, èn nanga yepi fu lezing di e hori na kongres èn na tra bigi konmakandra. Sosrefi na ini a gemeente wi e kisi rai, èn dati e pasa nanga yepi fu kring-opziener, nanga yepi fu brifi, noso nanga yepi fu den skoro di e hori gi brada di abi frantwortu na ini a gemeente.

Yu man si krin taki Gado e tiri a pipel fu en? Yehovah e gebroiki na organisâsi fu en fu tiri a pipel fu en, so taki wi kan pasa „a sabana” libilibi na ini den lasti dei fu na ogri-ati grontapu fu Satan. Leki bakapisi fu dati, wi de na ini wánfasi, wi abi lobi gi makandra, èn wi abi a dyaranti taki sani o waka bun nanga wi.

Di den Israelsma ben doro a Pramisi Kondre, dan Yosua taigi den: „Unu sabi heri bun taki Yehovah un Gado du ala den bun sani di a ben pramisi unu. Ala den sani disi kon tru” (Yos. 23:14). Na so a de tu taki a pipel fu Gado na ini a ten disi seiker o doro a nyun grontapu di Gado pramisi wi. Ma efu ibriwan fu wi wani de drape, dan wi o abi fu de klariklari fu teki a tiri fu Gado. Fu dati ede, meki wi alamala tan si krin taki Yehovah e tiri a pipel fu en!

[Prenki na tapu bladzijde 5]

Na ini a ten disi, Yehovah e tiri wi nanga yepi fu na organisâsi fu en

Nyun publikâsi

Kresten brada e kisi leri

Wi e kisi leri na den preikiwroko konmakandra