Fa yu kan teki a tiri fu Krestes, a tumusi bun Tiriman?

DEN sma di e teki a tiri fu grontapu tiriman, nofo tron e ondrofeni taki den tiriman dati e meki den fesi fadon. Ma den sma di e teki a tiri fu Krestes, e ondrofeni wan heri tra sani. Yesus ben taki: „Un kon na mi, un alamala di musu wroko hebi èn di musu tyari hebi lai, èn mi sa gi unu krakti baka. Teki mi tyatyari na un tapu èn leri fu mi, bika mi abi safri-ati nanga sakafasi, èn unu sa kisi krakti baka” (Mat. 11:28, 29). A tiri fu Yesus e meki taki sma de koloku. Yesus e broko en ede trutru nanga den mofinawan èn nanga den wan di trawan e wisiwasi èn a e gi den a kari fu teki a tyatyari fu en di lekti, na den tapu. Ma san a wani taki fu teki a tiri fu Yesus?

Na apostel Petrus ben skrifi: „Krestes ben nyan pina gi unu èn a libi wan eksempre gi unu, so taki unu kan waka soifri na en baka” (1 Petr. 2:21). Fu san ede wi musu teki na eksempre fu Yesus? Kon meki wi taki dati yu nanga wan tu tra sma ben musu waka pasa na ini wan gron di lai nanga mijn. Wán sma nomo sabi fa fu pasa sondro taki a kisi mankeri. Yu no ben o luku bun fa a e waka? Iya, yu no ben o poti yu futu soifri pe a e poti a di fu en? Na so a de tu taki efu wi wani taki sani waka bun nanga wi na ini a ten di e kon, dan wi musu teki na eksempre fu Yesus. Dati wani taki dati wi musu arki en, wi musu gi yesi na en, èn wi musu wroko makandra nanga den wan di e teki presi gi en.

Arki èn gi yesi

Na a kaba fu a Bergitaki fu en, Yesus ben taki: „Efu wan sma e yere den sani disi di mi taki èn a e du den, dan a sa de leki wan koni man di bow en oso na tapu ston-gron. Ne alen fadon, bigi frudu kon, winti wai èn a naki na oso dati bun tranga, ma na oso no fadon, bika a ben bow na tapu ston-gron.”​—Mat. 7:24, 25.

Dyaso Yesus ben taki dati wan man di e arki en èn di e gi yesi na en, na wan „koni” man. Wi e sori taki wi e gi yesi na Krestes nanga wi heri ati? Iya, wi e sori taki wi abi lespeki nanga warderi gi na eksempre fu en? Noso wi abi a gwenti fu gi yesi na Yesus soso te a makriki fu du dati? Yesus ben taki: „Ala ten mi e du san e plisi [Gado]” (Yoh. 8:29). Meki wi du tranga muiti fu du a srefi sani dati.

Na ini a fosi yarihondro, den apostel ben de wan moi eksempre gi wi te wi e luku a fasi fa den ben e saka densrefi na ondro a tiri fu Krestes. Wán leisi, Petrus ben taigi Yesus: „Luku! Wi gowe libi ala sani, èn wi kon waka na yu baka” (Mark. 10:28). Iya, den apostel ben e si a tiri di den ben e kisi fu Yesus leki so wan prenspari sani, taki den ben de klariklari fu libi tra sani na baka fu tron bakaman fu en.​—Mat. 4:18-22.

Wroko makandra nanga den wan di e teki presi gi Krestes

Syatu bifo Yesus dede, a taki fu ete wan fasi fa wi kan sori taki wi e teki a tiri fu en. A ben taki: „Efu wan sma e teki a wan di mi seni kon, dan a e teki mi tu” (Yoh. 13:20). Fu taki en leti, Yesus ben kari den salfuwan di ben e teki presi gi en, en „brada” (Mat. 25:40). Baka di Yesus kisi wan opobaka èn a opo go na hemel, dan den „brada” fu en kisi a frantwortu fu handri na ini a nen fu en. Iya den ben e „teki presi gi Krestes”, fu di den ben e gi sma a kari fu meki sani bun baka nanga Yehovah Gado (2 Kor. 5:18-20). Te wi e teki a tiri fu Krestes, dan dati  wani taki dati wi e saka wisrefi na ondro den „brada fu en”.

A bun te wi e luku fa wi e si den rai fu Bijbel di wi e kisi na a reti ten nanga yepi fu den Bijbel publikâsi fu wi. Te wi e studeri Bijbel, èn te wi e go na den gemeente konmakandra, dan wi e kon sabi baka sortu sani Krestes ben leri wi (2 Petr. 3:1, 2). Wi e sori taki wi abi trutru warderi gi a yeye nyanyan disi te wi e kisi wini fu en doronomo. Ma fa wi musu feni en te wi e kisi spesrutu rai ibri tron baka? Fu eksempre, Gado Wortu e gi Kresten a rai fu trow „soso na ini Masra” (1 Kor. 7:39). Ten na ten, a tijdschrift The Watchtower poti prakseri na a tori disi, èn dati e pasa moro leki wán hondro yari kaba. A no de fu taki dati den brada fu Krestes e sori taki den e broko den ede nanga wi, fu di den e tyari artikel kon na doro di e poti prakseri na a tori disi èn na tra rai di e komoto fu Gado. Wan fasi fa wi kan sori taki wi e poti prakseri na den rai disi, na te wi e teki a tiri fu wi tumusi bun Fesiman, Yesus Krestes.

Odo 4:18 e taki: „A pasi fu den reti-ati sma de leki a leti di e bigin skèin na musudei. Safrisafri a e kon moro krin, teleki a de leki a brenki leti fu son na mindridei.” Iya, a tiri di Yesus e gi wi e tyari bun kenki kon trutru. Wan tra fasi fa wi kan wroko makandra nanga den „brada” fu Krestes, na te wi abi wan bun denki fu iniwan kenki di e kon te a abi fu du nanga a fasi fa wi musu frustan den tru tori fu Bijbel. Wi e kon sabi den sani disi fu di „a getrow èn koni srafu” e tyari den kon na doro.​—Mat. 24:45.

Wi e sori tu taki wi e saka wisrefi na ondro den „brada” fu Krestes, te wi e wroko makandra nanga den opziener di e teki fesi na ini a gemeente. Na apostel Paulus ben taki: „Gi yesi na den wan di e teki fesi na un mindri èn saka unsrefi na den ondro, bika den e sorgu unu” (Hebr. 13:17). Fu eksempre, kande wan owruman e sori wi o prenspari a de fu hori na Osofamiri Anbegi doronomo. Noso kande a e gi wi rai fa fu du a preikiwroko moro bun. Kande wan kring opziener e gi wi rai fu Bijbel fu yepi wi fu fiti den rai fu Krestes moro bun na ini wi libi. Te wi de klariklari fu gi yesi na den rai dati, dan dati e sori taki wi e teki a tiri fu Yesus, wi Fesiman.

A sari fu si taki a grontapu disi no abi bun tiriman. Ma a no de fu taki dati te wi e teki a lobi-ati tiri fu Krestes, dan dati e gi wi deki-ati trutru! Sobun, meki wi gi yesi na wi Fesiman èn meki wi wroko makandra nanga den wan di a e gi frantwortu na ini a ten disi.

[Prenki na tapu bladzijde 27]

Yu e gi yesi na a rai di Bijbel e gi wi fu no kon na ondro a srefi tyatyari nanga wan sma di no de na bribi?