Kresten osofamiri, un musu „de srekasreka”

„De srekasreka, bika a Manpikin fu libisma e kon na wan yuru di unu no ben prakseri.”​—LUK. 12:40.

1, 2. Fu san ede wi musu gi yesi na a rai di Yesus gi fu „de srekasreka”?

’TE A Manpikin fu libisma kon nanga en glori fu prati sma’, dan san o pasa nanga yu èn nanga yu osofamiri? (Mat. 25:31, 32) Fu di a sani disi o pasa na wan ten di wi no fruwakti, meki a de tumusi prenspari taki wi e gi yesi na a rai di Yesus e gi wi fu „de srekasreka”!​—Luk. 12:40.

² A studie-artikel na fesi ben sori fa ibri memre fu na osofamiri kan tyari a frantwortu fu en na wan seryusu fasi, so taki a heri osofamiri kan tan na ai. Meki wi poti prakseri now na tra sani di na osofamiri kan du fu tan abi wan bun matifasi nanga Yehovah.

Tan abi wan „krin” ai

3, 4. (a) Gi san Kresten osofamiri musu luku bun? (b) San a wani taki fu tan abi wan „krin” ai?

³ Fu kan de srekasreka gi a ten te Krestes o kon, dan osofamiri musu luku bun taki noti no e puru den prakseri fu a tru anbegi. Furu osofamiri bigin feti baka gudu, èn dati ben de leki wan trapu gi den. Fu dati ede, a bun taki wi e poti prakseri na a rai di Yesus gi wi fu tan abi wan „krin” ai. (Leisi Mateyus 6:22, 23.)  Wan lampu kan yepi wi fu si krin pe wi musu waka, so taki wi no naki futu fadon. Na so a de tu taki na agersi „ati” fu wi kan yepi wi fu si sani krin, so taki wi kan tyari wisrefi na so wan fasi taki wi no e naki futu.​—Ef. 1:18.

⁴ Efu wi wani si bun, dan wi ai musu wroko bun, èn te wi e luku wan sani, dan wi musu man si a sani dati krin. Na so a de tu nanga na agersi ati fu wi. Te na agersi ai fu wi krin, dan dati wani taki dati wi abi wán marki nomo na ini a libi. Wi no musu feti baka gudu, èn wi no musu sorgu nomo taki wi osofamiri abi krosi, nyanyan, nanga wan tanpresi. Na presi fu dati, wi musu poti ala wi prakseri na a bun matifasi di wi musu abi nanga Gado (Mat. 6:33). Disi wani taki dati wi de tevrede nanga den sani di wi abi, èn wi e poti a diniwroko fu Gado na a fosi presi na ini wi libi.​—Hebr. 13:5.

5. Fa wan yongu meisje sori taki a ben wani gebroiki en libi gi a diniwroko fu Gado?

⁵ A kan tyari furu blesi kon te papa nanga mama e leri den pikin fu den fu tan abi wan krin ai! Luku na eksempre fu wan yongu meisje di e libi na ini Etiopia. A ben e leri so bun na skoro, taki a skoro ben de klariklari fu pai den kostu, efu a ben o studeri moro fara. Ma fu di a ben wani gebroiki en libi na ini a diniwroko fu Yehovah, meki a no teki na okasi dati. Syatu baka dati, a ben kan kisi wan wroko pe den ben o pai en 3000 euro, èn dati na furu moni te yu e luku a moni di furu sma na ini a kondre dati e meki. Ma a meisje ben poti en leki marki fu dini leki pionier. Sondro fu suku rai na en papa nanga mama, a weigri fu teki a wroko. Fa en papa nanga mama ben feni en di den yere san na umapikin fu den ben du? We, den ben prisiri makandra nanga en, èn den taigi en fa den ben breiti srefisrefi taki a ben teki so wan bosroiti!

6, 7. Gi sortu sani wi musu ’de na ai’?

⁶ Den sani di Yesus taki na Mateyus 6:22, 23 e leri wi tu taki wi no musu de sma di gridi. Bijbel e taki fu ’wan krin ai’ èn fu ’ai di no krin’. Wan sma di abi wan ’ai di no krin’, abi bigi-ai, noso a gridi (Mat. 6:23). Fa Yehovah feni en te wan sma abi bigi-ai, noso te a gridi? Bijbel e taki: „Un no musu taki srefi fu hurudu, noso fu iniwan morsu tori, noso fu tori di e sori taki unu abi bigi-ai.”​—Ef. 5:3.

⁷ Kande a makriki fu si te trawan gridi, ma a no makriki so fu si te wisrefi gridi. Fu dati ede, a bun te wi e gi yesi na a rai disi di Yesus gi: „Tan na ai èn luku bun taki unu no kisi bigi-ai na nowan fasi” (Luk. 12:15). Fu man du dati, dan wi musu ondrosuku wisrefi fu si san de na ini wi ati. Kresten osofamiri musu prakseri bun o furu ten nanga moni den e gebroiki fu luku felem, fu arki poku, fu abi prisiriten, èn fu bai sani.

8. Fa wi kan ’de na ai’ te wi wani bai sani?

⁸ Fosi yu bai wan sani, dan yu no musu luku nomo efu yu abi nofo moni fu bai a sani dati. Poti prakseri tu na den sani disi: ’Mi o abi ten fu gebroiki a sani doronomo, èn mi o man sorgu en bun? O langa a o teki mi fu leri wroko bun nanga a sani?’ Yonguwan, no bribi ala den sani di de fu si na ini den reklame di sma e meki. Nofo tron den reklame disi e gi wi deki-ati fu bai diri krosi nanga tra diri sani di wi no abi fanowdu trutru. Leri fu dwengi yusrefi. Luku tu efu a sani di yu o bai, o yepi yu osofamiri fu de srekasreka gi a ten te a Manpikin fu libisma o kon. Poti bribi na ini a pramisi disi fu Yehovah: „Mi no sa libi yu kwetikweti èn noiti mi no sa gowe fu yu.”​—Hebr. 13:5.

Meki muiti fu doro marki na ini na anbegi

9. Sortu wini a kan tyari kon gi osofamiri te den e suku fu doro marki na ini na anbegi?

⁹ Wan tra fasi fa memre fu na osofamiri kan tranga a bribi fu makandra èn kan sorgu taki a heri osofamiri e tan na ai, na te den e poti marki na ini na anbegi èn te den e suku  fu doro den marki dati. Disi sa yepi memre fu na osofamiri fu kon sabi efu den e go na fesi na ini a diniwroko fu Yehovah, èn a o yepi den tu fu kon sabi sortu sani den musu poti na a fosi presi na ini den libi.​—Leisi Filipisma 1:10.

10, 11. Sortu marki osofamiri kan suku fu doro na ini na anbegi, èn sortu marki yu ben o wani doro na ini a ten di e kon?

¹⁰ A kan tyari furu wini kon te osofamiri e poti marki di ibri sma na ini na osofamiri kan doro makriki. Fu eksempre, kande den kan poti leki marki fu luku a deitekst ibri dei. Den piki di memre fu na osofamiri e gi kan yepi na edeman fu kon sabi fa den e denki fu Yehovah èn fu a tru anbegi. Te osofamiri poti leki marki fu leisi Bijbel makandra doronomo, dan dati sa de wan moi okasi fu yepi den pikin fu leri leisi moro bun, èn fu frustan Bijbel moro bun (Ps. 1:1, 2). Èn wi musu pruberi tu fu begi na wan moro bun fasi, a no so? Wan tra moi marki di osofamiri kan suku fu doro, na fu pruberi fu sori a froktu fu a yeye moro bun (Gal. 5:22, 23). Noso wi kan suku okasi fu sori lobi gi sma di wi e miti na ini a diniwroko. Te osofamiri e meki muiti fu sori den fasi disi, dan den pikin sa leri fu abi sari-ati gi trawan, èn a kan taki den o kisi na angri fu dini leki gewoon pionier, noso leki zendeling.

¹¹ Luku wan tu marki di yu nanga yu osofamiri kan suku fu doro. Kande unu kan poti en leki marki fu du moro na ini a diniwroko. Kande unu musu teki moro deki-ati fu preiki nanga yepi fu telefon, na strati, noso na ini bisnis kontren. Kande unu kan go preiki na presi pe moro Kownukondre preikiman de fanowdu. Noso, kande wan memre fu na  osofamiri kan leri wan tra tongo, so taki a kan preiki a bun nyunsu gi sma di komoto fu wan tra kondre.

12. San osofamiri edeman kan du fu yepi na osofamiri fu den fu go na fesi?

¹² Leki edeman fu na osofamiri, yu musu pruberi fu kon sabi na ini sortu sani yu osofamiri musu go na fesi. Baka dati, du san de fanowdu fu doro a marki dati. Poti marki di na osofamiri kan doro trutru, èn di fiti gi a situwâsi fu unu (Odo 13:12). A no de fu taki dati a e teki ten fu doro marki di sa tyari wini kon gi na osofamiri. Sobun, pruberi fu no luku telefisi so furu, ma gebroiki a ten dati fu suku fu doro marki na ini na anbegi (Ef. 5:15, 16). Meki tranga muiti fu doro den marki di unu poti leki osofamiri (Gal. 6:9). Wan osofamiri di e pruberi fu doro marki na ini na anbegi sa go na fesi, èn ’ala sma o si dati’.​—1 Tim. 4:15.

Hori na Osofamiri Anbegi doronomo

13. Sortu kenki kon na den konmakandra, èn san wi musu aksi wisrefi?

¹³ Wan heri bun sani di kan yepi osofamiri fu „de srekasreka” gi a ten te a Manpikin fu libisma o kon, na a prenspari kenki di kon na den konmakandra di e hori ibri wiki. Bigin fu 1 yanuari 2009, a no ben o de fanowdu moro fu kon makandra tapu wan tra dei fu hori a Gemeente Bukustudie. Now a konmakandra dati e hori tapu wán dei, makandra nanga a Theokrasia Diniwroko-skoro èn a Diniwroko Konmakandra. Den brada tyari a kenki dati kon, fu gi Kresten osofamiri na okasi fu poti wan dei ibri wiki fu studeri leki osofamiri, so taki a bribi fu den e kon moro tranga. Now di wan pisi ten pasa kaba sensi a kenki dati kon, dan wi kan aksi wisrefi den sani disi: ’Mi e gebroiki a ten di mi abi now, fu hori na Osofamiri Anbegi? Noso efu mi wawan de, dan mi e gebroiki a ten dati fu studeri? Mi e kisi wini fu a seti dati?’

14. (a) San na a moro prenspari reide di wi abi fu hori na Osofamiri Anbegi, èn fu studeri nanga wisrefi? (b) Fu san ede a de tumusi prenspari taki wi abi wan dei fu studeri Bijbel?

¹⁴ A moro prenspari reide di wi abi fu hori na Osofamiri Anbegi doronomo èn fu studeri doronomo, na taki a e yepi wi fu kon moro krosibei na Gado (Yak. 4:8). Te wi e gebroiki ten fu studeri Bijbel doronomo èn fu kon sabi a Mekiman moro bun, dan wi e kon abi wan moro bun matifasi nanga en. O moro wi e kon krosibei na Yehovah, o moro wi o lobi en ’nanga wi heri ati, nanga wi heri sili, nanga wi heri frustan, èn nanga ala wi krakti’ (Mark. 12:30). A no de fu taki dati wi wani gi yesi na Gado nanga wi heri ati, èn wi wani teki na eksempre fu en (Ef. 5:1). Efu wi wani yepi ibri memre fu na osofamiri fu „de srekasreka” gi a „bigi banawtu” di o kon, dan a de tumusi prenspari taki wi e hori na Osofamiri Anbegi doronomo (Mat. 24:21). Wi musu hori en fu kan kisi frulusu.

15. Sortu krakti na Osofamiri Anbegi kan abi tapu den memre fu na osofamiri?

¹⁵ Wan tra reide fu san ede wi musu hori na Osofamiri Anbegi, na taki a e yepi den memre fu na osofamiri fu kon abi wan moro bun matifasi nanga makandra. Te wi e teki ten ibri wiki fu taki nanga makandra fu sani di abi fu du nanga na anbegi, dan dati e yepi den memre fu na osofamiri fu kon abi moro lobi gi makandra. A no de fu taki dati trowpatna sa frustan makandra moro bun te den lobi fu taki nanga makandra fu den moi sani di den leri na ini Bijbel! (Leisi Preikiman 4:12.) Te papa nanga mama e dini Gado makandra nanga den pikin fu den, dan den e kon lobi makandra èn den o de na ini wánfasi, fu di „lobi na wan volmaakti banti di e meki sma kon de wán.”​—Kol. 3:14.

16. Fruteri fa dri Kresten sisa kisi wini fu di den ben poti wan dei fu studeri Bijbel makandra.

¹⁶ Luku fa dri Kresten sisa kisi wini fu di den abi wan neti fu studeri Bijbel. Den dri  owru sisa disi di no de famiri fu makandra, e libi na ini a srefi foto èn den de bun mati fu makandra furu yari kaba. Den sisa disi ben wani de moro nanga makandra, ma den no ben wani du dati soso fu abi prisiriten. Den ben wani gi makandra deki-ati tu fu abi wan moro tranga bribi. Dati meki den ben poti wan dei fu studeri Bijbel makandra. Den ben gebroiki a buku ’Grondig getuigenis afleggen’ van God’s Koninkrijk („Gi kotoigi finifini” fu a Kownukondre fu Gado). Wan fu den sisa e taki: „Wi e prisiri srefisrefi te wi e studeri nanga makandra, èn nofo tron wi e studeri moro langa leki wán yuru. Wi e pruberi fu si fa a ben de gi den Kresten brada nanga sisa fu a fosi yarihondro, èn wi e taki san wi ben o du efu wi ben de na ini wan srefi sortu situwâsi. Baka dati, te wi de na ini a diniwroko, dan wi e pruberi fu fiti den sani di wi leri. A sani disi meki taki wi abi moro prisiri na ini a wroko di wi abi fu preiki a Kownukondre boskopu èn fu meki disipel. Boiti dati, a yepi wi tu fu abi moro bun bakapisi na ini a wroko disi.” Boiti taki a seti disi yepi den dri sisa disi fu go na fesi na ini a tru anbegi, a yepi den tu fu tron moro bun mati fu makandra. Den e taki: „Wi lobi a seti disi srefisrefi.”

17. San wi musu du fu kisi wini fu na Osofamiri Anbegi?

¹⁷ Fa a de nanga yu? Yu e kisi wini fu a dei di yu abi fu studeri makandra nanga yu osofamiri, èn efu yu de yu wawan, dan yu e kisi wini tu fu a seti dati? Efu yu e du den sani disi wanwan leisi, dan yu no sa kisi wini fu a seti disi. Ibri memre fu na osofamiri musu de srekasreka te a yuru doro di unu poti fu studeri Bijbel. Wi no musu meki pikinpikin sani tapu wi fu hori na Osofamiri Anbegi. Boiti dati, un musu studeri sani di na osofamiri kan gebroiki na ini den aladei libi. San yu kan du fu sorgu taki ala sma e prisiri fu a studie? Du sani di sa yepi yu fu doro na ati fu den sma na ini na osofamiri. Boiti dati, hori a studie na wan lespeki fasi, èn sorgu taki ala sma e firi switi.​—Yak. 3:18. *

’Tan na ai’ èn „de srekasreka”

18, 19. Fu di yu sabi taki a Manpikin fu libisma o kon heri esi, dan sortu krakti dati musu abi tapu yu nanga yu osofamiri?

¹⁸ Sensi 1914, a situwâsi na grontapu e kon ogri moro nanga moro. Disi e sori taki na ogri grontapu fu Satan doro en lasti dei. Armagedon de krosibei. Heri esi Yehovah o seni a Manpikin fu libisma kon fu krutu den ogri sma (Ps. 37:10; Odo 2:21, 22). Fu di yu sabi dati, dan yu nanga yu osofamiri musu de na ai, a no so?

¹⁹ Yu e gi yesi na a rai di Yesus gi yu fu tan abi wan „krin” ai? Sma na ini a grontapu disi e feti baka gudu, den de nomonomo fu kisi biginen nanga makti. Ma a de so taki na osofamiri fu yu e suku fu doro marki na ini na anbegi? Yu e kisi wini fu na Osofamiri Anbegi, noso efu yu de yu wawan, dan yu e kisi wini tu fu a seti dati? A seti disi e yepi yu osofamiri fu kon moro krosibei na Yehovah èn fu kon abi moro lobi gi makandra? Yu e tyari a frantwortu di yu abi leki masra, wefi, noso pikin, soleki fa na artikel na fesi ben gi wi deki-ati fu du? Unu e yepi a heri osofamiri fu ’tan na ai’? (1 Tes. 5:6) Efu yu e du dati, dan yu sa „de srekasreka” te a Manpikin fu libisma kon.

[Futuwortu]

San yu leri?

• Fruklari fa Kresten osofamiri kan „de srekasreka” . . .

te den abi wan „krin” ai.

te den e suku fu doro marki na ini na anbegi.

te den e hori na Osofamiri Anbegi doronomo.

[Aksi fu a tori disi]

[Prenki na tapu bladzijde 13]

Te wi abi wan „krin” ai, dan wi no sa gi pasi taki grontapu sani puru wi prakseri