Kresten osofamiri, un ’tan na ai’

„Meki wi tan wiki èn meki wi de na ai.”​—1 TES. 5:6.

1, 2. San wan osofamiri musu du fu man tan na ai?

NA INI a brifi di na apostel Paulus ben skrifi gi den Kresten na ini Tesalonika, a ben taki fu ’a bigi dei fu Yehovah di o meki sma frede srefisrefi’. Paulus ben skrifi: „Mi brada, unu no de na ini dungru, èn dati meki a dei dati no sa kon na un tapu wantronso, leki fa deiten e kon miti fufuruman wantronso, bika un alamala na manpikin fu a leti èn manpikin fu deiten. Wi a no sma fu a neti, noso sma fu a dungru.” Paulus ben taki moro fara: „Fu dati ede, meki wi no sribi go doro leki fa den tra sma e sribi, ma meki wi tan wiki èn meki wi de na ai.”​—Yoèl 2:31; 1 Tes. 5:4-6.

² A rai di Paulus ben gi den Kresten na ini Tesalonika fiti srefisrefi gi Kresten di e libi na ini „a ten fu a kaba” (Dan. 12:4). Fu di a kaba fu na ogri grontapu fu Satan e kon moro krosibei, meki Satan de nomonomo fu kori so furu tru anbegiman leki a man, so taki den e drai baka gi Gado. Fu dati ede, a bun te wi e gi yesi na a rai di Paulus e gi wi fu tan na ai. Efu wan Kresten osofamiri wani tan na ai, dan ibri memre musu du san Yehovah e fruwakti fu en. Sobun, fa masra, wefi, nanga yonguwan kan yepi na osofamiri fu den fu ’tan na ai’?

Un masra, teki na eksempre fu „a tumusi bun skapuman”

3. Soleki fa 1 Timoteyus 5:8 e sori, dan sortu frantwortu wan man abi leki edeman fu na osofamiri?

³ Bijbel e taki: „A man na a ede fu na uma” (1 Kor. 11:3). Sortu frantwortu wan man abi leki edeman fu na osofamiri? Luku san Bijbel e taki fu wan fu den frantwortu di na edeman abi: ’Efu wan sma no e sorgu den sma fu en, spesrutu den sma fu en osofamiri, dan a drai baka gi a bribi, èn a takru moro leki wan sma di no e bribi’ (1 Tim. 5:8). Iya, wan man musu sorgu gi en osofamiri. Ma efu wan masra wani yepi en osofamiri fu tan na ai, dan a no nofo te a e wroko fu gi en osofamiri nyanyan. A musu tranga a bribi fu en osofamiri, noso a musu yepi ala den sma na ini en osofamiri fu kon abi wan moro bun matifasi nanga Gado (Odo 24:3, 4). Fa a kan du dati?

4. San kan yepi wan man fu tranga a bribi fu en osofamiri?

⁴ Fu di „wan masra na a ede fu en wefi neleki fa Krestes na a ede tu fu a gemeente”, meki wan man di trow musu ondrosuku fa Yesus e tiri a gemeente, èn a musu teki na eksempre fu En (Ef. 5:23). Luku san Yesus ben taki fu a matifasi di a abi nanga den bakaman fu en. (Leisi Yohanes 10:14, 15.) San na wan prenspari sani di kan yepi wan man fu tranga a bribi fu na osofamiri fu en? A musu studeri den sani di Yesus, „a tumusi bun skapuman”, ben taki èn ben e du, èn a musu „waka soifri na en baka”.​—1 Petr. 2:21.

5. San a Tumusi Bun Skapuman sabi fu a gemeente?

⁵ Meki wi go luku san wan osofamiri edeman kan leri fu na eksempre fu Krestes. Fu taki en leti, a skapuman sabi den skapu fu en heri bun, den skapu sabi a skapuman tu, èn den e frutrow en. Den sabi a sten fu en, èn den e gi yesi na en. Yesus ben taki: „Mi sabi mi skapu èn mi skapu sabi mi.” Yesus no sabi a gemeente frafra. A Griki wortu di vertaal dyaso nanga „sabi”, e sori taki Yesus „sabi den skapu heri bun”. Iya, a Tumusi Bun Skapuman sabi ibriwan fu den skapu fu en. A sabi san den abi fanowdu, sortu swakifasi den abi, èn san na  den bun fasi fu den. A Bigi Eksempre fu wi sabi ala sani fu den skapu fu en. Na so a de tu taki den skapu sabi a skapuman bun, èn den abi a frutrow taki a e tiri den na wan bun fasi.

6. Fa masra kan teki na eksempre fu a Tumusi Bun Skapuman?

⁶ Efu wan masra wani de wan bun edeman neleki Krestes, dan a musu leri fu si ensrefi leki wan skapuman, èn den wan di a e tiri, a musu si leki skapu. A musu pruberi fu kon sabi na osofamiri fu en bun. Wan masra kan kon sabi en osofamiri bun? Iya, dati kan te a e taki bun nanga ala sma na ini en osofamiri, te a e arki den te den e taki fu den broko-ede fu den, èn te a e teki fesi te na osofamiri musu du sani makandra. Wan Kresten masra musu de wan bun eksempre tu te a abi fu du nanga sani soleki na Osofamiri Anbegi, den gemeente konmakandra, a preikiwroko, prisiriten, nanga den felem di a e luku èn den poku di a e arki. Boiti dati, a musu sorgu taki a e teki bun bosroiti te a abi fu du nanga den tori disi. Wan Kresten masra di wani de wan eksempre èn di wani teki bun bosroiti, e ondrosuku san Gado Wortu e taki, èn a e kon sabi na osofamiri fu en bun. Na so na osofamiri fu en o de klariklari fu teki a tiri fu en, èn a o abi a grani fu si taki den e tan dini Gado na ini wánfasi.

7, 8. Fa wan masra kan teki na eksempre fu a Tumusi Bun Skapuman, te a e sori lobi gi den memre fu en osofamiri?

⁷ Wan bun skapuman lobi den skapu fu en tu. Te wi e studeri den Evangelietori di e taki fu a libi fu Yesus èn fu a diniwroko fu en, dan a o naki wi ati fu si fa Yesus ben e sori lobi gi den disipel fu en. A ’gi en libi srefi gi den skapu fu en’. Masra musu sori lobi gi den wan di a e tiri, neleki fa Yesus ben du dati. Efu wan masra wani taki Gado feni en bun, dan a no musu basi en wefi, ma a musu tan lobi en „neleki fa Krestes lobi a gemeente” (Ef. 5:25). A musu taki na wan switi fasi nanga a wefi fu en, èn a musu hori den firi fu en na prakseri, fu di en wefi warti fu kisi grani.​—1 Petr. 3:7.

⁸ Te wan osofamiri edeman e gi den pikin fu en leri, dan a musu tan hori ensrefi na Bijbel gronprakseri. Ma ala ten a musu sori lobi gi den pikin fu en. Te a musu gi den pikin fu en trangaleri, dan a musu du dati na wan lobi-ati fasi. Kande a e teki moro langa gi son yonguwan fu frustan san den papa nanga mama e fruwakti fu den. Te dati de so, dan wan papa musu abi moro pasensi nanga den. Te wan masra e tan teki na eksempre fu Yesus, dan en osofamiri sa firi switi te den de na oso, èn den o abi a dyaranti taki sani sa waka bun nanga den. Na osofamiri fu en sa abi wan bun matifasi nanga Gado, neleki a psalm skrifiman.​—Leisi Psalm 23:1-6.

9. Sortu frantwortu Kresten masra abi, neleki fa a ben de nanga a famiri-edeman Noa, èn san o yepi den fu tyari a frantwortu dati?

⁹ Ete wan sma di ben de wan bun eksempre gi osofamiri edeman, na Noa. A famiri-edeman Noa ben e libi na a ten fu a kaba fu a grontapu fu a ten fu en. Ma Yehovah ben ’kibri en makandra nanga seibi tra sma, di a ben tyari wan bigi frudu kon na tapu wan libimakandra fu ogrisma’ (2 Petr. 2:5). Noa ben abi a frantwortu fu yepi en osofamiri fu pasa a Frudu libilibi. Edeman fu Kresten osofamiri abi wan srefi sortu frantwortu na ini den lasti dei disi (Mat. 24:37). A prenspari srefisrefi taki den e studeri na eksempre fu „a tumusi bun skapuman”, èn taki den e du muiti fu teki na eksempre fu en!

Un wefi, ’bow na osofamiri fu unu’

10. Te wan wefi e saka ensrefi na ondro a masra fu en, dan san dati wani taki?

¹⁰ Na apostel Paulus ben skrifi: „Meki den wefi saka densrefi na den masra ondro neleki fa den e saka densrefi na Masra ondro” (Ef. 5:22). Den wortu disi no wani taki dati a frantwortu fu na uma no prenspari. Bifo a tru Gado ben meki a fosi uma Eva, dan a ben taki: „A no bun taki a man e tan en wawan. Mi o meki wan patna gi en di fiti en èn di kan yepi en” (Gen. 2:18). A frantwortu di a wefi abi fu de  wan ’yepi’ nanga wan ’patna di fiti gi en masra’, wani taki dati a e horibaka gi en masra te a e tyari den frantwortu di a abi na ini na osofamiri. A no de fu taki dati a frantwortu di a wefi abi warti srefisrefi.

11. Fa wan bun wefi ’e bow na osofamiri fu en’?

¹¹ Wan bun wefi e meki muiti fu sorgu taki sani e waka bun nanga na osofamiri fu en. (Leisi Odo 14:1.) Wan don uma no e sori lespeki gi a masra di de na edeman fu en, ma wan koni uma abi bigi lespeki gi a seti dati. Wan bun wefi no e trangayesi en masra, èn a no e du san ensrefi wani, soleki fa grontapusma e du. Na presi fu dati, a e saka ensrefi na ondro a masra fu en (Ef. 2:2). Wan don wefi lobi fu taki takru fu en masra, ma wan koni wefi e sorgu taki den pikin fu en nanga tra sma e kisi moro lespeki gi a masra fu en. Wan koni wefi no e dwengi en masra fu du san en wani èn a no e haritaki nanga en masra, fu di dati kan meki taki tra sma lasi lespeki gi en masra. Wan koni wefi e luku bun tu fa a e gebroiki a moni fu en osofamiri. Nofo tron, wan don uma e frumorsu a moni di en masra wroko so tranga fu feni. Wan bun wefi no de so. A e wroko makandra nanga en masra te a abi fu du nanga moni afersi. A fasi fa a e du sani e sori taki a e gebroiki en frustan, èn taki a sabi fa fu handri nanga moni. A no e dwengi en masra fu wroko moro yuru, soso fu meki moro moni.

12. San wan wefi kan du fu yepi en osofamiri fu ’tan na ai’?

¹² Wan bun wefi e yepi en osofamiri fu ’tan na ai’, fu di a e yepi en masra fu gi den pikin fu en leri fu Gado (Odo 1:8). A e horibaka fayafaya gi na Osofamiri Anbegi. Boiti dati, a e horibaka gi en masra te a e gi den pikin fu den rai nanga trangaleri. Iya, wan bun wefi de heri tra fasi leki wan wefi di no e wroko makandra nanga en masra. A no de fu taki dati te wan wefi no e du dati, dan sani no sa waka bun na ini na osofamiri fu en!

13. Fu san ede a prenspari taki wan wefi e horibaka gi en masra te a abi frantwortu na ini a gemeente?

¹³ Fa wan bun wefi feni en te en masra abi frantwortu na ini a Kresten gemeente? We, a breiti! Efu en masra na wan dinari ini a diniwroko, wan owruman, wan memre fu na Ati-oso Kontakti Komte noso fu a Bowkomte, dan a breiti taki a masra abi a grani disi. A no de fu taki dati efu a wani horibaka gi en masra na ala fasi, dan o abi fu fiti ensrefi. Ma a sabi taki a wroko di en masra e du gi a gemeente èn gi na organisâsi, e yepi en heri osofamiri fu tan na ai.

14. (a) San kan de wan tyalensi gi wan bun wefi, èn san kan yepi en? (b) Fa wan wefi kan sorgu taki sani e waka bun nanga en heri osofamiri?

¹⁴ Kande a sa muilek gi wan wefi fu horibaka gi en masra te a no e agri nanga wan bosroiti di en masra teki. Awansi dati de so, toku a sa tan abi wan „tiri èn safri fasi’, èn a sa wroko makandra nanga en masra fu meki sani waka  bun (1 Petr. 3:4). Wan bun wefi e pruberi fu teki a bun eksempre fu fositen uma di ben lobi Gado. Wan tu fu den uma dati na Sara, Rut, Abikail, nanga Maria, a mama fu Yesus (1 Petr. 3:5, 6). Wan bun wefi e teki na eksempre tu fu uma di owru moro en èn di „e tyari densrefi na wan fasi di fiti santa sma” (Tit. 2:3, 4). Fu di wan bun wefi e sori lobi nanga lespeki gi en masra, meki a trowlibi fu en e waka bun, èn sani e go bun tu nanga en heri osofamiri. En osofamiri e firi switi te den de na oso èn den abi a dyaranti taki sani o waka bun nanga den. Te wan man di e wroko tranga gi Yehovah abi wan wefi di e horibaka gi en, dan dati na wan warti sani trutru!​—Odo 18:22.

Un yonguwan, ’tan luku den sani di wi no e si’

15. Fa yonguwan kan wroko makandra nanga den papa nanga mama so taki na osofamiri e ’tan na ai’?

¹⁵ Yonguwan, fa unu kan wroko makandra nanga un papa nanga mama so taki na osofamiri fu unu sa ’tan na ai’? Luku den blesi di Yehovah wani gi yu. A kan taki di yu ben pikin, yu papa nanga mama sori yu prenki di ben abi fu du nanga a libi na ini Paradijs. Di yu ben e gro kon moro bigi, dan a kan taki den gebroiki Bijbel nanga Bijbel publikâsi fu yepi yu fu si na yu fesi fa a ben o de fu libi fu têgo na ini a nyun grontapu. Tan poti prakseri na a diniwroko di yu e du gi Yehovah, èn seti yu libi na wan fasi di sa yepi yu fu ’tan na ai’.

16, 17. San yonguwan kan du fu lon a streilon fu libi nanga bun bakapisi?

¹⁶ Gi yesi na den wortu fu na apostel Paulus di skrifi na 1 Korentesma 9:24. (Leisi en.) Lon a streilon fu libi nanga a marki fu wini en. Libi na so wan fasi taki yu sa kisi a blesi fu têgo libi. Furu sma go feti baka gudu, èn a sani dati meki taki den no tan poti prakseri na den blesi. Dati na wan don sani trutru! Te wi e libi soso fu kon gudu, dan wi no sa de koloku trutru. Den sani di moni kan bai de fu wan pisi ten nomo. Ma yu fu yu sei musu tan ’luku den sani di wi no e si’. Fu san ede? Fu di „den sani di wi no e si, e tan fu têgo”.​—2 Kor. 4:18.

¹⁷ „Den sani di wi no e si”, abi fu du nanga den blesi fu a Kownukondre. Teki a bosroiti fu libi na so wan fasi taki yu e kisi den blesi dati. Yu sa de koloku trutru te yu e gebroiki yu libi fu dini Yehovah. Te wi e dini a tru Gado, dan wi o man poti marki di wi kan doro na ini wan syatu pisi ten, noso baka wan moro langa pisi ten. * Te yu e poti marki di yu man doro na ini a tru anbegi, dan dati kan yepi yu fu tan dini Gado nanga yu heri ati, so taki yu kan kisi a blesi fu têgo libi.​—1 Yoh. 2:17.

18, 19. Fa wan yonguwan kan kon sabi efu a abi wan bun matifasi nanga Gado?

¹⁸ Yonguwan, a fosi sani di un musu du fu kan kisi têgo libi, na taki un musu kon abi wan matifasi nanga Gado. Yu du dati kaba? Aksi yusrefi a sani disi: ’Mi lobi a tru anbegi, noso mi e teki prati na a anbegi fu di mi papa nanga mama e du dati? Mi e kweki fasi di sa meki taki Gado feni mi bun? Mi e meki muiti fu teki prati doronomo na den sani di abi fu du nanga a tru anbegi? Iya, mi e begi doronomo? Mi e studeri Gado Wortu? Mi e go na den konmakandra doronomo? Èn mi e teki prati doronomo tu na a preikiwroko? Mi e du muiti fu kon moro krosibei na Gado, èn fu abi wan moro bun matifasi nanga en?’​—Yak. 4:8.

 ¹⁹ Poti prakseri na a eksempre fu Moses. Aladi Moses ben musu tan na mindri sma di ben abi wan tra kulturu, toku a no ben wani taki sma sabi en leki a boi fu na umapikin fu Farao, ma a ben wani taki sma sabi en leki wan anbegiman fu Yehovah. (Leisi Hebrewsma 11:24-27.) Kresten yonguwan, un musu abi a fasti bosroiti fu dini Yehovah nanga un heri ati. Te unu e du dati, dan un sa de koloku trutru, èn nownowde kaba un sa „grabu a trutru libi bun steifi”.​—1 Tim. 6:19.

20. Te sma e lon a streilon, dan suma e wini?

²⁰ Na ini owruten, wán sma nomo ben kan wini wan streilon. Ma dati no de so nanga a streilon fu libi. Gado wani taki „ala sortu sma musu kisi frulusu èn taki den musu kon sabi a waarheid soifri” (1 Tim. 2:3, 4). Furu sma di ben de na yu fesi, lon a streilon nanga bun bakapisi, èn furu sma e lon na yu sei (Hebr. 12:1, 2). Ala sma di e tan horidoro o wini. Sobun, abi a fasti bosroiti fu wini!

21. Na sortu sani wi sa poti prakseri na ini a tra artikel?

²¹ Noti no o man tapu pasi gi ’a bigi dei fu Yehovah di o meki sma frede srefisrefi’ (Mal. 4:5). Kresten osofamiri musu de srekasreka gi a dei dati. A de prenspari taki ala sma na ini na osofamiri e tyari a frantwortu di Gado gi den. Sortu tra sani yu kan du fu tan na ai èn fu kon abi wan moro bun matifasi nanga Gado? A tra artikel sa poti prakseri na dri sani di kan abi krakti tapu a bribi fu a heri osofamiri.

[Futuwortu]

San yu leri?

• Fu san ede a prenspari taki Kresten osofamiri e ’tan na ai’?

• Fa wan masra kan teki na eksempre fu a Bun Skapuman?

• San wan bun wefi kan du fu horibaka gi a masra fu en?

• Fa yonguwan kan yepi na osofamiri fu den fu tan na ai?

[Aksi fu a tori disi]

[Prenki na tapu bladzijde 9]

Te wan man di e wroko tranga gi Yehovah abi wan wefi di e horibaka gi en, dan dati na wan warti sani trutru