Suma na a moro prenspari sma na ini yu libi?

„Yu wawan na a Moro Heiwan fu heri grontapu.”​—PS. 83:18.

1, 2. Efu wi wani kisi frulusu, dan fu san ede a no nofo taki wi sabi a nen fu Yehovah nomo?

KANDE a fosi leisi di yu si a nen fu Yehovah, na di sma meki yu leisi en na ini Psalm 83:18. Kande yu ben e fruwondru di yu leisi den wortu disi: „Na so sma o sabi taki yu di nen Yehovah, yu wawan na a Moro Heiwan fu heri grontapu.” A kan taki sensi a ten dati, yu gebroiki a srefi Bijbeltekst disi fu yepi trawan fu kon sabi Yehovah, wi lobi-ati Gado.​—Rom. 10:12, 13.

² Aladi a prenspari taki sma e kon sabi a nen fu Yehovah, toku dati wawan no nofo. Luku taki a psalm skrifiman e poti prakseri na wan tra tumusi prenspari tru tori di kan meki taki wi kisi frulusu. A e taki: „Yu wawan na a Moro Heiwan fu heri grontapu.” Iya, Yehovah na a moro prenspari Sma na hemel èn na grontapu. Fu di en na a Mekiman fu ala sani, meki a abi a reti fu fruwakti taki ala libisani e saka densrefi na en ondro (Openb. 4:11). Fu dati ede wi musu aksi wisrefi a sani disi: ’Suma na a moro prenspari sma na ini mi libi?’ A de tumusi prenspari taki wi e luku bun sortu piki wi e gi tapu na aksi dati!

Na afersi di opo kon na ini a dyari fu Eden

3, 4. Fa Satan ben man kori Eva, èn san ben de a bakapisi?

³ Den sani di pasa na ini a dyari fu Eden e sori taki na aksi dati prenspari srefisrefi. Drape na engel di ben opo ensrefi teige Gado èn di ben tron Satan Didibri bakaten, ben kori Eva, a fosi uma. A ben meki taki Eva du san ensrefi wani, èn na so a trangayesi a wet di Yehovah ben gi den fu no nyan fu a froktu fu wán fu den bon (Gen. 2:17; 2 Kor. 11:3). Eva brokokindi gi a tesi dati, èn na so a sori taki a no ben abi lespeki gi Yehovah, a Moro Hei Tiriman. Ma fa Satan ben man kori Eva?

⁴ Satan gebroiki difrenti triki di a ben e taki nanga Eva. (Leisi Genesis 3:1-5.) A fosi sani na taki Satan no gebroiki a nen fu Yehovah di a ben e taki nanga Eva. A gebroiki a wortu „Gado” nomo. Tra fasi leki dati, a skrifiman fu Genesis gebroiki a nen fu Yehovah na ini a fosi vers fu kapitel dri. A di fu tu sani na taki Satan no ben aksi Eva sortu „komando” Gado ben gi den, ma a ben aksi en nomo san Gado ben „taki” (Gen. 2:16). A kan taki Satan gebroiki a triki disi fu meki a gersi leki a komando di Gado ben gi, no de so prenspari. A di fu dri sani, na taki Satan gebroiki a wortu „un”, aladi a ben e taki nanga Eva wawan. A kan taki Satan du dati fu di a ben wani taki Eva bigin denki tumusi furu fu ensrefi. Iya, kande a ben wani taki Eva ben musu si ensrefi leki a sma di ben abi a reti fu taki gi ensrefi èn gi en masra. San ben de a bakapisi? Soleki fa a sori, dan Eva prefuru fu taki gi ensrefi èn gi en masra. A taigi a sneki: „Wi kan nyan den froktu fu den bon na ini a dyari.”

5. (a) Na sortu sani Satan ben meki Eva poti prakseri? (b) San Eva ben sori fu di a nyan fu a froktu?

⁵ Satan ben wani meki Eva kisi wan fowtu denki fu sani. A ben sori Eva taki Gado no ben handri na wan reti fasi di a gi en nanga Adam a komando fu ’no nyan fu ala den bon na ini a dyari’. Baka dati Satan meki taki Eva  bigin denki ensrefi nomo, èn a kori en taki a ben o kon abi wan moro bun libi te a ben o kon de „leki Gado”. Te fu kaba, a kisi en so fara fu prakseri soso a bon nanga a froktu, na presi taki a prakseri a Sma di ben gi en ala sani. (Leisi Genesis 3:6.) A sari fu si taki, di Eva nyan fu a froktu, dan na so a sori taki a no ben si Yehovah leki a moro prenspari Sma na ini en libi.

Na afersi di opo kon na ini den dei fu Yob

6. San Satan ben taki fu a fasi fa Yob ben e dini Gado, èn sortu okasi Yob ben kisi leki bakapisi fu dati?

⁶ Hondrohondro yari baka dati, a reti-ati man Yob ben kisi na okasi fu sori suma ben de a moro prenspari Sma na ini en libi. Di Yehovah ben sori Satan taki Yob ben e tan gi yesi na En, dan Satan piki en: „Na fu soso Yob e dini Gado?” (Leisi Yob 1:7-10.) Satan no ben taki dati Yob no ben e gi yesi na Gado. Na presi fu dati, a ben taki dati Yob no ben e dini Gado nanga en heri ati. Na wan triki fasi Satan ben taki dati Yob no ben e dini Yehovah fu di a lobi En, ma fu di a ben wani kisi wini gi ensrefi. Na Yob wawan ben kan sori taki Satan no ben abi leti, èn a ben kisi na okasi fu du dati.

7, 8. Sortu tesi Yob kisi, èn san a sori fu di a tan gi yesi na Gado?

⁷ Yehovah gi pasi taki Satan tyari wan tu rampu kon na tapu Yob, a wan baka a trawan (Yob 1:12-19). San Yob du baka di a situwâsi fu en kenki so? Bijbel e taki dati „a no sondu èn a no taki nowan ogri fu Gado” (Yob 1:22). Ma Satan no ben kaba ete. A ben taki moro fara: „Meki a de taki na dede wan sma de fu dede, dan yu o si efu a no o gi ala san a abi soso fu man tan na libi” (Yob 2:4). Satan ben taki dati efu Yob srefi ben o kisi skin ati, dan a ben o sori taki Yehovah no ben de a moro prenspari Sma na ini en libi.

⁸ Yob ben kisi wan siki di ben pori en skin, èn en wefi ben e dwengi en fu fluku Gado èn dede. Bakaten, dri falsi trowstuman taigi Yob taki a ben kisi den tesi disi fu di a ben du sani di no fiti (Yob 2:11-13; 8:2-6; 22:2, 3). Ma aladi Yob kisi ala den tesi disi, toku a weigri fu drai baka gi Gado. (Leisi Yob 2:9, 10.) Fu di a tan gi yesi na Yehovah, meki a sori taki Yehovah ben de a moro prenspari Sma na ini en libi. Yob ben sori tu taki awinsi wan sma abi sondu, toku a man sori taki Didibri na wan leiman.​—Luku Odo 27:11.

Yesus gi a moro bun piki

9. (a) Fa Satan pruberi fu kori Yesus di angri ben e kiri en? (b) San Yesus du di Satan ben wani kori en?

⁹ Syatu baka di Yesus teki dopu, Satan pruberi fu kori en fu suku wini gi ensrefi, na presi fu tan si Yehovah leki a moro prenspari Sma na ini en libi. Didibri tesi Yesus na dri fasi. Na a fosi presi, a ben sabi taki angri ben e kiri Yesus, èn dati meki a ben wani kori en fu meki ston tron brede (Mat. 4:2, 3). Angri ben e kiri Yesus fu di a ben faste 40 dei langa. Dati meki Didibri gi en a deki-ati fu gebroiki  en krakti fu du wan wondru so taki a ben kan abi wan sani fu nyan. San Yesus du? Tra fasi leki Eva, Yesus tan poti prakseri na a Wortu fu Yehovah, èn wantewante a kakafutu gi Satan.​—Leisi Mateyus 4:4.

10. Fu san ede Satan taigi Yesus fu fringi ensrefi abra den skotu fu a tempel go na gron?

¹⁰ Satan ben wani kori Yesus tu fu prakseri ensrefi nomo. A taigi Yesus fu fringi ensrefi abra den skotu fu a tempel go na gron (Mat. 4:5, 6). Fu san ede Satan ben taigi Yesus fu du dati? Satan ben taki dati efu Yesus no ben o kisi mankeri, dan dati ben o buweisi taki a ben de „wan manpikin fu Gado”. Soleki fa a sori, dan Didibri ben wani taki Yesus ben musu poti so furu prakseri na ensrefi, taki a ben o du sma-ai sani. Satan ben sabi taki wan sma ben o de klariklari fu du iniwan sani soso fu no meki sma lasi lespeki gi en, awinsi a sani di a o du kan meki a kisi hebi mankeri. Satan ben drai a Wortu fu Gado, ma Yesus sori taki a ben e frustan a Wortu fu Yehovah heri bun. (Leisi Mateyus 4:7.) Fu di Yesus kakafutu gi a tesi dati fu Satan, meki a sori taki Yehovah ben de a moro prenspari Sma na ini en libi.

11. Di Didibri ben wani gi Yesus ala den kownukondre fu grontapu, dan fu san ede Yesus weigri fu teki den sani dati?

¹¹ Fu di Satan ben de nomonomo fu kisi Yesus, meki a lasti sani di a du, na taki a pramisi Yesus taki a ben o gi en ala den kownukondre fu grontapu (Mat. 4:8, 9). Wantewante Yesus sori Satan taki a no ben wani den sani dati kwetikweti. Yesus ben sabi taki efu a ben o teki san Satan ben wani gi en, dan dati ben o sori taki a drai baka gi Yehovah, a Moro Heiwan di abi a reti fu tiri ala sani. (Leisi Mateyus 4:10.) Ibri leisi te Satan ben e tesi Yesus, dan Yesus ben e gebroiki Bijbeltekst di abi a nen fu Yehovah na ini.

12. Sortu muilek bosroiti Yesus ben musu teki na a kaba fu en diniwroko na grontapu, èn san wi e leri fu a fasi fa a ben denki fu a bosroiti dati?

¹² Na a kaba fu a diniwroko fu en na grontapu, Yesus ben musu teki wan muilek bosroiti. Na a ten fu a diniwroko fu en, a ben sori taki a ben de klariklari fu gi en libi leki  wan srakti-ofrandi (Mat. 20:17-19, 28; Luk. 12:50; Yoh. 16:28). Ma Yesus ben sabi taki sma ben o tyari en go na fesi a Dyu krutubangi aladi a no ben du nowan ogri. A ben sabi tu taki den ben o kiri en leki wan sma di spotu Gado. A sani disi di ben o pasa nanga en ben trobi en srefisrefi. A ben begi: „Mi Tata, efu a man, dan meki a kan disi pasa mi.” Ma a ben taki moro fara: „Ma no du soleki fa mi wani, ma soleki fa yu wani” (Mat. 26:39). Iya, fu di Yesus tan gi yesi na Gado te na a dede fu en, meki a sori krin suma ben de a moro prenspari Sma na ini en libi!

Fa wi o piki na aksi

13. San wi leri fu na eksempre fu Eva, a di fu Yob, èn a di fu Yesus Krestes?

¹³ San wi leri te nanga now? A tori fu Eva e leri wi taki den wan di e suku wini gi densrefi nomo, noso den wan di e denki tumusi furu fu densrefi, e sori taki Yehovah no de a moro prenspari Sma na ini den libi. Ma na eksempre fu Yob di ben e tan gi yesi na Gado, e leri wi taki awinsi wi na sondu libisma, toku wi kan horidoro te wi e kisi tesi, awinsi wi no e frustan fu san ede den tesi dati e miti wi. Na so fasi wi e sori taki wi e poti a wani fu Yehovah na a fosi presi na ini wi libi (Yak. 5:11). Leki lasti, na eksempre fu Yesus e leri wi taki wi no musu frede fu kisi syen, èn wi no musu denki tumusi furu fu wisrefi (Hebr. 12:2). Ma fa wi kan fiti den sani disi di wi leri?

14, 15. Fa a fasi fa Yesus handri di a ben e kisi tesi, e difrenti fu a fasi fa Eva ben handri? Fa wi kan teki na eksempre fu Yesus? (Taki fu a prenki na tapu bladzijde 18.)

¹⁴ Noiti no gi pasi taki tesi e meki yu frigiti Yehovah. Eva ben gi pasi taki a tesi di a ben kisi na a momenti dati, hari ala en prakseri. A ben kon si taki a froktu ben „bun fu nyan èn taki a bon ben moi fu si, iya, a no ben man puru en ai fu a bon” (Gen. 3:6). Ma Yesus ben handri heri tra fasi di a ben kisi den dri tesi! Noiti a gi pasi taki den tesi ben meki a frigiti den bakapisi fu a fasi fa a ben o handri. A ben e frutrow tapu a Wortu fu Gado, èn a gebroiki a nen tu fu Yehovah.

¹⁵ Te wi e kisi tesi di kan meki wi du sani di Yehovah no lobi, dan na san wi e poti wi prakseri? O moro wi e poti prakseri na a tesi, o moro wi o kisi a firi fu du san no bun (Yak. 1:14, 15). Wi musu handri wantewante fu rutu a takru firi puru, awinsi a sani di wi musu du de neleki wi e koti wan pisi fu wi skin puru (Mat. 5:29, 30). Neleki Yesus, wi musu poti prakseri na den bakapisi fu a fasi fa wi o handri. Iya, wi musu prakseri sortu krakti a sa abi tapu wi matifasi nanga Yehovah. Wi musu prakseri san en Wortu, Bijbel, e taki. Soso te wi e du den sani disi, wi kan sori taki Yehovah na a moro prenspari Sma na ini wi libi.

16-18. (a) San kan meki wi firi brokosaka? (b) San o yepi wi fu horidoro te wi de na ini muilek situwâsi?

¹⁶ Noiti no atibron tapu Yehovah fu di rampu e miti yu (Odo 19:3). O moro wi e kon krosibei na a kaba fu na ogri grontapu disi, o moro rampu nanga problema o miti a pipel fu Yehovah. Wi sabi taki Yehovah no sa kibri wi na wan wondru fasi na ini a ten disi. Ma toku, neleki Yob, wi kan firi brokosaka te wan lobiwan fu wi dede, noso te wi abi problema.

¹⁷ Yob no ben e frustan fu san ede Yehovah ben e gi pasi taki son sani ben e miti en, èn a kan taki son leisi wi no e frustan tu fu san ede ogri e pasa. Kande wi yere taki reti-ati brada nanga sisa dede di wan gronseki pasa, soleki a wan na ini Haiti. Noso kande yu yere taki brada nanga sisa dede na ini wan tra sortu rampu. Kande wi kon sabi tu taki sma du ogri nanga wan brada noso sisa di e dini Yehovah nanga en heri ati. Kande wi yere srefi taki wan brada noso wan sisa dede fu di den ben kisi wan ongoloku. A kan tu taki wi de na ini wan situwâsi di e gi wi broko-ede, noso a kan taki sma no e handri na wan reti fasi nanga wi. Kande wi e sari so te, taki wi e bari taki: ’Yehovah, fu san ede den sani disi e miti mi? San mi  du? (Hab. 1:2, 3) San kan yepi wi fu horidoro te den sani disi e miti wi?

¹⁸ Te den sortu rampu dati e miti wi, dan wi no musu denki taki den sani dati e sori taki Yehovah no feni wi bun. Yesus ben poti prakseri na a tori disi di a ben e taki fu tu rampu di ben pasa na ini a ten fu en. (Leisi Lukas 13:1-5.) Nofo tron sma e kisi fu du nanga rampu fu di „takru ten nanga sani di den no e fruwakti” e miti den (Preik. 9:11). Ma awinsi san e meki taki wi kisi problema, toku wi kan horidoro efu wi e poti ala wi prakseri na „a Gado fu ala trowstu”. A sa gi wi a krakti di wi abi fanowdu fu tan gi yesi na en.​—2 Kor. 1:3-6.

19, 20. San yepi Yesus fu horidoro di a ben kisi syen, èn san kan yepi wi fu du a srefi?

¹⁹ Noiti no denki tumusi furu fu yusrefi, èn noiti no frede fu kisi syen. Fu di Yesus ben abi sakafasi, meki a ben man ’gowe libi ala san a ben abi fu kan tron leki wan srafu’ (Fil. 2:5-8). Furu situwâsi miti Yesus pe a kisi syen. Ma toku a ben man horidoro, fu di a ben frutrow tapu Yehovah (1 Petr. 2:23, 24). Na so fasi Yesus poti a wani fu Yehovah na a fosi presi, èn a sani dati meki taki a kisi wan moro hei posisi (Fil. 2:9). Yesus gi den disipel fu en a deki-ati fu teki na eksempre fu en.​—Mat. 23:11, 12; Luk. 9:26.

²⁰ Son leisi, wi kan kisi tesi di kan meki wi firi syen. Toku wi musu abi a srefi frutrow di na apostel Paulus ben abi, di ben taki: „Na fu a srefi sani disi meki mi e pina tu, ma mi no e syen. Bika mi sabi a sma di mi e bribi na ini, èn mi de seiker taki ala sani di mi poti na ini en anu, a sa man kibri teleki a dei dati doro.”​—2 Tim. 1:12.

21. Sortu fasti bosroiti yu abi, aladi sma na ini grontapu e denki densrefi nomo?

²¹ Bijbel ben taki na fesi dati na ini a ten fu wi sma ben o „lobi densrefi nomo” (2 Tim. 3:2). Dati meki a no e fruwondru wi taki sma na ala sei e suku wini gi densrefi nomo. Noiti wi musu tron leki den sma dati! Ma awinsi wi e kisi tesi, awinsi rampu e miti wi, noso awinsi wi e kisi syen, toku ibriwan fu wi musu abi a fasti bosroiti fu sori taki trutru Yehovah na a moro prenspari Sma na ini wi libi!

San wi kan leri . . .

• fu a fasi fa Satan kori Eva?

• fu a fasi fa Yob handri di rampu miti en?

• fu a fasi fa Yesus ben e tan poti prakseri na den moro prenspari sani?

[Aksi fu a tori disi]

[Prenki na tapu bladzijde 17]

Eva ben frigiti a matifasi di a ben abi nanga Yehovah

[Prenki na tapu bladzijde 18]

Yesus kakafutu gi den tesi fu Satan, èn a ben abi a fasti bosroiti fu du a wani fu Yehovah

[Prenki na tapu bladzijde 20]

Den e preiki gi sma di go tan na ini tenti, baka di a gronseki pasa na ini Haiti

Te wi e kisi problema, dan wi kan poti ala wi prakseri na „a Gado fu ala trowstu”