„Wan tumusi bun opziener nanga wan lobi mati”

TAPU satra mamanten 4 december 2010, John (Jack) Barr kaba a diniwroko fu en na grontapu. A brada disi ben e dini leki memre fu a Tiri Skin fu Yehovah Kotoigi. A ben abi 97 yari. Sma e taki dati a ben de „wan tumusi bun opziener nanga wan lobi mati”.

Brada Jack Barr ben gebore na ini Aberdeen, na Skotland, èn a ben de a moro yonguwan fu den dri pikin fu en papa nanga mama. En papa nanga mama ben de salfu Kresten. Brada Barr ben gwenti taki na wan switifasi fu a fasi fa a ben kweki. A ben abi warderi gi a tumusi moi eksempre di en lobi-ati papa nanga mama ben gi en.

Di a ben abi sowan 13 yari, dan a bigin syensyen fu taki nanga sma di a no ben sabi. Ma a ben e wroko tranga fu wini a problema dati. Sobun di a ben abi 14 yari, a taigi en papa taki a ben de srekasreka fu go nanga en na ini a oso-fu-oso preikiwroko. Dati ben de a bigin fu den someni yari di a dini Yehovah. Sensi a dei dati, Brada Barr tan wan fayafaya preikiman fu a bun nyunsu, te na a dede fu en.

Wan dei, Jack en lobi-ati mama kisi wan bigi mankeri, èn pikinmoro a lasi en libi. A sani disi meki taki Jack bigin denki seryusu fu a libi. Dati meki na ini 1929, a gi ensrefi abra na Yehovah, èn na ini 1934, a teki dopu na a fosi okasi di a ben abi. Baka dati, na ini 1939, a tron wan memre fu a Bethel famiri na ini London, na Ingrisikondre. Na so a bigin du furuten diniwroko gi Yehovah, èn a du dati 71 yari langa.

Tapu 29 oktober 1960, Brada Barr trow nanga Mildred Willet, èn a kari a trowlibi dati „wan tumusi warti matifasi”. Langa ten kaba, a sisa dati ben de wan fayafaya pionier nanga wan zendeling. Sma ben sabi Brada nanga Sisa Barr leki wan trowpaar di ben de wan bun eksempre, èn di ben e anbegi Gado nanga den heri ati. Èn dati ben tan so teleki Mildred kaba a diniwroko fu en na grontapu na ini oktober 2004. Sensi a dei di Brada nanga Sisa Barr trow, den teki en leki wan gwenti fu leisi wan pisi fu Bijbel makandra ibri dei.

Den sma di ben sabi Jack Barr, sa memre en leki wan man di ben e gi sma bun rai. Ala ten a rai fu en ben fiti, ala ten a ben gi a rai dati na wan switi fasi, èn ala ten a rai ben e komoto fu Bijbel. A brada disi ben de wan opziener di ben e wroko tranga, a ben e hori den firi fu trawan na prakseri, a ben e sori lobi gi trawan, èn a ben de wan bun mati. Den piki fu en, den lezing di a ben e hori, èn den begi fu en ben e sori taki a ben lobi a tru anbegi, èn taki a ben abi wan bun matifasi nanga Yehovah.

Aladi wi sa misi wi lobi Brada Barr, wi e prisiri makandra nanga en fu di a kisi a grani fu kisi wan opobaka èn fu no dede noiti moro. A ben e angri fu kisi a grani disi, èn a ben gwenti fu taki fu a tori dati. Na dati wawan a ben wani.​—1 Kor. 15:53, 54. *

[Futuwortu]