Wi sa abi wan korostu firi te wi e frutrow dorodoro tapu Yehovah

„Yehovah srefi o yere te mi bari kari en.”​—PS. 4:3.

1, 2. (a) Na ini sortu muilek situwâsi David ben de? (b) Na sortu psalm wi sa poti prakseri?

KOWNU DAVID ben e tiri Israel wan heri pisi ten kaba, ma a ben kon de na ini wan muilek situwâsi. Na wan triki fasi, Absalom, a manpikin fu en, ben poti ensrefi leki kownu. A sani dati meki taki David ben abi fu lowe komoto na ini Yerusalem. Wan bun mati fu en ben tori en tu, èn now David ben e waka soso futu na tapu na Olèifbergi, èn a ben e krei. Wan tu sma nomo di ben tan horibaka gi en ben de nanga en. Boiti dati, Simei, wan famiriman fu Kownu Saul, ben e fringi ston nanga santi na tapu David èn a ben e kosi en.​—2 Sam. 15:30, 31; 16:5-14.

² A muilek situwâsi disi ben o meki taki David dede nanga sari èn nanga syen? Nôno, bika a ben e frutrow tapu Yehovah. Wi kan si disi krin na ini a di fu dri Psalm di David ben skrifi, èn a psalm disi e taki fu a ten di a ben e lowe gi Absalom. A ben skrifi sosrefi a di fu fo Psalm. Ala den tu psalm disi e sori taki a ben abi na overtoigi taki Gado e arki den begi fu sma èn taki a e piki den tu (Ps. 3:4; 4:3). Den psalm disi e gi wi a dyaranti taki Yehovah de nanga den reti-ati futuboi fu en dei nanga neti, taki a e yepi den, èn taki a e gi den wan korostu firi (Ps. 3:5; 4:8). Fu dati ede, wi sa poti prakseri na den psalm disi fu si fa den e yepi wi fu kon abi wan korostu firi èn fa den e yepi wi tu fu frutrow tapu Gado.

Te ’someni sma e gens wi’

3. Soleki fa Psalm 3:1, 2 e sori, dan na ini sortu situwâsi David ben de?

³ „Den Israelsma teki a sei fu Absalom”, na so wan boskopuman ben taigi David (2 Sam. 15:13). David no ben man frustan fa Absalom ben man overtoigi someni sma fu horibaka gi en. Fu dati ede a ben aksi: „Ke Yehovah, fu san ede someni sma tron mi feanti? Fu san ede someni sma e gens mi? Sma e taki fu mi: ’Gado no o man frulusu en’” (Ps. 3:1, 2). Furu Israelsma ben e denki taki Yehovah no ben o puru David na ini a muilek situwâsi di Absalom nanga den kompe fu en ben poti en na ini.

4, 5. (a) Sortu dyaranti David ben abi? (b) San den wortu „na yu e opo mi ede” wani taki?

⁴ Ma David ben abi wan korostu firi fu di a ben e frutrow dorodoro tapu Gado. A ben singi: „Ma yu, Yehovah, de leki wan skelt gi mi. Na yu e meki mi kisi glori èn na yu e opo mi ede” (Ps. 3:3). David ben de seiker taki Yehovah ben o kibri en neleki fa wan skelt e kibri wan srudati. Iya, a grani kownu ben e lowe, a ben tapu en ede nanga wan krosi, èn a ben e saka en ede fu di a ben kisi syen. Ma a Moro Hei Gado ben o tyari wan kaba kon na a syen di David ben kisi, èn a ben o meki a kisi glori. Yehovah ben o meki a tanapu leti-opo, èn a ben o meki a opo en ede hei baka neleki fosi. David ben e bari suku yepi na Gado fu di a ben abi a frutrow taki Gado ben o yepi en. Yu abi a srefi frutrow dati na ini Yehovah?

⁵ Nanga yepi fu den wortu „na yu e opo mi ede”, David e sori taki a sabi taki Yehovah o yepi en. Wan tra Bijbel vertaal den wortu fu Psalm 3:3 na a fasi disi: „Ma yu, O MASRA, ala ten na mi skelt di e kibri mi gi ogri; yu e meki mi wini èn yu e gi mi deki-ati baka” (Today’s  English Version). Wan buku e taki disi fu den wortu „na yu e opo mi ede”: „Te Gado e opo . . . wan sma en ’ede’, dan a e gi a sma dati howpu nanga wan korostu firi.” Wi kan frustan fu san ede Kownu David ben e sari srefisrefi, bika a ben abi fu lowe komoto na ini Israel. Ma Gado ben o ’opo en ede’ so taki a ben o kisi deki-ati baka, a ben o kon abi wan korostu firi, èn a ben o frutrow dorodoro tapu Gado.

’Yehovah o piki wi!’

6. Fu san ede David ben taki dati a begi fu en ben o kisi piki komoto fu a santa bergi fu Yehovah?

⁶ David di ben e frutrow tapu Yehovah èn di ben abi wan korostu firi, e taki moro fara: „Nanga wan tranga sten mi o bari kari Yehovah èn komoto fu a santa bergi fu en, a o piki mi” (Ps. 3:4). Sma ben tyari na ark fu a frubontu go na Sion-bergi, soleki fa David ben taigi den fu du. Na ark disi ben e prenki taki Gado ben de na mindri a pipel fu en. (Leisi 2 Samuel 15:23-25.) Dati meki a fiti taki David ben taki dati Yehovah piki den begi fu en komoto fu a santa bergi fu en.

7. Fu san ede David no ben e frede?

⁷ Fu di David ben abi a frutrow taki Gado ben o piki den begi fu en, meki a no ben e frede. Na presi fu dati, a ben singi: „Dan mi o kanti didon fu sribi. Ma mi sabi taki mi o wiki baka, fu di Yehovah e tan horibaka gi mi” (Ps. 3:5). Srefi na neti, te a ben o moro makriki gi sma fu kon du ogri nanga en, David no ben e frede fu go sribi. A ben sabi seiker taki a ben o wiki baka, fu di den sani di a ben ondrofeni fosi, ben gi en a frutrow taki Gado ben o tan yepi en. Wi kan abi a frutrow dati tu te wi e tan du „san Yehovah wani” èn te wi noiti no e drai baka gi en.​—Leisi 2 Samuel 22:21, 22.

8. Fa Psalm 27:1-4 e sori taki David ben e frutrow tapu Gado?

⁸ Ete wan psalm fu David e sori taki a ben abi wan korostu firi èn taki a ben e frutrow dorodoro tapu Gado. A psalm dati di skrifi nanga yepi fu santa yeye, e taki: „Yehovah na a leti fu mi èn na en e frulusu mi. Sobun, suma kan meki mi frede? Yehovah na wan fortresi pe mi kan lon go fu tan na libi. Sobun, suma o man tapu skreki gi mi? . . . Awinsi wan heri legre seti kampu  lontu mi, toku mi ati no sa beifi. . . . Wán sani mi aksi Yehovah èn dati na san mi wani trutru: Fu mi kan tan na ini na oso fu Yehovah, solanga mi de na libi, fu mi kan si taki Yehovah e du bun èn fu mi kan luku a tempel fu en nanga prisiri” (Ps. 27:1-4). Efu na so yu e firi tu, dan yu sa kon makandra doronomo nanga tra anbegiman fu Yehovah, efu a situwâsi fu yu e gi pasi taki yu du dati.​—Hebr. 10:23-25.

9, 10. Fu san ede wi kan taki dati den wortu na Psalm 3:6, 7 no e sori taki David ben e suku fu pai ogri nanga ogri?

⁹ Aladi Absalom handri na wan triki fasi nanga David, èn aladi furu trawan ben drai baka gi en, toku David ben e singi: „Mi no sa frede den dusundusun sma di seti densrefi lontu mi fu du mi ogri. Ke Yehovah, mi e begi yu, opo! Ke mi Gado, frulusu mi! Na yu o abi fu naki mi feanti na den kakumbe. Yu o abi fu broko den tifi fu den ogriwan.”​—Ps. 3:6, 7.

¹⁰ David no ben e suku fu pai ogri nanga ogri. Na Gado ben o ’naki den feanti fu en na den kakumbe’. Kownu David ben skrifi wan kopi fu a Wet gi ensrefi èn a ben sabi taki na ini a Wet dati Yehovah ben taki: „Na mi o puru atibron na den tapu èn na mi o strafu den” (Deut. 17:14, 15, 18; 32:35). Na Gado ben o „broko den tifi fu den ogriwan” tu. Dati wani taki dati den no ben o man du ogri moro nanga trawan. Yehovah sabi suma na den ogriwan, fu di a e „si fa na ati de” (1 Sam. 16:7). Wi de nanga tangi trutru taki Gado e gi wi deki-ati nanga krakti fu kakafutu gi Satan, a moro ogriwan. Boiti dati, heri esi Gado o fringi en go na ini wan dipi peti leki wan lew di e bari, ma di no abi tifi, èn te fu kaba a o kisi têgo pori!​—1 Petr. 5:8, 9; Openb. 20:1, 2, 7-10.

„Na Yehovah e frulusu sma”

11. Fu san ede wi musu begi gi wi Kresten brada nanga sisa?

¹¹ David ben sabi taki na Yehovah wawan ben kan tyari a frulusu kon di a ben abi so tranga fanowdu. Ma a psalm skrifiman no ben e denki ensrefi nomo. Fa a de nanga a pipel fu Yehovah? A fiti taki na a kaba fu a psalm fu en di skrifi nanga yepi fu santa yeye, David e skrifi den wortu disi: „Na Yehovah e frulusu sma. Yu e blesi a pipel fu yu” (Ps. 3:8). A no de fu taki dati David ben abi bun bigi problema, ma toku a ben e hori a pipel fu Yehovah na prakseri, èn a ben de seiker taki Gado ben o blesi den. Yu no feni taki wi musu hori wi Kresten brada nanga sisa na prakseri tu? Meki wi prakseri den na ini den begi fu wi, èn meki wi aksi Yehovah fu gi den en santa yeye so taki den kan teki deki-ati fu meki a bun nyunsu bekènti sondro frede.​—Ef. 6:17-20.

12, 13. San ben pasa nanga Absalom, èn san David du?

¹² Absalom dede na wan syen fasi. A sani dati de wan warskow gi ala sma di e du ogri nanga trawan, spesrutu nanga den salfuwan fu Gado, soleki David. (Leisi Odo 3:31-35.) Wan feti ben pasa, èn den srudati fu Absalom lasi a feti. Absalom ben e rèi na tapu wan buriki, di a bigi wiwiri fu en go fasi na wan lagi taki fu wan bigi bon. A ben tan fasi na ini a bon, èn a no ben man du noti. Te fu kaba Yoab dyuku dri peiri go na ini en ati meki a dede.​—2 Sam. 18:6-17.

¹³ A de so taki David ben breiti di a kon yere san pasa nanga en manpikin? Nôno. Na presi fu dati, a ben e waka go-kon, a ben e krei, èn a ben e bari: „Mi manpikin Absalom, mi manpikin, mi manpikin Absalom! Betre mi ben dede na presi fu yu, Absalom mi manpikin, mi manpikin!” (2 Sam. 18:24-33) David ben e sari srefisrefi, ma na di Yoab taki nanga en, dan fosi a kisi ensrefi baka. A no de fu taki dati Absalom dede na wan tumusi ogri-ati fasi. Fu di a ben gridi fu kisi biginen, meki a bigin feti nanga en eigi papa, a salfuwan fu Yehovah, èn a sani dati tyari rampu kon gi en!​—2 Sam. 19:1-8; Odo 12:21; 24:21, 22.

David e sori baka taki a e frutrow tapu Gado

14. San wi kan taki fu Psalm 4?

¹⁴ Neleki a di fu dri Psalm, a di fu fo Psalm na wan fayafaya begi fu David di e sori taki a e frutrow dorodoro tapu Yehovah (Ps. 3:4; 4:3). Kande  David ben skrifi a psalm disi fu sori taki a ben breiti èn taki a ben de nanga tangi taki Absalom no ben man teki a kownumakti abra. Noso kande a ben abi den singiman fu Leifi na prakseri di a ben skrifi a psalm disi. Awansi fa a no fa, te wi e denki dipi fu a psalm disi, dan a kan yepi wi fu kon abi moro frutrow na ini Yehovah.

15. Fu san ede wi kan begi Yehovah nanga ala frutrow na ini a nen fu en Manpikin?

¹⁵ David e sori baka taki a e frutrow dorodoro tapu Gado, èn a de seiker taki Gado e arki den begi fu sma. A ben singi: „Ke mi Gado di e du san reti, arki mi te mi e kari yu. Suku wan fasi fu frulusu mi te mi de na nowtu. Du bun gi mi èn arki a begi fu mi” (Ps. 4:1). Wi kan abi a frutrow dati tu te wi e du san reti. Fu di wi sabi taki Yehovah, a „Gado di e du san reti”, e blesi reti-ati sma, meki wi kan begi en nanga ala frutrow na ini a nen fu en Manpikin, aladi wi e poti bribi na ini a frulusu-ofrandi fu Yesus (Yoh. 3:16, 36). A no de fu taki dati a sani disi e gi wi wan korostu firi!

16. San ben meki kande taki David lasi-ati?

¹⁶ Son leisi wan situwâsi kan meki wi lasi-ati so te, taki wi e bruya. Kande na dati ben pasa nanga David wan pisi ten, fu di a ben singi: „Un libisma, o langa unu o du sani fu meki mi kisi syen? O langa unu o tan lobi soso sani? O langa unu o tan lei?” (Ps. 4:2) A de krin taki a wortu „libisma” abi fu du nanga sma di Gado no feni bun. Den feanti fu David ’ben lobi soso sani’. Wan tra Bijbel vertaal den wortu dati na a fasi disi: „O langa yu sa lobi leitori èn o langa yu o suku falsi gado?” (New International Version) Awansi wi e lasi-ati fu di trawan e handri takru nanga wi, toku wi musu tan begi fayafaya èn wi musu sori taki wi e frutrow dorodoro tapu a wan-enkri tru Gado.

17. Fruklari fa wi kan handri na wan fasi di e kruderi nanga Psalm 4:3.

¹⁷ A de krin taki David ben e frutrow tapu Gado te wi e luku den wortu disi: „Sabi taki Yehovah o gi grani na a sma di e tai hori na en. Yehovah srefi o yere te mi bari kari en” (Ps. 4:3). Wi musu abi deki-ati èn wi musu frutrow dorodoro tapu Yehovah efu wi wani tan gi yesi na en. Fu eksempre, wan Kresten osofamiri musu abi den fasi disi te wan famiriman fu den di no abi berow puru fu a gemeente. Gado e gi grani na den wan di e tai hori na en èn di e tan du a wani fu en. Èn fu di a pipel fu Yehovah e tai hori na en èn fu di den e frutrow dorodoro na en tapu, meki den de nanga prisiri.​—Ps. 84:11, 12.

18. Soleki fa Psalm 4:4 e sori, dan san wi musu du te wan sma taigi wi hati sani noso te wan sma du hati sani nanga wi?

¹⁸ Ma fa a de te wan sma e taki, noso e du sani di e hati den firi fu wi? Wi kan tan nanga prisiri te wi e du san David taki: „Te unu e kisi atibron, un no musu sondu. Taki san unu abi fu taki na ini un ati, na tapu un bedi, dan un tan tiri” (Ps. 4:4). Efu wan sma taigi wi hati sani, noso efu a sma dati e handri takru nanga wi, dan meki wi no pai ogri nanga ogri, fu di dati na wan sondu (Rom. 12:17-19). Wi kan taigi Yehovah san de na ini wi ati te wi e didon na tapu wi bedi. Te wi e begi fu a tori, dan kande wi o si sani tra fasi, èn lobi kan meki taki wi gi a sma pardon (1 Petr. 4:8). A moi fu sabi taki a rai di na apostel Paulus ben gi na ini a tori disi, abi fu du nanga Psalm 4:4: „Unu kan kisi atibron, ma toku un no musu du sondu; no meki son dongo, dan unu e mandi ete; no gi Didibri okasi.”​—Ef. 4:26, 27.

19. Fa Psalm 4:5 e yepi wi te a abi fu du nanga na anbegi fu wi?

¹⁹ David e sori krin taki wi musu frutrow  tapu Gado, fu di a e singi: „Tyari ofrandi nanga wan reti ati èn frutrow tapu Yehovah” (Ps. 4:5). Den ofrandi di den Israelsma ben e tyari gi Gado ben warti soso te den ben e tyari den nanga wan krin ati (Yes. 1:11-17). Efu wi wani taki Gado feni na anbegi fu wi bun, dan wi musu anbegi en nanga wan krin ati tu, èn wi musu frutrow dorodoro na en tapu.​—Leisi Odo 3:5, 6; Hebrewsma 13:15, 16.

20. Sortu dyaranti wi kan abi te wi e du a wani fu Gado sondro frede?

²⁰ David e taki moro fara: „Furu sma e taki: ’Suma o meki sani waka bun gi wi?’ Ke Yehovah, du bun gi wi” (Ps. 4:6). Fu di wi e frutrow tapu Yehovah, meki a feni wi bun èn wi abi bigi prisiri fu di wi e du a wani fu en sondro frede.

21. Sortu dyaranti wi abi te wi e teki prati fayafaya na a preikiwroko na ini a ten disi?

²¹ David ben e fruwakti taki Gado ben o meki a prisiri moro leki den sma di ben e prisiri na a kotiten. Fu dati ede a ben e singi gi Yehovah: „Yu o meki mi ati prisiri moro leki na a ten di sma ben abi furu aleisi nanga furu nyun win” (Ps. 4:7). Wi kan abi a dyaranti taki wi sa prisiri srefisrefi te wi e teki prati doronomo na a preikiwroko na ini a ten disi (Luk. 10:2). Den salfuwan e teki fesi na ini a wroko disi, èn wi e prisiri taki moro nanga moro sma e bigin du a „kotiwroko” (Yes. 9:3). Yu e teki prati doronomo na a wroko disi di e gi prisiri?

Tan dini Gado sondro frede, èn nanga ala frutrow

22. Soleki fa Psalm 4:8 e sori, dan fa sani waka nanga den Israelsma di den ben e gi yesi na a Wet fu Gado?

²² Na a kaba fu a psalm fu en, David e taki: „Mi o kanti didon èn mi o sribi, sondro fu broko mi ede nanga wan sani. Bika na yu, Yehovah, yu wawan kan kibri mi” (Ps. 4:8). Te den Israelsma ben e gi yesi na a Wet fu Yehovah, dan den ben de na ini vrede nanga en, èn den ben abi a dyaranti taki sani ben o waka bun nanga den. Fu eksempre, na a bigin fu a tiri fu Salomo, „nowan sma fu Yuda nanga Israel ben frede taki ogri ben o miti en” (1 Kow. 4:25). Den wan di ben e frutrow tapu Gado, ben abi vrede aladi den pipel na den lontu ben e suku fu du ogri nanga den. Neleki David, wi e sribi switi fu di Gado e gi wi a dyaranti taki sani o waka bun nanga wi.

23. San wi o ondrofeni te wi e frutrow dorodoro tapu Gado?

²³ Meki wi tan dini Yehovah sondro frede. Meki wi begi tu nanga bribi, so taki wi kan ondrofeni „a vrede fu Gado di bigi moro leki san libisma man frustan” (Fil. 4:6, 7). A sani dati e gi wi prisiri trutru! Èn te wi e tan frutrow dorodoro tapu Yehovah, dan wi no abi fu frede a ten di e kon.

San yu ben sa piki?

• Sortu problema ben miti David fu di Absalom ben e gens en?

• Fa Psalm 3 e yepi wi fu abi wan korostu firi?

• Na sortu fasi Psalm 4 e yepi wi fu kon abi moro frutrow na ini Yehovah?

• Fa wi kan kisi wini te wi e frutrow dorodoro tapu Gado?

[Aksi fu a tori disi]

[Prenki na tapu bladzijde 29]

David ben e frutrow tapu Yehovah, srefi di a ben e lowe gi Absalom

[Prenki na tapu bladzijde 32]

Yu e frutrow dorodoro tapu Yehovah?