Gado e sori wi a lobi fu en

’A no-frudini bun-ati fu Gado o tiri leki kownu nanga yepi fu regtfardikifasi, èn na so fasi sma kan kisi têgo libi.’​—ROM. 5:21.

1, 2. San na tu sani di sma ben kan si leki presenti, èn sortuwan moro prenspari?

„A MORO prenspari sani di a tirimakti fu Rome libi na baka gi tra tirimakti, na den wet fu en, èn na overtoigi taki sma musu libi na wan fasi di e kruderi nanga wet.” (Dr. David J. Williams fu na Universiteit fu Melbourne, Australia) Awinsi dati tru noso awinsi a no tru, toku wan moro prenspari presenti de. A presenti disi e kon fu Gado èn a e gi libisma okasi fu kon abi wan bun nen baka na Gado, èn fu kon abi a howpu fu kisi frulusu èn fu libi fu têgo.

² Fu taki en leti, Gado ben hori ensrefi na den wet fu en, fu kan gi wi a presenti disi. Di na apostel Paulus ben e taki fu a tori disi na ini Romesma kapitel 5, dan a no ben taki finifini fu ala sortu wet. Na presi fu dati, a bigin nanga a tumusi moi dyaranti disi: „Gado fruklari taki wi de regtfardiki fu di wi abi bribi, [dati] meki wi abi vrede nanga Gado nanga yepi fu wi Masra Yesus Krestes.” Den sma di e kisi a presenti fu Gado, wani sori lobi tu gi en. Paulus ben de wan fu den sma dati. A ben skrifi: „Gado poti a lobi fu en na ini wi ati nanga yepi fu a santa yeye.”​—Rom. 5:1, 5.

3. Sortu aksi e opo kon?

 ³ Ma fu san ede a ben de fanowdu taki wi lobi-ati Gado gi wi a presenti disi? Fa a kan taki Gado ben kan gi wi a presenti disi na wan reti fasi, so taki ala sma kan kisi wini fu en? Èn san wan sma musu du fu kan kisi wini fu a presenti disi? Wi sa poti prakseri na den moi piki tapu den aksi disi, èn wi sa si tu fa den e sori wi krin taki Gado lobi libisma.

Gado e sori lobi gi wi aladi wi na sondu libisma

4, 5. (a) Na sortu moi fasi Yehovah sori lobi gi wi? (b) San wi musu sabi fu man frustan Romesma 5:12?

⁴ Fu di Yehovah lobi libisma trutru, meki a seni en wan-enkri Manpikin fu yepi wi. Paulus ben taki en na a fasi disi: „Gado sori wi a lobi fu en na a fasi disi: taki Krestes dede gi wi, aladi wi ben de sondari ete” (Rom. 5:8). Poti prakseri na wan fu den sani di a taki: „Aladi wi ben de sondari ete.” Ala libisma musu frustan fa a du kon taki wi tron sondusma.

⁵ Paulus bigin poti prakseri na a tori dati nanga den wortu disi: „Wán man meki sondu kon na grontapu èn sondu fu en sei tyari dede kon, èn na so fasi ala sma e dede, bika den alamala sondu” (Rom. 5:12). Wi kan frustan disi fu di Gado meki sma skrifi fa sani waka na a bigin di a meki libisma. Yehovah ben meki tu libisma, Adam nanga Eva. A Mekiman no abi fowtu, èn na so a ben de tu nanga den fosi tu libisma, noso den afo fu wi. Gado ben gi den wán wet nomo, èn a taigi den taki te den ben o trangayesi a wet dati, dan den ben o dede (Gen. 2:17). Ma den bosroiti fu handri na wan fasi di ben o tyari takru bakapisi kon gi den. Den pasa a wet dati di no ben hebi gi den, èn na so den sori taki den no ben lespeki Gado leki a Sma di e poti wet gi libisma, èn di de sosrefi a Moro Hei Tiriman.​—Deut. 32:4, 5.

6. (a) Fu san ede den bakapikin fu Adam ben e dede bifo Gado ben gi Moses a Wet, èn sosrefi baka dati? (b) Nanga san wi kan agersi a sondu di wi kisi?

⁶ Baka di Adam sondu, dan fosi a meki pikin. Na so ala den bakapikin fu en kisi sondu, èn den e kisi fu du tu nanga den bakapisi fu sondu. A no de fu taki dati den no ben pasa a wet fu Gado neleki fa Adam ben du dati, èn fu dati ede a no krutu den fu a srefi sondu dati. Boiti dati, Gado no ben gi libisma no wan tra wet ete (Gen. 2:17). Toku den bakapikin fu Adam kisi sondu. Sobun, sondu nanga dede tiri leki kownu te na a ten di Gado gi den Israelsma wet di ben e sori den krin taki den ben de sondusma. (Leisi Romesma 5:13, 14.) Fu man frustan sortu krakti a sondu di wi kisi kan abi na wi tapu, dan wi sa agersi dati nanga wan siki di de na ini wan famiri. Aladi son pikin na ini a famiri e kisi a siki, toku a no de so taki ala pikin sa kisi a siki dati. Ma a de tra fasi nanga sondu. Wi alamala kisi sondu fu Adam èn fu dati ede wi alamala e dede. Oiti wan lusu o kon gi a problema disi?

A sani di Gado gi wi nanga yepi fu Yesus Krestes

7, 8. Fa a fasi fa tu volmaakti man handri, ben abi tu difrenti bakapisi?

⁷ Fu di Yehovah abi lobi gi libisma, meki a seti sani so taki wi kan kisi frulusu fu sondu. Paulus tyari kon na krin taki Gado ben du disi nanga yepi fu wan tra man di no ben abi sondu, fu taki en leti, wan tra Adam (1 Kor. 15:45). Ma a fasi fa a libi fu den tu volmaakti man disi waka, e difrenti fu makandra. Fa so?​—Leisi Romesma 5:15, 16.

⁸ Paulus ben skrifi: „Nanga a presenti a no de leki fa a ben de nanga a sondu.” Adam ben du a sondu dati, èn nanga reti a kisi strafu fu a sani dati, iya, a dede. Ma a no en wawan ben o dede. Bijbel e taki: „A sondu fu [a] wán sma [dati] meki taki furu sma dede.” Fu di Adam kisi a strafu dati, meki ala den sondu bakapikin fu en kisi a strafu dati tu, iya, wi kisi en tu. Toku a de wan trowstu gi wi fu sabi taki a volmaakti man Yesus, ben o tyari wan kenki kon na ini a tori dati. San ben o de a bakapisi? Wi e kisi piki tapu na aksi dati, te Paulus e taki dati ’Gado o fruklari ala sortu sma regtfardiki, so taki den kan kisi libi’.​—Rom. 5:18.

9. San Gado du di a fruklari taki libisma regtfardiki, soleki fa Romesma 5:16, 18 e sori?

⁹ San a Griki wortu di vertaal nanga „fruklari  taki den de regtfardiki” èn ’fruklari den regtfardiki’ wani taki? Wan man di vertaal Bijbel ben skrifi: „Na wan agersi fasi, den wortu disi e poti prakseri na difrenti sani di abi fu du nanga wan krutu-afersi. Den wortu disi no e taki fu a kenki di wan sma e kenki na ini en ati, ma den e sori taki wan sma e kon abi wan bun matifasi baka nanga Gado . . . Na agersitori e prenki Gado nanga wan krutuman di teki wan bosroiti fu a bun fu a sma di trawan tyari kon na fesi krutu fu di den feni taki a no de regtfardiki. Ma Gado e gi a sma dati pardon.”

10. San Yesus du fu sorgu taki Gado ben kan fruklari libisma regtfardiki?

¹⁰ Fa a kan taki „a sma di e krutu heri grontapu” ben kan gi wan sondu sma pardon? (Gen. 18:25) Wan prenspari sani di Gado du fosi, na taki a seni en wan-enkri Manpikin kon na grontapu. Yesus du soifri san en Papa taigi en fu du, aladi a kisi tesi, aladi sma spotu en na ala sortu fasi, èn aladi den du ogri-ati sani nanga en. A tan gi yesi na Gado, srefi te na a dede fu en na wan pinapostu (Hebr. 2:10). Yesus gi en volmaakti libi leki wan srakti-ofrandi, èn na so a pai wan lusu-paiman di ben o frulusu den bakapikin fu Adam fu sondu nanga dede.​—Mat. 20:28; Rom. 5:6-8.

11. Sortu sani warti a srefi leki a lusu-paiman?

¹¹ A lusu-paiman warti a srefi leki a sani di a bai puru. San na a sani dati? Adam meki taki milyardmilyard bakapikin fu en kisi sondu èn e dede leki bakapisi fu dati. A tru taki Yesus, di ben de wan volmaakti man, ben kan de a papa fu milyardmilyard volmaakti sma. * Fu dati ede, a denki ben de taki a libi fu Yesus èn a di fu den bakapikin di a ben kan kisi, ben de wan srakti-ofrandi di ben warti a srefi leki a libi di Adam nanga den sondu bakapikin fu en lasi. Ma Bijbel no e taki dati den pikin di Yesus ben kan kisi, ben de na ini a lusu-paiman. Romesma 5:15-19 e sori taki na a dede fu „wán sma” tyari frulusu kon. Iya, a volmaakti libi fu Yesus warti a srefi leki a volmaakti libi di Adam ben abi. Na Yesus Krestes wawan dede leki wan lusu-paiman, èn nowan enkri tra sma. Ala sortu sma ben kan kisi a fri presenti nanga libi leki bakapisi fu a ’wán reti sani di Yesus du’, iya, fu di a tan gi yesi na Gado, èn fu di a tai hori na en, srefi te na dede (2 Kor. 5:14, 15; 1 Petr. 3:18). Fa a lusu-paiman e meki taki sma kan kisi pardon?

A lusu-paiman e meki taki sma kan kisi pardon fu sondu

12, 13. Fu san ede a de fanowdu taki Gado e sori sari-ati nanga lobi gi den sma di a e si leki regtfardikiwan?

¹² Yehovah Gado ben feni a frulusu-ofrandi fu en Manpikin bun (Hebr. 9:24; 10:10, 12). Toku, den disipel fu Yesus, èn sosrefi den reti-ati apostel fu en, ben tan sondusma. Aladi den ben e meki muiti fu no du ogri, toku den no ben abi bun bakapisi ala ten. Fu san ede? Fu di den ben kisi sondu (Rom. 7:18-20). Ma Gado ben kan du wan sani fu lusu a problema, èn na dati a du.  Gado teki „a lusu-paiman”, èn a ben de klariklari fu gebroiki en fu a bun fu den futuboi fu en na grontapu.

¹³ A no fu di den apostel nanga tra sma ben du wan tu bun sani, meki Gado ben de fruplekti fu meki den kisi wini fu a lusu-paiman. Ma Gado meki den kisi wini fu a lusu-paiman fu di a abi sari-ati nanga den, èn fu di a lobi den trutru. A bosroiti fu no strafu den apostel nanga tra sma, èn fu dati ede a gi den pardon fu a sondu di den ben kisi. Paulus ben taki en krin: „Na fu di a sori unu a no-frudini bun-ati disi, meki unu kisi frulusu bika unu ben abi bribi; a no unu meki taki disi pasa, ma a de wan presenti fu Gado.”​—Ef. 2:8.

14, 15. Sortu blesi den sma di Gado fruklari regtfardiki sa kisi, ma san den musu tan du?

¹⁴ A no de fu taki dati a de wan bigi presenti taki na Almaktiwan e gi wan sma pardon gi den sondu di a kisi, èn gi den sondu di a du! Fosi wan sma tron wan Kresten, dan a ben du bun furu sondu. Ma nanga yepi fu a lusu-paiman Gado kan gi en pardon fu den sondu dati. Paulus ben skrifi: „Den furu sondu meki taki Gado gi sma a presenti, èn dati abi leki bakapisi taki a fruklari taki den de regtfardiki” (Rom. 5:16). Den apostel nanga tra sma di kisi a presenti disi (a grani fu tron wan sma di Gado fruklari regtfardiki), ben o abi fu tan anbegi a tru Gado nanga bribi. Sortu blesi dati ben o tyari kon? „Den sma di Gado sori no-frudini bun-ati pasa marki èn di kisi a regtfardikifasi fu en leki wan fri presenti, o libi èn o tiri leki kownu nanga yepi fu a wán sma disi, Yesus Krestes.” Iya, a presenti di Gado e gi sma fu de regtfardikisma e tyari bun bakapisi kon. A presenti e meki taki sma kan kisi libi.​—Rom. 5:17; leisi Lukas 22:28-30.

¹⁵ Den wan di e kisi a presenti dati, namku fu de regtfardikisma, e tron yeye manpikin fu Gado. Leki sma di o tiri makandra nanga Krestes, den abi a howpu fu kisi wan opobaka na hemel leki yeye, èn fu „tiri leki kownu” makandra nanga Yesus Krestes.​—Leisi Romesma 8:15-17, 23.

Gado e sori lobi gi trawan

16. Fa den wan di abi a howpu fu libi na grontapu kan kisi wan presenti?

¹⁶ A no ala Kresten di e sori bribi èn di e dini Gado nanga den heri ati abi a howpu fu „tiri leki kownu” makandra nanga Krestes na hemel. Furu Kresten abi a srefi howpu leki a di fu den futuboi fu Gado di ben e libi fosi a ten fu Krestes. Den abi a howpu fu libi fu têgo na ini wan paradijs na grontapu. A de so taki nownow kaba den kan kisi wan presenti fu Gado, èn taki den kan de regtfardikisma di abi a howpu fu libi fu têgo na grontapu? Te wi e luku san Paulus skrifi gi den Romesma, dan wi kan abi a dyaranti taki den kan abi a howpu dati!

17, 18. (a) Te wi e luku a bribi di Abraham ben abi, dan fa Gado ben e si en? (b) Fa a du kon taki Yehovah ben si Abraham leki wan regtfardiki sma?

¹⁷ Paulus ben poti prakseri na Abraham, di gi wi a moro bun eksempre fu di a ben sori bribi. Abraham ben e libi na ini a ten fosi Yehovah ben gi den Israelsma a Wet èn langa ten bifo Krestes opo a pasi gi libisma so taki den kan kisi libi na hemel (Hebr. 10:19, 20). Bijbel e taki: „Bika a no fu di Abraham, noso den pikin fu en ben hori densrefi na a wet, meki Gado pramisi en taki a ben o kisi wan grontapu leki gudu, ma a ben de fu di a ben kon regtfardiki nanga yepi fu a bribi fu en” (Rom. 4:13; Yak. 2:23, 24). Dati meki Gado ben si Abraham di ben sori bribi, leki wan regtfardiki sma.​—Leisi Romesma 4:20-22.

¹⁸ Dati no wani taki dati na ini den someni yari di Abraham dini Yehovah, a no du nowan sondu. Nôno, a no fu a sani dati Gado ben fruklari en regtfardiki (Rom. 3:10, 23). Ma fu di Yehovah koni pasa marki, meki a ben hori a tranga bribi fu Abraham na prakseri èn sosrefi den sani di a du fu sori taki a ben abi bribi. Abraham ben poti bribi spesrutu na ini a pramisi ’pikin’ di ben o tron wan bakapikin fu en. A Pikin dati ben de a Mesias, noso Krestes (Gen. 15:6; 22:15-18). Dati meki nanga yepi fu „a lusu-paiman di Krestes Yesus pai”, Gado di de a Bigi Krutuman man gi sma fu owruten pardon  fu den sondu fu den. Sobun, Abraham nanga tra man di ben sori bribi èn di ben e libi na a ten bifo Krestes, o kisi wan opobaka.​—Leisi Romesma 3:24, 25; Ps. 32:1, 2.

Yu kan tron wan regtfardiki sma nownow kaba

19. Fu san ede a fasi fa Gado ben si Abraham musu de wan deki-ati gi furu sma na ini a ten disi?

¹⁹ A musu de wan deki-ati gi tru Kresten na ini a ten disi, taki a Gado fu lobi ben fruklari Abraham regtfardiki. Di Yehovah fruklari en regtfardiki, dan dati no wani taki dati a ben o kisi den srefi blesi leki a di fu den wan „di kisi [a kownukondre] makandra nanga Krestes”. A pikin grupu disi na „den wan di [Gado] kari fu de santa sma”, èn Gado teki den leki ’en manpikin’ (Rom. 1:7; 8:14, 17, 33). Tra fasi leki dati, Abraham ben tron „Yehovah mati”, èn a kisi a grani dati srefi bifo a lusu-paiman ben pai (Yak. 2:23; Yes. 41:8). Ma fa a de nanga tru Kresten di abi a howpu fu libi na ini a Paradijs grontapu?

20. San Gado e fruwakti fu den wan di a fruklari regtfardiki na ini a ten disi, neleki fa a ben de nanga Abraham?

²⁰ Den sma disi no kisi ’a fri presenti di e sori taki Gado fruklari den regtfardiki’ fu kisi libi na hemel ’nanga yepi fu a lusu-paiman di Krestes Yesus pai’ (Rom. 3:24; 5:15, 17). Toku den e sori tranga bribi na ini Gado èn na ini den seti fu en, èn fu di den abi a bribi dati meki den e du bun wroko. Wan fu den bun wroko di den e du na taki den e ’fruteri sma fu a kownukondre fu Gado, èn den e taki nanga den fu den sani di abi fu du nanga Masra Yesus Krestes’ (Tori. 28:31). Sobun, Yehovah kan fruklari den sma disi regtfardiki, neleki fa a du dati nanga Abraham. A presenti di den sma disi e kisi, namku wan bun matifasi nanga Gado, e difrenti fu „a fri presenti” di den salfuwan e kisi. Ma a no de fu taki dati den de nanga bigi tangi gi a presenti dati.

21. Sortu blesi wi kan kisi fu di Yehovah e sori lobi nanga retidu?

²¹ Libisma tiriman e pramisi sma bun furu sani, ma a howpu di yu abi fu kisi têgo libi no e kon fu den. A howpu di yu abi fu kisi têgo libi e kon fu di a Moro Hei Tiriman abi wan marki na prakseri. Yehovah du difrenti sani fu doro a marki fu en. Den sani di a du e kruderi nanga a retidu fu en. Ma san moro prenspari, na taki den sani dati e sori taki Gado abi furu lobi gi sma. Dati meki Paulus ben taki: „Gado sori wi a lobi fu en na a fasi disi: taki Krestes dede gi wi, aladi wi ben de sondari ete.”​—Rom. 5:8.

[Futuwortu]

Yu e memre disi ete?

• San den bakapikin fu Adam kisi, èn sortu bakapisi dati tyari kon?

• Fa wan lusu-paiman ben pai, èn fa a ben warti a srefi leki a sani di a bai puru?

• Sortu howpu yu abi fu di Gado fruklari yu regtfardiki?

[Aksi fu a tori disi]

[Prenki na tapu bladzijde 13]

A volmaakti man Adam ben sondu. A volmaakti man Yesus dede leki „wan lusu-paiman”

[Prenki na tapu bladzijde 15]

Dati na bun nyunsu trutru​—nanga yepi fu Yesus, Gado kan fruklari wi regtfardiki!