’Tyari den bukulolo kon, spesrutu den wan di meki fu metibuba’

NANGA den wortu di skrifi na tapusei, na apostel Paulus aksi Timoteyus, di ben e du zendelingwroko makandra nanga en, fu tyari wan tu bukulolo gi en. Fu sortu bukulolo Paulus ben e taki? Fu san ede a ben taki dati? Èn san wi kan leri fu a sani disi di a ben aksi Timoteyus?

Na a ten fu a yari 50, di Paulus ben skrifi den wortu disi, dan den 39 Hebrew Buku fu Bijbel ben prati na ini 22, noso 24 buku. A kan taki furu fu den buku disi ben skrifi na tapu aparti bukulolo. Professor Alan Millard taki dati aladi den bukulolo disi ben diri na a ten dati, toku „sma di ben abi moni ben man bai den”. Son sma ben abi awinsi wán fu den bukulolo disi. Fu eksempre, a heiheiman fu Etiopia ben abi wan bukulolo na ini na asiwagi fu en, èn a ben e „leisi a buku fu a profeiti Yesaya nanga wan tranga sten”. A man disi ’ben e luku ala den gudu fu Kandase, na umakownu fu den Etiopiasma’. A musu de so taki a ben abi nofo moni fu bai wan tu fu den Buku fu Bijbel.​—Tori. 8:27, 28.

Luku san Paulus ben skrifi Timoteyus: „Te yu o kon, dan yu musu tyari a dyakti kon di mi ben libi na Troas na ini Karpus oso, èn tyari den bukulolo kon tu, spesrutu den wan di meki fu metibuba” (2 Tim. 4:13). Disi e sori taki Paulus ben abi wan tu buku. Fu ala den buku di Paulus ben abi, a Wortu fu Gado ben de a moro prenspariwan gi en. Luku san Bijbel sabiman A. T. Robertson ben taki fu den wortu „den wan di meki fu metibuba”: „Soleki fa a sori, dan den bukulolo dati ben de kopi fu den buku fu na Owru Testamenti, fu di bukulolo di ben meki fu metibuba ben diri moro den wan di ben meki fu papirus.” Sensi di Paulus ben yongu, a ben „kisi leri fu Gamalièl”, di ben leri sma a Wet di Gado ben gi Moses. A ben de sosrefi wan man di ala sma ben e lespeki. Sobun, wi kan frustan fu san ede Paulus ben kon abi wan tu fu den bukulolo fu Gado Wortu.​—Tori. 5:34; 22:3.

A fasi fa den Kresten ben e gebroiki bukulolo

Toku, a no ala sma ben abi bukulolo fu den Santa Buku fu Bijbel. We, dan fa furu fu den Kresten na ini a ten dati ben e kon sabi san skrifi na ini Gado Wortu? A fosi brifi di Paulus ben skrifi gi Timoteyus, e yepi wi fu kon frustan dati. A ben skrifi: ’Tan meki muiti fu leisi moro bun gi sma teleki mi kon’ (1 Tim. 4:13). Wan fu den sani di den Kresten ben e du na den konmakandra fu den, na taki den ben e leisi gi a publiki. Disi ben de wan sani di a pipel fu Gado ben gwenti du sensi a ten fu Moses.​—Tori. 13:15; 15:21; 2 Kor. 3:15.

Leki wan owruman, Timoteyus ben musu „meki muiti” fu leisi gi sma, so taki den sma di no ben abi den eigi bukulolo fu den Buku fu Bijbel, ben kan kisi wini fu dati. A no de fu taki dati te sma ben e leisi Gado Wortu gi a publiki, dan  ala sma ben kaka yesi arki fu no misi nowan enkri sani. A ben musu de so tu taki te papa, mama, nanga den pikin fu den ben de na oso, dan den ben e taki fu den sani di den ben yere na den konmakandra.

A pôpi Dede Se Lolo fu Yesaya langa pikinmoro 7.3 meter. Wan pisi udu ben fasi na ala tu sei fu a bukulolo, èn nofo tron sma ben e poti a bukulolo na ini wan saka so taki a no pori. Disi ben meki taki a ben hebi. Soleki fa a sori, dan furu Kresten no ben man tyari den bukulolo fu den te den ben e go preiki. Srefi Paulus di ben abi wan tu bukulolo fu den Buku fu Bijbel, no ben kan tyari ala den bukulolo fu en te a ben e go du zendelingwroko. Soleki fa a sori, dan a ben libi wan tu fu den na en mati Karpus na ini Troas.

San wi kan leri fu na eksempre fu Paulus?

Di Paulus ben aksi Timoteyus fu tyari den bukulolo gi en, dan a ben de na strafu-oso na ini Rome fu a di fu tu leisi. Syatu bifo a ben aksi Timoteyus den bukulolo, a ben skrifi: „Mi feti a bun feti, mi lon a streilon te na a kaba . . . Fu dati ede, a sani di e wakti mi na taki Masra, wan regtfardiki krutuman, o pai mi nanga regtfardikifasi” (2 Tim. 4:7, 8). A kan taki a ben skrifi den wortu disi na a ten fu a yari 65, di Nero ben e frufolgu den Kresten. Disi leisi a strafu di a ben kisi, ben hebi. Fu taki en leti, a ben sabi taki heri esi a ben o kisi dedestrafu (2 Tim. 1:16; 4:6). Sobun, wi kan frustan fu san ede Paulus ben e angri fu kisi den bukulolo fu en. Paulus ben abi na overtoigi taki a ben feti a bun feti te na a kaba, ma a ben e angri fu studeri a Wortu fu Gado so taki a ben kan tan tranga a bribi fu en.

A kan taki Timoteyus ben de ete na ini Efeise, di Paulus seni aksi en den bukulolo (1 Tim. 1:3). Timoteyus ben komoto na Efeise, dan a go na Troas, èn fu drape a hari go na Rome. A pasi dati di a ben teki, ben langa sowan 1600 km. Na ini a srefi brifi, Paulus ben begi Timoteyus: „Du muiti fu kon dya bifo a kowru ten fu a yari” (2 Tim. 4:21). Bijbel no e sori efu Timoteyus ben feni wan boto fu tyari en go na Rome, na a ten di Paulus ben wani.

Te wi e leisi taki Paulus ben aksi Timoteyus fu ’tyari den bukulolo kon, spesrutu den wan di meki fu metibuba’, dan san wi e leri fu dati? A ben tan angri fu leisi a Wortu fu Gado na ini a moro muilek pisi ten fu en libi. A de krin taki na a sani dati ben yepi en fu tan abi wan bun matifasi nanga Yehovah, èn fu gi trawan deki-ati.

Wi na ini a ten disi musu de nanga tangi trutru efu wi abi wi eigi kopi fu a heri Bijbel! Sonwan fu wi abi moro leki wán Bijbel èn moro leki wán Bijbelvertaling. Neleki Paulus, wi musu kon abi na angri fu frustan Bijbel moro bun. Paulus ben abi a grani fu skrifi 14 brifi nanga yepi fu santa yeye, èn a di fu tu brifi di a ben skrifi gi Timoteyus ben de a lastiwan. A sani di a ben aksi Timoteyus skrifi na a kaba fu a buku dati. Fu taki en leti, di Paulus ben aksi Timoteyus fu ’tyari den bukulolo kon, spesrutu den wan di meki fu metibuba’, dan dati ben de wan fu den lasti winsi fu en di skrifi na ini Bijbel.

Yu e angri trutru fu feti a bun feti fu a bribi te na a kaba, neleki fa Paulus ben du dati? Yu wani tan du a diniwroko fu Yehovah fayafaya? Yu wani de klariklari fu du a preikiwroko solanga leki Masra wani taki wi du dati? Dan fu san ede yu no e teki a rai di Paulus ben gi den Kresten? A ben taki: „Tan poti prakseri na yusrefi èn na den sani di yu e leri sma.” Wi kan du dati te wi e studeri Bijbel fayafaya, èn te wi e du dati doronomo. Iya, wi musu de nanga tangi taki now moro sma kan abi wan Bijbel di meki na so wan fasi, taki a moro makriki fu gebroiki en.​—1 Tim. 4:16.

[Karta/​Prenki na tapu bladzijde 18, 19]

(Efu yu wani si pe den sani disi skrifi, luku a tijdschrift)

Efeise

Troas

Rome