San na a rostu fu Gado?

„Wan sabadei de ete pe a pipel fu Gado kan go rostu.”​—HEBR. 4:9.

1, 2. San Genesis 2:1-3 e sori wi te a abi fu du nanga a di fu seibi dei, èn sortu aksi e opo kon?

NA INI a fosi kapitel fu Genesis wi e leri taki Gado ben meki grontapu na ini siksi agersi dei. A ben meki en so taki libisma ben kan tan na tapu. Na a kaba fu ibriwan fu den dei dati a skrifi: „Na so neti pasa èn mamanten pasa” (Gen. 1:5, 8, 13, 19, 23, 31). Ma te wi e leisi Genesis 2:1-3, di e taki fu a di fu seibi dei, dan den wortu disi no skrifi.

² A sani disi e sori taki a di fu seibi dei, noso a „dei” di Gado e rostu, no ben kon na wan kaba ete na a ten dati. A de so taki te nanga now a dei dati no kon na wan kaba ete? Efu a no kon na wan kaba ete, dan wi man go na ini a rostu dati na ini a ten disi? Den piki tapu den aksi disi prenspari trutru gi wi.

A de so taki Yehovah „e rostu” ete?

3. Fa den wortu fu Yesus di skrifi na Yohanes 5:16, 17 e sori taki a di fu seibi dei no ben kon na wan kaba ete na ini a fosi yarihondro?

³ Tu buweisi de di e meki wi frustan taki a di fu seibi dei no ben kon na wan kaba ete na ini a fosi yarihondro. Wi sa poti prakseri fosi na a sani di Yesus ben taigi den gensman fu en. Den sma disi ben krutu en fu di a ben dresi sma tapu a sabadei. Den ben feni taki na wroko a ben e wroko. Masra ben taigi den: „Mi Tata tan wroko teleki now èn misrefi e tan wroko tu” (Yoh. 5:16, 17). San den wortu dati ben wani taki? Sma ben krutu Yesus taki a ben e wroko tapu a sabadei. A piki di a ben gi den, „Mi Tata tan wroko teleki now” ben sori den taki den no ben abi leti fu krutu en. Fu taki en leti, Yesus ben taigi den gensman disi: ’Mi nanga mi Papa e du a srefi sortu wroko. Fu di mi Papa tan wroko na a sabadei fu en di e teki dusundusun yari, meki a fiti taki mi e tan wroko, srefi tapu a Sabadei.’ Sobun, Yesus ben taki dati te a abi fu du nanga grontapu, dan a bigi Sabadei fu a rostu fu Gado, namku a di fu seibi dei, no ben kon na wan kaba na a ten di a ben de na grontapu. *

4. Sortu tra buweisi Paulus e gi wi taki a di fu seibi dei no ben kon na wan kaba ete na ini a ten fu en?

⁴ Na apostel Paulus e gi wi a di fu tu buweisi. Di Paulus ben e taki fu Genesis 2:2, di e poti prakseri na a rostu fu Gado, dan a skrifi nanga yepi fu santa yeye: „Wi di e bribi o go na ini a rostu” (Hebr. 4:3, 4, 6, 9). Sobun, a di fu seibi dei no ben kon na wan kaba ete na ini a ten fu Paulus. O langa a dei fu rostu ben o go doro ete?

5. San ben de a marki fu a di fu seibi dei, èn o ten den sani dati o kon tru dorodoro?

⁵ Fu man piki na aksi dati, dan wi musu hori na prakseri san na a marki fu a di fu seibi dei. Genesis 2:3 e fruklari san na a marki dati: „Gado meki ala sani di a ben wani meki, dan a blesi a di fu seibi dei èn a meki a dei dati kon santa.” Yehovah ben meki a dei dati kon „santa” fu man meki a wani fu en kon tru. Yehovah wani taki mansma nanga umasma di e gi yesi na en musu libi na grontapu, den musu sorgu gi grontapu, èn sosrefi ala sani di e libi na tapu (Gen. 1:28). Na fu dati ede Yehovah Gado nanga Yesus Krestes, a „Masra fu sabadei” tan „wroko teleki now” (Mat. 12:8). A dei di Gado e rostu sa go doro teleki a wani fu en kon tru dorodoro na a kaba fu a Dusun Yari Tiri fu Krestes.

 No ’kon abi a srefi gwenti fu trangayesi Gado’

6. Sortu eksempre de leki wan warskow gi wi, èn san wi kan leri fu den?

⁶ Gado ben taigi Adam nanga Eva krin san a ben o du, ma den no horibaka gi en. A no de fu taki dati Adam nanga Eva ben de den fosi libisma di bigin trangayesi Gado. Ma bakaten, milyunmilyun tra sma du a srefi sani dati. Srefi den sma di Gado ben teki leki a pipel fu en, namku a pipel fu Israel, bigin trangayesi Gado. Èn a moi fu sabi taki Paulus ben warskow den Kresten fu a fosi yarihondro taki srefi wan tu sma na den mindri ben kan fadon na ini a srefi trapu di den Israelsma fu owruten ben fadon na ini. A ben skrifi: „Fu dati ede, meki wi du ala muiti fu go na ini a rostu dati, so taki nowan fu wi e fadon èn e teki a srefi gwenti fu trangayesi Gado” (Hebr. 4:11). Na ini a tekst disi, Paulus e sori taki wan sma di no e gi yesi na Gado, no sa go na ini a rostu fu en. San dati wani taki gi wi? Efu wi e weigri fu horibaka gi a wani fu Gado, dan a sani dati kan meki taki wi no e go na ini a rostu fu Gado? A de krin taki a piki tapu na aksi dati prenspari srefisrefi gi wi, èn wi sa luku a tori dati moro fini. Ma meki wi poti prakseri na a takru eksempre fu den Israelsma, fu kon si san wi musu du fu man go na ini a rostu fu Gado.

„Den no sa go na ini a rostu fu mi”

7. San Yehovah ben abi na prakseri di a ben frulusu den Israelsma fu katibo na ini Egepte, èn san a ben fruwakti fu den?

⁷ Na ini 1513 bifo Krestes, Yehovah fruteri en futuboi Moses san a ben abi na prakseri gi den Israelsma. Gado ben taki: „Mi o saka go fu frulusu den fu den Egeptesma, èn mi o puru den fu a kondre dati fu tyari den go na wan bun èn bigi kondre. Mi o tyari den go na wan kondre di lai merki nanga oni” (Ex. 3:8). Yehovah ben o frulusu den Israelsma „fu den Egeptesma” èn a ben o teki den leki a pipel fu en. Na dati a ben pramisi Abraham, na afo fu den (Gen. 22:17). Gado gi den Israelsma wan wet di ben o yepi den fu tan abi wan bun matifasi nanga en (Yes. 48:17, 18). A ben taigi den Israelsma: „Efu unu e du finifini san mi taigi unu èn unu e hori unsrefi na mi frubontu [soleki fa a wet e taki], dan unu sa tron wan spesrutu gudu gi mi na mindri ala tra pipel, bika heri grontapu na fu mi” (Ex. 19:5, 6). Sobun, te den Israelsma ben o gi yesi na Gado, dan den ben o tan abi wan bun matifasi nanga Gado.

8. Fa a libi fu den Israelsma ben o de efu den ben gi yesi na Gado?

⁸ Prakseri fa a libi ben o de gi den Israelsma efu den ben gi yesi na Gado! Yehovah ben o blesi den gron fu den, den droifidyari, den skapu fu den, nanga den meti fu den. Den feanti fu den no ben o man tan pina den. (Leisi 1 Kownu 10:23-27.) Te a Mesias ben o sori ensrefi, dan a ben o si taki sani ben e waka bun nanga Israel, fu di den ben abi den eigi tirimakti. A no ben o de so taki den ben o pina na ondro na ogri-ati tiri fu Rome. A kownukondre fu Israel ben o de leki wan eksempre gi tra kownukondre, èn dati ben o sori krin taki a tru Gado e blesi den wan di e gi yesi na en.

9, 10. (a) Fu san ede a ben de wan seryusu sani taki Israel ben de nomonomo fu drai go baka na Egepte? (b) Te den Israelsma ben o drai go baka na Egepte, dan fa dati ben o abi krakti tapu na anbegi fu den?

⁹ A no de fu taki dati Israel ben abi wan bigi grani! Iya, den ben mag horibaka gi Yehovah fu meki a prakseri fu en kon tru, èn dati ben o tyari blesi kon gi den èn te fu kaba gi ala libisma na grontapu! (Gen. 22:18) Ma a tranga-ede pipel dati no ben wani seti wan kownukondre di Gado ben o tiri, èn di ben o de wan eksempre gi tra kownukondre. Fu taki en leti, den ben de nomonomo fu drai go baka na Egepte! (Leisi Numeri 14:2-4.) We, efu Israel ben drai go baka na Egepte, dan fa Gado ben o man meki Israel kon tron wan eksempre gi tra kownukondre? A no ben o man du dati. Fu  taki en leti, efu den Israelsma ben drai go baka fu dini den Egeptesma di no ben anbegi Gado, dan noiti den no ben o man hori densrefi na a Wet di Gado ben gi Moses. Boiti dati, den no ben o man kisi wini tu fu a seti fu Yehovah di ben o meki den kisi pardon gi den sondu fu den. A no de fu taki dati den no ben e si sani kwetikweti soleki fa Gado ben e si sani! Dati meki a no e fruwondru wi taki Yehovah taki disi fu a tranga-ede pipel dati: „Mi ben mandi srefisrefi nanga den sma fu a ten dati èn mi taki: ’Ala ten den e meki den ati go prakseri tra sani, èn densrefi no kon sabi den pasi fu mi.’ Fu dati ede, mi ben sweri na ini mi atibron, taki: ’Den no sa go na ini a rostu fu mi.’”​—Hebr. 3:10, 11; Ps. 95:10, 11.

¹⁰ Di a tranga-ede pipel ben wani drai go baka na Egepte, dan dati sori taki den no ben abi nowan warderi gi den blesi di den ben kisi fu Gado. Na presi fu dati den ben wani den ayun nanga den knofroku di ben de fu feni na ini Egepte (Num. 11:5). Neleki Esau di no ben abi warderi, a tranga-ede pipel ben de klariklari fu libi a tumusi moi gudu di Gado ben wani gi den, soso fu nyan wan switi nyanyan.—Gen. 25:30-32; Hebr. 12:16.

11. Di den Israelsma na ini a ten fu Moses trangayesi Gado, dan fa dati ben abi krakti tapu a sani di Gado ben abi na prakseri gi den?

¹¹ Aladi den bakapikin fu den Israelsma di ben gowe libi Egepte ben trangayesi Yehovah, toku a „tan wroko” nanga pasensi fu meki a sani di a ben abi na prakseri gi a pipel dati kon tru. Now a e poti prakseri na den bakapikin fu a grupu dati. Den bakapikin dati no ben tranga-ede so leki den afo fu den. Soleki fa Yehovah ben taigi den bakapikin fu du, den go na ini a Pramisi Kondre èn den bigin teki en abra. Na Yosua 24:31 wi e leisi: „Den Israelsma tan dini Yehovah. Den tan dini en sosrefi na ini a pisi ten fu den owru man di ben de na libi ete, baka di Yosua dede. Den owru man disi ben sabi ala den sani di Yehovah ben du gi Israel.”

12. Fa wi du sabi taki wi man go na ini a rostu fu Gado na ini a ten disi?

¹² Ma den Israelsma dati di ben e gi yesi na Gado kon dede te fu kaba, èn den bakapikin fu den „no ben sabi Yehovah èn den no ben sabi tu san a ben du gi Israel”. A sani dati meki taki „den Israelsma bigin du sani di Yehovah no feni bun èn den go anbegi den Bâal-gado” (Krut. 2:10, 11). A Pramisi Kondre no ben tron ’wan presi pe den ben kan rostu’. Fu di den ben trangayesi Gado, meki den no ben tan abi wan bun matifasi nanga en. Paulus ben skrifi fu den Israelsma dati: „Efu Yosua ben tyari den go na wan presi pe den ben kan rostu, dan bakaten Gado no ben o taki fu wan tra dei. Sobun, wan sabadei de ete pe a pipel fu Gado kan go rostu” (Hebr. 4:8, 9). „A pipel fu Gado” di Paulus ben taki fu en, ben de den Kresten. A sani dati wani taki dati Kresten man go na ini a rostu fu Gado? Iya, trutru. Dyu Kresten nanga Kresten di no ben de Dyu man du dati!

 Son sma no e go na ini a rostu fu Gado

13, 14. (a) San den Israelsma fu a ten fu Moses ben musu du fu man go na ini a rostu fu Yehovah? (b) San Kresten na ini a fosi yarihondro ben musu du fu man go na ini a rostu fu Gado?

¹³ Di Paulus ben skrifi a brifi gi den Hebrew Kresten, dan a ben e broko en ede taki sonwan fu den no ben e horibaka gi Gado fu meki a prakseri fu en kon tru. (Leisi Hebrewsma 4:1.) Fa so? We, sonwan fu den Kresten disi ben e hori densrefi ete na sonwan fu den sani di ben skrifi na ini a Wet di Gado ben gi Moses. Sowan 1500 yari langa, ibri Israelsma di ben wani horibaka gi Gado, ben musu hori ensrefi na a Wet. Ma di Yesus dede, dan den no ben abi fu hori densrefi moro na a Wet dati. Son Kresten no ben e frustan dati, èn den ben de nomonomo fu hori densrefi na spesrutu sani fu a Wet. *

¹⁴ Paulus sori den Kresten di ben de nomonomo fu hori densrefi na a Wet, taki Yesus ben de wan moro bun granpriester leki iniwan sondu libisma. A ben sori den tu taki a nyun frubontu ben bun moro a frubontu di Gado ben meki nanga den Israelsma. Wan tra sani di a ben sori den na taki na agersi tempel fu Yehovah ben bun moro a tempel na ini Yerusalem (Hebr. 7:26-28; 8:7-10; 9:11, 12). Soleki fa a sori, dan Paulus ben abi a sabadei na prakseri di den Dyu ben e hori ibri wiki soleki fa a Wet ben taki. Paulus ben gebroiki na eksempre dati fu sori Kresten taki den ben abi a grani tu fu go na ini a rostu fu Yehovah. A ben taki: „Wan sabadei de ete pe a pipel fu Gado kan go rostu. Bika a sma di go na ini a rostu fu Gado, go rostu sosrefi fu en eigi wroko, neleki fa Gado go rostu fu en eigi wroko” (Hebr. 4:8-10). Den Hebrew Kresten dati ben musu tapu fu denki taki Yehovah ben o feni den bun te den ben e hori densrefi na a Wet. Sensi a Pinksterfesa fu a yari 33, den wan di e sori bribi na ini Yesus Krestes, e kisi bogobogo blesi fu Gado.

15. Fu san ede wi musu gi yesi na Gado efu wi wani go na ini a rostu fu en?

¹⁵ Fu san ede den Israelsma na ini a ten fu Moses no ben man go na ini a Pramisi  Kondre? Fu di den ben trangayesi. San meki taki son Kresten na ini a ten fu Paulus no ben man go na ini a rostu fu Gado? A srefi sani. Den ben trangayesi tu. Den no ben man si taki a wet ben doro a marki fu en èn taki Yehovah ben wani taki a pipel fu en ben musu anbegi en na wan tra fasi.

Wi man go na ini a rostu fu Gado na ini a ten disi

16, 17. (a) San a wani taki fu go na ini a rostu fu Gado na ini a ten disi? (b) San wi o luku na ini a tra artikel?

¹⁶ A no ben o pasa makriki taki wan Kresten ben o bribi taki a musu hori ensrefi na a Wet fu man kisi frulusu. Den sani di Paulus ben skrifi den Efeisesma e sori dati krin: „Fu tru, na fu di a sori unu a no-frudini bun-ati disi, meki unu kisi frulusu bika unu ben abi bribi; a no unu meki taki disi pasa, ma a de wan presenti fu Gado. Nôno, a no fu di unu ben wroko gi dati; fu dati ede nowan sma sa man meki bigi” (Ef. 2:8, 9). Ma san a wani taki te wan Kresten e go na ini a rostu fu Gado? Yehovah gebroiki a di fu seibi dei, noso a dei di a e rostu, fu meki a prakseri di a abi gi grontapu kon tru na wan tumusi moi fasi. Wi kan go na ini a rostu fu Yehovah, noso wi kan rostu makandra nanga en, te wi e horibaka gi en fu meki a wani fu en kon tru safrisafri, soleki fa na organisâsi fu en e yepi wi fu kon sabi.

¹⁷ Ma te wi no e gi yesi dorodoro na den Bijbel rai di wi e kisi nanga yepi fu a getrow èn koni srafu èn te wi e libi soleki fa wisrefi wani, dan dati ben o sori taki wi no e horibaka gi Gado fu meki a wani fu en kon tru. Disi kan pori a bun matifasi di wi abi nanga Yehovah. Na ini a tra artikel wi sa luku wan tu situwâsi di e gi wi okasi fu sori taki wi e gi yesi na Gado. Den bosroiti di wi e teki na ini den situwâsi dati sa sori efu trutru wi go na ini a rostu fu Gado.

[Futuwortu]

Denki dipi fu den aksi disi

• Fu san ede Gado rostu tapu a di fu seibi dei?

• Fa wi du sabi taki a di fu seibi dei no kon na wan kaba ete?

• San meki taki den Israelsma na ini a ten fu Moses, èn sosrefi son Kresten na ini a fosi yarihondro no ben man go na ini a rostu fu Gado?

• San a wani taki fu go na ini a rostu fu Gado na ini a ten disi?

[Aksi fu a tori disi]

[Prenspari pisi na tapu bladzijde 27]

Na ini a ten disi, wi kan go na ini a rostu fu Yehovah, noso wi kan rostu makandra nanga en, te wi e horibaka gi en fu meki a wani fu en kon tru safrisafri, soleki fa na organisâsi fu en e yepi wi fu kon sabi

[Prenki na tapu bladzijde 26, 27]

San a pipel fu Gado musu tan du fu man go na ini a rostu fu en?