Yehovah Kotoigi wini wan prenspari krutu-afersi!

A KRUTU-AFERSI dati bigin na ini 1995, èn a teki 15 yari fosi a kon na wan kaba. A heri pisi ten dati, tru Kresten na ini Rosiakondre ben e kisi gens fu sma di no wani taki den anbegi a Gado fu den fri. Den gensman disi ben abi a fasti bosroiti fu tyari wan kaba kon na a wroko fu Yehovah Kotoigi na ini Moskow èn na tra presi fu Rosiakondre. Toku, Yehovah blesi den lobi brada nanga sisa fu wi na ini Rosiakondre fu di den ben tan gi yesi na en. Iya, a meki den wini wan prenspari krutu-afersi. Ma san meki taki sma tyari den Kotoigi go na krutu?

DEN KISI PRIMISI FU ANBEGI GADO FRI!

Na ini 1917, den brada fu Rosiakondre ben lasi a reti fu anbegi Gado fri, ma na ini den yari syatu baka 1990, den kisi a reti dati baka. Na ini 1991, a tirimakti fu a Sovjet-Unie bosroiti taki Yehovah Kotoigi ben abi a reti fu du a diniwroko fu den na ini a kondre dati. Baka di a Sovjet-Unie fadon, lanti fu Rosiakondre gi Yehovah Kotoigi a reti fu anbegi a Gado fu den na ini a kondre dati. A nyun tirimakti ben agri tu taki a Sovjet-Unie trutru ben frufolgu den brada nanga sisa fu wi na wan ogri-ati fasi. Na ini 1993, a Ministeria fu Krutu-afersi na ini Moskow gi Yehovah Kotoigi a reti fu anbegi Gado fri, èn lanti sabi a grupu disi leki a Moskow Gemeente fu Yehovah Kotoigi. A srefi yari dati, a nyun Wet fu Rosiakondre kon abi krakti tu, èn a Wet disi e gi sma a reti fu anbegi a gado fu den fri. Wan brada ben taki: „Noiti wi ben denki taki wi ben o kisi a fri disi!” Ne a taki: „Wi wakti a dei disi 50 yari langa!”

Den brada nanga sisa na ini Rosiakondre gebroiki a „bun ten” dati na wan koni fasi, fu di den du a preikiwroko fayafaya, èn furu sma gi yesi na a bun nyunsu (2 Tim. 4:2). Wan uma ben taki: „Sma ben angri fu kon sabi moro fu Gado.” A no teki langa fosi a nomru fu preikiman, pionier, nanga gemeente kren. Fu taki en leti, a nomru fu Yehovah Kotoigi na ini Moskow kren fu 300 na ini a yari 1990, go na 5000 na ini yari 1995! Fu di moro nanga moro sma na ini Moskow bigin dini Yehovah, meki gensman bigin broko den ede. Na a pisi ten disi, den bigin tyari Yehovah Kotoigi go na krutu. A ben o teki bun langa fosi a strei dati kon na wan kaba.

SMA E BIGIN KRUTU YEHOVAH KOTOIGI TAKI DEN E DU SANI DI NO E KRUDERI NANGA WET

Sma bigin gens den brada nanga sisa fu wi na ini yuni 1995. Wan grupu na ini Moskow di e horibaka krinkrin gi na Orthodox Kerki fu Rosiakondre, tyari den brada nanga sisa fu wi go na krutu, fu di den ben feni taki den e du sani di no e kruderi nanga lantiwet. A grupu disi ben taki dati den ben e opo taki gi famiriman di no ben feni en bun kwetikweti taki den patna noso den pikin fu den tron Kotoigi. Na ini yuni 1996 lanti bigin ondrosuku efu buweisi de taki den brada nanga sisa ben e du ogri, ma den no feni nowan buweisi. Toku a srefi grupu disi tyari Yehovah Kotoigi go na krutu baka fu den srefi sani ede. Lanti ondrosuku na afersi baka, ma den si taki nowan fu den sani di sma ben taki fu Yehovah Kotoigi ben tru. Toku den gensman tyari den Kotoigi go baka na krutu fu a di fu dri leisi, èn gi den srefi sani. Lanti ondrosuku den Yehovah Kotoigi na ini Moskow ete wan tron, ma den kon si baka taki den no ben du nowan sani di no e kruderi nanga lantiwet. Baka dati, den gensman prefuru fu tyari den Kotoigi go na krutu gi densrefi sani baka, èn disi ben de fu a di fu fo leisi. Ma agen lanti no feni nowan buweisi. Toku a srefi grupu dati prefuru fu aksi lanti fu ondrosuku den Yehovah Kotoigi ete wan leisi. Te fu kaba, tapu 13 april 1998, a nyun krutuman tapu a krutu-afersi.

Wan afkati di ben teki prati na ini a krutu-afersi, ben taki: „Ma wan sani pasa, di wi no ben fruwakti.” Na afkati di ben ondrosuku den Kotoigi a di fu feifi leisi, ben agri taki buweisi no ben de  taki Yehovah Kotoigi e du sani di no e kruderi nanga lantiwet. Ma toku a gi den gensman a rai fu meki sma na ini a libimakandra tyari Yehovah Kotoigi go na krutu, na presi fu meki skowtu du dati. Na afkati disi taki dati a Moskow Gemeente fu Yehovah Kotoigi ben du sani di no ben e kruderi nanga a wet fu a Rosiakondre èn sosrefi nanga wet fu tra kondre. Sobun, na afkati fu a Northern Administrative Circuit fu Moskow agri nanga dati, èn a tyari den brada go na krutu. * Tapu 29 september 1998, a krutu-afersi bigin na ini a krutubangi fu a distrikt Golovinsky, na ini Moskow.

DEN E GEBROIKI BIJBEL NA KRUTUBANGI

A krutu-afersi ben hori na ini wan pikin krutu-kamra na a noordsei fu Moskow. Na afkati di ben e taki gi den gensman, ben de Tatyana Kondratyeva. A gebroiki wan wet di lanti ben meki na ini 1997, di e sori taki den Orthodox Kerki fu Krestenhèit, na Islam, a Dyu bribi, èn a Buda bribi na den moro prenspari kerkigrupu na ini Rosiakondre. * A srefi wet dati meki en muilek gi tra kerkigrupu fu kisi a reti fu anbegi a gado fu den fri. A wet dati e gi lanti okasi tu fu tapu pasi gi kerkigrupu di e gi sma deki-ati fu sori bita-ati gi trawan. Na afkati di ben e taki gi den gensman gebroiki a wet disi fu lei taki Yehovah Kotoigi e gi sma deki-ati fu sori bita-ati gi trawan, èn taki den e tyari prati kon na ini osofamiri. Dati meki den ben feni taki Yehovah Kotoigi na ini Rosiakondre no musu kisi primisi moro fu anbegi a Gado fu den fri.

Wan afkati di ben e taki gi den brada nanga sisa fu wi, ben aksi: „Suma na den sma na ini a Moskow Gemeente fu Yehovah Kotoigi di e pasa a wet?” Na afkati fu den gensman no ben man kari nowan enkri nen. Ma a taki dati den publikâsi fu Yehovah Kotoigi e gi sma deki-ati fu sori bita-ati gi tra kerkigrupu. Fu man sori taki a ben abi leti, dan a leisi wan tu pisi fu A Waktitoren nanga na Ontwaakt!, èn sosrefi fu tra publikâsi (Luku wan tu eksempre na loktusei). Di sma aksi en na sortu fasi den publikâsi dati ben e gi sma deki-ati fu sori bita-ati gi trawan, dan a taki: „Yehovah Kotoigi e leri sma taki na den abi a tru bribi.”

Wan afkati, di de wan fu den brada fu wi, gi a krutuman nanga na afkati fu den gensman wan Bijbel, èn a leisi Efeisesma 4:5, pe skrifi: „Wán Masra, wán bribi, nanga wán dopu de.” Fosi yu denki, a krutuman, na afkati di ben e taki gi den gensman, èn a brada fu wi bigin taki-go-taki-kon fu Bijbeltekst soleki Yohanes 17:18 nanga Yakobus 1:27. Den alamala ben abi wan Bijbel na ini den anu. A krutuman aksi: „A de so taki den Bijbeltekst disi e gi sma deki-ati fu sori bita-ati gi tra kerkigrupu?” Na afkati di ben e taki gi den gensman taki dati a no ben man piki na aksi dati, fu di a no ben sabi Bijbel bun. Na afkati fu wi sori a krutubangi difrenti publikâsi fu na Orthodox Kerki fu Rosiakondre di e krutu Yehovah Kotoigi hebi, èn a aksi: „Den sani di skrifi dyaso na sani di e kruderi nanga wet?” Na afkati piki: „Mi no man piki na aksi dati, fu di mi no sabi kerkitori bun.”

DEN GENSMAN NO ABI NOWAN BUWEISI

Na afkati di ben e taki gi den gensman, krutu Kotoigi taki den e tyari prati kon na ini osofamiri, fu di wi no e hori fesa soleki Kresneti. Ma bakaten  a agri taki a wet fu Rosiakondre no e fruplekti sma fu hori Kresneti. Sma fu Rosiakondre, sosrefi Yehovah Kotoigi na ini a kondre dati, mag bosroiti gi densrefi efu den wani hori den sortu fesa dati. Na afkati fu den gensman ben taki tu dati na organisâsi fu wi e ’tapu pikin fu rostu bun èn fu du sani di e meki den firi koloku’. Ma di tra afkati poti aksi gi en, dan a taki dati noiti a taki nanga yonguwan di abi papa nanga mama di de Kotoigi. Di wan afkati fu den Kotoigi aksi na afkati fu den gensman efu oiti a go na den konmakandra fu Yehovah Kotoigi, dan a piki: „Mi no ben feni en fanowdu fu du dati.”

Na afkati fu den gensman kari wan professor kon fu kotoigi. A professor disi ben de wan sabiman di e ondrosuku fa difrenti situwâsi kan abi krakti tapu a frustan fu sma. A professor disi taki dati sma di e leisi den publikâsi fu wi e kisi problema na frustan sei. Wan fu den afkati fu den Kotoigi taki dati den sani di a professor fruteri a krutubangi, ben de den srefi sani di skrifi na ini wan dokumenti di den fesiman fu na Orthodox Kerki fu Moskow ben sreka. A professor agri taki sonwan fu den sani di a ben taki ben skrifi leti so na ini a dokumenti dati. Di den afkati fu den Kotoigi poti moro aksi gi a professor disi, dan a kon na krin taki noiti wan Yehovah Kotoigi ben kon na en fu suku datra-yepi. Ma wan tra professor di e du a srefi sortu wroko dati, ben taki na fesi krutubangi taki a ben ondrosuku moro leki 100 Kotoigi na ini Moskow. A ben si taki den Kotoigi dati ben de bun na den frustan. A taki tu dati sensi di sonwan fu den sma na ini a grupu dati tron Yehovah Kotoigi, den no ben abi bita-ati moro gi sma fu tra kerkigrupu.

WI WINI A KRUTU-AFERSI, MA A STREI NO BEN KABA

Tapu 12 maart 1999 a krutuman gi feifi professor a wroko fu ondrosuku den publikâsi fu Yehovah Kotoigi, èn a tapu a krutu-afersi fu wan pisi ten. Ma fosi den sma fu Moskow ben tyari Yehovah Kotoigi go na krutu, Lanti fu Rosiakondre ben gi wan tu sabiman a wroko kaba fu ondrosuku den publikâsi fu wi. Tapu 15 april 1999, a grupu disi taki dati den no feni nowan fowtu na ini den publikâsi fu wi. Dati meki tapu 29 april 1999,  a Ministeria fu Krutu-afersi bosroiti taki Yehovah Kotoigi na ini a kondre ben kan go doro fu anbegi a Gado fu den fri. Aladi a sani disi ben pasa kaba, toku a krutubangi na ini Moskow ben de nomonomo taki wan tra grupu sabiman ondrosuku den publikâsi fu wi. Disi ben de wan situwâsi di wi no ben man frustan. Na a wan sei, a Ministeria fu Krutu-afersi fu Rosiakondre bosroiti taki Yehovah Kotoigi na ini heri Rosiakondre ben abi a reti fu anbegi a Gado fu den fri fu di den ben e hori densrefi na lantiwet. Ma na a tra sei, a Ministeria fu Krutu-afersi fu Moskow ben e ondrosuku Yehovah Kotoigi fu di a ben feni taki den ben e du sani di no ben e kruderi nanga lantiwet!

Pikinmoro tu yari pasa fosi a krutu-afersi go doro, èn tapu 23 februari 2001 Krutuman Yelena Prokhorycheva koti krutu. Baka di a luku a raportu fu den sabiman di a ben gi a wroko fu ondrosuku den publikâsi fu wi, a taki: „Reide no e fu tapu a wroko fu Yehovah Kotoigi na ini Moskow.” Disi ben sori krin taki den brada nanga sisa fu wi no ben du nowan fu den ogri di sma ben taki dati den ben du! Ma na afkati fu den gensman no ben agri nanga a bosroiti fu a Krutuman, èn a tyari na afersi go na a Krutubangi fu Moskow. Dri mun baka dati, tapu 30 mei 2001, a krutubangi dati taki dati a bosroiti fu Krutuman Prokhorycheva, no ben e teri. A krutubangi dati bosroiti taki wan nyun krutu ben musu hori, èn taki a srefi afkati fu den gensman ben musu taki gi a pipel. Ma wan tra krutuman ben o teki fesi.

WI LASI A KRUTU-AFERSI, MA A STREI NO BEN KABA

Tapu 30 oktober 2001, Krutuman Vera Dubinskaya bigin a krutu. * Afkati Kondratyeva krutu Yehovah Kotoigi baka taki den e gi sma deki-ati fu sori bita-ati gi trawan. Ma a taki tu dati a ben o bun efu lanti tapu a wroko fu Yehovah Kotoigi, bika dati ben o kibri den Kotoigi na ini Moskow gi ogri! Wantewante ala den 10.000 Kotoigi na ini Moskow poti den nen na ondro wan brifi di ben e sori taki den no ben abi a kibri dati fanowdu.

Na afkati fu den gensman taki dati a no ben de fanowdu fu tyari buweisi kon na fesi fu sori taki Kotoigi ben e du ogri. A taki dati a krutu-afersi no abi fu du nanga a wroko fu Yehovah Kotoigi, ma nanga den publikâsi nanga den leri fu den. A taki dati a ben o kari wan takiman fu na Orthodox Kerki fu Rosiakondre kon fu kotoigi. A no de fu taki dati disi ben e sori krin taki na kerki fesiman fu a kerki dati ben de nomonomo fu tapu a wroko fu Kotoigi. Tapu 22 mei 2003 a krutuman bosroiti taki wan grupu sabiman ben musu ondrosuku den publikâsi fu Yehovah Kotoigi ete wan leisi.

Tapu 17 februari 2004, krutubangi go doro nanga a krutu-afersi fu luku san den sabiman ben feni. Den sabiman kon si taki den publikâsi fu wi e gi sma deki-ati fu „du muiti fu sorgu taki na osofamiri fu den no e prati èn taki a trow fu den no e broko”. Den taki tu dati „buweisi no de” taki den publikâsi fu wi e gi sma deki-ati fu sori bita-ati gi trawan. Tra sabiman ben agri nanga dati. Wan afkati ben aksi wan sabiman fu kerki historia: „Fu san ede Yehovah Kotoigi e preiki.” A sabiman dati piki a krutubangi: „Wan Kresten musu du a preikiwroko. Dati na san den Evangelietori e taki èn dati na a wroko di Krestes ben gi den disipel fu en. A ben taki: ’Go na sma fu ala kondre, èn preiki gi den.’” Aladi di den sani disi ben kon na fesi, toku, a krutuman tapu a wroko fu Yehovah Kotoigi na ini Moskow tapu 26 maart 2004. Tapu 16 yuni 2004, a Krutubangi fu Moskow horibaka gi a bosroiti dati. * Wan brada di de wan Kotoigi furu yari langa kaba, e taki fu a bosroiti disi: „Di a Sovjet Unie ben de na makti, dan nowan sma na ini Rosiakondre ben mag bribi na ini Gado. Ma now ala sma na ini Rosiakondre musu abi na Orthodox bribi.”

San den brada nanga sisa fu wi du baka di lanti tapu a wroko fu den? Den handri neleki Nehemia fu owruten. Di sma ben e gens Nehemia fu no bow den skotu fu Yerusalem, dan en nanga a pipel no ben tapu nanga a wroko. Na presi fu dati, den „bow go doro” èn den „tan wroko fayafaya”  (Neh. 4:1-6). Na so a de tu, taki den brada nanga sisa fu wi na ini Moskow no gi pasi taki den gensman puru den prakseri na a wroko di de fu du na ini a ten disi, namku a wroko di den kisi fu preiki a bun nyunsu (1 Petr. 4:12, 16). Den ben abi na overtoigi taki Yehovah ben o yepi den, èn den ben de klariklari fu feti gi a reti di den abi fu anbegi Yehovah, awansi a strei dati ben teki langa.

SMA BIGIN FRUFOLGU DEN KOTOIGI MORO HEBI

Tapu 25 augustus 2004, den brada fu wi seni wan petitie gi Vladimir Putin, di ben de presidenti fu Rosiakondre na a ten dati. Na ini petitie disi den brada sori taki den ben e broko den ede trutru nanga a bosroiti di lanti ben teki fu tapu a wroko fu den. A petitie disi ben abi 76 pisi èn moro leki 315.000 sma teken en. Na a srefi ten, na Orthodox Kerki fu Rosiakondre sori krin fa den e denki fu Kotoigi. Wan fu den takiman fu a kerki disi ben taki: „Wi no e agri kwetikweti nanga a wroko fu den Yehovah Kotoigi.” Wan fesiman fu a Moslim bribi ben taki dati a ben de wan „prenspari sani èn wan bun sani sosrefi” taki lanti ben tapu a wroko fu den Kotoigi.

Dati meki a no ben fruwondru wi taki son sma na ini Rosiakondre ben e bribi den lei, èn dati gi den deki-ati fu du ogri nanga Yehovah Kotoigi. Gensman kofu noso skopu son Kotoigi di ben e du a preikiwroko na ini Moskow. Wan man di no ben wani taki wan sisa ben musu preiki na ini a gebow pe a e tan, atibron so te nanga a sisa disi, taki a lon na en baka. A skopu en so tranga na en baka, taki a sisa fadon èn a naki en ede. A ben abi datrayepi fanowdu, ma toku skowtu no du noti nanga a man. Skowtu grabu son Kotoigi, den handri nanga den neleki den na ogriman, èn den hori den na strafu-oso a neti dati. Sma di abi a frantwortu fu luku konmakandra presi, no ben wani yuru den presi disi moro gi Yehovah Kotoigi, fu di den ben frede taki den ben o lasi den wroko. A no teki langa fosi bun furu gemeente no ben abi wan presi moro fu hori konmakandra. Fotenti gemeente ben abi fu gebroiki a srefi konmakandra presi di ben prati na ini fo Kownukondre zaal. Wan fu den gemeente di ben e gebroiki wan fu den zaal dati ben musu hori  a konmakandra fu den 7:30 mamanten. Wan kring-opziener ben taki: „Fu man go na a konmakandra dati, den preikiman ben abi fu wiki feifi yuru mamanten, ma den ben de klariklari fu du dati pasa wán yari langa.”

’DEN DE LEKI WAN KOTOIGI GI DEN’

Fu di den brada fu wi ben wani tyari kon na krin taki sma no ben abi a reti fu tapu a wroko fu den na ini Moskow, meki na ini december 2004, den afkati fu wi suku yepi na a Hei Krutubangi fu Europa di e feti gi den reti fu libisma. (Luku a faki di nen „Fu san ede wan bosroiti di teki na ini Rosiakondre, e go na krutu baka na ini Fransikondre”, na tapu bladzijde 6.) Siksi yari baka dati, tapu 10 yuni 2010, a Krutubangi dati bosroiti taki Yehovah Kotoigi no du nowan ogri! * A Krutubangi poti prakseri na ala den sani di sma ben e taki fu wi, èn den si taki nowan buweisi ben de gi den sani dati. A Krutubangi ben taki tu dati den tiriman fu Rosiakondre ben de fruplekti fu „gi den Kotoigi primisi baka fu go doro nanga a wroko fu den, èn den ben musu seti sani bun baka gi den Kotoigi”.—Luku a faki di nen „A bosroiti di a Krutubangi teki”, na tapu bladzijde 8.

A Hei Krutubangi teki a krin bosroiti taki na organisâsi fu Europa di e horibaka gi den reti fu libisma, musu sorgu taki noti no e tapu pasi gi a wroko fu Yehovah Kotoigi. Boiti Rosiakondre, sosrefi den tra 46 kondre di de memre fu a organisâsi dati, musu hori densrefi na den bosroiti dati. Ma san moro prenspari, na taki a wet disi di abi krakti tapu someni difrenti sani, o hari a prakseri fu furu afkati, krutuman, fu tiriman di e meki wet, èn fu sma di e feti gi den reti fu libisma na heri grontapu. Fu san ede? We, fu man teki a bosroiti disi, dan a Hei Krutubangi poti prakseri na aiti tra bosroiti di den ben teki fu a bun fu Yehovah Kotoigi, èn na neigi krutu-afersi di wi ben wini na hei krutubangi na ini Argentinia, Kanada, Yapan, Rosiakondre, Zuid-Afrika, Spanyorokondre, Ingrisikondre, nanga Amerkankondre. A no de fu taki dati den buweisi disi, èn sosrefi a krin bosroiti di a Hei Krutubangi ben teki teige a krutubangi fu Moskow, o tyari wini kon gi Yehovah Kotoigi na heri grontapu. Iya, den sani disi e gi den krakti buweisi fu sori taki den abi a reti fu anbegi Gado fri èn fu du a preikiwroko fu den.

Yesus ben taigi den bakaman fu en: „Fu mi ede, meki den o srepi unu go na fesi granman nanga kownu, so taki unu kan de wan kotoigi gi den èn gi den trakondre sma” (Mat. 10:18). Den krutu-afersi di hori na ini Rosiakondre na ini den 15 yari di pasa, gi den brada fu wi na okasi fu meki a nen fu Yehovah bekènti leki noiti bifo na ini Moskow èn na furu tra presi. Na ondrosuku di sma ondrosuku na organisâsi fu Yehovah Kotoigi, den krutu-afersi, èn a bosroiti fu a Hei Krutubangi fu Europa, trutru ben de ’wan kotoigi’ gi tra sma. Den sani disi meki tu taki „a bun nyunsu go na fesi” (Fil. 1:12). Fu taki en leti, te Yehovah Kotoigi na ini Moskow e du a preikiwroko na ini a ten disi, dan furu ososma e taki: „Sma no ben tapu a wroko fu unu?” Nofo tron na aksi dati e gi den brada nanga sisa fu wi na okasi fu fruteri den sma moro fu a bribi fu den. A de krin taki nowan gensman, awinsi fa a makti, kan tapu a Kownukondre preikiwroko. Wi e begi Yehovah fu tan blesi den lobi brada nanga sisa fu wi na ini Rosiakondre, èn fu tan gi den deki-ati fu go doro nanga a wroko.

[Futuwortu]

[Faki/​Prenki na tapu bladzijde 6]

Fu san ede wan bosroiti di teki na ini Rosiakondre e go na krutu baka na ini Fransikondre?

Tapu 28 februari 1996, a tirimakti fu Rosiakondre teken taki den ben o horibaka gi na Organisâsi fu Europa di e feti gi den reti fu libisma. (Tapu 5 mei 1998, a tirimakti fu Rosiakondre teken baka fu sori taki den e horibaka gi na Organisâsi disi.) Di a tirimakti fu Rosiakondre ben teki a bosroiti dati, dan dati ben wani taki dati den sma na ini a kondre abi den reti disi:

’Den abi a reti fu anbegi Gado fri, a reti fu teki prati na a anbegi fu den na oso èn na publiki, èn a reti fu teki wan tra bribi efu den wani du dati.’​—Artikel 9.

’Den abi a reti fu taki èn fu skrifi san den e denki, èn den mag meki tra sma kon sabi sani, solanga den e du dati na wan frantwortu fasi.’​—Artikel 10.

’Den abi a reti fu teki prati na konmakandra di e hori na wan tiri èn orga fasi.’​—Artikel 11.

Efu sma noso organisâsi di e kisi frufolgu no kisi yepi aladi den suku yepi kaba na ala den krutubangi fu a kondre, dan den kan suku yepi na a Hei Krutubangi fu Europa, di de na ini Strasbourg, na Fransikondre (yu kan si disi na loktusei). A Hei Krutubangi disi abi 47 krutuman, èn 47 kondre e horibaka gi na Organisâsi fu Europa di e feti gi den reti fu libisma. Ala sma musu hori densrefi na den bosroiti di a Hei Krutubangi disi e teki. Den kondre di e horibaka gi na Organisâsi disi, de fruplekti fu hori densrefi na den bosroiti fu a Hei Krutubangi.

[Faki na tapu bladzijde 8]

Bosroiti di a Hei Krutubangi teki

Luku dri syatu pisi fu a bosroiti di a Hei Krutubangi teki.

Wan fu den sani di den gensman ben taki, na taki Yehovah Kotoigi e tyari prati kon na ini osofamiri. A Hei Krutubangi no ben agri nanga dati. A ben taki:

„Na fu di den famiriman di no e bribi na ini Gado e gens den wan di teki a bribi, èn na fu di den no wani lespeki a reti di den sma dati abi fu anbegi Gado fri, meki prati e kon na ini osofamiri.”​—Par. 111.

Den gensman ben taki dati Yehovah Kotoigi e „basi a denki” fu sma, ma a Hei Krutubangi no ben feni no wan buweisi di e sori dati. A ben taki:

„A Hei Krutubangi e fruwondru taki den krutubangi (na ini Rosiakondre) no ben man kari nowan enkri nen fu sma di ben ondrofeni taki Yehovah Kotoigi du a sani dati nanga en.”​—Par. 129.

Wan tra sani di den gensman ben taki, na taki Yehovah Kotoigi e pori a gosontu fu den memre fu den fu di den no e teki brudu. A Hei Krutubangi no ben agri nanga dati. A ben taki:

„Wan fu den tumusi prenspari reti di wan sma abi, na taki a mag teki en eigi bosroiti te a abi fu du nanga a libi fu en. Fu eksempre, wan sma di lepi kaba mag bosroiti gi ensrefi efu a wani du wan oparâsi, noso efu a wani datrayepi. Dati wani taki dati a mag bosroiti tu gi ensrefi efu a wani teki brudu.”​—Par. 136.