Yu go na ini a rostu fu Gado?

„A wortu fu Gado de na libi, a abi krakti.”​—HEBR. 4:12.

1. San na wán fasi fa wi kan go na ini a rostu fu Gado na ini a ten disi, ma fu san ede dati no makriki kwetikweti?

NA INI na artikel na fesi, wi si taki wi kan go na ini a rostu fu Gado te wi e gi yesi na en èn te wi e horibaka gi en fu meki a wani fu en kon tru. Ma a sani dati no makriki. Fu eksempre, te wi e kon sabi taki wi e du wan sani di Yehovah no feni bun, dan kande wi no sa agri nanga en na a bigin. Dati e sori taki wi musu meki moro muiti fu de „klariklari fu gi yesi” (Yak. 3:17). Na ini na artikel disi, wi sa poti prakseri na wan tu situwâsi di e gi wi okasi fu sori efu wi de klariklari fu gi yesi na Gado nanga wi heri ati.

2, 3. Sortu muiti wi musu tan meki efu wi wani taki Yehovah feni wi bun?

² Yu de klariklari fu teki rai di e komoto fu Bijbel? Bijbel e taigi wi taki Gado wani tyari ’den gudu fu ala den pipel’ kon na wán (Hag. 2:7). Disi wani taki dati Gado e teki sma di lobi fu du san bun. A tru taki di wi bigin studeri Bijbel fu a fosi leisi, dan furu fu wi no ben e du sani di Gado feni bun. Ma fu di wi lobi Gado nanga en lobi-ati Manpikin, meki wi tyari bigi kenki kon na ini a fasi fa wi ben e  denki èn ben e handri, so taki Gado ben kan feni wi bun. Baka di wi begi Gado doronomo èn wi du tranga muiti fu tyari kenki kon, dan a prenspari dei doro taki wi ben man teki dopu fu tron Kresten.​—Leisi Kolosesma 1:9, 10.

³ Ma di wi teki dopu, wi ben musu tan meki muiti fu basi den swakifasi fu wi. Wi o abi fu du a sani disi solanga wi na sondu libisma. Ma wi kan abi a dyaranti taki efu wi e tan meki muiti èn efu wi abi a fasti bosroiti fu tron sma di Yehovah feni bun, dan A sa blesi a muiti di wi e meki.

Te wi musu kisi rai

4. San na dri fasi fa wi kan kisi rai fu Bijbel?

⁴ Fosi wi kan basi den swakifasi fu wi, dan wi musu kon sabi san na den. A kan taki wan moi lezing di hori na ini a Kownukondre zaal, noso wan artikel di wi leisi na ini wan fu den publikâsi yepi wi fu kon si taki wi abi wan swakifasi. Ma te wi no e frustan san wan lezing noso wan artikel wani leri wi, dan Yehovah kan gebroiki wan Kresten brada noso sisa fu sori wi sortu swakifasi wi abi.​—Leisi Galasiasma 6:1.

5. Taki fu wan tu fowtu fasi fa wi ben kan handri te wi e kisi rai. Fruklari fu san ede Kresten skapuman musu tan pruberi fu yepi wi.

⁵ A no makriki fu teki rai fu wan tra sondu sma, awansi a sma dati e hori den firi fu wi na prakseri èn awansi a e taki na wan switi fasi. Ma soleki fa Galasiasma 6:1 e sori, dan Yehovah e taigi lepi Kresten taki den musu „pruberi” fu tyari wi kon baka na tapu a reti pasi, èn den musu du dati „na wan safri-ati fasi”. Te wi e gi yesi, dan dati o yepi wi fu kon moro krosibei na Gado. A tru taki te wi e begi, dan wi no e frede fu taigi Yehovah taki wi na sondusma. Ma te wan sma e sori wi krin sortu fowtu wi abi, dan nofo tron wi e opo taki gi wisrefi, wi e suku fu taki bun fu a tori, kande wi feni taki a sma e krutu wi fu di a no lobi wi, noso kande wi e krutu a fasi fa a sma gi wi rai (2 Kow. 5:11). Kande wan sma e gi wi rai di abi fu du nanga wan sani di wan famiriman fu wi du, den krosi di wi e weri, a fasi fa wi e sorgu gi wisrefi, noso a prisiriten di wi abi, ma di Yehovah no lobi kwetikweti. A no de fu taki dati a no makriki gi wi fu kisi rai fu den tori disi. Sondro taki wi fruwakti dati, wi ben kan atibron nanga a sma di gi wi a rai, èn a sma dati kan sari srefi! Ma te wi e go denki fu a tori, dan nofo tron wi e kon si taki a rai ben fiti.

6. Fa Gado wortu e tyari kon na krin „san na ati e denki èn san a abi na prakseri”?

⁶ A tekst na a bigin fu na artikel disi e sori wi taki a wortu fu Gado „abi krakti”. Iya, Gado wortu e gi wi krakti fu kenki wi libi. Neleki fa a ben yepi wi fu tyari kenki kon fosi wi ben teki dopu, na so a sa yepi wi tu baka te wi teki dopu. Na ini a brifi di Paulus ben skrifi gi den Hebrewsma, a skrifi tu taki a wortu fu Gado „e koti go so dipi taki a e prati sili nanga yeye srefi, èn a e prati bonyo nanga a bonyo-fatu fu makandra; a man si krin san na ati e denki èn san a abi na prakseri” (Hebr. 4:12). Sobun, te wi e frustan krin san Gado abi na prakseri gi wi, dan a fasi fa wi e meki a wortu dati abi krakti na wi tapu, e sori san de trutru na ini wi ati. A de so taki son leisi a fasi fa sma e si wi (a „sili”) e difrenti fu a sma di wi de trutru (a „yeye”)? (Leisi Mateyus 23:27, 28.) Prakseri fa yu ben o handri na ini den situwâsi di e kon now.

Tan go na fesi makandra nanga Yehovah en organisâsi

7, 8. (a) San ben kan meki taki den Dyu Kresten ben e tan hori densrefi na spesrutu sani fu a Wet? (b) Fa den sani di den ben e du no ben e kruderi nanga a wani fu Yehovah di ben e kon tru?

⁷ Furu fu wi sabi den wortu disi di skrifi na Odo 4:18, na ede: „A pasi fu den reti-ati sma de leki a leti di e bigin skèin na musudei. Safrisafri a e kon moro krin, teleki a de leki a brenki leti fu son na mindridei.” Dati wani taki dati safrisafri wi o tyari wisrefi moro bun èn wi o kon frustan moro bun tu san na a wani fu Gado.

 ⁸ Soleki fa wi si na ini na artikel na fesi, dan baka di Yesus dede, a ben muilek gi furu Dyu Kresten fu no hori densrefi moro na a Wet di Gado ben gi Moses (Tori. 21:20). Aladi Paulus ben sori den na wan koni fasi taki Kresten no ben abi fu hori densrefi moro na a Wet, toku sonwan fu den no ben wani gi yesi na den sani di a ben wani sori den nanga yepi fu santa yeye (Kol. 2:13-15). Kande den ben e firi taki efu den ben e tan hori densrefi na spesrutu sani fu a Wet, dan sma no ben o frufolgu den. Awinsi fa a no fa, Paulus ben skrifi den Hebrew Kresten èn a taigi den krin taki den no man go na ini a rostu fu Gado, solanga den no e horibaka gi Gado fu meki a wani fu en kon tru. * (Hebr. 4:1, 2, 6; leisi Hebrewsma 4:11.) Efu den ben wani taki Yehovah feni den bun, dan den ben o abi fu frustan taki A ben wani taki den ben musu anbegi en na wan tra fasi.

9. Fa wi musu feni en te a srafu e tyari kenki kon na ini a fasi fa den e fruklari sani fu Bijbel?

⁹ Na ini a ten disi, wi kon frustan wan tu Bijbel leri moro bun. A sani disi no musu gi wi broko-ede, ma a musu tranga na overtoigi di wi abi na ini a getrow èn koni srafu grupu. Te den brada di e teki presi gi a „srafu” e kon si taki wan tu kenki musu kon na ini a fasi fa wi e frustan son Bijbel leri, dan den no e frede fu fruklari sani tra fasi, noso fu fruklari sani moro bun. A srafu grupu sabi taki son sma o krutu den fu den kenki disi di den e tyari kon, ma dati a no a moro prenspari sani gi den. A moro prenspari sani gi den, na fu horibaka gi Gado so taki a wani fu en kan kon tru. Fa yu feni en te a srafu e tyari kenki kon na ini a fasi fa den ben fruklari sani na ini Bijbel?​—Leisi Lukas 5:39.

10, 11. San wi kan leri fu a fasi fa son sma handri di den ben musu preiki a bun nyunsu na tra fasi?

¹⁰ Meki wi poti prakseri na wan tra eksempre. Pikinmoro 100 yari pasa, son Bijbel ondrosukuman di ben de bun publiki takiman, ben feni taki a moro bun fasi fa den ben kan du a preikiwroko, na fu hori moi taki gi sma di ben wani arki. Den ben lobi fu hori publikitaki, èn sonwan fu den ben lobi en te sma ben e prèise den. Ma bakaten, a kon na krin taki Yehovah ben wani taki a pipel fu en musu preiki na difrenti fasi, èn wan fu den fasi dati na a oso-fu-oso preikiwroko. Sonwan fu den bun takiman disi weigri krinkrin fu horibaka gi a nyun seti disi. A ben gersi leki den man disi ben lobi Gado èn taki den ben e gi densrefi abra dorodoro na Masra. Ma di den kon si krin san Gado ben abi na prakseri nanga a preikiwroko, dan a kon na krin san ben de trutru na ini den ati. Fa Yehovah ben feni den sma disi? A no blesi den. Den gowe libi na organisâsi.​—Mat. 10:1-6; Tori. 5:42; 20:20.

¹¹ Ma dati no wani taki dati a ben makriki gi ala den sma di tan du a preikiwroko fu sori taki den ben e horibaka gi na organisâsi. Furu fu den sma disi ben feni a wroko disi muilek, spesrutu na ini a bigin. Ma den gi yesi. Baka wan pisi ten, den no ben e frede moro, èn Yehovah blesi den bogobogo. Fa yu e handri te yu e kisi a kari fu teki prati na a preikiwroko na wan fasi di yu no gwenti? Yu de klariklari fu pruberi fu preiki na wan tra fasi?

Te wan sma di wi lobi e drai baka gi Yehovah

12, 13. (a) Fu san ede Yehovah wani taki sma di no abi berow musu puru fu a gemeente? (b) Sortu tyalensi e miti son Kresten papa nanga mama, èn fu san ede a sani disi muilek so?

¹² A no de fu taki dati wi alamala e agri taki efu wi wani taki Gado feni wi bun, dan wi musu hori wi skin krin, wi musu tyari wisrefi na wan krin fasi, èn wi musu anbegi Gado na a yoisti fasi. (Leisi Titus 2:14.) Ma son leisi a kan de wan bigi tyalensi gi wi fu tan gi yesi na Gado te a abi fu du nanga a tori disi. Kon meki wi taki dati wan Kresten trowpaar di de  wan eksempre gi trawan, abi wan-enkri manpikin, èn a manpikin disi e gowe libi a tru anbegi. Ma a yonguman disi feni en moro prenspari fu „prisiri nanga sondu fu wan pisi ten” leki fu abi wan bun matifasi nanga Yehovah èn nanga en papa nanga mama di lobi Gado. Dati meki den brada e puru en fu a gemeente.​—Hebr. 11:25.

¹³ A papa nanga mama e sari srefisrefi! A no de fu taki dati den sabi san Bijbel e taki fu sma di den brada puru fu a gemeente. Bijbel e taki dati wi ’no musu bumui moro nanga wan sma di de wan brada, aladi a de sosrefi wan huruman, noso wan gridiman, noso wan sma di e anbegi kruktugado, noso wan sma di e kosi trawan, noso wan drunguman, noso wan bedrigiman. Wi no musu nyan srefi nanga so wan sma’ (1 Kor. 5:11, 13). Den e frustan tu taki disi wani taki dati den no musu moksi tu nanga famiriman di puru fu a gemeente èn di no e libi na ini a srefi oso leki den. Ma den lobi a manpikin fu den so te! Fu dati ede den ben kan denki: ’Fa wi kan yepi a boi fu wi fu drai kon baka na Yehovah efu wi no man bumui srefisrefi moro nanga en? Efu wi e bumui nanga en, dan wi o man yepi en moro bun, a no so?’ *

14, 15. San na a prenspari bosroiti di papa nanga mama musu teki te wan pikin fu den puru fu a gemeente?

¹⁴ Wi e firi gi den papa nanga mama dati. Te yu e luku en bun, dan a boi fu den ben kan teki wan bosroiti, ma a bosroiti fu libi na wan fasi di no fiti gi wan Kresten, na presi taki a tan abi krosibei demakandra nanga en papa nanga mama èn nanga tra Kresten brada nanga sisa. Ma a papa nanga mama fu den sei, no ben man du noti. Dati meki wi kan frustan taki den e sari!

¹⁵ Ma san den lobi-ati papa nanga mama dati o du? Den o gi yesi na a krin rai fu Yehovah? Kande a de fanowdu son leisi taki den e seti wan tu famiri afersi nanga a boi. Ma den o suku ala sortu reide fu man bumui doronomo nanga a boi? Te den e teki wan bosroiti, dan den musu denki tu fa Yehovah feni a sani di den e du. Yehovah wani hori na organisâsi fu en krin, èn efu a kan, a wani gi sma di du sondu na okasi fu kenki den libi. Fa Kresten papa nanga mama kan horibaka gi Gado na ini a tori dati?

16, 17. San wi kan leri te wi e denki dipi fu na eksempre fu Aron?

¹⁶ Moses en brada Aron, ben kisi fu du nanga wan muilek situwâsi di ben abi fu du nanga tu fu den boi fu en. Prakseri fa a ben e firi di en manpikin Nadab nanga Abihu tyari ofrandi gi Yehovah sondro taki den ben abi reti fu du dati. Yehovah naki den kiri. A no de fu taki dati Aron nanga en wefi no ben kan abi demakandra moro nanga den tu man disi. Ma dati a no ala. Yehovah ben taigi Aron nanga den tra reti-ati manpikin fu en: „Un no  musu meki un wiwiri gro kon langa èn un no musu priti un krosi [fu di unu e row], noso unu o dede èn [Yehovah] en ati o bron nanga a heri pipel” (Lef. 10:1-6). A boskopu de krin. A lobi di wi abi gi Yehovah musu tranga moro a lobi di wi abi gi famiriman di drai baka gi Yehovah.

¹⁷ Te sma e pasa den wet fu Yehovah na ini a ten disi, dan Yehovah no e kiri den. Na wan lobi-ati fasi a e gi den okasi fu sori berow fu den sondu fu den. Ma fa Yehovah ben o firi efu a papa nanga mama fu a sma di no e sori berow, e tan trangayesi En fu di den e tan bumui nanga a pikin fu den, aladi dati no de fanowdu?

18, 19. Sortu blesi famiriman kan kisi te den e gi yesi na den rai di Yehovah gi wi fu no bumui nanga sma di puru fu a gemeente?

¹⁸ Furu sma di ben puru fu a gemeente taki dati den drai kon baka fu di den mati nanga den famiriman fu den ben e gi yesi na Yehovah fu no bumui nanga den. Di den owruman ben agri taki wan yongu uma ben kan tron wan memre baka fu a gemeente, dan den ben skrifi taki a ben drai en libi fu di „en bigi brada no ben bumui nanga en di den ben puru en fu a gemeente”. Na uma taki dati „fu di en brada ben e gi yesi na den rai fu Bijbel, meki dati yepi en fu drai kon baka na a gemeente”.

¹⁹ San wi kan leri fu den eksempre disi? Wi e leri taki wi musu du furu muiti fu no trangayesi Bijbel rai. Wi musu abi na overtoigi taki a fasi fa Gado e lusu problema, ala ten na a moro bun wan.

„A wortu fu Gado de na libi”

20. San na tu fasi fa wi kan frustan Hebrewsma 4:12? (Luku san skrifi na ini a futuwortu.)

²⁰ Di Paulus ben skrifi taki „a wortu fu Gado de na libi”, dan a no ben e taki spesrutu fu Bijbel. * Den tra vers na ini a kapitel e sori taki a ben e taki fu den pramisi fu Gado. Paulus ben wani leri Kresten taki te Gado e pramisi wan sani, dan a no e frigiti san a pramisi. Nanga yepi fu a profeiti Yesaya, Yehovah e sori taki ala ten a e du san a pramisi. A ben taki: „Den wortu di e komoto na mi mofo . . . no o drai kon baka na mi solanga sani no pasa soleki fa mi taki. . . . Den wortu fu mi musu fu abi bun bakapisi” (Yes. 55:11). Fu dati ede, wi no abi fu lasi pasensi te sani no e go so esi leki fa wi ben o wani. Yehovah e „tan wroko” fu meki a wani fu en kon tru.​—Yoh. 5:17.

21. Fa Hebrewsma 4:12 kan de wan deki-ati gi reti-ati brada nanga sisa fu a „bigi ipi” di e dini Gado furu yari kaba?

²¹ Furu reti-ati brada nanga sisa fu a „bigi ipi” dini Yehovah furu yari langa (Openb. 7:9). Furu fu den noiti no ben fruwakti taki den ben o kon owru na ini a sistema disi. Toku den no lasi-ati (Ps. 92:14). Den sabi taki den pramisi fu Yehovah sa kon tru seiker, fu di a e wroko fu meki a wani fu en kon tru. Fu di a prenspari gi Gado taki a wani fu en kon tru, meki a e prisiri te wi e poti a wani fu en na a fosi presi na ini wi libi. Na ini a di fu seibi dei disi, Yehovah e rostu, fu di a de seiker taki a wani fu en sa kon tru, èn taki a pipel fu en sa horibaka gi en. Fa a de nanga yu? Yu go na ini a rostu fu Gado?

[Futuwortu]

Frustan san Gado wani leri yu

• San wan sma musu du fu man go na ini a rostu fu Gado na ini a ten disi?

• Fu san ede wi musu de klariklari fu teki rai di e komoto fu Bijbel?

• O ten a kan muilek gi wi fu gi yesi na rai di komoto fu Bijbel, ma fu san ede a de prenspari taki wi e gi yesi?

• San na tu fasi fa wi kan frustan Hebrewsma 4:12?

[Aksi fu a tori disi]

[Prenki na tapu bladzijde 31]

A papa nanga mama e sari srefisrefi