Aksi fu leisiman

San den nomru na ini den alayari preikiwroko raportu wani taki?

Ibri yari wi wani sabi san a preikiwroko raportu di e kon na ini a Yaribuku o sori wi. Wi breiti te wi e si san a pipel fu Yehovah du na ini a wroko di den kisi fu preiki a bun nyunsu fu a Kownukondre èn fu gi sma leri. Ma efu wi wani frustan san skrifi na ini a raportu, dan wi musu sabi san den nomru na ini wani taki. Luku wan tu eksempre.

A dienstyari. Wan dienstyari na fu september te go miti augustus fu a tra yari. A Yaribuku abi a raportu fu a yari na fesi. Sobun, a Yaribuku fu 2011 abi a raportu fu a dienstyari 2010. Dati na fu 1 september 2009 te go miti 31 augustus 2010.

Heimarki fu preikiman nanga a gemiddeld nomru fu preikiman. „Preikiman” na Kotoigi fu Yehovah di dopu èn Kownukondre preikiman di no dopu ete. A nomru ondro „Heimarki fu preikiman” teki fu a mun na ini a dienstyari pe moro furu sma gi a raportu fu den. A kan taki a mun disi abi moro furu sma, fu di son sma no e gi den raportu fu a mun na fesi biten èn den ben abi fu teri den makandra nanga a raportu fu a mun disi. Na so a e pasa taki den e teri son preikiman tu leisi na ini wan mun. Ma a nomru di yu e si ondro „Heimarki fu preikiman” no abi den preikiman na ini di teki prati na a preikiwroko èn di frigiti fu gi den raportu. Sobun, a prenspari srefisrefi taki ibri preikiman e gi en raportu fu ibri mun biten. A nomru ondro „A gemiddeld nomru fu preikiman” na a nomru fu den preikiman di gwenti gi den preikiwroko raportu ibri mun.

Totaal yuru. Soleki fa a Yaribuku fu 2011 e sori, dan Yehovah Kotoigi wroko moro leki 1.6 milyard yuru na ini a preikiwroko. Ma den yuru disi no abi fu du nanga ala a ten di wi e gebroiki na ini na anbegi fu Yehovah. Dati de so fu di a ten di owruman e gebroiki doronomo fu go luku den brada nanga sisa fu a gemeente, a ten di wi e gebroiki gi den konmakandra, fu studeri èn fu denki dipi fu den sani di wi e leri, no teri na ini den yuru dati.

A moni di den gebroiki. Na ini a dienstyari fu 2010, Yehovah Kotoigi gebroiki moro leki 155 milyun Amerkan dala fu yepi spesrutu pionier, zendeling, nanga opziener di e rèis fu du a preikiwroko fu den. Ma den kostu fu meki Bijbel, buku nanga tijdschrift, no teri na ini a moni dati. Na so a de tu nanga den kostu di meki fu sorgu gi den moro leki 20.000 brada nanga sisa di e wroko na Bethel na heri grontapu, sondro taki den e kisi pai gi dati.

Sma di e nyan fu a brede èn e dringi fu a win na a Memrefesa. Disi na a nomru fu dopu Kresten di e nyan fu a brede èn di e dringi fu a win na a Memrefesa di e hori na heri grontapu. A de so taki a nomru disi na a nomru fu ala den salfuwan na heri grontapu? Dati no abi fu de so. Son leisi difrenti sani kan meki taki sma abi a fowtu denki taki den abi a howpu fu go na hemel. Dati kan abi fu du nanga a bribi di den ben abi fosi, noso kande a e kon fu di a sma e siki na frustan sei. A Tiri Skin no abi wan buku pe den nen skrifi fu ala den sma di e nyan fu a brede èn e dringi fu a win. *

Wi sabi taki sonwan fu den salfu „srafu fu wi Gado” o de na grontapu te a bigi banawtu o tyari pori kon na grontapu (Openb. 7:1-3). Solanga den salfuwan de na grontapu ete, den o wroko tranga fu preiki a bun nyunsu èn fu gi sma leri. Na alayari raportu e sori wi san a pipel fu Yehovah e du na heri grontapu na ini a moro bigi wroko di libisma du oiti.

[Futuwortu]