Du muiti fu libi bun nanga trawan

„Meki wi du muiti fu libi bun nanga trawan.”​—ROM. 14:19.

1, 2. Fu san ede Yehovah Kotoigi man libi bun nanga makandra?

NA INI a ten disi, furu sma no e libi bun nanga makandra moro. Srefi sma fu a srefi kondre èn sma di e taki a srefi tongo no de wán. Den prati te a abi fu du nanga kerki, politiek, moni, nanga skoroleri. Ma toku a de so taki den anbegiman fu Yehovah e libi bun nanga makandra, aladi den komoto fu „ala kondre, lo, pipel, nanga tongo”.​—Openb. 7:9.

² Ma disi no kon fu ensrefi. Na a fosi presi a kon fu di wi „de bun nanga Gado”. Wi de bun nanga en, fu di wi e bribi na ini en Manpikin di gi en libi leki ofrandi fu pai gi den sondu fu wi (Rom. 5:1; Ef. 1:7). Boiti dati, a tru Gado e gi santa yeye na den futuboi fu en di e gi yesi na en èn wan fu den fasi di a yeye e meki wi abi na freide (Gal. 5:22). Wan tra sani di e meki taki wi man libi bun nanga makandra èn taki wi de wán, na taki wi „no de wan pisi fu grontapu” (Yoh. 15:19). Disi wani taki dati wi no e teki prati na politiek noso na feti. Dati meki Bijbel e taki dati a pipel fu Yehovah „naki den feti-owru kon tron plugu èn den lansri kon tron grasinefi”.​—Yes. 2:4.

3. Fa wi e tyari wisrefi fu di wi wani libi bun nanga makandra? Fu sortu sani wi o taki na ini na artikel disi?

³ Na ini a gemeente wi „lobi makandra” awinsi wi komoto fu difrenti presi, awinsi wi abi difrenti gwenti noso awinsi wi abi difrenti fasi fu denki (Yoh. 15:17). A libi di wi e libi bun nanga makandra no wani taki nomo dati wi no wani du makandra ogri. A wani taki tu dati wi e „du bun gi ala sma, ma spesrutu gi den wan di abi a srefi bribi leki wi” (Gal. 6:10). Gi wi a prenspari srefisrefi taki wi de bun nanga Yehovah èn nanga den brada nanga sisa fu wi. Dati meki wi musu du ala muiti fu hori en so. Meki wi luku fa wi kan  tan libi bun nanga makandra na ini a gemeente.

Te tu sma abi wan problema nanga makandra

4. San wi kan du te wi denki taki wi du wan sma wan hati sani?

⁴ A disipel Yakobus skrifi: „Wi alamala e sondu furu tron. Efu wan sma no e sondu nanga en mofo, dan a bun dorodoro” (Yak. 3:2). Sobun, a o pasa son leisi taki tu sma na ini a gemeente no agri nanga makandra, noso taki problema de na den mindri (Fil. 4:2, 3). Ma efu wan problema de, den musu man lusu en sondro fu tyari dyugudyugu kon na ini a gemeente. Luku fu eksempre sortu rai wi e kisi te wi denki taki wi du wan trawan wan hati sani.​—Leisi Mateyus 5:23, 24.

5. Te wan sma du wi wan sani, dan san wi musu du fu tan libi bun nanga en?

⁵ San wi musu du te wi feni taki wan sma du wi wan sani? Wi musu fruwakti taki a sma musu kon na wi èn taki a musu aksi pardon? 1 Korentesma 13:5 taki: „[Lobi] no e tan memre na ogri di trawan du.” Te wi feni taki wan sma du wi wan sani, wi musu gi a sma pardon èn wi musu frigiti a tori, fu di wi wani libi bun nanga en. Sobun, wi no musu ’tan memre na ogri di a du’. (Leisi Kolosesma 3:13.) Disi na a moro bun fasi fa wi kan lusu pikinpikin problema, bika a e meki taki wi e libi bun nanga wi brada nanga sisa èn wi e firi bun fu di wi sabi taki wi du san bun. Wan moi odo e taki: „A moi te wan sma no e prakseri den fowtu fu trawan moro.”​—Odo 19:11.

6. San wi musu du te wan sma du wi wan hati sani di wi no man frigiti?

⁶ Ma san wi musu du te wan sma du wi wan hati sani di wi no man frigiti? A no de wan koni sani fu go panya a tori, bika disi o tyari soso problema kon na ini a gemeente èn wánfasi no o de moro. Fa wi kan lusu a problema sondro fu tyari dyugudyugu kon? Mateyus 18:15 taki: „Efu yu brada du wan sondu teige yu, go sori en san na a sondu te yu nanga en wawan de. Efu a e arki yu, dan yu wini yu brada.” Mateyus 18:15-17 e taki fu seryusu sondu, ma toku wi kan gebroiki a rai na ini vers 15 na ini tra situwâsi tu. Sobun, te wan sma du wi wan hati sani, wi musu go taki nanga en wawan. Na wan switi fasi wi musu pruberi fu meki en bun baka nanga en. *

7. Fu san ede wi no musu draidrai fu lusu problema?

⁷ Na apostel Paulus skrifi: „Efu un ati e bron, sorgu taki unu no sondu. No meki son dongo, aladi unu e mandi ete. No gi Didibri okasi fu abi krakti na un tapu” (Ef. 4:26, 27). Yesus taki: „Efu wan sma wani tyari yu go na krutu, dan yu no musu draidrai fu lusu a problema di yu abi nanga en” (Mat. 5:25). Fu kan libi bun nanga trawan, wi no musu draidrai fu lusu problema. Fu san ede? Efu wi no du dati, dan den problema e kon moro bigi èn moro seryusu, neleki fa wan soro kan kon moro bigi te wi no e poti dresi gi en esi-esi. Wi no musu meki heimemre, dyarusu, noso lobi gi moni tapu wi fu lusu problema esi-esi.​—Yak. 4:1-6.

Te wan problema abi fu du nanga furu sma

8, 9. (a) Sortu trobi ben de na ini a gemeente na Rome? (b) Sortu rai Paulus gi den Kresten fu Rome?

⁸ Son leisi wan problema na ini a gemeente no abi fu du nanga tu sma nomo, ma nanga furu sma. Na so a ben de nanga den Kresten na ini Rome. Trobi ben de na mindri den Kresten di ben de Dyu èn den wan di no ben de Dyu. Sonwan fu den ben abi wan swaki konsensi, fu di a konsensi fu den no ben gi den pasi fu du wan lo sani, aladi den Buku fu  Bijbel no e sori taki den sani disi no bun. Ma trawan na ini a gemeente ben abi wan moro tranga konsensi. Den ben denki taki den bun moro den wan di abi wan swaki konsensi. Den wan di ben abi wan swaki konsensi bigin krutu den wan di abi wan moro tranga konsensi. Ma ala den sma disi ben abi den eigi denki fu son sani. Sortu rai Paulus gi den na ini a brifi fu en?​—Rom. 14:1-6.

⁹ Paulus ben gi ala tu grupu rai. A taigi den wan di ben e frustan taki den no ben abi fu gi yesi na a Wèt fu Moses moro, taki den no ben musu wisiwasi den brada fu den di ben abi wan swaki konsensi (Rom. 14:2, 10). Efu den ben e tyari densrefi na a fasi disi, dan disi ben kan meki taki den trawan nanga wan swaki konsensi gowe libi Yehovah. Paulus gi den a rai: „No pori a wroko fu Gado fu nyanyan ede. . . . A bun fu no nyan meti, fu no dringi win, noso fu no du wan sani efu dati kan meki yu brada fadon” (Rom. 14:14, 15, 20, 21). Ma Paulus gi rai tu na den wan di ben abi wan swaki konsensi. A taigi den taki den no musu denki taki den trawan trangayesi Yehovah soso fu di den konsensi ben gi den pasi fu du moro sani (Rom. 14:13). A taigi den ’alamala drape fu no denki moro fu densrefi leki san de fanowdu’ (Rom. 12:3). Baka di Paulus gi ala tu grupu rai, a skrifi: „Fu dati ede, meki wi du muiti fu libi bun nanga trawan èn fu du sani di e gi trawan deki-ati.”​—Rom. 14:19.

10. Efu wan problema de na ini a gemeente leki fa a ben de na ini a gemeente na Rome, dan san musu pasa fu lusu a problema?

¹⁰ Wi kan de seiker taki a gemeente na Rome teki a rai fu Paulus èn den tyari kenki kon. Na so a musu de nanga Kresten na ini a ten disi. Te wi abi problema nanga wi brada nanga sisa, dan wi o man lusu a problema na wan lobi-ati fasi efu wi abi sakafasi èn efu wi e du san Bijbel taki. Neleki fa a ben de nanga den Kresten fu Rome, na so a kan de tu taki ala sma na ini a trobi musu tyari kenki kon fu man „libi bun nanga makandra.”​—Mark. 9:50.

 Fa owruman kan yepi

11. San wan owruman musu du efu wan Kresten wani taki nanga en fu wan problema di a abi nanga wan tra Kresten?

¹¹ Ma fa a de dan efu wan Kresten wani taki nanga wan owruman fu wan problema di a abi nanga wan famiriman noso nanga wan tra Kresten? Odo 21:13 taki: „Efu wan sma e tapu en yesi te wan mofinawan e bari suku yepi, dan sma no o piki en tu te ensrefi o bari suku yepi.” A no de fu taki dati wan owruman no musu „tapu en yesi” na ini so wan situwâsi. Ma wan tra odo e warskow tu: „A fosi sma di e opo taki gi ensrefi te sma e koti krutu gi en o kisi leti. Ma dan wan trawan e kon na inisei èn a e bigin poti aksi gi en fu tyari kon na krin fa sani de trutru” (Odo 18:17). Wan owruman kan arki na wan switi fasi, ma a musu luku bun taki a no teki a sei fu a sma di e fruteri en a tori. Te a arki san na a problema, a kan aksi a sma efu a taki kaba nanga a trawan di du en wan sani. Na owruman kan taki nanga en tu fu wan tu Bijbel tekst di o yepi en fu meki en bun baka nanga a trawan.

12. Kari dri eksempre di e sori krin taki a no bun te wan sma du wan sani wantewante baka di a yere fu wan problema.

¹² Dri Bijbel eksempre e sori krin taki a no bun kwetikweti te wan sma e du wan sani wantewante baka di a yere soso wán sei fu wan problema. Di Potifar en wefi taki dati Yosef ben wani dwengi en fu abi seks nanga en, dan Potifar bribi wantewante. En ati bron so te, taki a meki sma poti Yosef na strafu-oso (Gen. 39:17-20). Kownu David ben bribi Siba tu di a taki dati en masra Mefiboset ben teki a sei fu den feanti fu David. Wantewante David taki: „A bun. Ala sani di Mefiboset abi, na fu yu” (2 Sam. 16:4; 19:25-27). Sma ben taigi Kownu Artakserkses taki den Dyu ben e bow den skotu fu Yerusalem baka èn taki den ben o opo densrefi teige a Gran Kownukondre Persia. A kownu bribi a lei disi èn a gi a komando fu tapu nanga a bow fu Yerusalem. Na so den Dyu tapu fu bow a tempel fu Gado (Esra 4:11-13, 23, 24). A de wan koni sani te owruman e teki a rai di Paulus gi Timoteyus fu no teki bosroiti sondro fu sabi a fini fu wan tori.​—Leisi 1 Timoteyus 5:21.

13, 14. (a) Te tu sma abi wan trobi, dan san wi musu hori na prakseri? (b) San kan yepi owruman fu krutu wan tori na wan reti fasi?

¹³ Awinsi wi yere a tori fu ala tu sei, toku a prenspari fu hori na prakseri taki „efu wan sma denki taki a sabi wan sani, dan a no sabi a sani ete soleki fa a musu sabi en” (1 Kor. 8:2). A de so taki trutru wi sabi ala sani di meki taki a trobi pasa? A kan taki wi no sabi ala sani fu den tu sma di abi a trobi. Te den owruman musu krutu wan tori, den musu luku bun taki sma no fruteri den lei noso kori den. Den no musu bribi san sma di no de na ini a tori e taki. Den no musu bribi wan sma tu soso fu di a gudu. Yesus Krestes, a sma di Gado poti leki Krutuman, e krutu sani na wan reti fasi. „Te a o koti krutu, a no o poti prakseri nomo na san en ai si. Te a o piri-ai gi sma, a no o poti prakseri nomo na san en yesi yere” (Yes. 11:3, 4). Na presi fu dati Yesus e meki Yehovah en yeye tiri en. Na a srefi fasi, Kresten owruman musu meki Gado en santa yeye tiri den.

¹⁴ Fosi den owruman krutu wan tori, den musu begi Yehovah fu tiri den nanga en yeye. Den musu abi a frutrow taki a yeye o tiri den te den e suku rai na ini Gado Wortu èn na ini den buku di a koni srafu di de fu frutrow tyari kon na doro.​—Mat. 24:45.

A moro prenspari fu tan Gado mati

15. O ten wan Kresten musu go na den owruman te a sabi taki wan trawan du wan sondu?

¹⁵ Leki Kresten wi e kisi a rai fu libi bun nanga trawan. Ma Bijbel e taki tu: „Na a fosi presi, a koni fu hemel de soifri, a lobi freide” (Yak. 3:17). Luku taki a tekst disi e taki fosi fu a wortu ’soifri’ èn baka dati a e taki fu freide. Disi e sori taki na a fosi presi wi musu hori  wisrefi na den soifri èn krin wèt fu Gado èn wi musu du san en feni bun. Efu wan Kresten kon sabi taki wan tra Kresten du wan seryusu sondu, dan a musu gi en deki-ati fu go taigi den owruman san a du (1 Kor. 6:9, 10; Yak. 5:14-16). Efu a sma di sondu no e du dati, dan a Kresten di sabi a tori musu go taigi den owruman. Efu a no e du dati fu di a wani taki a trawan tan en mati, dan ensrefi e du wan sondu tu.​—Odo 29:24; leisi Lefitikus 5:1.

16. San Yehu du nanga Kownu Yoram èn san wi kan leri fu dati?

¹⁶ A tori fu Yehu e sori taki a moro prenspari fu du san Gado feni bun, leki fu tan wan mati fu wan sma di e du sondu. Gado ben seni Yehu fu strafu Kownu Akab en famiri. Di na ogri Kownu Yoram, a manpikin fu Akab nanga Iseibel, rèi na ini en asiwagi go miti Yehu, a taki: „Ala sani bun, Yehu?” San Yehu taki? A taki: „Fa ala sani kan go bun, efu yu mama Iseibel e huru nanga falsi gado èn efu a e du ala den towfruwroko fu en ete?” (2 Kow. 9:22) Dan Yehu hari en bo èn a sutu Yoram na ini en ati. Neleki fa Yehu no tapu en ai gi sondu, na so den owruman no musu tapu den ai te wan sma du wan sondu èn a no abi berow. Den no kan gi pasi taki so wan sma tan na ini a gemeente soso fu di den wani tan bun nanga a sma. Den musu puru so wan sma na ini a gemeente, so taki Gado tan feni a gemeente bun.​—1 Kor. 5:1, 2, 11-13.

17. San ala Kresten musu du fu tan libi bun nanga makandra?

¹⁷ Te brada noso sisa abi wan problema nanga makandra, dan nofo tron a no seryusu so, taki owruman musu seti wan krutu komte fu luku a tori. Sobun, a moro bun fu sori lobi èn fu frigiti den fowtu fu trawan. Gado Wortu taki: „Wan sma di e tapu sondu e suku lobi, ma a sma di e tan taki fu wan tori e pori bunbun mati” (Odo 17:9). Efu wi du san Bijbel e taki, wi o libi bun nanga wi brada nanga sisa na ini a gemeente èn wi o tan mati fu Yehovah.​—Mat. 6:14, 15.

Den wan di e du muiti fu libi bun nanga trawan o kisi blesi

18, 19. Sortu blesi wi o kisi te wi e du muiti fu libi bun nanga trawan?

¹⁸ Te wi e „du muiti fu libi bun nanga trawan”, wi o kisi furu blesi. Wi de bunbun mati fu Yehovah, fu di wi e du muiti fu abi den srefi fasi leki en èn fu di wi e du muiti fu meki wánfasi de na ini a gemeente. Te wi e du muiti fu libi bun nanga wi Kresten brada nanga sisa, dan dati o yepi wi tu fu de bun nanga den sma di wi e miti te wi e „preiki a bun nyunsu fu freide” (Ef. 6:15). Wi o man ’sori switifasi gi ala sma èn wi o man hori wisrefi te ogri e miti wi’.​—2 Tim. 2:24.

¹⁹ Hori na prakseri tu taki „Gado sa gi wan opobaka na den bun sma èn na den sma di no bun” (Tori. 24:15). Te disi pasa, dan yu o abi milyunmilyun sma na grontapu di kweki na ala sortu fasi èn di abi ala sortu maniri. Yu o abi sma di ben libi na ala sortu presi fu grontapu, èn sma di ben libi na ini ala sortu ten, srefi den wan di ben libi „sensi a ten di grontapu seti”! (Luk. 11:50, 51) A o de wan bigi grani fu leri den sma di kisi wan opobaka fa fu libi bun nanga trawan. A leri di wi e kisi now fu man libi bun nanga trawan o de wan bigi yepi na a ten dati!

[Futuwortu]

San yu leri?

• Te wi du wan sma wan sani, dan san wi musu du fu meki en bun nanga en?

• Te wan sma du wi wan sani, dan san wi musu du fu meki en bun baka?

• Fu san ede a no de wan koni sani fu teki sei na ini wan trobi di tra sma abi?

• Fu san ede a moro prenspari fu du san Gado feni bun, leki fu tan wan mati fu wan sma di e du sondu?

[Aksi fu a tori disi]

[Prenki na tapu bladzijde 29]

Yehovah lobi den wan di de klariklari fu gi pardon