Internet​—Fa fu gebroiki en na wan koni fasi

HONDROHONDRO yari pasa di sma bigin druk buku, wan bigi kenki kon na ini a fasi fa sma e meki trawan kon sabi sani. Na dati pasa tu di sma bigin gebroiki Internet. Na ini a ten disi a makriki fu go tapu Internet fu feni bun furu sani awinsi o ten èn awinsi pe wi de. Dati meki na heri grontapu sma e gebroiki Internet now.

A taki di wi man taki nanga makandra na wan kado di wi Mekiman gi wi. Na so wi man fruteri trawan fa wi e denki èn wi kan meki den kon sabi sani. Yehovah ben de a fosiwan di ben taki nanga libisma. A ben fruteri den krin fa den kan libi wan switi libi (Gen. 1:28-30). Ma den sani di pasa bakaten, e sori taki sma kan gebroiki a kado disi di Gado gi wi, fu du ogri. Satan fruteri Eva soso lei. Eva bribi san a taki, dan a go fruteri Adam, di tyari soso rampu gi libisma.​—Gen. 3:1-6; Rom. 5:12.

Ma fa a de nanga a fasi fa wi kan gebroiki Internet? Internet kan meki wi sabi prenspari sani, a kan yepi wi fu no lasi furu ten, èn wi kan gebroiki en gi bun sani. Ma Internet abi sani tu di kan kori wi, a kan nyan wi ten, èn a kan pori wi denki. Meki wi luku fa wi kan gebroiki Internet na wan bun fasi.

Fa yu kan sabi efu wan sani tru noso efu a no tru?

Noiti no denki taki ala sani di yu kan feni tapu Internet na bun sani noso sani di e tyari wini kon. Den programa fu suku sani tapu Internet, yu kan agersi nanga wan grupu fisiman di e fanga ala sortu fisi doronomo, dan den e poti alamala na ini wán baki fu yu kan teki. Sonwan fu den fisi yu kan nyan, ma trawan no bun fu nyan srefisrefi. Sobun, efu yu ben o go teki fisi, yu ben o luku den wan-fru-wan fu sabi sortuwan yu kan nyan, a no so? Na so a de tu nanga den programa fu suku sani tapu Internet. Den e gebroiki bun furu tra computer fu go na presi tapu Internet di den e kari website. Na den website yu abi den moro bun sani, ma sani de tu di no bun srefisrefi. Sobun, wi musu luku bun san wi e luku tapu Internet, noso wi kan pori wi frustan nanga sani di no bun.

Na ini 1993, wan tijdschrift di furu sma sabi ben abi wan prenki pe tu dagu ben e sidon baka wan computer. A wan dagu taigi a trawan: „Tapu Internet nowan sma sabi taki yu na wan dagu.” Sobun, tapu Internet nowan sma man sabi suma yu de trutru. Langa ten pasa, Satan ben du a srefi sani tu. Na presi fu sori suma na en, a gebroiki wan sneki fu  taki nanga Eva. A taigi en taki a ben kan tron leki Gado. Na ini a ten disi, iniwan sma di abi Internet kan prei sabiman. A kan du leki a sabi furu, sondro fu taki srefi san na en nen. Nowan wèt de di e sori suma kan poti sani tapu Internet. Iniwan sma kan poti san a e denki, san a sabi, fowtow, noso tra sani.

Te yu go tapu Internet, no kon de leki Eva. Luku bun èn no bribi ala sani. Fosi yu bribi wan sani, aksi yusrefi: (1) Suma poti a sani disi tapu Internet? Na wan sma di mi kan frutrow? (2) Fu san ede a sani disi de tapu Internet? San meki a sma poti en drape? Na en eigi denki a poti drape? (3) Pe a sma feni den sani disi? A skrifi pe a feni den sani, so taki misrefi kan luku efu den sani tru? (4) Den sani tru te now ete? Na ini a fosi yarihondro, na apostel Paulus gi Timoteyus rai di wi musu teki leki seryusu rai te now ete. Paulus skrifi: „Sorgu bun gi a sani di yu kisi. No arki lawlaw takitaki di e pori santa sani èn no arki den leri di no e kruderi nanga a tru leri, bika na den tori disi sma e kari ’sabi’, ma a no trutru sabi.”​—1 Tim. 6:20.

A e meki yu wini ten noso a e meki yu lasi ten?

Efu yu e gebroiki Internet nanga koni, dan yu no o lasi furu ten, krakti, nanga moni. Wi kan bai sani makriki sondro fu komoto na oso. Te wi suku bun, wi kan bai sani moro bunkopu tu. A libi fu furu sma kon moro makriki fu di den no abi fu go na bangi fu seti den moni tori fu den. Den kan seti den moni tori na iniwan ten leti drape na ini den oso. Efu yu wani go na wan tra kondre, dan yu kan bai den ticket tapu Internet, yu kan feni telefon nomru, adres, nanga difrenti fasi fa yu kan doro a presi pe yu wani go. Na heri grontapu den bijkantoro fu Yehovah Kotoigi e gebroiki Internet gi den sani disi, so taki den kan wini ten, den no abi fu teki so furu sma na wroko, èn den no e lasi furu moni.

Ma Internet abi en takru sei tu. Wi musu luku bun taki Internet no nyan wi ten. Gi son sma Internet no de wan sani moro di bun fu gebroiki son leisi, ma a kon tron wan moi preisani di den no man libi. Den e lasi bun furu ten tapu Internet, fu di den e prei game, den e bai sani, den e taki nanga trawan, den e seni brifi noso e-mail, den e go ondrosuku sani, noso den e lukuluku ala sortu sani leki den no abi noti fu du. Te fu kaba a kan taki den no e poti prakseri na moro prenspari sani di abi fu du nanga den famiri, den mati, èn a gemeente. Gi son sma Internet kan tron leki drugs gi wan dyonki. Den no man sondro en èn den musu fu gebroiki en nomonomo. Fu eksempre, sma di e ondrosuku sani kon si na ini 2010 taki 18,4 procent fu den yongusma na Korea no man sondro Internet. Ondrosukuman na Doisrikondre taki dati „moro nanga moro uma e krutu, fu di den masra no man sondro Internet”. Wan uma krutu taki en masra tron wan heri tra sma, fu di a no man sondro Internet. A sani disi pori en trowlibi srefi.

Wan bijkantoro fu Yehovah Kotoigi ben kisi wan brifi fu wan sma di e kari ensrefi wan Internet dyonki. Son leisi a ben de tapu Internet sowan tin yuru ibri dei. A taki dati „biginbigin a ben gersi leki a sani disi a no wan takru sani”. Ma a taki tu: „Bakaten mi bigin misi konmakandra èn mi no ben e begi moro.” A no ben e  sreka ensrefi gi den konmakandra èn te a ben de drape, a ben e prakseri nomo fu go na oso fu „man go tapu Internet baka”. Koloku a kisi ensrefi biten èn a kon frustan o seryusu a problema disi de. Dati meki a du muiti fu tapu nanga a gwenti disi. Noiti no meki a kon so fara taki yu srefi tron wan Internet dyonki èn taki yu no man sondro en.

San bun fu luku èn san no bun?

Na 1 Tesalonikasma 5:21, 22 wi e leisi: „Ondrosuku ala sani fu luku efu den tru. Tan du sani di bun. Tan farawe fu ibri sortu ogridu.” Te wi e luku sani tapu Internet, wi musu hori na prakseri fa Yehovah e denki fu den sani dati. San wi e luku no musu de sani di e pori sma denki èn den musu de sani di fiti gi Kresten. Na ini a ten disi porno tapu Internet na wan aladei sani èn efu wi no e luku bun, dan makriki a kan tron wan problema gi wi.

A bun fu aksi wisrefi: ’A sani di mi e luku na wan sani di mi ben o puru esi-esi efu mi trowpatna, mi papa noso mama, noso wan tra Kresten ben o kon na ini a kamra?’ Efu disi de so, dan a ben o bun efu wi go tapu Internet soso te trawan de drape. Iya, Internet kenki a fasi fa wi kan meki sma sabi sani èn a fasi fa wi kan bai sani. Boiti dati, a meki taki wan heri nyun fasi de now fa wan sma kan ’du sutadu na ini en ati.’​—Mat. 5:27, 28.

A bun ala ten fu panya wan tori tapu Internet?

Tapu Internet yu kan kon sabi son tori èn yu kan fruteri trawan tori tu. Wi alamala fri fu kisi noso panya nyunsu tapu Internet, ma a sani disi e go nanga wan frantwortu. Wi musu sabi seiker efu a tori disi tru èn efu a fiti gi wan Kresten. Wi de seiker taki a sani di wi skrifi noso seni gi trawan tru? Wi abi a reti fu panya a tori dati? * Sma kan leri wan sani fu en noso a o gi den deki-ati? Fu san ede wi wani tra sma fu sabi dati? Na fu di wi wani plei kefalek gi den?

E-mail kan de wan heri bun sani efu wi e gebroiki en na a yoisti fasi. Ma sma kan gebroiki en tu fu seni wan lo sani di no de fanowdu. Wi e seni tumusi furu sani gi trawan? Efu wi e du dati, dan a kan taki wi e teki tumusi furu ten fu den, fu di den abi fu leisi ala den sani dati. A no moro bun fu prakseri fosi fu san ede yu wani seni na e-mail? Fositen, sma ben gwenti skrifi brifi fu fruteri den famiri noso mati san den ondrofeni, so taki den kan sabi fa a e go nanga den. A no fu dati ede wi musu gebroiki e-mail? Fu san ede wi ben o seni wan sani efu wi no sabi seiker efu a tru?

We, dan fa wi musu denki fu Internet? Wi no musu gebroiki en kwetikweti? A kan taki disi de fanowdu gi son sma. A man di kari ensrefi wan Internet dyonki na ini na artikel disi ben abi fu du dati fu man tapu nanga a takru gwenti di a ben abi furu yari langa. Ma na a tra sei Internet kan tyari wini kon gi wi efu wi meki ’a frustan di wi abi, de leki wan waktiman gi wi’ èn efu wi meki ’a koni di wi abi fu si sani krin, kibri wi.’​—Odo 2:10, 11.

[Futuwortu]

[Prenki na tapu bladzijde 4]

Fa yu kan sorgu taki den sani tapu Internet no kori yu?

[Prenki na tapu bladzijde 5]

San yu musu prakseri, fosi yu seni wan e-mail?