Wan konmakandra di sma no sa frigiti

„NA A KABA fu a konmakandra disi, unu o taki: ’Noiti mi sa frigiti na alayari konmakandra disi!’” Na so Brada Stephen Lett fu a Tiri Skin fu Yehovah Kotoigi ben bigin a konmakandra. Di a taki dati, dan a bigi grupu sma bigin angri fu kon sabi sortu sani den ben o yere na a konmakandra disi. Den ben kon makandra gi a di fu 126 alayari konmakandra fu a Watch Tower Bible and Tract Society of Pennsylvania. A konmakandra disi ben hori tapu 2 oktober 2010, na a Kongreshal fu Yehovah Kotoigi na ini Jersey City, New Jersey, na Amerkankondre. San ben de wan tu heimarki fu a prenspari okasi disi?

Brada Lett di hori a fosi lezing ben taki fayafaya fu a hemel wagi fu Yehovah soleki fa a skrifi na ini a Bijbel buku Esekièl. A bigi moi wagi disi di e prenki na organisâsi fu Yehovah, e go na iniwan sei pe Yehovah wani. Brada Lett ben taki dati na hemel yu abi yeye di de wan pisi fu na organisâsi disi di e go na fesi heri esi, neleki te faya e koti na hemel. A pisi fu na organisâsi disi e du wantewante san Yehovah e prakseri. Na organisâsi fu Yehovah Gado abi wan pisi na grontapu tu di e go na fesi na a srefi fasi. Brada Lett ben taki fu wan tu moi sani di pasa no so langa ete na ini a pisi disi fu Gado en organisâsi.

Fu eksempre, now a Tiri Skin e tapu den bijkantoro na ini son kondre, so taki den wan di ben e wroko na Bethel drape kan poti moro prakseri na a preikiwroko. Brada Lett gi den arkiman deki-ati fu tan begi gi a Tiri Skin di e teki presi gi a srafu grupu, so taki Gado kan yepi den fu tan gi yesi na en èn fu tan sori koni.​—Mat. 24:45-47.

Ondrofenitori nanga interview di e gi deki-ati

Tab Honsberger, di de wan memre fu a Bijkantoro Komte na ini Haiti, ben fruteri fu wan tu sani di pasa baka a gronseki fu 12 yanuari 2010. Disi ben naki sma ati trutru. Sowan 300.000 sma ben lasi den libi na ini a gronseki dati. A ben taki dati kerki fesiman e fruteri sma taki Gado strafu den sma dati fu di den no ben bribi na ini En, ma a kibri den bun sma. Ma na a tra sei, dusundusun ogriman kon fri fu di a skotu fu wan strafu-oso broko fadon na ini a gronseki. Sobun, furu reti-ati sma fu Haiti e feni trowstu te den e kon sabi krin fu san ede a ten fu wi lai so furu problema. Brada Honsberger ben taki fu wan brada na ini Haiti di e dini Yehovah fayafaya. A wefi fu a brada disi dede na ini a gronseki. A brada taki: „Te nanga a dei fu tide mi e krei. Mi no sabi o langa mi o sari so, ma a lobi di na organisâsi fu Yehovah e sori gi mi, e meki mi prisiri. Mi abi wan howpu èn mi abi na fasti bosroiti fu prati a howpu dati nanga tra sma.”

 Mark Sanderson, di de wan memre fu a Brooklyn Bethelfamiri now, ben fruteri fa a wroko e go na den Filippijnen. A brada disi di fosi ben de wan memre fu a Bijkantoro Komte drape, ben e prisiri di a ben taki fu den 32 heimarki fu preikiman di a kondre disi ben abi baka makandra. A nomru fu Bijbelstudie hei omeni tron moro a nomru fu preikiman. A ben taki fu wan brada di nen Miguel èn a fruteri taki wan man kiri wan granpikin fu a brada dati. Miguel ben du furu muiti fu meki na ogriman disi koti strafu gi na ogri di a du. Bakaten, di Miguel ben e gi kotoigi na a strafu-oso, dan a miti na ogriman disi. Aladi Miguel ben e senwe, toku a taki na wan switi fasi nanga a man disi. Te fu kaba, a bigin studeri nanga en. A man disi poti bribi na ini den sani di a ben leri èn a bigin sori lobi gi Yehovah. Now a teki dopu, en nanga Miguel na bun mati, èn Miguel e du muiti fu meki a nyun brada fu en komoto na strafu-oso moro esi. *

Baka dati, Mark Noumair, wan fu den leriman di e wroko na a Kantoro gi den Bijbelskoro, taki nanga den dri trowpaar Alex nanga Sarah Reinmueller, David nanga Krista Schafer, èn Robert nanga Ketra Ciranko. Alex Reinmueller, wan yepiman fu a Buku Komte, fruteri san yepi en fu kan abi na overtoigi taki disi na a tru bribi, aladi a ben e pionier na ini Kanada. Na a pisi ten dati a ben abi 15 yari nomo èn nofo tron a ben e wroko en wawan. Di a brada ben aksi en suma ben abi bun furu krakti na en tapu na Bethel, dan brada Reinmueller kari dri brada di ben e dini Gado nanga den heri ati. A ben sori taki den brada disi yepi en fu go na fesi na ini a tru anbegi. En wefi Sarah ben fruteri fu a matifasi di a ben abi nanga wan sisa di ben de na strafu-oso na ini China someni tenti yari langa fu a bribi fu en ede. Sarah taki dati begi yepi en fu frutrow na tapu Yehovah.

David Schafer, di de wan yepiman fu a Leri Komte, ben prèise en mama fu a tranga bribi fu en èn a ben taki fu fo brada di ben yepi en fu dini leki yepipionier di a ben moro yongu. Den brada disi ben abi a wroko fu koti bon. En wefi Krista, ben fruteri nanga prisiri taki a leri furu fu den owru memre fu a Bethelfamiri di ben sori taki den ben „de fu frutrow na ini a moro pikin afersi”, soleki fa Yesus ben gi leki rai.​—Luk. 16:10.

Robert Ciranko, wan yepiman fu a Skrifi Komte, ben fruteri fu den granmama nanga den granpapa fu en. Ala fo ben komoto fu Hongaria èn den ben de salfu Kresten. Leki yongu boi a ben e go na bigi Kongres na ini den yari baka 1950, èn a ben naki en ati di a kon sabi taki na organisâsi fu Yehovah bigi omeni tron moro a gemeente fu en. En wefi Ketra ben fruteri fa a leri fu tai hori na Yehovah na a ten di a  ben e dini leki pionier na ini wan gemeente di ben kisi fu du nanga sma di fadon komoto na bribi, èn nanga tra problema. A ben horidoro èn te fu kaba a kisi a grani fu dini leki spesrutu pionier na ini wan gemeente pe a wánfasi na mindri den brada nanga sisa ben naki en ati.

Baka dati, Manfred Tonak fruteri fa a wroko ben waka na ini Etiopia. A kondre disi na fu sensi Bijbel ten èn now a abi moro leki 9000 preikiman di e preiki a bun nyunsu. Furu fu den preikiman disi e libi na ini a mamafoto Addis Abeba, noso krosibei fu drape. Sobun, moro preikiman de fanowdu gi den moro farawe kontren. Fu man tapu a nowtu disi, dan Kotoigi fu Etiopia di e libi na ini tra kondre, kisi a kari fu kon drape fu preiki na den farawe kontren fu a kondre. Furu brada nanga sisa ben kon, den gi den Kotoigi drape deki-ati èn den feni sma di arki a boskopu.

Wan heimarki fu a programa ben de wan symposium di ben poti prakseri na Yehovah Kotoigi na ini Rosiakondre èn na den problema di den ben abi nanga krutubangi. Aulis Bergdahl fu a Bijkantoro Komte na ini Rosiakondre, ben fruteri fa sma frufolgu den Kotoigi na ini Rosiakondre na ini den yari di pasa, spesrutu na ini Moskow. Philip Brumley, di e wroko na a Kantoro gi krutu-afersi na a Bijkantoro fu Amerkankondre, ben fruteri fu den tumusi moi sani di pasa na ini den mun disi. A fruteri taki a Hei Krutubangi fu Europa di e horibaka gi den reti fu libisma, poti prakseri na den neigi krutu-afersi di sma ben abi teige den Kotoigi. A Krutubangi kon si taki buweisi no de gi nowan fu den sani di sma taki fu den. Na ini sonwan fu den afersi dati, a Krutubangi du spesrutu muiti fu fruklari finifini fu san ede den gensman no ben abi leti fu krutu den Kotoigi. A Krutubangi musu teki wan bosroiti ete na ini a tori, ma Brada Brumley ben abi a frutrow taki a bosroiti dati ben o abi krakti tapu furu krutu-afersi di e hori na ini tra kondre.

Baka di den arkiman yere a moi nyunsu disi, dan Brada Lett meki bekènti taki a Hei Krutubangi fu Europa bosroiti taki den o krutu na afersi di abi fu du nanga a belasting-moni di a tirimakti fu Fransikondre wani taki Yehovah Kotoigi musu pai. A tumusi prenspari Krutubangi disi e krutu wan tu fu den afersi nomo di sma e tyari kon na en. Te nanga now, a Hei Krutubangi fu Europa luku sowan 39 afersi di abi fu du nanga Yehovah Kotoigi èn wi wini 37 fu den afersi disi. Brada Lett gi ala Kotoigi na heri grontapu a deki-ati fu tan begi Yehovah Gado fu meki den afersi disi waka bun.

Leki lasti, Richard Morlan kon taki. A brada disi na wan fu den leriman fu a Skoro gi Gemeente Owruman. A ben fruteri fayafaya fa sani e waka nanga a skoro èn fa den brada di kon na a skoro disi de nanga tangi gi a leri di den kisi.

 Tra lezing di den brada fu a Tiri Skin hori

Guy Pierce fu a Tiri Skin ben hori wan moi lezing di ben abi fu du nanga a yaritekst fu 2011: „Suku kibri na a nen fu Yehovah” (Sef. 3:12). A taki dati aladi a ten disi na wan moi ten gi a pipel fu Yehovah, toku a de wan seryusu ten fu poti prakseri na sani di e pasa. Aladi a bigi dei fu Yehovah de krosibei, toku sma e tan suku kibri na falsi bribi, na politiek organisâsi, na ini gudu, èn na tra sortu sani. Son sma e meki prisiri nomo fu di den no wani poti prakseri na den broko-ede fu a libi disi. Fu man feni kibri trutru, dan wi musu kari a nen fu Yehovah. Dati wani taki dati wi musu kon sabi a Sma di abi a nen dati, wi musu kon abi bigi lespeki gi en, wi musu frutrow na en tapu, èn wi musu lobi en nanga wi heri ati.

Baka dati, David Splane fu a Tiri Skin hori wan seryusu lezing di e poti sma na prakseri-broki. A lezing dati ben nen: „Yu e rostu leki Gado?” A taki dati a rostu di Gado e rostu no wani taki dati Gado no e wroko, fu di Yehovah nanga en Manpikin „tan wroko” na a ten fu na agersi dei fu rostu. Den du dati fu man meki den sani di Gado abi na prakseri gi grontapu, kon tru (Yoh. 5:17). Ma fa wi kan rostu leki Gado? We, wi musu kakafutu gi sondu èn wi musu tapu fu bosroiti gi wisrefi san bun èn san no bun. Ma dati a no ala. Wi musu abi bribi, wi musu hori a wani fu Gado na prakseri èn wi musu du ala san wi man fu horibaka gi a wani dati. Son leisi a no sa makriki srefisrefi fu du dati, ma wi musu gi yesi na rai di wi e kisi fu na organisâsi fu Yehovah èn wi musu teki sosrefi a tiri di wi e kisi fu en. Brada Splane ben gi den arkiman deki-ati fu du ala san den man fu kan rostu leki Gado.

Anthony Morris fu a Tiri Skin hori a lasti lezing fu a programa. A lezing dati ben nen: „San wi e wakti?” Neleki wan papa di lobi den pikin fu en, na so Brada Morris gi den arkiman deki-ati èn a memre den na den profeititori di musu kon tru ete. Dati na sani di ala reti-ati futuboi fu Gado e fruwakti fayafaya. Wan tu fu den sani dati, na a bari di sma o bari taki „Freide de èn ala sani e waka bun!”, èn a pori di falsi bribi o kisi (1 Tes. 5:2, 3; Openb. 17:15-17). Brada Morris ben warskow den arkiman taki den no musu taki: „Disi musu fu de Armagedon”, te nyunsu e taki fu sani di e pasa, ma di no de wan kontru fu den profeititori disi. A gi den arkiman a rai fu wakti Gado nanga prisiri èn nanga pasensi, soleki fa Mika 7:7 e taki. Ma na a srefi ten a gi den alamala deki-ati fu kon krosibei na Yehovah makandra nanga a Tiri Skin, neleki fa srudati e bondru kon na wán te den e hari go feti. A ben taki: „Abi deki-ati èn no frede, un sma di e wakti Yehovah nanga pasensi.”​—Ps. 31:24.

Na a kaba den brada meki wan tu moi sani bekènti di wi no sa frigiti noiti. Geoffrey Jackson fu a Tiri Skin meki bekènti taki den o tyari wan Ingrisitongo Waktitoren nanga Studie-artikel kon na doro di moro makriki fu frustan. Den wani luku efu disi kan yepi sma di no man leisi Ingrisitongo so bun. Baka dati, Stephen Lett meki bekènti taki a Tiri Skin o seti sani, so taki lepi brada e go luku distrikt-opziener na ini Amerkankondre nanga den wefi fu den fu gi den deki-ati. Baka dati a fruteri taki now a Dinariskoro nen a Bijbelskoro gi brada di no trow. Syatu baka dati a meki bekènti tu taki wan nyun skoro o opo di nen Bijbelskoro gi Kresten trowpaar. A skoro disi o gi trowpaar moro leri, so taki na organisâsi fu Yehovah kan gebroiki den moro bun. Brada Lett meki bekènti tu taki now a Skoro gi den kring-opziener nanga distrikt-opziener èn den wefi fu den, èn a Skoro gi brada fu Bijkantoro Komte èn den wefi fu den, o hori tu leisi wan yari na Patterson. Sani o seti tu so taki den wan di go kaba na a skoro, kan go ete wan leisi.

Na a kaba fu a programa, Brada John E. Barr di abi 97 yari èn di de wan memre fu a Tiri Skin langa ten kaba, begi nanga sakafasi èn nanga en heri ati. A no de fu taki dati a begi dati naki na ati fu den arkiman. * Na a kaba fu a konmakandra, ala sma ben e firi taki disi ben de wan dei di den noiti no sa frigiti.

[Futuwortu]

[Prenspari pisi na tapu bladzijde 19]

Ala den arkiman ben lobi den interview di ben yepi den fu kon sabi den brada nanga sisa moro bun

[Prenspari pisi na tapu bladzijde 20]

Yehovah blesi a preikiwroko na ini Etiopia