Yu e memre disi ete?

Yu prisiri fu leisi den Waktitoren di kon na doro no so langa pasa? We, luku efu yu kan gi piki tapu den aksi di e kon now:

• San na dri sani di kan yepi wi fu no de sma di lobi fu bedrigi trawan?

Dati na: (1) Kon abi frede gi Gado (1 Petr. 3:12). (2) Wi musu meki Bijbel tiri a konsensi fu wi. (3) Wi musu de tevrede nanga san wi abi.​—15/4, bladzijde 6, 7.

• Te wi dini Gado na wan seryusu fasi, dan dati no wani taki dati ala ten wi musu span wi fesi, noso taki wi no mag abi prisiriten. Fa wi du sabi dati?

Wi kan poti prakseri na a eksempre fu Yesus. A ben lobi fu nyan makandra nanga sma, aladi den ben abi prisiriten. Wi sabi taki a no ben seryusu tumusi. Tra sma, sosrefi pikin-nengre, ben lobi fu go na en, èn den ben e firi switi te den ben de makandra nanga en.​—15/4, bladzijde 10.

• San wan trowpaar kan du efu den si taki a matifasi fu den kon swaki, baka di den kisi pikin?

Den musu sori taki den lobi makandra ete. A masra musu du muiti fu trowstu en wefi te a e broko en ede nanga wan sani. Ala tu musu meki muiti fu taki bun nanga makandra fu den firi fu den èn fu den sani di den abi fanowdu.​—1/5, bladzijde 12, 13.

• San na olèifbon na ini Romesma kapitel 11 e prenki?

Na olèifbon abi fu du nanga na Israel fu Gado, noso den tra bakapikin fu Abraham. Yehovah de leki a rutu èn Yesus de leki a bonskin fu na agersi olèifbon disi. Di furu fu den trutru Dyu no ben wani poti bribi na ini Yesus, dan sma di no ben de Dyu èn di ben tron bribiman, ben kan fasi na ini a bonskin. Na so a nomru 144.000 ben kan doro. Disi na a nomru fu den tra bakapikin fu Abraham.​—15/5, bladzijde 22-25.

• Sortu spesrutu bun nyunsu wi kan fruteri den pôtisma?

A bun nyunsu na taki Gado poti Yesus leki Kownu. Yesus na a wan-enkri Tiriman di kan tyari wan kaba kon na pôtifasi. Fu san ede? Fu di a o tiri a heri libisma famiri èn a abi furu makti, a abi sari-ati nanga den pôtiwan, èn a kan tyari wan kaba kon na a sani di e tyari pôtifasi kon. A sani dati na a sondu firi di wi abi fu denki wisrefi nomo.​—1/6, bladzijde 7.

• San Yesus ben abi na prakseri di a taigi Kayafas: „Yusrefi taki so”?​—Mat. 26:63, 64.

Soleki fa a sori, dan nofo tron den Dyu ben gwenti taki „yusrefi taki so” fu sori taki wan sani di wan sma taki, de tru. Granpriester Kayafas ben aksi Yesus efu en na a Krestes, a Manpikin fu Gado. Di Yesus piki en: „Yusrefi taki so”, dan a sori Kayafas taki dati tru.​—1/6, bladzijde 18.

• A de so taki den pikin di a volmaakti man Yesus ben kan abi, ben de wan pisi fu a lusu-paiman?

Nôno. Aladi Yesus ben kan meki milyardmilyard bakapikin di no ben o abi sondu, toku den bakapikin dati di a ben kan meki no ben de wan pisi fu a lusu-paiman. Soso a volmaakti libi fu Yesus ben e kruderi nanga a di fu Adam (1 Tim. 2:6).​—15/6, bladzijde 13.

• Fa Kresten kan gi yesi na a warskow di den e kisi na Tori fu den Apostel 20:29, 30, fu luku bun nanga falsi leriman?

Den no e teki falsi leriman na ini den oso èn den no e taki den odi tu (Rom. 16:17; 2 Yoh. 9-11). Kresten no e poti prakseri na den buku fu sma di fadon komoto na bribi, den no e luku telefisi programa di abi fu du nanga den sma dati, èn den no e go tapu website di e taki fu den leri fu den.​—15/7, bladzijde 15, 16.

• Suma musu gi pikin leri fu Gado?

A papa nanga a mama musu du a sani disi, soleki fa Bijbel e taki (Odo 1:8; Ef. 6:4). Ondrosuku sori taki te a papa nanga a mama e gi den pikin leri, dan dati abi furu krakti tapu den pikin fu den.​—1/8, bladzijde 6, 7.