Mi heri libi langa mi kisi krakti fu di mi gwenti leisi Bijbel

Soleki fa Marceau Leroy fruteri

„NA A BIGIN Gado meki hemel nanga grontapu”, na so mi bigin leisi kibrikibri na ini mi kamra. Fu san ede mi ben e leisi kibrikibri? Mi ben sabi taki mi papa no ben o feni en bun taki mi e leisi Bijbel, fu di a no ben e bribi srefisrefi na ini Gado.

Noiti mi ben leisi Bijbel ete èn den fosi wortu fu Genesis seki mi trutru. Mi prakseri: ’Luku a piki tapu mi aksi leti dya! Ala ten mi ben e fruwondru fu a fasi fa ala den sani na grontapu èn na hemel orga so bun.’ A tori disi ben hari mi prakseri so te, taki mi leisi Bijbel fu aiti yuru na neti teleki fo yuru mamanten. Na so mi teki a gwenti fu leisi Gado Wortu mi heri libi langa. Meki mi fruteri fa a gwenti fu leisi Bijbel gi mi krakti mi heri libi langa.

„Yu o abi fu leisi en ibri dei”

Mi gebore na ini 1926 na noordsei fu Fransikondre na ini a dorpu Vermelles, pe sma ben e wroko na ini mijn fu puru wan sortu ston di den ben e gebroiki leki krofaya. Na ini a di fu Tu Grontapufeti a sortu ston disi ben prenspari so te, taki den sma di ben e wroko na ini den mijn no ben abi fu du srudatiwroko. Dati meki mi srefi no ben abi fu du srudatiwroko tu. Ma fu di mi ben wani wan moro bun libi, meki mi go studeri sani di abi fu du nanga stroom èn fa a e wroko. Na so mi kon si taki ala den sani na grontapu èn na hemel orga bun èn den e wroko heri bun nanga makandra. Di mi ben abi 21 yari, wan mati fu mi di ben de nanga mi na ini a srefi klas, gi mi a fosi Bijbel fu mi èn a taki: „Leisi a buku disi. Yu o leri furu.” Di mi kaba leisi en mi ben de seiker taki Bijbel na Gado Wortu, wan buku pe Gado e tyari sani kon na krin gi libisma.

Mi ben prakseri taki den birtisma fu mi ben o lobi fu leisi Bijbel tu, sobun mi suku ete aiti Bijbel gi den. Mi no ben fruwakti taki den ben o spotu èn gens mi so di mi tyari den gi den. Son famiriman di ben e bribi ala sortu sani, warskow mi: „Efu yu bigin leisi a buku disi, yu o abi fu leisi en ibri dei!” A tru taki mi leisi en, ma noiti a hati mi taki mi du dati. A kon tron wan gwenti gi mi, mi heri libi langa.

Di son birtisma si taki mi lobi Bijbel, den gi mi wan tu buku fu Yehovah Kotoigi di den ben kisi. Wan fu den ben de One World, One Government * („Wán grontapu, wán tirimakti”. Na tapu a bladzijde disi a de na ini Fransitongo.) A buku disi nanga trawan ben e sori fu san ede Bijbel e taki dati Gado Kownukondre na a wan-enkri howpu gi libisma (Mat. 6:10). Mi ben de fayafaya fu fruteri sma fu a howpu disi.

 Wan fu den fosi sma di teki wan Bijbel fu mi ben de mi mati Noël di mi sabi sensi di mi ben pikin. Fu di a ben de wan fayafaya Lomsu, meki a seti sani fu wi go taki nanga wan man di ben e teki leri fu tron wan priester. Mi ben e frede, ma fu di mi leisi Bijbel, meki mi ben sabi taki Psalm 115:4-8 èn Mateyus 23:9, 10, e sori taki Gado no feni en bun te sma e gebroiki popki fu anbegi en èn a no feni en bun taki wi e gi ala sortu nen na kerki fesiman fu gi den grani. Disi gi mi deki-ati fu opo taki gi a bribi fu mi. A bakapisi ben de taki Noël teki a tru bribi èn teleki a dei fu tide a de wan fayafaya Kotoigi.

Mi ben go na mi sisa tu. En masra ben abi bonubuku èn ogri yeye ben e trobi en. Biginbigin mi ben e firi leki mi no man du nowan sani, ma Bijbel tekst soleki Hebrewsma 1:14 meki taki mi ben de seiker taki den engel fu Yehovah ben e horibaka gi mi. Di mi swagri bigin du san Bijbel taki èn di a puru ala bonu sani di a ben abi, a kon fri fu den ogri yeye. En nanga mi sisa tron fayafaya Kotoigi tu.

Na ini 1947 Arthur Emiot, wan Kotoigi fu Amerkankondre, kon na mi oso. Mi ben breiti srefisrefi èn mi aksi en pe den Kotoigi e kon makandra. A taigi mi taki wan grupu ben de na Liévin, sowan 10 kilometer moro fara. Fu di a ten dati ben de wan muilek ten èn srefi baisigri no ben de fu feni, meki mi ben e waka go na den konmakandra. Mi du dati wan tu mun langa. Na a ten dati a ben de aiti yari kaba taki Yehovah Kotoigi no ben abi primisi fu du a wroko fu den na Fransikondre. Na ini a heri kondre soso 2380 Kotoigi ben de èn furu fu den ben de sma fu Polen di kon tan na ini Fransikondre. Tapu 1 september 1947, wi kisi primisi baka fu du wi wroko na Fransikondre. Den seti wan bijkantoro baka na ini Parijs na a presi Villa Guibert. Fu di nowan pionier ben de na ini Fransikondre, meki na Informant (now a nen Wi Kownukondre diniwroko) fu december 1947 aksi suma wani tron wan gewoon pionier di ben o du a preikiwroko 150 yuru ibri mun. (Na ini 1949, den saka en go na 100 yuru ibri mun.) Fu di mi ben agri trutru nanga den wortu fu Yesus na Yohanes 17:17, pe skrifi taki „[Gado] wortu e taki san tru”, meki mi teki dopu na ini 1948 èn na ini december 1949 mi tron wan pionier.

Fu strafu-oso mi go baka na Dunkerque

A fosi presi pe den seni mi go leki pionier ben de a foto Agen na zuidsei fu Fransikondre, ma mi no tan langa drape. Fu di mi no ben e wroko na ini den mijn moro, meki den kari mi fu du srudatiwroko. Di mi no ben wani go na ini a legre, den poti mi na strafu-oso. Den no ben wani taki mi abi wan Bijbel, ma toku mi ben man feni wan tu bladzijde fu a buku Psalm. Mi kisi furu deki-ati di mi ben e leisi den. Baka di den puru mi na strafu-oso, mi ben musu teki wan bosroiti: mi musu go doro nanga mi furuten diniwroko, noso mi musu tapu nanga dati fu go suku wan wroko fu bai wan oso èn seti mi libi? Ete wan leisi den sani di mi leisi na ini Bijbel yepi mi. Mi prakseri den wortu fu Paulus na Filipisma 4:11-13: „Mi man du ala sani nanga yepi fu a sma di e gi mi krakti.” Ne mi teki a bosroiti fu go doro nanga a pionierwroko. Na ini 1950 den seni mi go baka na Dunkerque, a foto pe mi ben preiki fosi.

Di mi doro drape, mi no ben abi nowan sani. A di fu Tu Grontapufeti ben pori a foto srefisrefi èn a ben muilek fu feni wan tanpresi. Mi bosroiti fu go luku wan famiri di mi ben gwenti go luku fosi èn na uma ben breiti srefisrefi fu si mi. A taki: „Meneer Leroy, den lusu yu! Mi masra taki dati efu moro man leki yu ben de, noiti wan feti ben o de.” Den ben abi wan oso di den ben e yuru gi sma èn den meki mi tan drape teleki a pisi ten fu a yari pe furu trakondre sma ben o kon nyan fakansi drape. A srefi dei dati Evans Emiot, a brada fu Arthur Emiot, taigi mi taki a abi wan wroko gi mi. * A ben e vertaal gi den trakondre sma di ben e kon na a lanpe drape èn a ben e suku wan waktiman gi wan sipi. Sobun, a tyari mi go miti wan fu den basi fu a sipi. Na strafu-oso mi ben kon mangri srefisrefi èn di Evans fruteri a basi fu san ede mi mangri so, a taigi mi taki mi ben kan go teki nyanyan  na ini na ijskasi. Na so a kon de taki mi kisi sribipresi, wroko, nanga nyanyan na a srefi dei dati! A sani disi tranga a bribi fu mi, fu di mi srefi si taki den wortu fu Yesus na Mateyus 6:25-33 de so trutru.

Di a pisi ten doro taki furu trakondre sma ben o kon nyan fakansi drape, dan mi nanga mi pionier patna Simon Apolinarski ben abi fu feni wan tra tanpe. Ma wi no ben wani libi Dunkerque pe wi ben e pionier. Wan man taigi wi taki wi ben kan tan na wan presi fu en pe asi ben e tan fosi èn drape wi ben e sribi na tapu matrasi di abi drei grasi na ini. Wi ben e preiki ibri dei. Wi preiki gi a man di ben abi a presi pe wi ben e tan èn bakaten a tron wan fu den furu sma di teki a tru bribi. A no teki langa fosi sma poti wan pisi na ini koranti fu warskow den sma fu Dunkerque gi „Yehovah Kotoigi di e panya a bribi fu den na ini a heri kontren”. Ma na soso mi, Simon nanga wan tu preikiman ben de Kotoigi drape! Te problema ben e miti wi, wi ben e kisi deki-ati te wi ben e prakseri fu a howpu di wi leki Kresten abi èn a fasi fa Yehovah sorgu wi. Na ini 1952, di den seni mi go na wan tra presi fu preiki, sowan 30 preikiman ben e preiki doronomo na Dunkerque.

Mi kisi krakti fu teki nyun frantwortu

Baka di mi tan syatu na a foto Amiens, mi ben musu go leki spesrutu pionier na Boulogne-Billancourt, wan foto na Parijs. Mi ben abi furu Bijbelstudie èn bakaten wan tu fu den bigin du furuten diniwroko nanga zendelingwroko. Wan yongu man di nen Guy Mabilat ben teki a tru bribi èn bakaten a tron kring-opziener nanga distrikt-opziener. A disiten Bethel na Louviers di de pikinso moro fara fu Parijs, ben abi wan presi fanowdu fu druk buku, èn a brada disi ben e teki fesi na a bow-wroko dati. Fu di mi ben gwenti taki fu Bijbel na ini a preikiwroko, meki Gado Wortu kon abi moro krakti na mi tapu. Na so mi ben kisi moro prisiri èn mi ben kan gi sma Bijbel leri moro bun.

Ne wantronso na ini 1953, mi kisi a frantwortu fu go leki kring-opziener na Alsace-Lorraine. Na ini a pisi ten fu 1871 te go miti 1945, Doisrikondre ben teki a kontren disi abra tu leisi. Sobun, mi ben abi fu go leri Doisritongo. Di mi bigin nanga a kringwroko, furu wagi, telefisi, nanga skrifimasyin no ben de na ini a kontren dati èn nowan radio noso computer ben de. Ma toku mi no ben e mankeri noti èn mi no ben e fruferi sondro den sani disi. Fu taki en leti, a ben de wan prisiri ten gi mi. Fu di mi ben teki a Bijbel rai fu hori mi ’ai krin’ èn fu di so furu sani no ben de fu puru mi prakseri, meki a ben de moro makriki gi mi fu poti prakseri na a diniwroko gi Yehovah.​—Mat. 6:19-22.

Wan kongres di mi no sa frigiti noiti na a „Kownukondre Wini” kongres di ben hori na ini 1955 na Parijs. Na drape mi miti Irène Kolanski di tron mi wefi bakaten. A ben bigin  nanga a furuten diniwroko wán yari fosi mi. En papa nanga mama ben de fu Polen èn den ben de fayafaya Kotoigi langa ten kaba. Na ini Fransikondre Adolf Weber ben go na den. A brada disi ben e krin a dyari fu Brada Russell èn a ben kon na Europa fu preiki a bun nyunsu. Mi nanga Irène trow na ini 1956, dan a kon nanga mi na ini a kringwroko. Mi breiti trutru taki a horibaka gi mi ala den yari disi!

Baka tu yari wan tra prisiri sani pasa nanga mi. Den meki mi tron distrikt-opziener. Ma fu di furu brada no ben de fu du a kringwroko, meki mi ben musu go ete leki kring-opziener na son gemeente. Na a ten dati mi ben abi furu fu du! Boiti taki mi ben musu preiki 100 yuru ibri mun, mi ben musu hori lezing ibri wiki, mi ben musu go na dri bukustudie, mi ben musu luku son raportu èn misrefi ben musu skrifi raportu tu. Fa mi ben o feni ten fu leisi Gado Wortu now? We, a fasi fa mi ben e si en, dan na wán sani nomo mi ben kan du: Mi koti den bladzijde puru fu wan owru Bijbel, dan mi ben e hori den na mi. Ala leisi te mi ben musu wakti wan sma mi ben e teki den bladzijde fu leisi wan pisi. Den syatu pisi ten dati ben tranga mi bribi èn mi bosroiti fu tan du mi wroko.

Na ini 1967, mi nanga Irène kisi a kari fu go tan na Bethel na Boulogne-Billancourt. Mi bigin wroko na a Dienst Afdeling èn teleki now, baka 40 yari mi abi a grani fu wroko drape ete. Wan sani di mi lobi fu a wroko fu mi, na fu gi piki tapu den Bijbel aksi di sma e seni kon. A e switi gi mi fu suku piki na ini Gado Wortu, so taki mi kan „opo taki gi a bun nyunsu”! (Fil. 1:7) Mi lobi en tu fu hori a takimakandra fu a deitekst na Bethel te mamanten, fosi wi go nyan. Na ini 1976 mi kisi a grani fu tron wan memre fu a Bijkantoro Komte na ini Fransikondre.

A moro bun fasi fu libi

Son leisi mi ben abi en muilek na ini a libi, ma a moro muilek ten fu mi libi na now. Fu di mi nanga Irène kon owru èn wi no de so gosontu moro, meki wi no man du so furu moro. Ma fu di wi e leisi èn studeri Gado Wortu makandra, meki wi abi howpu te now ete. Wi lobi fu teki bus go na a kontren di wi gemeente kisi, fu fruteri trawan fu a howpu fu wi. Makandra wi e du furuten diniwroko moro leki 120 yari kaba. Nanga wi heri ati wi e gi deki-ati na ala sma di wani libi wan prisiri èn bun libi, fu du san wi du. Di Kownu David skrifi den wortu na Psalm 37:25, a ben „kon owru” kaba èn neleki en mi srefi „no si noiti taki Gado libi wan reti-ati sma en wawan”.

Mi heri libi langa Yehovah gi mi krakti nanga yepi fu en Wortu. Moro leki 60 yari pasa den famiriman fu mi taki dati a leisi di mi e leisi Bijbel ben o tan wan gwenti gi mi, mi heri libi langa. We, den ben abi leti. A de wan aladei gwenti fu mi èn a no hati mi noiti taki mi du disi!

[Futuwortu]

[Prenki na tapu bladzijde 5]

Mi nanga Simon

[Prenki na tapu bladzijde 5]

Wan Bijbel leki a fosiwan di mi ben kisi

[Prenki na tapu bladzijde 5]

Di mi ben de distrikt-opziener

[Prenki na tapu bladzijde 6]

A trowdei fu wi

[Prenki na tapu bladzijde 6]

Mi nanga Irène lobi fu leisi èn studeri Gado Wortu