Yehovah sabi yu leki en mati?
Yehovah sabi yu leki en mati?
„Yehovah sabi den sma di de fu en.”—2 TIM. 2:19.
1, 2. (a) Nanga san Yesus ben broko en ede? (b) Na sortu aksi wi musu poti prakseri?
WAN dei wan Fariseiman go na Yesus, dan a aksi en: „San na a moro bigi komando na ini a Wèt?” Yesus taigi en: „Yu musu lobi Yehovah yu Gado nanga yu heri ati, nanga yu heri libi, èn nanga yu heri frustan” (Mat. 22:35-37). A fasi fa Yesus ben e libi sori taki a lobi en hemel Tata trutru. A heri fasi fa a ben e libi sori tu taki a ben e broko en ede trutru nanga san Yehovah ben e denki fu en. Fu dati ede, syatu fosi Yesus dede, a taki dati Gado sabi en leki wan sma di e gi yesi na den wèt fu en ala ten. Na so Yesus meki taki Yehovah tan lobi en.—Yoh. 15:10.
2 Furu sma na ini a ten disi e taki dati den lobi Gado. Wi srefi e taki dati tu, a no so? Ma wi musu prakseri fu den aksi disi: ’Gado sabi mi leki en mati? San Yehovah e denki fu mi? A sabi mi leki wan sma di de fu en?’ (2 Tim. 2:19) A de wan bigi grani fu de wan mati fu a Moro Hei Tiriman fu hemel nanga grontapu!
3. Fu san ede son sma no wani bribi taki den kan de fu Yehovah? San o yepi wi fu no abi a denki disi?
3 Ma son sma di lobi Yehovah trutru, no wani bribi taki den kan de wan mati fu en. Sonwan fu den e firi leki den no warti noti èn dati meki den no man bribi taki den de fu Yehovah. A moi fu sabi taki Gado no e si wi na a fasi disi (1 Sam. 16:7). Na apostel Paulus taigi den tra Kresten: „Efu wan sma lobi Gado, dan Gado sabi a sma dati” (1 Kor. 8:3). Lobi gi Gado prenspari trutru efu yu wani de wan sma di a sabi leki en mati. Prakseri disi: Fu san ede yu e leisi a tijdschrift disi? Fu san ede yu e du muiti fu dini Yehovah nanga yu heri ati, nanga yu heri libi, nanga yu heri frustan èn nanga ala yu krakti? Efu yu gi yusrefi abra na Gado èn yu dopu, dan san meki taki yu du dati? Bijbel e sori taki Yehovah, a sma di e ondrosuku sma ati, e hari den sma di a e si leki gudu, kon na en. (Leisi Hagai 2:7; Yohanes 6:44.) Fu dati ede yu kan de seiker taki yu e dini Yehovah fu di na en hari yu kon. Noiti a o gowe libi den sma di a hari kon, solanga den tai hori na en. Gado e si den leki gudu èn a lobi den trutru.—Ps. 94:14.
4. Fu san ede wi musu si en leki wan bigi grani ala ten fu de wan mati fu Gado?
4 Te Yehovah hari wi kon, wi musu sorgu taki a tan lobi wi. (Leisi Yudas 20, 21.) Hori na prakseri taki Bijbel e sori taki wan sma kan gowe libi Gado safrisafri noso a kan hari ensrefi puru fu en (Hebr. 2:1; 3:12, 13). Fu eksempre, fosi Paulus taki san skrifi na 2 Timoteyus 2:19, a ben taki fu Himeneyus nanga Fileitus. Den tu man disi ben de fu Yehovah, ma bakaten den drai baka gi a tru bribi (2 Tim. 2:16-18). Memre tu taki na ini den gemeente na Galasia son sma di Gado ben sabi leki mati, no tan na ini a leti fu a tru bribi (Gal. 4:9). Noiti wi musu frigiti taki a de wan bigi grani fu de wan mati fu Gado.
5. (a) Sortu fasi noso maniri Gado lobi? (b) San wi o luku na ini na artikel disi?
5 Wan tu fasi noso maniri de di wi musu abi efu wi wani taki Yehovah lobi wi (Ps. 15:1-5; 1 Petr. 3:4). Gado ben sabi son sma leki en mati, fu di den ben abi bribi nanga sakafasi. Meki wi go luku a libi fu tu man di Yehovah ben lobi, fu di den ben abi den fasi disi. Boiti dati wi o luku a libi fu wan man di ben denki taki Gado sabi en leki mati, ma bakaten a kon si taki Yehovah drai baka gi en fu di a ben abi heimemre. Wi kan leri wan tu prenspari sani fu a libi fu den man disi.
A tata fu ala sma di e bribi
6. (a) San Abraham du fu di a ben e bribi na ini den pramisi fu Yehovah? (b) Fa Yehovah ben sabi Abraham?
6 Abraham ben de wan man di ben „poti bribi na ini Yehovah”. Fu taki en leti, Bijbel e kari en a „tata fu ala sma di e bribi” (Gen. 15:6; Rom. 4:11). Fu di Abraham ben abi bribi, a gowe libi en oso, en mati èn a switi libi fu en fu go na wan farawe kondre (Gen. 12:1-4; Hebr. 11:8-10). Furu yari baka dati Abraham ben abi wan tranga bribi ete. Wi kan si disi fu di a ben de klariklari fu gi yesi di Yehovah taigi en fu gi en manpikin Isak leki ofrandi (Hebr. 11:17-19). Fu di Abraham sori taki a ben e bribi na ini den pramisi fu Yehovah, meki Yehovah si en leki wan spesrutu sma. A ben sabi en trutru. (Leisi Genesis 18:19.) Yehovah no ben sabi en nomo leki iniwan sma di de na libi, ma a ben sabi en leki en mati.—Yak. 2:22, 23.
7. San Abraham ben sabi fu den pramisi fu Yehovah èn fa a sori taki a ben bribi disi?
7 Luku taki Abraham dede, fosi a kisi a kondre di Gado ben pramisi en. A no si tu fa den bakapikin fu en ben kon furu „leki den aisanti na sesyoro” (Gen. 22:17, 18). Aladi den sani disi no pasa di Abraham ben de na libi ete, toku a tan abi wan tranga bribi na ini Yehovah. A ben sabi taki efu Gado taki wan sani yu kan de seiker taki a o du en. Iya, a heri fasi fa a ben e libi ben e sori taki a ben bribi den sani disi. (Leisi Hebrewsma 11:13.) Yehovah sabi wi leki sma di abi bribi leki Abraham?
Sori bribi fu di yu e wakti Yehovah
8. Sortu sani son sma wani trutru?
8 Kande wan tu sani de di wi ben sa wani trutru, soleki fu trow, fu abi pikin, èn fu de gosontu. A no fowtu fu wani den sani disi. Ma a kan taki furu fu wi no o kisi san wi wani. Efu wi wani wan sani trutru ma wi no kan kisi en nownow, san wi o du? Den sani di wi o du o sori o tranga a bribi fu wi de.
9, 10. (a) San son sma du fu kisi san den wani? (b) Fa yu e si den pramisi fu Gado?
9 A ben o de wan don sani efu wi du sani di Gado no feni bun, soso fu di wi wani kisi san wi wani. Disi kan pori a matifasi di wi abi nanga Yehovah. Fu eksempre, te son sma siki den e suku ala sortu dresi noso tra fasi fu kon betre, awinsi na sani di Yehovah no feni bun. Trawan go teki wan wroko di e meki taki den no de so furu nanga den osofamiri èn den no e go na den gemeente konmakandra. Tra sma e hori nanga wan sma di no e dini Yehovah. Efu wan Kresten e du wan fu den sani disi, yu kan taki dati a e du muiti trutru, so taki Yehovah sabi en leki en mati? San Yehovah ben o denki efu Abraham no ben wani wakti moro teleki Gado du san a pramisi? Fa a ben o de efu Abraham du sani soleki fa ensrefi wani? Fa a ben o de efu a ben o tan na wán presi nomo èn suku biginen gi ensrefi na presi fu wakti Yehovah? (Luku Genesis 11:4.) Yehovah ben o si en leki en mati ete?
10 Sortu sani yu wani? Yu bribi tranga nofo fu wakti teleki Yehovah gi yu dati? Yehovah pramisi fu „gi ala libisani san den e angri fu kisi” (Ps. 145:16). Kande wi feni taki wi musu wakti tumusi langa fu si fa den pramisi fu Gado o kon tru. Yehovah e warderi en taki wi e du muiti fu libi na wan fasi di e sori taki wi abi bribi neleki Abraham. Efu wi e libi na a fasi disi, wi o kisi furu blesi.—Hebr. 11:6.
Wan man di ben abi sakafasi èn wan man di ben abi heimemre
11. Sortu grani Korak ben abi èn san disi e sori fu a fasi fa a ben si Gado?
11 Meki wi luku na eksempre fu Moses nanga Korak. Moses ben sori lespeki gi den seti nanga den bosroiti fu Yehovah, ma Korak ben de heri tra fasi. Den sani di den tu man disi du meki taki Yehovah feni a wan bun èn a trawan a no feni bun. Korak ben de wan bakapikin fu Keihat fu a lo fu Leifi. A ben abi furu grani. Kande a si fa Gado frulusu den Israelsma èn tyari den pasa na ini a Redi Se. Kande a ben horibaka gi Yehovah di Yehovah strafu den trangayesi Israelsma na Sinai-bergi. A kan tu taki a ben tyari a santa kisi fu a frubontu (Eks. 32:26-29; Num. 3:30, 31). Soleki fa a sori, dan a ben gi yesi na Yehovah furu yari langa èn furu Israelsma ben e lespeki en.
12. San Korak du fu di a ben abi heimemre, soleki fa yu e si na tapu a prenki na bladzijde 28?
12 Ma di den ben de na pasi e go na a Pramisi Kondre, Korak bigin denki taki wan sani no bun na a fasi fa Yehovah ben e tiri a pipel. Bakaten 250 fesiman fu a pipel teki a sei fu Korak tu di a ben wani tyari kenki kon. Korak nanga den fesiman ben de seiker taki Yehovah ben sabi den leki mati. Den taigi Moses: „A sani fu unu musu kaba now! A heri pipel santa èn Yehovah de na den mindri” (Num. 16:1-3). Dati na wan drei-ai den ben abi! Den ben abi heimemre, fu di den ben denki taki den man du sani moro bun. Moses taigi den: „Yehovah sa sori suma na fu en.” (Leisi Numeri 16:5.) Na a kaba fu a tra dei Korak nanga ala den sma di teki en sei dede.—Num. 16:31-35.
13, 14. Fa Moses sori taki a ben abi sakafasi?
13 Tra fasi leki Korak, Moses ben de „a moro safri-ati sma fu ala libisma di ben de na grontapu” (Num. 12:3). Ala ten a ben e du san Yehovah taigi en èn disi e sori taki a ben abi safri-ati nanga sakafasi trutru (Eks. 7:6; 40:16). Nowan sani e sori taki Moses no ben e agri nanga a fasi fa Yehovah ben e du sani. Nowan sani e sori tu taki en ati ben e bron te Yehovah ben taigi en fu du wan sani. Fu eksempre, Yehovah ben taigi en finifini fa a tabernakel ben musu meki. A ben taigi en a kloru fu den titei di den ben musu gebroiki èn omeni olo ben musu de na ini den tentikrosi (Eks. 26:1-6). Den sma di e teki fesi na ini Gado en organisâsi na sondu libisma. Efu wan fu den taigi yu finifini fa yu musu du wan sani, dan a kan taki yu no lobi dati. Ma Yehovah a no libisma. En na a moro bun fesiman. A lobi fu gi en futuboi wroko fu du èn a sabi taki den o du en bun. Te a taigi wi finifini fa fu du wan sani, a sabi fu san ede a e du dati. Luku taki Moses ati no bron nanga Yehovah. A no ben denki taki Yehovah ben e soso en fu di a taigi en finifini fa a musu du den sani. A no ben denki tu taki Yehovah no ben wani libi en meki a du sani na a fasi fa en ben wani. Na presi fu dati, Moses sorgu taki den wrokoman du ala san Gado taigi en èn taki den „du leti so” (Eks. 39:32). Dati na trutru sakafasi! Moses ben frustan taki a wroko ben de fu Yehovah èn taki en ben de soso wan sma di Yehovah gebroiki fu du a wroko.
14 A sakafasi fu Moses ben de fu si srefi te sani ben pasa di ben meki en firi brokosaka. Wan leisi di a pipel ben e krutukrutu, Moses lasi ensrefi èn a no gi Gado glori. Fu dati ede Yehovah taigi Moses taki a no ben o tyari a pipel go na ini a Pramisi Kondre (Num. 20:2-12). Den Israelsma ben lobi fu krutu, èn Moses nanga en brada Aron ben teki dati furu yari langa. Ma a wán leisi dati di a lasi ensrefi, meki taki Moses no si san a ben fruwakti bun langa kaba! San Moses du? A no de fu taki dati a ben firi brokosaka, ma toku a sori sakafasi èn a gi yesi na a bosroiti fu Yehovah. A ben sabi taki Yehovah na wan reti-ati Gado di no e du kruktudu (Deut. 3:25-27; 32:4). Te yu e prakseri Moses, yu no feni taki a ben de wan sma di Yehovah ben sabi leki en mati?—Leisi Eksodes 33:12, 13.
Wi musu abi sakafasi fu man gi yesi na Yehovah
15. San wi kan leri fu Korak di ben abi heimemre?
15 Yehovah o feni wi bun soso te wi e sori lespeki tu gi den wan di Yehovah poti fu teki fesi na ini a gemeente èn te wi e gi yesi na den. Te den brada disi teki wan bosroiti noso te den kenki a fasi fa wi e du sani na ini a gemeente, dan san wi e du? Korak nanga den sma di teki en sei ben drai baka gi Gado, fu di den ben denki taki den ben man du sani moro bun, fu di den ben abi heimemre, èn fu di den no ben abi bribi. Te Korak ben e luku Moses, a ben si soso wan owru man di e teki bosroiti ibri dei. A no ben si moro taki na Yehovah ben e tiri a pipel nanga yepi fu Moses èn dati meki a no ben wani gi yesi na Moses. A ben o moro bun efu Korak ben wakti Yehovah. Yehovah ben kan yepi en fu frustan sani moro bun èn Yehovah ben kan tyari kenki kon efu dati ben de fanowdu trutru. Korak ben dini Yehovah furu yari kaba, ma toku heimemre meki taki a pori a bun nen fu en te fu kaba!
16. Fa Yehovah o sabi wi efu wi abi sakafasi leki Moses?
16 A tori disi na wan seryusu warskow gi owruman nanga tra sma na ini a gemeente na ini a ten disi. Wi musu abi sakafasi fu man wakti Yehovah èn fu man gi yesi na den wan di e teki fesi na ini a gemeente. Wi e sori taki wi abi sakafasi èn safri-ati neleki Moses? Wi e si den sma di e teki fesi leki sma di Yehovah poti fu wroko gi en? Wi e gi yesi na den bosroiti di den teki? Wi e gi yesi, srefi te sani no e waka soleki fa wi wani? Efu wi e du disi, dan Yehovah o sabi wi leki en mati. Yehovah o lobi wi te wi abi sakafasi èn te wi e gi yesi.
Yehovah sabi den sma di de fu en
17, 18. San o yepi wi fu tan sma di de fu Yehovah?
17 A bun fu prakseri fu den sma di Yehovah hari kon fu de en mati. Abraham nanga Moses ben de sondusma di ben abi fowtu neleki wi. Toku Yehovah ben sabi den leki sma di de fu en. Ma a tori fu Korak e sori taki safrisafri wi kan gowe libi Yehovah, so taki a no sabi wi moro leki en mati. Ibriwan fu wi musu aksi ensrefi: ’Fa Yehovah e si mi? San mi kan leri fu den sma disi di Bijbel e taki fu den?’
18 Yehovah e si den sma di a hari kon èn di e tai hori na en leki sma di de fu en. A e gi wi furu trowstu fu sabi disi. Fu dati ede, tan du muiti fu kisi wan moro tranga bribi èn fu sori sakafasi nanga tra moi fasi di e meki taki Gado lobi yu. A de wan bigi grani fu de wan sma di Yehovah sabi leki en mati. Disi e gi wi furu prisiri now èn wi o kisi furu moi blesi na ini a ten di e kon.—Ps. 37:18.
Yu e memre disi ete?
• Sortu sma Yehovah sabi leki en mati?
• Fa yu kan abi bribi leki Abraham?
• San wi kan leri fu Korak nanga Moses?
[Aksi fu a tori disi]
[Prenki na tapu bladzijde 26]
Wi de leki Abraham di ben bribi taki Yehovah o du trutru san a pramisi?
[Prenki na tapu bladzijde 28]
Korak no ben abi sakafasi èn a no ben wani gi yesi na den sma di ben e teki fesi
[Prenki na tapu bladzijde 29]
Yehovah sabi yu leki wan sma di abi sakafasi èn di e gi yesi na den wan di e teki fesi?
