Yu kan de leki Pinehas te problema de?

A DE wan bigi grani fu dini leki gemeente owruman. Ma Gado Wortu e sori taki owruman o kisi fu du nanga problema. Ten na ten den musu ’koti krutu gi Yehovah’ te sma du sondu (2 Kron. 19:6). Noso kande wan owruman e kisi wan wroko fu du, ma neleki Moses a e firi leki a no bun nofo fu du en. Di Moses kisi wan wroko fu du, dan nanga sakafasi a aksi: „Suma na mi fu go na a kownu?”​—Eks. 3:11.

Gado e gebroiki en santa yeye fu poti owruman na wroko. Nanga yepi fu a srefi yeye dati a meki sma skrifi Bijbel pe wi kan leisi fu fesiman di du a wroko fu den bun aladi problema ben de. Pinehas ben de a manpikin fu Eleasar èn a granpikin fu Aron. Sobun, a ben o tron granpriester. Dri sani di pasa na ini en libi e sori krin taki te problema de na ini a ten disi, owruman musu abi deki-ati nanga koni èn den musu frutrow tapu Yehovah.

„Wantewante a opo”

Pinehas ben de wan yonkuman di den Israelsma seti kampu na Moab-lagipresi. Bijbel e taki: „Den du hurudu nanga den uma fu Moab. . . . A pipel ben e go nyan nanga den èn den ben e boigi gi den gado fu den uma disi” (Num. 25:1, 2). Yehovah strafu den sma di ben e du a sondu disi èn furu fu den ben e dede. Prakseri fa Pinehas ben e firi di a yere taki a pipel sondu èn taki Yehovah strafu den.

Bijbel e taki moro fara: „Ne wan man fu Israel tyari wan uma fu Midian kon na ini a kampu fu den Israelsma, leti na fesi Moses nanga den tra Israelsma. Den ben e krei ete na a mofodoro fu a konmakandra-tenti” (Num. 25:6). San Priester Pinehas ben o du? A ben yongu èn na Israelsma di du a sondu ben de wan edeman di ben e teki fesi gi a pipel na ini na anbegi fu Gado.​—Num. 25:14.

Ma Pinehas ben e frede Yehovah, a no ben e frede libisma. Di a si den tu sma, wantewante a teki wan lansri, a go na ini a tenti pe a man ben de, dan a dyuku den ala tu kiri. Fa Yehovah ben feni en taki Pinehas sori deki-ati èn taki a no draidrai fu du wan sani? Wantewante Yehovah tapu fu strafu a pipel, èn a blesi Pinehas fu di a meki wan frubontu nanga en taki en nanga den bakapikin fu en ben o de priester fu „ala ten”.​—Num. 25:7-13.

A no de fu taki dati Kresten owruman na ini ten disi no e du sma ogri. Ma neleki Pinehas, owruman musu sori deki-ati te dati de fanowdu èn den no musu draidrai fu du wan sani. Luku na eksempre fu Guilherme. A ben e dini leki owruman wan tu mun nomo, di den brada aksi en fu dini na ini wan krutu komte. A sma di ben musu kon na fesi a krutu komte ben de wan owruman di ben yepi Guilherme di a ben moro yongu. Guilherme taki: „Mi ben e firi fruferi fu du disi. Mi no ben man sribi bun te neti. Mi ben e tan prakseri san mi ben kan du, so taki den firi fu mi no tapu mi fu krutu na afersi disi soleki fa Yehovah wani. Mi begi wan tu dei èn mi suku  Bijbel rai na ini den buku fu wi.” Disi yepi en fu sori deki-ati na ini na aparti situwâsi disi, èn a ben man yepi en brada di ben sondu fu kon bun baka nanga Gado.​—1 Tim. 4:11, 12.

Efu owruman e sori deki-ati èn den no e draidrai fu du wan sani te problema de na ini a gemeente, dan den e tron eksempre gi trawan fu di den abi bribi èn den e tai hori na Gado. A no de fu taki dati tra Kresten musu sori deki-ati tu. Sobun, te den kon sabi taki wan Kresten brada noso sisa du wan seryusu sondu, dan den no musu draidrai fu meki den owruman kon sabi dati. Fu di den wani tai hori na Gado, meki den no o bumui tu nanga wan mati noso wan famiriman di puru fu a gemeente.​—1 Kor. 5:11-13.

Koni kan meki taki problema no opo kon

Den deki-ati sani di Pinehas du, a no du fu di a ben de wan yongu man di e du sani sondro fu denki. A ben koni tu èn a ben e denki bun, fosi a du wan sani. Luku san a du di a yere wan tra boskopu. A lo fu Ruben, Gad nanga na afu lo fu Manase ben meki wan altari krosibei fu Yordan-liba. Tra Israelsma ben feni taki den meki na altari fu anbegi falsi gado èn den sreka sani fu go feti nanga den.​—Yos. 22:11, 12.

San Pinehas du? Nanga koni Pinehas nanga den tra edeman fu Israel go taki a tori nanga den wan di meki na altari. Den dri lo sori den krin taki den ben meki na altari fu „dini Yehovah”. Na so den sorgu taki problema no opo kon.​—Yos. 22:13-34.

Efu wan Kresten yere taki wan tra futuboi fu Yehovah du wan sani di no bun, noso efu a yere sma e taki takru fu wan trawan, dan a de wan koni sani fu du leki Pinehas. Koni e meki taki wi no o mandi esi èn wi no o taki takru fu wi brada nanga sisa.​—Odo 19:11.

Fa koni kan yepi owruman fu du leki Pinehas? Jaime di de owruman moro leki tin yari kaba taki: „Te wan preikiman e fruteri mi fu wan problema di a abi nanga wan tra sma, dan esi-esi mi e begi Yehovah fu yepi mi fu no teki sei, ma fu gi rai fu Bijbel. Wan leisi wan sisa kon fruteri mi san wan tra brada di abi frantwortu na ini wan tra gemeente du nanga en. Fu di a brada dati ben de mi mati, meki a ben o makriki gi mi fu taki nanga en. Ma na presi fu du dati, mi nanga a sisa taki fu wan tu Bijbel gronprakseri. A agri taki ensrefi ben o go taki nanga a brada fosi (Mat. 5:23, 24). Den no meki en bun wantewante. Sobun, mi gi en deki-ati fu poti prakseri na tra Bijbel gronprakseri. A sisa bosroiti fu begi fu a tori baka èn fu pruberi fu gi a brada pardon.”

San ben de a bakapisi? Jaime taki: „Wan tu mun baka dati a sisa kon na mi. A taki dati bakaten a brada sari fu a sani di a taigi en. A brada seti sani fu wroko makandra nanga en na ini a preikiwroko, a taki na wan switi fasi nanga en èn a prèise en gi den bun fasi fu en. Na so den lusu a problema. Mi no ben o man  lusu a problema moro bun. Efu mi ben o bumui na ini a tori, dan kande sma ben o feni taki mi e teki sei.” Bijbel e gi wi a rai: „No de esi fu tyari wan sma go na krutu” (Odo 25:8). Te Kresten abi problema nanga makandra, dan owruman di abi koni e gi den deki-ati fu hori densrefi na Bijbel gronprakseri èn fu meki sani bun baka nanga makandra.

A aksi Yehovah san a musu du

Pinehas kisi a grani fu dini leki priester gi a pipel fu Gado. Soleki fa wi si kaba, a ben abi furu deki-ati nanga koni, srefi di a ben yongu. Ma a ben man lusu problema na wan bun fasi, fu di a ben e frutrow tapu Yehovah.

Luku san pasa di den sma fu a lo fu Benyamin du wan bigi ogri na a foto Gibeya. Den man fu Gibeya ben abi seks nanga wan uma fu wan man fu a lo fu Leifi teleki a dede. Fu dati ede den tra lo sreka fu go feti nanga den Benyaminsma (Krut. 20:1-11). Fosi den go feti, den begi Yehovah fu yepi den, ma tu tron den lasi a feti èn furu fu den dede (Krut. 20:14-25). Di disi pasa, a kan taki den lasi-ati. Kande den bigin prakseri taki Yehovah no ben e arki den begi fu den èn taki a no ben feni en prenspari taki den ben wani strafu den sma di ben du so wan bigi ogri.

Na ini a tori disi wi e si baka taki Pinehas, di ben de granpriester fu Israel now, ben e frutrow trutru tapu Yehovah. A aksi Yehovah na ini begi: „Wi musu go feti baka nanga den Benyaminsma, den brada fu wi, noso wi no musu go feti?” Yehovah piki a begi fu en, fu di a meki den tra Israelsma wini den Benyaminsma èn den bron a heri foto Gibeya.​—Krut. 20:27-48.

San wi e leri fu a tori disi? Son problema e tan na ini a gemeente, awinsi den owruman e meki muiti fu lusu den èn den e begi Gado fu yepi den. Efu disi e pasa, dan a bun taki owruman e memre den wortu fu Yesus: „Tan aksi [noso begi], dan unu sa kisi. Tan suku, dan unu sa feni. Tan naki na tapu a doro, dan a doro sa opo gi unu” (Luk. 11:9). Srefi efu a gersi leki Yehovah no e piki den begi fu den owruman, toku den kan de seiker taki a o lusu a problema na wan ten di ensrefi feni bun.

Fu eksempre, wan gemeente na ini Ierland ben abi wan Kownukondre zaal tranga fanowdu. Ma a lantiman fu a kontren di ben musu gi den primisi fu bow a zaal, no ben wani. Ala leisi te den brada ben sori en fa den ben wani bow a zaal na a pisi gron, a lantiman no ben agri. A ben gersi leki a wan-enkri fasi fa den ben kan kisi primisi fu bow a zaal, na fu go na a lantiman di abi a frantwortu fu a heri distrikt. Begi ben o yepi den, neleki fa a yepi Pinehas?

Wan owruman fu a gemeente fruteri: „Baka di wi begi Yehovah furu leisi, wi go na a edekantoro di e gi sma primisi fu bow oso. Sma taigi mi taki a ben o teki wan tu wiki fosi wi ben kan miti a lantiman di abi a frantwortu fu a heri distrikt. Ma toku wi miti en èn wi ben kan taki nanga en feifi miniti nomo. Baka di a si den nyun bow-papira fu a zaal, dan wantewante a gi wi primisi fu bow. Sensi a ten dati a lantiman fu a kontren pe wi ben e bow a zaal, du ala san a ben man fu yepi wi. Na ondrofenitori disi e sori wi krin taki begi e yepi.” Iya, te owruman di e frutrow tapu Yehovah e begi en nanga den heri ati, dan Yehovah e piki den begi dati.

Pinehas ben abi wan bigi frantwortu na ini Israel fu owruten. Ma a ben man lusu problema fu di a ben abi deki-ati, a ben abi koni, èn a ben e frutrow tapu Gado. Yehovah ben lobi a fasi fa Pinehas ben e sorgu bun gi a pipel fu En. Sowan 1000 yari baka dati, Yehovah meki Esra skrifi: „Fosi, Pinehas, a manpikin fu Eleasar, ben de fesiman fu den èn Yehovah ben de nanga en” (1 Kron. 9:20). Meki a de so tu taki Yehovah de nanga ala den brada di e teki fesi na mindri a pipel fu Gado na ini a ten disi. Meki a de tu nanga ala Kresten di e dini en nanga den heri ati.