A gi mi furu prisiri fu dini Yehovah

Soleki fa Fred Rusk fruteri

Frukufruku kaba na ini mi libi mi kon si taki den wortu di David skrifi na Psalm 27:10 tru. David ben taki: „Awinsi mi eigi papa, noso mi eigi mama ben o gowe libi mi, toku Yehovah srefi ben o sorgu gi mi.” Meki mi fruteri fa disi pasa nanga mi.

MI GRO kon bigi na mi granpapa di ben abi wan katungron na a distrikt Georgia, na Amerkankondre na ini den yari baka 1930. Na a ten dati heri grontapu ben abi bigi moni problema. Mi papa ben sari srefisrefi di mi mama nanga mi pikin brada di ben de wan beibi ete, dede. Dati meki a froisi go tan na wan farawe foto èn a meki mi go tan nanga en papa. Mi granmama ben dede kaba. Bakaten mi papa pruberi na ala sortu fasi fu meki mi kon tan nanga en, ma noiti dati pasa.

A moro owru umapikin fu mi granpapa ben yepi wi nanga osowroko. Mi granpapa no ben de wan kerkisma, ma den umapikin fu en ben de fayafaya na ini a Zuidsei Baptist Kerki. Den ben de nomonomo taki mi ben musu hori misrefi na den kerkileri fu den. Den ben dwengi mi fu go na kerki ibri sonde, èn efu mi no ben wani du dati, den ben o gi mi fonfon. Den sani disi meki taki yonguyongu kaba mi no ben lobi kerki. Ma mi ben lobi go na skoro èn mi ben lobi prei sport.

Fisitiman di kenki mi libi

Wan bakadina na ini 1941, di mi ben abi 15 yari, wan owru man nanga en wefi kon na wi oso. Den taigi mi taki a man ben de „mi omu Talmadge Rusk”. Noiti mi ben yere fu en, ma mi kon sabi taki en nanga en wefi ben de Yehovah Kotoigi. A fruteri wi taki Gado wani taki libisma musu libi fu têgo na grontapu. Dati ben de wan heri tra sani leki san mi yere na ini kerki. Furu famiriman no ben bribi san mi omu nanga en wefi fruteri wi, èn den famiriman ati bron srefi na den tapu. Noiti moro mi omu nanga en wefi ben kan kon na wi oso. Ma mi tanta Mary, mi papa en pikin sisa di ben owru dri yari nomo moro mi, ben teki wan Bijbel nanga wan tu buku di e fruklari Bijbel.

Heri esi Mary kisi na overtoigi taki Bijbel e leri san tru, èn na ini 1942 a teki dopu leki wan Kotoigi fu Yehovah. A ondrofeni tu san Yesus ben taki na fesi dati „wan sma sa abi feanti na ini en eigi osofamiri” (Mat. 10:34-36). Den famiriman ben gens en hebi. Wan bigi sisa fu Mary ben sabi wan tu politiekman na ini a distrikt, èn en nanga a komsarsi meki skowtu sroto Omu Talmadge. Den ben feni taki a ben e seri sani sondro taki lanti gi en primisi fu du dati. Dati meki a ben musu koti strafu.

A koranti fu a foto fu wi fruteri taki a komsarsi, di ben de a krutuman sosrefi, taigi den sma  na fesi krutu: „Den buku di a man disi e prati . . . takru leki vergif.” Baka dati mi omu meki wan tra krutubangi krutu na afersi fu en èn te fu kaba a wini na afersi. Ma fosi dati pasa a koti strafu tin dei.

Tanta Mary yepi mi

Boiti taki Mary ben e taki nanga mi fu a nyun bribi fu en, a ben e preiki tu gi den birtisma. Mi go nanga en di a go studeri Bijbel nanga wan man di ben teki a buku The New World (A nyun grontapu). * En wefi taki dati en masra leisi a buku heri neti. Aladi mi no ben wani go na ini wan kerki wantronso, toku den sani di mi ben e leri naki mi ati. Ma a no den Bijbel leri gi mi na overtoigi taki den Kotoigi na a pipel fu Gado. Na a fasi fa sma ben gens den gi mi na overtoigi dati.

Fu eksempre, wan dei mi nanga Mary ben go na gron fu krin den tomatibon. Di wi drai kon baka na oso wi si taki den sisa fu en bron den buku fu en, wan gramafon, nanga wan tu plaat di ben abi Bijbel boskopu na tapu. Di wan fu den tanta fu mi si taki mi ati bron srefisrefi, a taki na wan heimemre fasi: „Te yu kon moro owru, yu o breiti taki wi du disi.”

Na ini 1943 Mary ben abi fu komoto na oso, fu di a no ben wani drai baka gi a nyun bribi fu en èn a no ben wani tapu fu preiki gi den birtisma. Na a pisi ten dati, mi ben breiti taki mi leri taki Gado abi wan nen èn taki a nen dati na Yehovah. Mi ben breiti di mi kon sabi taki Yehovah na wan lobi-ati Gado di e firi gi sma, èn taki a no e bron sma na ini wan faya hèl. Mi leri tu taki Yehovah abi wan organisâsi pe sma e sori lobi gi trawan aladi mi no ben go na wan konmakandra ete.

Wan leisi di mi ben e koti a grasi na wi mofodoro, wan oto rèi kon, dan wan fu den tu man na ini na oto aksi mi efu mi na Fred. Di mi kon sabi taki den na Kotoigi, mi taki: „Meki mi kon na ini na oto, dan wi o rèi go na wan presi pe wi kan taki sondro taki trawan si wi.” Mary ben seti sani, so taki den man ben kan miti mi. Wan fu den man ben de Shield Toutjian, di ben e go luku difrenti gemeente neleki wan kring-opziener. A ben gi mi deki-ati èn Bijbel rai na a yoisti ten. Now den famiriman fu mi ben e gens mi, fu di mi ben e opo taki gi den Kotoigi fu Yehovah.

Mary ben froisi go na a distrikt Virginia èn fu drape a skrifi wan brifi gi mi pe a taigi mi taki mi ben kan kon tan nanga en efu mi ben wani dini Yehovah trutru. Wantewante mi bosroiti fu go. Na wan freidaneti na ini oktober 1943, mi poti wan tu sani di mi ben o abi fanowdu na ini wan kisi, dan mi tai en na ini wan bon krosibei fu pe mi ben e tan. A satra baka dati mi go teki a kisi, dan mi teki wan boropasi go na a oso fu wan fu den birtisma. Fu drape mi rèi nanga wan sma go  na fotosei. Mi teki pasi go na a foto Roanoke, pe mi miti Mary na ini na oso fu Edna Fowlkes.

Mi go na fesi, mi teki dopu, èn mi go dini na Bethel

Edna ben de wan salfu Kotoigi di ben abi safri-ati èn a ben de neleki Lidia fu Bijbel ten. Edna ben tan na ini wan bigi yuru-oso pe a meki Tanta Mary kon tan nanga en. Boiti dati, a wefi fu Edna en brada nanga den umapikin fu den ben tan nanga en tu. Bakaten den tu meisje disi di nen Gladys nanga Grace Gregory tron zendeling. Gladys di pasa 90 yari kaba e dini ete na a bijkantoro fu Yapan.

Di mi ben e tan na Edna mi ben e go na den konmakandra doronomo èn mi leri fu du a preikiwroko. Fu di nowan sma ben tapu mi now fu studeri Gado Wortu èn fu go na den Kresten konmakandra, meki mi ben kan leri sabi Yehovah moro bun. Tapu 14 yuni 1944 mi teki dopu. Mary, Gladys, nanga Grace bigin pionier èn den kisi a grani fu go dini na a noordsei fu Virginia. Drape den yepi fu opo wan nyun gemeente na ini Leesburg. Na a bigin fu a yari 1946 mi bigin pionier na ini wan distrikt krosibei fu pe den trawan go dini. A yari dati wi go makandra na wan internationaal kongres di wi no sa frigiti noiti. Dati ben de a kongres di hori na ini Cleveland, Ohio, tapu 4-11 augustus.

Na a kongres dati Nathan Knorr di ben e teki fesi na ini na organisâsi, fruteri taki den ben o meki Brooklyn Bethel kon moro bigi. Den ben o bow nyun kamra na Bethel èn den ben o meki a presi pe den ben e druk buku, kon moro bigi. Den ben abi furu yongu brada fanowdu. Mi bosroiti taki na drape mi wani dini Yehovah. Sobun, mi gi mi nen fu wroko drape èn baka wan tu mun, tapu 1 december 1946, mi go na Bethel.

Baka wan yari, Max Larson di ben e teki fesi na a drukkerij, kon na mi na a afdeling di e seni brifi nanga tra sani gowe. A taigi mi taki mi ben o go wroko now na a Dienst Afdeling. Na a Dienst Afdeling mi kon frustan Bijbel gronprakseri moro bun èn mi kon frustan fa na organisâsi fu Gado e wroko. Mi kon frustan den sani disi moro bun spesrutu di mi ben e wroko makandra nanga T. J. (Bud) Sullivan, a brada di ben e teki fesi na a afdeling dati.

Mi papa kon luku mi wan tu leisi na Bethel. Bakaten a bigin go na kerki. Na ini 1965, di a kon luku mi a lasti leisi, a taigi mi: „Yu kan kon luku mi, ma noiti moro mi o kon luku yu dyaso.” Mi go luku en wan tu leisi fosi a dede. A ben de seiker taki a ben o go na hemel. Mi howpu taki a de na ini Yehovah en prakseri. Efu dati de so, dan te sma o kisi wan opobaka, a no o de pe a denki taki a ben o go, ma a o de dyaso na grontapu. A o abi a howpu fu libi fu têgo na ini wan paradijs.

 Tra kongres di mi no sa frigiti noiti nanga presi di mi yepi bow

Den kongres ben de prenspari sani di meki taki den gemeente ben e gro, ma den ben yepi mi tu fu go na fesi na ini a diniwroko. Dati ben de so, spesrutu nanga den internationaal kongres di hori na ini a Yankee Stadion na New York, na ini den yari baka 1950. Na wan kongres di hori na ini 1958, a Yankee Stadion nanga den Polo Grounds ben furu nanga 253.922 sma fu 123 kondre. Na a kongres dati wan sani pasa di mi no sa frigiti noiti moro. Di mi ben e yepi den brada di orga a kongres, Brada Knorr kon esi-esi na mi. A taki: „Fred, mi no sabi fa, ma mi frigiti fu aksi wan brada fu taki nanga ala den pionier di kon makandra now na ini wan bigi zaal krosibei fu dya. Yu wani lon go hori wan bun lezing gi den? Te yu de na pasi yu kan prakseri san yu o taki.” Na so mi go esi-esi. Di mi ben de na pasi mi begi furu èn ala mi blo ben de na tapu di mi doro drape.

Fu di moro nanga moro nyun gemeente ben e seti na ini New York City na a pisi ten fu den yari baka 1950 nanga 1960, meki furu presi no ben de moro di wi ben kan yuru fu hori konmakandra. Fu dati ede, na ini a pisi ten fu 1970 te go miti 1990, den brada bai dri gebow na ini a foto Manhattan. Den meki den gebow dati tra fasi, so taki konmakandra ben kan hori drape. Mi ben de fesiman fu a bow-komte di du a wroko disi. Mi e memre fa Yehovah blesi den gemeente trutru di wroko makandra fu pai den kostu fu bow den gebow disi. Te na a dei fu tide na organisâsi e gebroiki den gebow dati na ini a tru anbegi.

Kenki di kon na ini mi libi

Wan dei na ini 1957 mi ben e waka go na wroko na ini a moi dyari na mindri a gebow pe a Bethelfamiri ben e tan nanga a gebow pe den e druk buku. Ne alen bigin fadon. Mi si wan moi sisa e waka na mi fesi. No so langa pasa a ben tron wan memre fu a Bethelfamiri. A no ben abi wan prasoro, sobun mi aksi en efu a ben wani waka nanga mi na ondro a prasoro fu mi. Na so mi miti Marjorie. Wi trow na ini 1960 èn sensi a ten dati wi dini Yehovah nanga prisiri na ini bun ten èn na ini takru ten. Na ini september 2010 wi ben trow 50 yari.

Baka di wi trow wi go nanga fakansi. Ma syatu baka dati, Brada Knorr taigi mi taki mi kisi a grani fu de wan leriman na a Gileadskoro. Dati ben de wan bigi grani! A Gileadskoro ben e hori feifi mun langa fu gi leri na sma di ben o tron zendeling. Ma fu 1961 te go miti 1965, feifi klas hori di ben teki moro langa. Furu fu den brada na ini den klas dati ben e wroko na bijkantoro èn den ben kisi leri fu drai den bijkantoro na wan bun fasi. Na a kabapisi fu a yari  1965 den klas ben e hori baka fu gi leri na sma di ben o tron zendeling.

Na ini 1972 mi tapu fu gi leri na Gileadskoro èn mi bigin wroko leki fesiman fu na afdeling di e piki den aksi di sma seni kon. Mi ben musu ondrosuku sani di ben abi fu du nanga difrenti aksi nanga problema, èn dati yepi mi fu frustan den leri na ini Gado Wortu moro bun. Mi ben leri tu fa fu gebroiki den moi gronprakseri fu wi Gado fu yepi trawan.

Baka dati na ini 1987 mi kisi a grani fu dini na a kantoro di e yepi den brada nanga sisa te den abi problema na ati-oso. Konmakandra ben e hori fu leri owruman fu Ati-oso Kontakti Komte fa fu taki nanga datra, krutuman, nanga tra sma, so taki den kan sori den fa Bijbel e horibaka gi a fasi fa wi e denki fu brudu. Wan bigi problema ben de taki datra ben e gi den pikin fu Kotoigi brudu sondro taki den papa nanga mama ben e gi den pasi fu du dati. Nofo tron den datra ben aksi primisi fu krutubangi fu man du dati.

Te wi ben e sori den datra sortu tra fasi noso dresi de fu yepi wan sma sondro fu gi brudu, dan nofo tron den ben e taigi wi taki den sani dati no de fu feni noso taki den diri tumusi. Efu wan datra ben e taigi mi a sani dati, dan nofo tron mi ben taigi en: „Grantangi, kon meki mi si yu anu.” Te a ben du dati, mi ben taigi en: „Yu sabi taki yu abi wan fu den moro bun sani fu yepi wan sma di musu du wan oparâsi sondro brudu?” Te mi ben prèise a datra na a fasi disi, dan a ben memre wan sani di a sabi heri bun: a ben kan sorgu taki wan sma no lasi tumusi furu brudu, efu a e du na oparâsi na wan bun fasi.

Na ini den tutenti yari di pasa, Yehovah blesi a muiti di wi meki fu meki datra nanga krutuman kon sabi san wi e bribi èn sortu tra datrayepi de. A denki fu den kenki trutru di den kon frustan fa wi e si sani. Den kon si taki ondrosuku e sori taki sma kan kon betre sondro fu teki brudu, èn taki furu datra nanga ati-oso de di wani yepi sma sondro fu gi den brudu.

Sensi 1996, mi nanga Marjorie e dini na a Waktitoren Skoro na Patterson, New York, di de sowan 110 kilometer na a noordsei fu Brooklyn. Drape mi wroko fu wan syatu pisi ten na a Dienst Afdeling. Baka dati mi ben musu gi leri fu wan pisi ten na brada fu bijkantoro èn na opziener di e reis. Den 12 yari di pasa mi dini baka leki fesiman fu na afdeling di e piki den aksi di sma seni kon. Now den froisi na afdeling dati fu Brooklyn go na Patterson.

Problema fu di mi kon owru

Now di mi pasa 80 yari kaba, a kon moro muilek gi mi fu du mi wroko na Bethel. Moro leki tin yari langa mi feti nanga kanker. Mi e firi leki Heskia di Yehovah ben gi a grani fu libi moro langa (Yes. 38:5). A gosontu fu mi wefi no de so bun tu. A abi a siki fu Alzheimer èn mi e yepi en fu feti nanga a siki disi. Marjorie ben de wan bun preikiman fu Yehovah èn a ben lobi fu yepi den yonguwan. A ben de wan bun yepiman nanga mati gi mi tu. Ala ten a ben lobi studeri Bijbel èn a ben sabi gi Bijbel leri bun. Furu sma di wi yepi fu tron anbegiman fu Yehovah, de leki wi pikin èn den e poti prakseri na wi te now ete.

Mi tanta Mary dede na ini maart 2010 di a ben abi 87 yari. A ben sabi gi leri fu Gado Wortu heri bun èn a yepi trawan fu tanapu kánkan na ini a tru bribi. Furu yari langa a ben de na ini a furuten diniwroko. Mi de nanga tangi trutru taki a yepi mi fu kon sabi den tru tori fu Gado Wortu èn taki a yepi mi fu tron neleki en, wan futuboi fu wi lobi-ati Gado Yehovah. Mary beri na sei a grebi fu en masra, di ben e dini leki zendeling na ini Israel. Mi de seiker taki Yehovah e memre den èn taki a sa gi den wan opobaka.

Mi e dini Yehovah 67 yari kaba, èn te mi e prakseri ala den yari di pasa, dan mi de nanga tangi taki mi kisi so furu blesi. A gi mi furu prisiri fu du a wani fu Yehovah! Mi de seiker taki a de wan Gado di e sori bun-ati. Dati meki mi e howpu trutru taki mi o si a ten te a pramisi fu en Manpikin kon tru, di ben taki: „Ibri sma di gowe libi en oso, noso en brada, noso en sisa, noso en papa, noso en mama, noso en pikin, noso en gron fu mi nen ede, o kisi moro leki dati. A sma dati o kisi têgo libi leki gudu.”​—Mat. 19:29.

[Futuwortu]

[Prenki na tapu bladzijde 19]

A presi pe mi granpapa ben e prani katun na ini Georgia, na Amerkankondre, 1928

[Prenki na tapu bladzijde 19]

Tanta Mary nanga Omu Talmadge

[Prenki na tapu bladzijde 20]

Mary, Gladys nanga Grace

[Prenki na tapu bladzijde 20]

Mi teki dopu tapu 14 yuni 1944

[Prenki na tapu bladzijde 20]

Na a Dienst Afdeling na Bethel

[Prenki na tapu bladzijde 21]

Mi nanga Mary na a internationaal kongres di hori na Yankee Stadion na ini 1958

[Prenki na tapu bladzijde 21]

Mi nanga Marjorie tapu wi trowdei

[Prenki na tapu bladzijde 21]

Mi nanga Marjorie na ini 2008