Bun rai gi sma di no trow èn sma di trow
Bun rai gi sma di no trow èn sma di trow
„Mi e taki a sani disi fu . . . gi unu deki-ati fu du san fiti èn fu dini Masra doronomo sondro taki sani puru un prakseri.”—1 KOR. 7:35.
1, 2. Fu san ede wan sma musu suku Bijbel rai efu a trow noso efu a no trow?
KOLOKU, bruya nanga broko-ede na firi di furu mansma nanga umasma abi te den de makandra. Fu man sabi san fu du te wi abi den firi disi, wi musu suku yepi na Gado. Ma tra sani de tu fu san ede wi musu suku yepi na en. Fu eksempre, wan Kresten di de koloku aladi a no trow kan feni taki famiriman noso mati fu en e dwengi en fu trow. Kande wan trawan wani trow, ma a no feni wan bun patna ete. Son sma abi yepi fanowdu fu sreka densrefi gi den frantwortu di den o tyari leki masra noso wefi te den trow. Boiti dati, ala Kresten e kisi tesi di kan meki den du hurudu, awinsi den trow noso awinsi den no trow.
2 Den situwâsi disi kan meki taki wi de koloku noso taki wi no de koloku. Ma san moro prenspari, na taki den kan abi krakti tapu a fasi fa Yehovah e si wi. Na kapitel 7 fu a fosi brifi di Paulus skrifi gi den Korentesma, a gi rai na sma di no trow èn sma di trow. A ben wani gi den leisiman deki-ati fu ’du san fiti èn fu dini Masra doronomo sondro taki sani puru den prakseri’ (1 Kor. 7:35). Te yu o luku sortu rai a gi fu den prenspari sani disi, dan pruberi fu si fa yu kan dini Yehovah moro bun efu yu no trow noso efu yu trow.
Wan seryusu bosroiti di ibri sma musu teki
3, 4. (a) San kan pasa te mati nanga famiriman wani dwengi wan sma fu trow? (b) Fa a rai fu Paulus kan yepi wan sma fu abi wan yoisti denki fu a trowlibi?
3 Neleki den Dyu fu a fosi yarihondro, furu sma na ini a ten disi feni taki a moro prenspari sani di wan sma musu du na fu trow. Efu den feni taki wan sma owru nofo fu trow, ma a no trow, dan den mati nanga famiriman fu en e bigin broko den ede nanga en èn kande den feni taki den musu yepi en fu feni wan patna. Kande den o bigin taigi en taki a musu du moro muiti fu feni wan patna noso den e sori en suma ben o de wan bun patna gi en. A kan tu taki den seti sani srefi, so taki tu sma di no trow miti nanga makandra. Ma den sani disi kan tyari syen kon, matifasi kan pori, èn den kan hati sma tu.
4 Paulus no dwengi sma noiti fu trow noso fu tan sondro fu trow (1 Kor. 7:7). A ben de koloku fu dini Yehovah sondro wefi, ma noiti a taki dati a no bun fu trow. Ibriwan Kresten na ini a ten disi abi a reti fu bosroiti efu den o trow noso efu den wani tan sondro fu trow. Tra sma no musu dwengi den fu teki iniwan fu den bosroiti disi.
Fa yu kan de koloku efu yu no trow
5, 6. Fu san ede Paulus gi Kresten deki-ati fu no trow?
5 Wan moi sani di wi e si na ini a brifi di Paulus skrifi gi den Korentesma na taki a ben feni en bun efu wan sma no trow. (Leisi 1 Korentesma 7:8.) Son kerki fesiman fu a Krestenhèit no trow èn den feni taki den bun moro sma di trow. Paulus no ben trow tu, ma a no ben denki na a fasi disi. Na presi fu dati a ben sori taki furu futuboi fu Yehovah di no trow man du son sani di trawan no man du fu di den trow. San na den sani dati?
6 Nofo tron a moro makriki gi wan Kresten di no trow fu teki son wroko na ini Yehovah organisâsi na en tapu. Paulus ben kisi a spesrutu grani fu de „wan apostel gi den trakondre sma” (Rom. 11:13). Yu kan leisi Tori fu den apostel kapitel 13 te go miti kapitel 20 fu si fa en nanga tra zendeling ben go preiki na presi pe nowan sma ben preiki ete. Na difrenti presi den ben man seti nyun gemeente. Na ini a wroko disi Paulus kisi tesi di furu fu wi na ini a ten disi noiti no o kisi (2 Kor. 11:23-27, 32, 33). Ma a ben de klariklari fu teki a pina disi, fu di a ben man yepi furu sma fu tron disipel èn dati ben gi en furu prisiri (1 Tes. 1:2-7, 9; 2:19). Kande a no ben o man du ala den sani dati efu a ben trow noso efu a ben abi wan osofamiri.
7. Fruteri fa tu sisa ben man du moro gi a Kownukondre, fu di den no trow.
7 Furu Kresten e du furu gi a Kownukondre fu di den no trow. Sara nanga Limbania na tu pionier di no trow èn di e tan na Bolifia. Den ben froisi go na wan dorpu pe Kotoigi no ben preiki furu yari langa. Stroom no ben de na ini a dorpu dati, ma disi no ben de wan problema gi den. Den taki: „Fu di nowan radio noso telefisi de, meki den sma man poti prakseri na tra sani soleki fu leisi buku.” Sonwan fu den sma drape ben sori den tu sisa disi wan tu buku fu Yehovah Kotoigi di den ben e leisi, ma langa ten kaba den buku disi no e meki moro. Na pikinmoro ibri oso sma ben wani sabi moro fu Bijbel. Sobun, a teki langa fosi den tu sisa disi miti ala den sma na ini a kontren dati. Wan owru uma taigi den: „A musu fu de so, taki a kaba de krosibei, bika Yehovah Kotoigi kon na wi.” Heri esi sonwan fu den sma na ini a dorpu bigin kon na den konmakandra.
8, 9. (a) San Paulus ben wani sori di a taki dati a bun te wan sma no trow? (b) San Kresten di no trow kan du moro makriki?
8 A no de fu taki dati Kresten di trow abi bun bakapisi tu te den e preiki na muilek kontren. Ma den wan di trow noso di abi pikin no man preiki so makriki na son presi. A moro makriki gi pionier di no trow fu preiki na den presi dati. Paulus ben prakseri omeni wroko ben de fu du ete, so taki sma yere a bun nyunsu na den kontren pe den gemeente ben de. A ben wani ala sma fu abi a prisiri di en ben abi fu du a wroko disi. Dati meki a taki dati a bun te wan sma e dini Yehovah sondro fu trow.
9 Wan sisa di no trow èn di e tan na Amerkankondre skrifi: „Son sma denki taki yu no man de koloku te yu no trow. Ma mi si taki wan sma de koloku solanga a de wan mati fu Yehovah. A no makriki fu tan sondro fu trow, ma efu yu e gebroiki yu ten na wan bun fasi, a kan tyari furu wini kon gi yu.” A ben taki fu a koloku di wan sma kan feni: „Te yu no trow, dati no abi fu tapu yu fu de koloku. Na presi fu dati a de wan okasi fu du sani di kan meki yu de koloku. Mi sabi taki Yehovah lobi ala sma, a no abi trobi efu yu trow noso efu yu no trow.” Now a e dini na ini wan kondre pe moro Kownukondre preikiman de fanowdu. Efu yu no trow, yu kan gebroiki na okasi dati fu du moro na ini a preikiwroko fu leri sma den tru tori fu Bijbel? Efu yu du dati, dan yu o si a trow di yu no trow leki wan diri kado fu Yehovah.
Sma di wani trow
10, 11. Fa Yehovah e yepi den wan di wani trow, ma di no feni wani bun trowpatna ete?
10 Furu futuboi fu Yehovah di tan dini en wan pisi ten sondro fu trow e go suku wan trowpatna bakaten. Fu di den sabi taki den abi yepi fanowdu na ini a tori disi, meki den e aksi Yehovah fu yepi den feni wan bun trowpatna.—Leisi 1 Korentesma 7:36.
11 Efu yu wani trow nanga wan sma di wani dini Yehovah nanga en heri ati neleki yu, dan fruteri Yehovah disi (Fil. 4:6, 7). Awinsi o langa yu sa musu wakti, no lasi-ati. Yu musu abi a frutrow taki Gado na yu Yepiman. A sabi san yu abi fanowdu èn a o yepi yu fu horidoro.—Hebr. 13:6.
12. Efu wan sma aksi yu fu trow, fu san ede yu musu denki bun fosi yu piki en?
12 Ma fa a de te wan sma di no de so fayafaya na ini a bribi, noso wan sma di no de na bribi srefi e aksi yu fu trow? Kande yu wani trow trutru. Ma efu yu teki wan don bosroiti, a sari di yu o kisi o bigi moro leki di yu no trow. Memre taki te yu trow yu musu tan nanga a sma yu heri libi langa, awinsi problema kon (1 Kor. 7:27). No go trow soso fu di yu denki taki yu no o feni wan tra sma fu trow. Efu yu teki so wan bosroiti sondro fu denki, a o hati yu bakaten trutru.—Leisi 1 Korentesma 7:39.
Sreka yusrefi gi a trowlibi
13-15. Fu sortu sani di kan tron wan problema, sma musu taki fosi den trow?
13 Paulus ben taki dati a bun te wan sma e dini Yehovah sondro fu trow, ma disi no wani taki dati a no ben feni en bun efu wan sma trow. Na presi fu dati a ben wani yepi den wan di trow. Dati meki a gi den rai, so taki den kan frustan san den musu fruwakti baka te den trow èn fa den kan tan nanga a trowpatna fu den.
14 Son sma di meki mofo fu trow musu kenki den denki fu a trowlibi. Na ini a pisi ten fosi den trow den e denki taki nowan tra sma lobi makandra so. Den e denki taki den na den wan-enkri sma di e firi so. Na so den e bigin a trowlibi nanga den firi disi èn den e denki taki noti kan meki taki den no de koloku. Ma a libi no de so. A no kan taki unu o de koloku ala ten. A tru taki yu nanga yu trowpatna o abi un switi momenti. Ma disi no e lusu den problema di sma e kisi te den trow.—Leisi 1 Korentesma 7:28. *
15 Baka a trowdei furu sma e skreki èn den e firi brokosaka srefi te den kon si taki a trowpatna fu den e si son prenspari sani heri tra fasi leki fa den e si dati. Kande den no e agri fa den o gebroiki a moni fu den, san den o du fu abi prisiri, pe den o libi èn omeni leisi den o go luku den mama nanga papa fu den. Den ala tu abi maniri di a trawan no lobi. Te tu sma abi mofo fu trow den kan prakseri taki den no abi fu taki fu den sortu prenspari sani disi. Ma efu den no du dati a kan tyari bigi problema kon baka te den trow. A bun te den taki fu den sani disi fosi den trow.
16. Fu san ede wan trowpaar musu taki nanga makandra fu luku fa den o tyari den frantwortu na ini a trowlibi?
16 Efu trowpaar wani taki sani waka bun nanga den èn efu den wani abi wan koloku trowlibi, dan den musu wroko makandra fu tyari den frantwortu fu den. Den musu taki nanga makandra fu luku fa den o kweki den pikin èn fa den o sorgu gi den papa nanga mama di e kon owru. Den problema di den o kisi leki trowpaar no musu prati den. Te den e du san Bijbel e taki, dan den o man lusu furu problema, den o man horidoro awinsi den abi problema di den no man lusu, èn den o de koloku leki trowpaar.—1 Kor. 7:10, 11.
17. Fu san ede trowpaar e ’broko den ede nanga den sani fu grontapu’?
17 Na 1 Korentesma 7:32-34 Paulus e taki fu wan tra sani di abi fu du nanga a trowlibi. (Leisi en.) Sma di trow e ’broko den ede nanga den sani fu grontapu’. Dati na sani soleki nyanyan, krosi, wan tanpresi, nanga tra sani di no abi fu du nanga na anbegi. Fu san ede dati de so? Fu eksempre, te wan brada no trow, a kan gebroiki furu fu en ten na ini a preikiwroko. Ma te a trow a e si taki a musu gebroiki ten nanga krakti tu fu sorgu gi en wefi fu di a wani plisi en. Na uma musu du a srefi gi en masra. Yehovah e frustan taki masra nanga wefi wani taki a patna fu den de koloku. A sabi taki a trowpaar no man gebroiki so furu ten nanga krakti na ini a preikiwroko leki fosi di den no ben trow. Now den musu gebroiki ten nanga krakti tu gi makandra, so taki den kan abi wan bun trowlibi.
18. Sortu kenki trowpaar sa musu tyari kon te a abi fu du nanga den sani di den ben lobi du fosi den trow?
18 Ma moro de ete di trowpaar musu hori na prakseri. Soleki fa wi si, trowpaar no man du so furu moro na ini a preikiwroko, fu di den musu gebroiki ten nanga krakti gi a trowlibi fu den. Na so a de tu nanga a ten di den ben gebroiki gi den sani di den ben lobi du fosi den trow. Fa wan wefi ben o firi efu en masra tan gebroiki furu ten fu prei sport nanga den mati fu en? Noso fa wan masra ben o firi efu en wefi tan gebroiki furu ten fu du sani nanga den mati fu en? Den ala tu kan feni taki a patna fu den no e poti prakseri na den èn disi kan meki den firi leki den wawan de, den no sa de koloku, èn den o firi leki a patna fu den no lobi den. Ma efu masra nanga wefi e du ala san den man fu meki a lobi di den abi gi makandra kon moro tranga, dan disi no abi fu pasa.—Ef. 5:31.
Yehovah wani taki wi musu libi wan krin libi
19, 20. (a) Fu san ede sma no musu denki taki te den trow den no o kisi tesi fu du hurudu? (b) San kan pasa efu trowpatna e du sani di e meki taki den no de nanga makandra fu wan langa pisi ten?
19 Futuboi fu Yehovah abi a fasti bosroiti fu libi wan krin libi. Sonwan fu den e bosroiti fu trow, fu di den no wani du hurudu. Ma te wan sma trow, dan a no abi fu de so, taki dati o tapu en fu du hurudu. Na ini Bijbel ten, wan foto di ben abi tranga skotu ben kan kibri sma soso te den ben e tan na ini a foto dati. Efu wan sma ben o go dorosei fu a foto aladi ogriman nanga fufuruman de drape, dan den kan fufuru sani fu en, den kan du en ogri, noso den kan kiri en. Den wèt di Yehovah poti gi trowpaar de leki tranga skotu lontu wan foto. Trowpaar o man wai pasi gi hurudu soso te den e gi yesi na den wèt dati.
20 Paulus e taki fu den wèt dati na 1 Korentesma 7:2-5. A wefi wawan abi a reti fu abi seks nanga en masra, èn a masra wawan abi a reti fu abi seks nanga en wefi. Gado wani taki ibriwan fu den musu ’gi makandra san den abi reti na tapu’, dati wani taki dati trowpaar abi a reti fu abi seks nanga makandra. Ma son masra nanga wefi no de nanga makandra fu wan langa pisi ten. Kande den no e go nanga fakansi makandra, noso kande wan fu den e go wroko na wan tra presi farawe. Te den e du disi, dan den no e ’gi makandra san den abi reti na tapu’. Satan kan gebroiki den situwâsi disi fu pori a trowlibi. Efu wan masra noso wan wefi no e hori den seksfiri fu en patna na prakseri, dan wan fu den kan kisi tesi fu du sutadu. Yehovah e blesi osofamiri-edeman di e sorgu bun gi den osofamiri èn di no e du sani di kan pori a trowlibi.—Ps. 37:25.
Den wini di wi e kisi te wi e du san Bijbel e taki
21. (a) Fu san ede a muilek fu teki bosroiti di abi fu du nanga a trowlibi, noso fu teki a bosroiti fu tan sondro fu trow? (b) Fa a rai na ini 1 Korentesma kapitel 7 kan yepi wi?
21 Wan tu fu den moro muilek bosroiti di wan sma o teki na ini en libi na a bosroiti efu a o trow noso efu a no o trow, noso bosroiti di abi fu du nanga a trowlibi. Ma awinsi wi trow noso awinsi wi no trow, wi alamala o abi problema fu di wi alamala na sondusma. Sobun, srefi den sma di Yehovah feni bun èn di a e blesi o firi brokosaka ten na ten, awinsi den trow, noso awinsi den no trow. Ma efu yu e gebroiki a rai di skrifi na ini 1 Korentesma kapitel 7, yu no o kisi so furu problema. Dan Yehovah o si yu leki wan sma di e „du bun”, awinsi yu no trow, noso awinsi yu trow. (Leisi 1 Korentesma 7:37, 38.) A moro bigi blesi di yu kan abi, na taki Gado feni yu bun. Wi kan sorgu taki a feni wi bun now èn na ini a ten di e kon te wi o libi na ini a nyun grontapu di a pramisi wi. Na a ten dati, man nanga uma no o abi den problema di den abi na ini a ten disi.
[Futuwortu]
Yu kan gi piki?
• Fu san ede nowan sma musu dwengi wan trawan fu trow?
• Efu yu na wan futuboi fu Yehovah di no trow, san na a moro bun fasi fa yu kan gebroiki yu ten?
• Fa tu sma di abi mofo fu trow kan sreka densrefi gi den frantwortu di den o abi te den trow?
• Fu san ede sma no musu denki taki te den trow den no o kisi tesi fu du hurudu?
[Aksi fu a tori disi]
[Prenki na tapu bladzijde 14]
Kresten di no trow sa de koloku te den e gebroiki den ten fu du moro na ini a diniwroko
[Prenki na tapu bladzijde 16]
Sortu kenki son sma musu tyari kon baka te den trow?
