Meki wi prisiri makandra!

DEI fu dei a e kon moro muilek fu abi prisiri èn fu de koloku. Gi furu sma a muilek fu taki bun sani di e meki trawan prisiri. A libi fu disiten, spesrutu a libi na ini bigi foto, e meki son tron taki sma e firi leki den wawan de èn den e denki taki a moro bun fu no bumui nanga trawan.

Professor Alberto Oliverio taki dati a de wan aladei sani fu firi leki yu wawan de èn taki a libi na ini bigi foto e meki taki furu sma no e bumui nanga trawan. Fu dati ede furu sma no e poti prakseri moro na den trawan na wrokope, den birtisma, noso na den sma di e wroko na ini den wenkri pe den e go bai sani. A sani disi kan meki sma firi brokosaka doronomo.

Ma sani de tra fasi nanga Kresten èn den e libi tra fasi nanga sma. Na apostel Paulus skrifi: „Ala ten un musu prisiri” (1 Tes. 5:16). Furu sani de di kan meki wi breiti èn prisiri nanga makandra. Wi e dini a Moro Hei Gado Yehovah, wi e frustan a tru leri di skrifi na ini Bijbel, wi abi a howpu fu kisi frulusu èn fu kisi têgo libi, èn wi kan yepi trawan fu kisi den srefi blesi tu.​—Ps. 106:4, 5; Yer. 15:16; Rom. 12:12.

 Tru Kresten musu breiti èn prisiri nanga makandra. Fu dati ede Paulus ben skrifi gi den Kresten fu Filipi: „Mi breiti èn mi e prisiri makandra nanga un alamala. . . . Na so un musu breiti èn prisiri tu makandra nanga mi” (Fil. 2:17, 18). Na ini den tu vers disi Paulus taki tu leisi taki wi musu breiti èn prisiri nanga makandra.

Kresten musu luku bun taki den no tron sma di no e bumui nanga trawan. Nowan sma di no e bumui nanga trawan kan prisiri makandra nanga den Kresten brada nanga sisa fu en. Paulus gi wi a rai taki wi musu „tan prisiri fu Masra ede” makandra nanga wi brada nanga sisa. Fa wi kan du dati?​—Fil. 3:1.

Prisiri makandra nanga wi brada nanga sisa

Soleki fa a sori, dan Paulus skrifi a brifi gi den Kresten fu Filipi, di a ben de na strafu-oso na Rome fu a preikiwroko ede (Fil. 1:7; 4:22). Ma disi no ben meki a lasi a faya fu du en diniwroko. Na presi fu dati a ben e prisiri fu du ala san a man fu dini Yehovah. Paulus ben gi en heri libi na Yehovah „leki wan dringi-ofrandi di kanti trowe” gi en (Fil. 2:17). A fasi fa Paulus ben e denki e sori taki prisiri no e kon fu di wan sma de na ini wan spesrutu sortu situwâsi. A ben de na strafu-oso, ma toku a skrifi: „Mi o tan de nanga prisiri tu.”​—Fil. 1:18.

Paulus ben seti a gemeente na Filipi èn a ben lobi den brada nanga sisa drape trutru. A ben sabi taki den ben o kisi deki-ati efu a ben fruteri den fa a ben e prisiri fu dini Yehovah. Dati meki a skrifi: „Mi brada, now mi wani taki unu sabi taki den sani di miti mi, ben meki a bun nyunsu go na fesi. Na so fasi ala den waktiman fu Grankownu nanga ala tra sma kon sabi taki mi de na strafu, fu di mi na wan bakaman fu Krestes” (Fil. 1:12, 13). Di Paulus fruteri den Kresten fu Filipi san a ondrofeni, den kisi deki-ati. Na so Paulus ben kan breiti èn prisiri nanga den, èn den ben kan prisiri nanga en tu. Ma den ben musu hori na prakseri fu san ede den ben prisiri èn den no ben musu sari fu den sani di ben e miti Paulus. Den ben musu abi a srefi denki leki Paulus (Fil. 1:14; 3:17). Boiti dati, den Kresten fu Filipi ben kan begi gi Paulus doronomo èn den ben kan yepi en èn horibaka gi en so furu leki den man.​—Fil. 1:19; 4:14-16.

Wi e sori taki wi e prisiri neleki Paulus? Pruberi fu si den bun sani di pasa na ini wi libi èn den blesi di wi e kisi na ini wi Kresten diniwroko. Te wi de nanga den brada nanga sisa fu wi a  bun fu taki nanga prisiri fu den sani di wi ondrofeni na ini a preikiwroko. Wi no abi fu wakti teleki wi ondrofeni wan spesrutu sani. Kande a fasi fa wi bigin taki nanga wan sma noso a fasi fa wi taki-go-taki-kon nanga en meki taki a poti prakseri na a Kownukondre boskopu. Kande wi ben abi wan moi takimakandra nanga wan sma fu wan Bijbeltekst. Noso kande sma kon sabi wi leki Kotoigi fu Yehovah fu di wi ben e preiki na ini a birti. Te wi e fruteri wi brada nanga sisa fu den sortu sani disi, dan dati na wan fasi fa wi kan prisiri makandra nanga den.

Furu anbegiman fu Yehovah du furu fu man preiki gi trawan èn te now ete den e du furu muiti fu du dati. Pionier, kring-opziener, distrikt-opziener, sma di e wroko na Bethel, zendeling èn tra brada nanga sisa di e go yepi na tra kondre e wroko tranga èn den e prisiri fu du dati. Wi breiti fu dati èn wi e prisiri makandra nanga den? Meki wi sori den lobi brada nanga sisa disi taki wi e warderi a wroko di den e du èn taki wi breiti taki den ’e wroko makandra nanga wi gi a Kownukondre fu Gado’ (Kol. 4:11). Te wi de makandra na den gemeente konmakandra noso na den bigi Kresten konmakandra, dan wi kan sori taki wi breiti nanga den èn wi kan gi den deki-ati. Wi kan meki muiti tu fu wroko fayafaya neleki den. Te wi lobi fu teki den na ini wi oso, kande fu nyan makandra nanga wi, dan wi kan gebroiki na „okasi” dati fu arki den ondrofenitori fu den èn fu gi den deki-ati.​—Fil. 4:10.

Prisiri makandra nanga den wan di e kisi tesi

Te Paulus ben e horidoro aladi a ben e kisi frufolgu èn te a ben pasa wan tesi, dan a ben e kisi moro deki-ati fu tan dini Yehovah (Kol. 1:24; Yak. 1:2, 3). A ben sabi taki den Kresten fu Filipi ben o kisi den srefi sortu tesi èn taki den ben o kisi deki-ati te den yere fa a ben e horidoro. Fu dati ede a ben breiti èn prisiri makandra nanga den. Dati meki a skrifi: „Na unu kisi a grani fu no bribi nomo na ini Krestes, ma fu pina tu fu en ede. Soleki fa unu e si, unu e feti a srefi feti di mi e feti, èn now unu yere taki mi e feti a feti disi te now ete.”​—Fil. 1:29, 30.

Kresten na ini a ten disi e kisi frufolgu tu fu di den e preiki. Son leisi sma e du ogri-ati sani nanga den, ma furu tron den e du tra sani fu gens den Kresten. A kan taki sma di fadon komoto na bribi e taki lei fu den, famiri no wani si den na ai, noso den sma na wrokope noso skoro e spotu den. Yesus ben taki na fesi dati wi musu fruwakti den sortu tesi disi èn den tesi no musu meki wi lasi-ati. Na presi fu dati den musu meki wi firi prisiri. A ben taki: „Koloku fu unu te sma e gi unu porinen èn te den e frufolgu unu aladi den e lei èn e taki ala sortu ogri fu unu, fu di unu na mi bakaman. Un musu breiti èn prisiri pasa marki, fu di unu o kisi wan bigi pai na hemel.”​—Mat. 5:11, 12.

Wi no musu frede te wi yere fa den brada nanga sisa fu wi na ini son kondre e kisi hebi frufolgu. Na presi fu dati wi musu prisiri fu di den e horidoro. Wi kan begi èn aksi Yehovah fu yepi den fu abi wan tranga bribi èn fu horidoro (Fil. 1:3, 4). Kande na soso dati wi man du gi wi lobi brada nanga sisa di e kisi frufolgu. Ma na ini wi eigi gemeente brada nanga sisa de tu di e kisi tesi èn di wi kan yepi. Wi kan poti prakseri na den èn wi kan horibaka gi den. Wi kan suku fasi fu prisiri makandra nanga den. Kande ten na ten wi kan aksi den fu kon te wi abi Osofamiri Anbegi. Wi kan wroko nanga den na ini a preikiwroko tu èn wi kan kari den te wi o abi wan prisiriten nanga trawan.

Furu sani de di kan meki wi prisiri nanga makandra! Meki wi no teki a denki fu grontapu taki a moro bun fu no bumui nanga trawan. Na presi fu dati, meki wi go doro fu prisiri makandra nanga wi brada nanga sisa. Te wi e du disi wi o meki taki lobi èn wánfasi de na ini a gemeente èn wi o breiti trutru fu de makandra nanga den tra Kresten di de leki wi brada nanga sisa (Fil. 2:1, 2). Iya, meki wi teki a rai disi fu Paulus: „Prisiri ala ten fu Masra ede. Ete wan tron mi o taki: Prisiri!”​—Fil. 4:4.

[Sma di abi a reti fu a prenki na tapu bladzijde 6]

Globe: Courtesy of Replogle Globes