„Trowstu ala den sma di e sari”

„Yehovah salfu mi fu . . . trowstu ala den sma di e sari.”​—YES. 61:1, 2.

1. San Yesus ben e du gi den sma di ben e sari, èn fu san ede a ben e du dati?

YESUS KRESTES taki: „Mi nyanyan na fu du a wani fu a sma di seni mi kon èn fu klari a wroko fu en” (Yoh. 4:34). Di Yesus ben e du a wroko di Gado gi en a ben de krin taki a ben abi den moi fasi fu en Papa. Wan fu den fasi disi na a bigi lobi di Yehovah abi gi libisma (1 Yoh. 4:7-10). Wan fasi fa Yehovah e sori lobi gi wi na te a e trowstu wi. Na apostel Paulus ben taki fu disi di a kari Yehovah „a Gado fu ala trowstu” (2 Kor. 1:3). Yesus ben sori taki a abi a lobi disi di a du san a profeiti Yesaya ben taki na fesi. (Leisi Yesaya 61:1, 2.) Yesus ben leisi a profeititori disi na ini wan snoga na Nasaret, dan a sori taki a profeititori abi fu du nanga en (Luk. 4:16-21). Na ini a heri pisi ten di a ben e du en wroko na grontapu, Yesus trowstu den sma di ben e sari. Na wan lobi-ati fasi a ben e gi den deki-ati èn a ben meki den firi korostu.

2, 3. Fu san ede bakaman fu Krestes musu trowstu sma tu?

² Ala bakaman fu Yesus musu trowstu  sma tu (1 Kor. 11:1). Paulus taki: „Tan gi makandra deki-ati èn tan yepi makandra, soleki fa unu e du kaba” (1 Tes. 5:11). Wi musu trowstu sma spesrutu fu di wi e libi na ini ’muilek ten di tranga fu pasa’ (2 Tim. 3:1). Na heri grontapu sma e taki èn e du sani di e meki taki moro nanga moro krin-ati sma e firi sari, den e firi brokosaka, noso den e lasi-ati.

³ Bijbel ben taki na fesi taki na ini den lasti dei fu na ogri grontapu disi furu sma o ’lobi densrefi nomo. Den o lobi moni. Den o lobi dyaf. Den o abi heimemre. Den o taki ogri fu trawan. Den o trangayesi papa nanga mama. Den no o de nanga tangi. Den no o tai hori na trawan. Den no o lobi trawan. Den no o wani meki kruderi. Den o fruteri ogri-ati lei fu trawan. Den no o man dwengi densrefi. Den o du ogri-ati sani. Den no o lobi san bun. Den o tori trawan. Den o du san densrefi wani. Den o abi bigimemre. Den o lobi prisiri na presi taki den lobi Gado.’ A fasi fa ogri sma e denki èn den sani di den e du e „kon ogri moro nanga moro”, soifri soleki fa Bijbel taki.​—2 Tim. 3:2-4, 13.

4. Fa sani de na grontapu na ini a ten disi?

⁴ Den sani disi no musu fruwondru wi, bika Gado Wortu e sori krin taki „heri grontapu de na ini a makti fu na ogriwan” (1 Yoh. 5:19). Satan e gebroiki politiek, kerki, bisnis nanga tra sani fu panya den lei fu en èn fu kori den sma na grontapu. A fiti srefisrefi taki Bijbel e kari Satan Didibri „a tiriman fu grontapu” èn „a gado fu a grontapu disi” (Yoh. 14:30; 2 Kor. 4:4). Sani e kon moro ogri na grontapu now, bika Satan abi bigi atibron fu di a sabi taki a abi soso wan syatu pisi ten fosi Yehovah puru en na pasi (Openb. 12:12). A de wan trowstu fu sabi taki Gado no o wakti langa moro fosi a tyari wan kaba kon na Satan nanga en ogri grontapu, so taki ala sma kan sabi taki Yehovah na a Moro Hei Tiriman!​—Gen., kap. 3; Yob, kap. 2.

A bun nyunsu e preiki na heri grontapu

5. Fa a profeititori fu a preikiwroko e kon tru na ini den lasti dei disi?

⁵ Na ini a muilek ten disi den sani di Yesus ben taki na fesi e kon tru. A ben taki: „A bun nyunsu disi fu a Kownukondre o preiki gi sma na heri grontapu, so taki sma fu ala kondre kan yere dati, èn dan a kaba o kon” (Mat. 24:14). Na heri grontapu moro nanga moro sma e du a preikiwroko disi di abi fu du nanga Gado Kownukondre. Now moro leki 7.500.000 Kotoigi fu Yehovah di e go na moro leki 107.000 gemeente na heri grontapu e preiki fu Gado Kownukondre neleki Yesus di ben e preiki èn leri sma fu a Kownukondre  disi (Mat. 4:17). A preikiwroko di wi e du na ini a ten disi e meki taki sma di e sari kisi trowstu. Fu taki en leti, na ini den tu yari di pasa 570.601 sma teki dopu leki Yehovah Kotoigi!

6. Fa yu e denki fu a preikiwroko di e du na heri grontapu now?

⁶ Now Yehovah Kotoigi vertaal èn prati buku di abi fu du nanga Bijbel na ini moro leki 500 tongo. Noiti ete sma du so wan bigi wroko! A pipel fu Yehovah e libi na ini wan grontapu di Satan e tiri, ma toku den e tan du den wroko fayafaya èn moro nanga moro sma e tron anbegiman fu Yehovah. Sondro a tiri èn a yepi fu a tranga santa yeye fu Gado, den no ben o man disi. Den anbegiman disi èn den sma di e gi yesi na a Kownukondre boskopu e kisi trowstu fu Bijbel, fu di a bun nyunsu e preiki now na heri grontapu.

Trowstu wi brada nanga sisa

7. (a) Fu san ede wi no kan fruwakti taki now Yehovah o puru ala sani di e gi wi broko-ede? (b) Fa wi du sabi taki wi man horidoro awinsi frufolgu noso pina miti wi?

⁷ Na ini a grontapu disi di lai ogri nanga pina, wi kan de seiker taki wi o kisi fu du nanga situwâsi di e gi wi broko-ede. Wi no kan fruwakti taki Gado o puru ala sani di e gi wi broko-ede èn di e meki wi sari na ini a ten disi. Aladi wi e wakti te Gado o puru ala ogri, wi o kisi frufolgu. Wi o abi fu sori taki wi e tan dini Yehovah èn taki wi e horibaka gi en leki a Moro Hei Tiriman (2 Tim. 3:12). Ma wi hemel Tata e trowstu wi, so taki wi kan de leki den salfu Kresten fu owruten Tesalonika. Den ben e horidoro èn den no lasi bribi awinsi sma ben e frufolgu den noso pina den.​—Leisi 2 Tesalonikasma 1:3-5.

8. Sortu eksempre na ini Bijbel e sori taki Yehovah e trowstu den futuboi fu en?

⁸ A no de fu taki dati Yehovah e gi den futuboi fu en a trowstu di den abi fanowdu. Fu eksempre, di Umakownu Iseibel ben wani kiri a profeiti Elia, a profeiti ben kon frede èn a lowe. A ben taki srefi dati a ben wani dede. Ma na presi fu piri-ai gi Elia, Yehovah trowstu en èn a gi en deki-ati, so taki a ben kan du en wroko leki profeiti (1 Kow. 19:1-21). Wan tra eksempre di e sori taki Yehovah e trowstu en pipel, na san pasa nanga a Kresten gemeente na ini a fosi yarihondro. Wi e leisi fu wan ten pe ’ala sani ben kon tiri baka gi den gemeente na ini heri Yudea, Galilea, nanga Samaria, èn a gemeente ben kon moro tranga. Fu di a gemeente ben abi bigi lespeki gi Yehovah èn a ben kisi krakti fu a santa yeye, meki a ben kon moro bigi’ (Tori. 9:31). Wi de nanga bigi tangi tu taki wisrefi e „kisi krakti fu a santa yeye”!

9. Fu san ede wi kan kisi trowstu te wi e leri fu Yesus?

⁹ Leki Kresten wi kisi trowstu tu fu di wi leri fu Yesus èn fu di wi e waka na en baka. Yesus taki: „Un alamala di musu wroko hebi èn di musu tyari hebi lai, un kon na mi èn mi o gi unu krakti baka. Teki mi tyatyari na un tapu èn leri fu mi, bika mi abi safri-ati nanga sakafasi èn unu o kisi krakti baka. Bika a tyatyari fu mi switi fu tyari èn mi lai lekti” (Mat. 11:28-30). Te wi e leri fa Yesus sori lobi nanga switifasi di a ben de nanga sma èn te wi e pruberi fu du leki en, dan dati kan gi wi trowstu kaba te wi abi broko-ede.

10, 11. Suma na ini a gemeente kan gi trowstu?

¹⁰ Wi kan kisi trowstu tu fu wi Kresten brada nanga sisa. Fu eksempre, luku fa owruman na ini a gemeente e yepi den wan di de na ini banawtu. A disipel Yakobus skrifi: „Efu wan fu unu siki, meki a kari den owruman fu a gemeente kon na en. Meki den begi gi en.” San na a bakapisi? „Te den e begi nanga bribi, dan a sma di siki o kon betre èn Yehovah o meki a kisi ensrefi baka. Boiti dati, efu a du sondu, dan a o  kisi pardon fu dati” (Yak. 5:14, 15). Tra brada nanga sisa na ini a gemeente kan gi wi trowstu tu.

¹¹ Nofo tron a moro makriki gi umasma fu fruteri den problema fu den na tra umasma. Spesrutu den sisa di moro owru èn di abi ondrofeni kan gi bun rai na den yongu sisa. Kande den lepi Kresten uma disi kisi fu du nanga den srefi sortu situwâsi na ini den libi. A kan de wan bigi yepi te den e arki èn e sori taki den e broko den ede nanga den yongu sisa. (Leisi Titus 2:3-5.) A no de fu taki dati owruman nanga trawan kan èn musu „taki na wan fasi di e trowstu [wi brada nanga sisa] di lasi-ati” (1 Tes. 5:14, 15). A bun fu hori na prakseri tu taki Gado „e trowstu wi te wi de na ini ala sortu banawtu. A trowstu di wi e kisi fu Gado e meki taki wi man trowstu tra sma tu di de na ini ala sortu banawtu”.​—2 Kor. 1:4.

12. Fu san ede a prenspari fu go na den Kresten konmakandra?

¹² Wan prenspari fasi fa wi kan kisi trowstu, na te wi de na den Kresten konmakandra pe wi e yere sani fu Bijbel di e gi wi deki-ati. Bijbel e sori taki Yudas nanga Silas ben e „fruteri den brada furu sani fu gi den deki-ati nanga krakti” (Tori 15:32). Fosi èn baka den konmakandra wi man taki nanga makandra tu fu gi makandra deki-ati. Sobun, awinsi wi de na ini wan situwâsi di e gi wi broko-ede, wi no musu denki taki a moro bun fu no moksi nanga trawan, fu di dati no o meki sani kon moro bun gi yu (Odo 18:1). Na presi fu dati a moro bun fu du san na apostel Paulus taki: „Meki wi poti prakseri na makandra tu, so taki wi kan gi makandra deki-ati fu abi lobi èn fu du bun wroko. Meki wi no misi konmakandra, soleki fa son sma gwenti du, ma gi makandra deki-ati o moro unu e si a dei e kon krosibei.”​—Hebr. 10:24, 25.

Meki Gado Wortu trowstu yu

13, 14. Fruteri fa Bijbel kan gi wi trowstu.

¹³ Awinsi wi na dopu Kresten noso sma di bigin leri fu Gado nanga den sani di a abi na prakseri, wi alamala kan kisi furu trowstu fu den sani di skrifi na ini Gado Wortu. Paulus skrifi: „Ala sani di sma skrifi fositen, ben skrifi fu leri wi wan sani. Disi e yepi wi fu horidoro èn fu kisi trowstu fu Gado Buku, so taki wi kan abi howpu” (Rom. 15:4). Den Santa Buku fu Bijbel kan gi wi trowstu, den kan meki wi ’kon bun dorodoro èn den kan meki wi de srekasreka fu du ibri bun wroko’ (2 Tim. 3:16, 17). Te wi sabi san Gado o du na ini a ten di e kon èn te wi abi wan trutru howpu, dan wi o kisi furu trowstu tu. Fu dati ede, meki wi leri so furu leki wi man fu Gado Wortu nanga den buku fu wi di e taki  fu Bijbel, so taki wi kan kisi trowstu nanga wini na ala sortu fasi.

¹⁴ Yesus gi wi wan moi eksempre te wi e luku a fasi fa a gebroiki Bijbel fu gi sma leri èn fu trowstu den. Wan leisi baka di a kisi wan opobaka, a sori ensrefi na tu fu den disipel fu en, dan a ’meki den frustan finifini san skrifi na ini Gado Buku’. Disi ben naki den ati trutru (Luk. 24:32). Fu di na apostel Paulus ben du muiti fu du leki Yesus, meki a „taki-go-taki-kon nanga den [arkiman] fu Gado Buku”. Na Bereya den arkiman „ben de klariklari fu teki leri, bika den ben teki a wortu nanga den heri ati èn den ben e ondrosuku Gado Buku finifini ibri dei” (Tori. 17:2, 10, 11). Iya, a fiti srefisrefi taki wi e leisi Bijbel ibri dei, so taki wi kan kisi wini fu san skrifi na ini èn na ini den tra buku fu wi di e taki fu Bijbel. Na so wi o kisi trowstu nanga howpu na ini den muilek ten disi!

Tra fasi fa wi kan kisi trowstu

15, 16. Sortu sani wi kan du fu yepi èn trowstu wi Kresten brada nanga sisa?

¹⁵ Wi kan yepi èn trowstu den Kresten brada nanga sisa fu wi na difrenti fasi. Fu eksempre, wi kan go bai sani na wenkri gi den wan di owru noso siki. Wi kan yepi trawan nanga wan tu wroko na oso, èn na so wi kan sori taki wi e prakseri den (Fil. 2:4). Boiti dati, wi kan prèise den tu gi den moi fasi di den abi, soleki lobi, deki-ati, nanga bribi.

¹⁶ Fu man trowstu den owruwan, wi kan go luku den ten na ten. Wi kan arki bun te den e fruteri wi den ondrofenitori fu den èn den blesi di den kisi fu di den e dini Yehovah. Fu taki en leti, disi kan gi wi denki-ati nanga trowstu tu! Te wi go na den wi kan leisi Bijbel noso den buku fu wi di e taki fu Bijbel. Kande wi kan taki fu na artikel di wi o luku na a Waktitoren-studie a wiki dati noso fu a pisi di wi o luku na a Gemeente Bijbelstudie a wiki dati. Wi kan luku wan fu den DVD fu na organisâsi nanga den tu. Boiti dati, wi kan leisi noso fruteri den tu fu wan tu moi ondrofenitori di de na ini wan fu den buku noso tijdschrift fu wi.

17, 18. Fu san ede wi kan de seiker taki Yehovah o yepi wi èn taki a o trowstu wi te wi e tai hori na en?

¹⁷ Efu wi si taki wan brada noso wan sisa fu wi musu kisi trowstu, wi kan begi Yehovah fu yepi en (Rom. 15:30; Kol. 4:12). Aladi wi e kisi fu du nanga ala sortu problema na ini a libi èn wi e du muiti fu trowstu trawan, wi kan abi a srefi overtoigi leki a psalm skrifiman di singi: „Trowe yu hebi na tapu Yehovah, dan en srefi o horibaka gi yu. Noiti a o gi pasi taki wan reti-ati sma degedege” (Ps. 55:22). Iya, ala ten Yehovah o de na wi sei fu trowstu wi èn fu horibaka gi wi di e tai hori na en.

¹⁸ Na ini owruten, Gado taigi den anbegiman fu en: „Na mi, iya, mi srefi o trowstu unu” (Yes. 51:12). Yehovah o du a srefi gi wi èn a o blesi wi te wi e du èn taki sani fu trowstu den wan di e sari. Awinsi wi abi a howpu fu libi na hemel noso na grontapu, ibriwan fu wi kan kisi trowstu fu den wortu di Paulus skrifi gi den tra salfu Kresten: „Wi Masra Yesus Krestes srefi nanga Gado wi Tata, ben lobi wi èn den gi wi trowstu fu ala ten. Den e meki taki wi kon abi wan moi howpu tu fu di den sori wi bun-ati. Sobun, meki den trowstu unu. Meki den gi unu deki-ati, so taki ala ten unu e du èn e taki san bun.”​—2 Tes. 2:16, 17.

Yu e memre disi ete?

• O bigi a preikiwroko fu wi de?

• Sortu sani wi kan du fu trowstu trawan?

• Fa Bijbel e sori taki Yehovah e trowstu en pipel?

[Aksi fu a tori disi]

[Prenki na tapu bladzijde 28]

Yusrefi e trowstu trawan?

[Prenki na tapu bladzijde 30]

Yonguwan nanga owruwan kan gi sma deki-ati