Yepi mansma fu go na fesi

„Now yu o bigin kisi sma libilibi.”​—LUK. 5:10.

1, 2. (a) San furu mansma du di den yere a boskopu fu Yesus? (b) San wi o luku na ini na artikel disi?

DI YESUS ben e preiki na Galilea wan leisi, en nanga den disipel fu en go na ini wan boto fu go na wan presi pe den ben kan de den wawan. Ma wan lo sma ben e kon na den baka. Den sma di kon a dei dati ben de „sowan feifi dusun man . . .  aladi den no teri den uma nanga den yongu pikin ete” (Mat. 14:21). Wan tra leisi wan bigi grupu sma kon na Yesus fu di den ben wani a dresi den èn den ben wani arki en. A leisi dati yu ben abi „fo dusun man . . . aladi den no teri den uma nanga den yongu pikin” (Mat. 15:38). Soleki fa a sori, dan furu mansma ben de na mindri den sma di kon na Yesus èn den ben lobi den sani di a ben e leri sma. Te wi e luku san a taigi en disipel Simon baka di den fanga bun furu fisi, dan wi kan frustan taki a ben fruwakti taki moro sma ben o arki a boskopu fu en. A ben taki: „Now yu o bigin kisi sma libilibi” (Luk. 5:10). Nanga den wortu disi Yesus ben wani sori taki a preikiwroko de leki fisiwroko. Sobun, nanga a preikiwroko den disipel ben o man yepi furu sma fu teki a tru bribi. Furu fu den sma disi ben o de mansma.

² Na ini a ten disi, mansma e arki a Bijbel boskopu di wi e preiki èn den wani du san den yere (Mat. 5:3). Ma furu fu den mansma no e meki muiti fu go na fesi. Fa wi kan yepi den? A tru taki Yesus no ben e preiki spesrutu gi mansma, ma a ben taki fu tori di ben prenspari gi mansma. Meki wi luku na eksempre fu en fu si fa wi kan yepi mansma na ini a ten disi. Wi o taki fu dri prenspari tori di e gi mansma broko-ede. Wi o luku fa wi kan yepi den mansma (1) di e broko den ede nanga moni, (2) di e frede san tra sma o denki fu den, èn (3) di e denki taki den no bun nofo.

Te wan man e broko en ede nanga moni

3, 4. (a) Nanga sortu sani furu mansma e broko den ede? (b) Fu san ede son mansma e denki taki moni nanga wan wroko prenspari moro a tru bribi?

³ Wan leisi wan leriman fu Wèt taigi Yesus: „Leriman, mi sa waka na yu baka awansi pe yu e go.” Ma dan Yesus taigi en: „A Manpikin fu libisma no abi nowan presi fu sribi.” Bijbel no e taki dati a man disi tron wan bakaman fu Yesus. A kan taki a ben e broko en ede pe a ben o tan èn fa a ben o nyan.​—Mat. 8:19, 20.

⁴ Furu mansma e denki taki a moro prenspari fu abi moni èn wan wroko leki fu studeri Bijbel èn fu du san Bijbel e taki. A moro prenspari gi den fu teki hei-skoroleri èn fu abi wan wroko di e pai furu moni. Den sabi taki den abi moni fanowdu fu man kisi den sani di den abi fanowdu ibri dei. Dati meki den e denki taki moni nanga wan wroko moro bun leki fu studeri Bijbel èn fu tron wan mati fu Gado. A kan taki den lobi san Bijbel e leri, ma ’den broko-ede fu a grontapu disi, èn a bedrigifasi fu gudu’ e puru den prakseri, so taki den no wani sabi moro (Mark. 4:18, 19). Ma Yesus ben yepi den disipel fu en fu si san moro prenspari èn wi kan teki na eksempre fu en.

5, 6. San yepi Andreas, Petrus, Yakobus nanga Yohanes fu bosroiti sortu wroko ben musu de a moro prenspari wroko gi den?

⁵ Andreas nanga Simon ben abi wan fisi bisnis pe den ben e wroko makandra. A srefi sani Yohanes, en brada Yakobus nanga den papa Sebedeyus ben e du. A fisi bisnis ben e drai so bun taki den ben kan teki tra man na wroko srefi (Mark. 1:16-20). A fosi leisi di Andreas nanga Yohanes yere fu Yesus, ben de di  Yohanes a Dopuman ben taki fu en. Sensi a ten dati, den ben de seiker taki den feni a Mesias. Andreas go fruteri en brada Simon Petrus a nyunsu disi èn a kan taki na a srefi sani Yohanes du nanga en brada Yakobus (Yoh. 1:29, 35-41). Den mun baka dati den fo man disi ben de nanga Yesus di a ben e preiki na Galilea, Yudea, nanga Samaria. Baka dati den fo disipel disi go du fisiwroko baka. Den ben lobi den sani di Yesus ben e leri sma, ma na a ten dati den no ben denki taki a preikiwroko ben musu de a moro prenspari wroko gi den.

⁶ Wan pisi ten baka dati Yesus kari Petrus nanga Andreas fu tron en bakaman èn fu tron „fisiman di e fanga libisma”. San den du? „Wantewante den libi den fisinèt èn den go waka na en baka.” A srefi sani Yakobus nanga Yohanes du. „Wantewante den gowe libi a boto èn a papa fu den, dan den go waka na Yesus baka” (Mat. 4:18-22). San yepi den man disi fu teki a bosroiti fu meki a preikiwroko tron a moro prenspari wroko gi den? Den ben prakseri bun fosi den teki a bosroiti disi. Wan tu mun na fesi, den man disi ben arki Yesus, den ben si den wondru di a du, den ben si fa a lobi retidu trutru, èn den si fa furu sma ben lobi den sani di a ben e leri den. Den sani disi meki taki a bribi di den ben abi na ini Yehovah ben kon moro tranga èn den ben frutrow moro na en tapu tu.

7. Fa wi kan yepi Bijbelstudie fu kisi a frutrow taki Yehovah man sorgu gi en pipel?

⁷ Fa wi kan teki na eksempre fu Yesus te wi wani yepi den Bijbelstudie fu wi fu frutrow na Yehovah tapu? (Odo 3:5, 6) A fasi fa wi e gi leri prenspari srefisrefi. Te wi e gi leri, wi kan meki den poti prakseri na a pramisi fu Gado taki a o gi wi furu blesi te wi e poti a Kownukondre na a fosi presi. (Leisi Maleaki 3:10; Mateyus 6:33.) Wi kan gebroiki difrenti Bijbeltekst fu sori den fa Yehovah e sorgu en pipel, ma wi no musu frigiti taki wi musu de wan eksempre gi den tu. Te wi e fruteri den fa Yehovah yepi wi, dan dati kan yepi den fu frutrow na tapu Yehovah tu. Wi kan fruteri den tu fu wan moi ondrofenitori di wi leisi na ini wan fu den buku fu wi. *

8. (a) Fu san ede a prenspari taki wan Bijbelstudie leri fu „tesi èn si taki Yehovah bun”? (b) Fa wi kan yepi wan Bijbelstudie so taki ensrefi ondrofeni taki Yehovah bun?

⁸ Efu wi wani taki wan Bijbelstudie kisi wan moro tranga bribi, dan wi no musu leri en nomo fu leisi Bijbel èn wi no musu fruteri en nomo fa Yehovah blesi trawan. Ensrefi musu ondrofeni tu taki Yehovah bun. A psalm skrifiman singi: „Un pipel, tesi èn si taki Yehovah bun” (Ps. 34:8). Fa wi kan yepi wan Bijbelstudie fu si taki Yehovah bun? Kon meki wi taki dati wan Bijbelstudie abi moni problema èn a e pruberi fu tapu nanga wan takru gwenti soleki fu smoko, dòbel, noso dringi sopi te fu drungu (Odo 23:20, 21; 2 Kor. 7:1; 1 Tim. 6:10). Efu wi leri en fu begi Gado meki a yepi en fu tapu nanga a takru gwenti, dan ensrefi o si taki Yehovah bun. Dan wi kan gi en deki-ati fu poti na anbegi fu Yehovah na a fosi presi na ini en libi. Wi kan leri en taki ibri wiki a musu  studeri Bijbel, a musu sreka gi den konmakandra èn a musu go na den. Te a Bijbelstudie si fa Yehovah e blesi a muiti di a e meki, dan en bribi o kon moro tranga èn a no o broko en ede so furu nanga tra sani soleki moni.

Te wan man frede san tra sma o denki fu en

9, 10. (a) Fu san ede Nikodeimus nanga Yosef fu Arimateya no ben wani sma fu sabi taki den ben lobi den leri fu Yesus? (b) Fu san ede son mansma na ini a ten disi no wani tron bakaman fu Krestes?

⁹ Son mansma no wani tron bakaman fu Krestes fu di den e frede san tra sma o denki fu den. Nikodeimus nanga Yosef fu Arimateya no ben wani sori taki den ben lobi den leri fu Yesus, fu di den ben frede san den tra Dyu ben o taki efu den ben kon sabi disi (Yoh. 3:1, 2; 19:38). Den ben abi leti fu frede. Den kerki fesiman ben kon abi so wan bita-ati gi Yesus taki den ben puru wan sma na ini a snoga efu a ben taki dati a e bribi na ini Yesus.​—Yoh. 9:22.

¹⁰ Na son presi a de so taki te wan man e poti tumusi furu prakseri na Gado, Bijbel, noso kerki, dan den sma na wrokope, den mati fu en, noso den famiri fu en e gens en. Na tra presi a kan tyari bigi problema kon te wan sma e taki dati a o teki wan tra bribi. Gi wan man di e wroko na ini a legre, wan man di de na ini politiek, noso wan man di abi wan prenspari posisi na ini a libimakandra, a kan muilek srefisrefi fu taki fu a bribi fu en, fu di sma kan gens en trutru. Fu eksempre, wan man na ini Doisrikondre taki: „Den sani di Kotoigi e preiki na tru sani. Ma efu mi ben o tron wan Kotoigi tide, tamara ala sma ben o sabi dati. San den sma na wrokope, na ini a birti, èn den tra sma di mi sabi ben o denki fu mi? Mi no denki taki mi ben o man teki en.”

11. Fa Yesus yepi en disipel fu no frede san tra sma e denki fu den?

¹¹ Aladi den apostel fu Yesus ben de deki-ati man, toku den ben e frede sma son leisi (Mark. 14:50, 66-72). Fa Yesus yepi den fu go na fesi aladi sma ben e gens den trutru? Yesus bigin sreka den gi a frufolgu di den ben o kisi bakaten. A taki: „Koloku fu unu te sma no lobi unu kwetikweti, te den e yagi unu, te den e gi unu porinen, èn te den e taki wan lo ogri fu unu fu di unu na bakaman fu a Manpikin fu libisma” (Luk. 6:22). Yesus warskow den taki sma ben o gi den porinen. Ma a taigi den taki den ben o kisi porinen ’fu di den na bakaman fu a Manpikin fu libisma’. A memre den tu taki Gado ben o horibaka gi den solanga den ben abi a frutrow taki a ben o yepi den èn gi den krakti (Luk. 12:4-12). Boiti dati, a ben taigi den nyun bakaman fu en taki den ben musu moksi nanga den tra disipel fu en, so taki den tron mati.​—Mark. 10:29, 30.

12. Fa wi kan yepi Bijbelstudie fu no frede san sma o denki fu den?

¹² Wi musu yepi Bijbelstudie tu fu no frede san tra sma o denki fu den. Nofo tron a moro makriki fu kakafutu gi wan tesi te yu e fruwakti dati (Yoh. 15:19). Fu eksempre, a kan taki den sma na wrokope noso tra sma no e agri  nanga a nyun bribi fu en, noso den abi wan tu aksi fu a bribi fu en. A bun fu tron wan mati fu wi Bijbelstudie èn wi kan yepi en tu fu kon leri sabi tra sma na ini a gemeente, spesrutu den wan di ben de na ini a srefi situwâsi leki en. A prenspari srefisrefi fu leri en fu preiki doronomo èn fu taki san de na tapu en ati. Disi kan yepi en fu kon krosibei na Gado èn fu meki Yehovah tron en stonbergi pe a kan feni kibri.​—Leisi Psalm 94:21-23; Yakobus 4:8.

Te wan man e denki taki a no bun nofo

13. Te wan man e firi leki a no bun nofo, dan fa dati kan tapu en fu go na fesi?

¹³ Son man kan denki taki den no man du san trawan na ini a gemeente e du. Kande den no man leisi bun, noso den no man taki bun san den e denki. Kande den e syen, noso den no lobi fu taki fu a bribi fu den na fesi ala sma. Dati meki a muilek gi den fu studeri Bijbel, fu gi wan piki na den konmakandra, noso fu preiki gi trawan. Wan Kresten brada taki: „Di mi ben yongu, mi ben abi a gwenti fu waka esi-esi go na wan doro, dan mi ben e du neleki mi ben naki na tapu a doro. Baka dati mi ben e waka gowe safri aladi mi ben e winsi taki nowan sma yere noso si mi. . . . Na prakseri mi ben musu prakseri nomo taki mi ben musu go preiki oso fu oso, dan mi ben e firi siki kaba.”

14. Fu san ede den disipel fu Yesus no ben man yepi wan boi di ben abi wan ogri yeye na en tapu?

¹⁴ Prakseri nomo fa den disipel fu Yesus ben e firi di den no ben man yepi a boi di ben abi wan ogri yeye na en tapu. Kande den ben denki taki den no ben o man du san Yesus ben wani den fu du. A papa fu a boi go na Yesus, dan a taki: „Masra, abi sari-ati nanga a boi fu mi, bika a abi fadonsiki. A siki srefisrefi. Ibri leisi a e fadon go na ini faya èn na ini watra. Mi tyari en gi den disipel fu yu, ma den no ben man meki a kon betre.” Ne Yesus puru na ogri yeye na a boi tapu èn a boi kon betre. Bakaten den disipel aksi Yesus: „Fu san ede wi no ben man yagi a yeye puru na a boi tapu?” Yesus piki den: „Fu di unu no abi nofo bribi. Bika fu tru mi e taigi unu: Efu a bribi fu unu pikin leki wan mosterd-siri, dan unu o man taigi a bergi disi: ’Opo fu dya go drape’, èn a bergi o opo ensrefi go drape. Noti sa de di unu no man du” (Mat. 17:14-20). Wan sma di abi bribi na ini Yehovah o man du sani di a denki taki a no man du. Ma efu a e frutrow soso tapu ensrefi, a no o man du son sani èn a kan taki a e firi leki a no bun nofo fu dini Yehovah.

15, 16. Fa wi kan yepi wan Bijbelstudie fu no firi leki a no bun nofo fu dini Yehovah?

¹⁵ Efu wan Bijbelstudie feni taki a no man dini Yehovah so bun leki trawan, wi kan gi en a deki-ati taki a no musu denki taki a musu du dati en wawan, ma a musu bribi taki Yehovah o yepi en. Petrus ben skrifi: „Saka unsrefi na ondro a bigi èn makti Gado, so taki a kan hei unu na a reti ten. Trowe ala un hebi na en tapu” (1 Petr. 5:6, 7). Wi musu yepi wan Bijbelstudie so taki a kan lobi Yehovah èn so taki a kan abi a winsi fu meki Yehovah tiri en. Disi wani taki dati a musu lobi san a e leri fu Bijbel èn a musu kisi „den fasi di a yeye e meki sma kisi” (Gal. 5:22, 23). Begi musu de wan tumusi prenspari sani gi en (Fil. 4:6, 7). A musu frustan taki na Gado o gi en a deki-ati èn a krakti fu man pasa iniwan tesi noso fu du iniwan wroko di a gi en fu du.​—Leisi 2 Timoteyus 1:7, 8.

¹⁶ Son Bijbelstudie abi yepi fanowdu tu fu leisi moro bun, fu taki moro bun noso fu no  frede fu taki nanga trawan. Trawan feni taki den no bun fu dini Gado fu di den du ogri, fosi den ben sabi Yehovah. Awinsi san na den problema, a o de wan bigi yepi gi den te wi e sori lobi gi den èn te wi abi pasensi nanga den. Yesus taki: „Gosontu sma no abi datra fanowdu, ma na siki sma abi datra fanowdu.”​—Mat. 9:12.

Yepi moro mansma fu leri sabi Yehovah

17, 18. (a) Fa wi kan yepi moro mansma te wi de na ini a preikiwroko? (b) San wi o luku na ini a tra studie-artikel?

¹⁷ Na Bijbel wawan abi wan boskopu di kan meki sma koloku trutru èn wi howpu taki moro nanga moro mansma teki a tru bribi (2 Tim. 3:16, 17). Ma fa wi kan miti moro mansma na ini a preikiwroko? Wi kan preiki moro na mofoneti, satra bakadina nanga sonde bakadina, noso na den fesadei te moro mansma de na oso. Kande wi kan aksi den ososma fu taki nanga den mansma na ini na oso. Efu wi kisi wan okasi wi kan taki nanga den mansma na wrokope. Efu wan sisa abi wan masra di no de na bribi, wi kan pruberi fu taki nanga en tu.

¹⁸ Te wi e preiki gi ala sma di wi e miti, wi kan de seiker taki den wan di e suku a tru bribi o arki. Meki wi abi a pasensi fu yepi ala sma di wani sabi moro fu Bijbel trutru. Ma fa wi kan yepi den mansma na ini a gemeente di dopu kaba fu go na fesi èn fu teki moro frantwortu na ini na organisâsi fu Gado? A tra artikel o taki fu a tori disi.

[Futuwortu]

San yu ben sa piki?

• Fa wi kan yepi mansma fu bosroiti san musu de a moro prenspari sani na ini den libi?

• Fa wi kan yepi nyun Bijbelstudie fu no frede san trawan o denki fu den?

• San kan yepi son sma fu no denki taki den no kan dini Yehovah so bun leki trawan?

[Aksi fu a tori disi]

[Prenki na tapu bladzijde 25]

Yu e suku okasi fu preiki a bun nyunsu gi mansma?

[Prenki na tapu bladzijde 26]

Fa yu kan sreka yu Bijbelstudie gi den tesi di a o kisi?