Fu san ede wi musu meki a yeye fu Gado tiri wi?

„Yu na mi Gado. Na soso bun a yeye fu yu e du gi mi. Meki a tyari mi.”​—PS. 143:10.

1. Te yu musu go na wan presi di yu no sabi, dan fu san ede a bun fu go nanga wan sma di sabi a presi?

KON meki wi taki dati yu musu go na wan presi di yu no sabi. A no de fu taki dati yu o go nanga wan sma di yu e frutrow èn di go na a presi dati kaba. Fu di a sabi sortu pasi a musu teki, a o man tyari yu èn yu no o lasi pasi te yu arki san a e taigi yu.

2, 3. (a) Sortu bigi krakti Yehovah gebroiki milyunmilyun yari pasa? (b) Fa wi du sabi taki a santa yeye kan tiri wi na ini a ten disi?

² Ma efu wi wani taki sani waka bun nanga wi, dan wi musu meki wan moro prenspari sani tyari wi noso tiri wi na ini a libi. A sani disi na wan krakti di wi no man si. San na a krakti disi? Wi e leisi fu en na ini den fosi tu vers fu Bijbel. A Bijbel buku Genesis e fruteri san Yehovah du milyunmilyun yari pasa. Drape skrifi: „Na a bigin Gado meki hemel nanga grontapu.” Di a du dati a gebroiki en bigi krakti fu meki sani. Genesis e taki moro fara: „A krakti fu Gado ben e buweigi abra den watra” (Gen. 1:1, 2). Sortu krakti Gado gebroiki? A gebroiki en santa yeye. Nanga a krakti dati a meki sani na a bigin. Wi de nanga tangi trutru taki Yehovah gebroiki en santa yeye fu gi wi libi èn fu meki tra sani.​—Yob 33:4; Ps. 104:30.

³ Wi sabi taki Gado gebroiki a krakti disi fu meki wi. Ma a krakti disi kan du wan tra sani na ini wi libi tu? Gado en eigi Manpikin taigi den disipel fu en taki dati kan. A taki: „A santa yeye . . . o leri unu san tru” (Yoh. 16:13). San na a santa yeye? Fu san ede wi musu meki a tiri wi?

San na a santa yeye?

4, 5. (a) Fu san ede son sma e denki taki a santa yeye na wan sma? (b) Fa yu ben o fruteri wan sma san na a santa yeye?

⁴ Kande yu taki nanga sma na ini a preikiwroko di e bribi taki Gado, Yesus nanga a santa yeye na wán. Den e bribi taki a santa yeye na wan sma di abi wan yeye skin èn di de a srefi leki Gado (1 Kor. 8:6). Dati meki na ini furu Bijbel den wortu santa yeye skrifi nanga bigi letter, sobun Santa Yeye. Ma a moi fu si taki son sma di vertaal Bijbel bosroiti fu no skrifi en nanga bigi letter, fu di den sabi taki na ini Bijbel den wortu „santa yeye” no abi fu du nanga wan sma. *

⁵ Ma san na a santa yeye dan? A Hebrew wortu di vertaal nanga „yeye” na Genesis 1:2, wani taki son leisi „winti” tu. Winti na wan krakti di wi no man si, ma wi man si san a e du. Na so a de tu nanga a santa yeye. A de wan krakti di wi no man si, ma wi man si san a e du. Wi no man fasi en èn a no de wan sma. A de a krakti fu Gado di a  kan poti na tapu sma noso sani. Nanga a krakti disi a kan meki sma noso sani du san a wani. A no tranga fu bribi taki so wan bigi krakti e kon fu a Santa Almakti Gado, a no so?​—Leisi Yesaya 40:12, 13.

6. Sortu prenspari sani David begi Yehovah?

⁶ Yehovah kan gebroiki en yeye te now ete fu tiri wi? A ben pramisi a psalm skrifiman David: „Mi o gi yu koni èn mi o sori yu a pasi di yu musu waka” (Ps. 32:8). David ben wani dati? Iya, bika a begi Yehovah: „Leri mi fu du yu wani, bika yu na mi Gado. Na soso bun a yeye fu yu e du gi mi. Meki a tyari mi” (Ps. 143:10). Wi musu wani taki Gado yeye tiri wi tu. Fu san ede? Meki wi luku fo sani.

Wi no man tiri wisrefi

7, 8. (a) Fu san ede wi no man tiri wisrefi sondro Gado? (b) Sortu eksempre kan yepi wi fu frustan fu san ede wi musu meki Gado tiri wi na ini na ogri grontapu disi?

⁷ A fosi sani di musu meki wi wani taki Gado yeye tiri wi, na fu di wi no man tiri wisrefi. Te wan sma e tiri wan trawan, dan a e tyari en pe a musu go noso a e sori en sortu pasi a musu waka. Ma Yehovah no meki wi fu tiri wisrefi. Fu di wi na sondusma, wi e meki furu fowtu te wi e pruberi fu tiri wisrefi. Gado profeiti Yeremia skrifi: „Yehovah, mi sabi heri bun taki a no de na wan libisma fu taki sortu pasi a o teki. A no de na wan libisma di e waka fu taki srefi pe a o poti en futu” (Yer. 10:23). Fu san ede disi de so? Gado meki Yeremia fruteri fu san ede. A taki: „Na ati na a moro bedrigi sani di de èn a ogri srefisrefi. Suma kan sabi en?”​—Yer. 17:9; Mat. 15:19.

⁸ Kon meki wi taki dati wan sma musu waka pasa na ini wan busi noso wan sabana di a no sabi èn pe ogri kan miti en. A no ben o de wan koni sani efu a ben o waka en wawan sondro wan sma fu tyari en noso sondro sani di kan yepi en fu feni en pasi. A kan lasi en libi efu a no sabi san fu du na den sortu presi dati èn efu a no sabi pe a musu waka fu man doro bun. Na so a de tu taki wan sma kan lasi en libi efu a e denki taki a sabi fa a musu libi na ini na ogri grontapu disi sondro taki Gado tiri en noso sori en san fu du. A wan-enkri fasi fa wi o man pasa den lasti dei fu na ogri grontapu disi, na fu aksi Yehovah san David aksi en: „Meki mi futu tan waka a pasi fu yu, so taki mi no naki futu” (Ps. 17:5; 23:3). Fa wi kan meki Gado tiri wi na a fasi disi?

9. Fa Gado yeye e tiri wi soleki fa yu kan si na tapu bladzijde 17?

⁹ Efu wi abi sakafasi èn wi de klariklari fu frutrow tapu Yehovah, dan a o gi wi en santa yeye fu tiri wi. Fa a krakti disi kan yepi wi? Yesus taigi den disipel fu en: „A  yepiman, sobun a santa yeye di a Tata o seni kon na ini mi nen, o leri unu ala sani èn a o meki unu memre ala den sani di mi taigi unu” (Yoh. 14:26). Te wi e begi èn studeri Gado Wortu, sosrefi den leri fu Krestes, dan a santa yeye o gi wi a koni fu frustan den dipi sani fu Yehovah, so taki wi kan gi yesi na en (1 Kor. 2:10). Boiti dati, te wan sani di wi no fruwakti pasa na ini wi libi, dan a santa yeye o yepi wi fu sabi san wi musu du. A o yepi wi fu memre san wi leri fu Bijbel èn a o yepi wi fu frustan fa wi kan gebroiki dati fu teki bun bosroiti.

Yesus ben e meki Gado yeye tiri en

10, 11. San Yesus ben sabi taki a santa yeye ben o du gi en? Fa a santa yeye yepi en?

¹⁰ A di fu tu sani di musu meki wi wani taki Gado yeye tiri wi, na fu di Gado ben e tiri en eigi Manpikin nanga a yeye dati. Yesus ben sabi taki a santa yeye ben o yepi en te a ben o de na grontapu, bika a ben sabi a profeititori disi: „A yeye fu Yehovah o de na en tapu. Fu dati ede a o koni, a o frustan sani bun, a o gi bun rai, a o tranga, a o abi furu sabi èn a o abi bigi lespeki gi Yehovah” (Yes. 11:2). A libi fu Yesus na grontapu no ben o makriki. Sobun, yu kan frustan taki a ben wani Gado yeye fu tiri en trutru!

¹¹ A profeititori disi fu Yehovah kon tru. Den Bijbel buku di e taki fu Yesus libi, e fruteri san pasa wantewante baka di Yesus dopu: „Di Yesus drai kon baka fu Yordan-liba, a ben furu nanga santa yeye èn a yeye tyari en go na ini a sabana” (Luk. 4:1). Drape Yesus ben e faste, a ben e begi, èn a ben e prakseri seryusu fu den sani di Yehovah tyari kon na krin gi en di a dopu. Soleki fa a sori, dan Yehovah ben sori en na a ten dati san a ben musu du èn a ben sreka en gi den sani di ben o pasa. Gado ben meki en yeye wroko tapu Yesus en frustan nanga en ati. Na so wan fasi a ben e tiri en prakseri èn a ben yepi en fu teki bosroiti. Dati meki Yesus ben sabi san fu du na ini ibri situwâsi èn a ben sabi heri bun san en Papa ben wani en fu du.

12. Fu san ede a prenspari taki wi aksi Gado fu meki en yeye tiri wi?

¹² Fu di Yesus ben sabi o prenspari Gado yeye ben de na ini en libi, meki a gi den disipel fu en deki-ati fu aksi Gado fu gi den santa yeye. Den ben musu meki a santa yeye tiri den na ini a libi tu. (Leisi Lukas 11:9-13.) Fu san ede wi musu aksi Gado fu meki en yeye tiri wi? Na fu di a kan kenki wi denki èn a kan yepi wi fu „denki soleki fa Krestes e denki” (1 Kor. 2:16; Rom. 12:2). Sobun, te wi e meki Gado yeye tiri wi na ini a libi, dan wi o denki soleki fa Krestes e denki èn wi kan du neleki en.​—1 Petr. 2:21.

 A yeye fu grontapu kan meki wi lasi pasi

13. San na a yeye fu grontapu èn san a e meki sma du?

¹³ A di fu dri sani di musu meki wi wani taki Gado yeye tiri wi, na taki sondro a tiri fu Gado yeye, a yeye fu grontapu o meki wi lasi pasi. Na ini a ten disi a yeye fu grontapu e tiri furu sma. A yeye disi abi so furu krakti na sma tapu, taki den e du sani di no e kruderi kwetikweti nanga den sani di a santa yeye e meki sma du. Na presi fu yepi sma fu denki soleki fa Krestes e denki, a yeye fu grontapu e meki sma denki èn du leki Satan, a tiriman fu grontapu. (Leisi Efeisesma 2:1-3; Titus 3:3.) Te wan sma e meki a yeye fu grontapu tiri en èn a e bigin du „den sani di a sondu skin e du”, dan sani no o waka bun gi en èn a „no o kisi a Kownukondre fu Gado”.​—Gal. 5:19-21.

14, 15. Fa wi man kakafutu gi a yeye fu grontapu?

¹⁴ Yehovah e gi wi san wi abi fanowdu fu man kakafutu gi a yeye fu grontapu. Na apostel Paulus ben taki dati wi musu ’kon tranga moro nanga moro, fu di wi de wán nanga Masra èn fu di a krakti fu en bigi srefisrefi . . . so taki wi o man kakafutu na a ogri dei’ (Ef. 6:10, 13). Nanga yepi fu en yeye, Yehovah e gi wi krakti fu kakafutu gi Satan te a e pruberi fu kori wi (Openb. 12:9). A yeye fu grontapu tranga èn wi no man wai pasi gi en krinkrin. Ma wi no abi fu meki a abi krakti na wi tapu. A santa yeye moro tranga èn a o yepi wi!

¹⁵ Na apostel Petrus ben taki disi fu den sma di gowe libi a Kresten bribi: „Fu di den gowe libi a reti pasi, meki sma kori den” (2 Petr. 2:15). Wi de nanga tangi trutru taki wi no kisi „a yeye fu grontapu, ma wi kisi a yeye di komoto fu Gado”! (1 Kor. 2:12) Te wi e meki Gado yeye tiri wi èn wi e gebroiki ala san Yehovah gi wi fu tan na tapu a reti pasi, dan wi sa man kakafutu gi a yeye fu na ogri grontapu disi di Satan e tiri.​—Gal. 5:16.

A santa yeye e meki wi du bun sani

16. Sortu fasi a yeye kan meki wi abi?

¹⁶ A di fu fo sani di musu meki wi wani taki Gado yeye tiri wi, na taki a e meki den wan di a e tiri, du bun sani èn den abi bun fasi. (Leisi Galasiasma 5:22, 23.) Suma fu wi no ben o wani sori moro lobi? Suma fu wi no ben o wani abi moro prisiri, freide nanga langa pasensi? Wi alamala ben sa wani sori moro switifasi, bun-ati, bribi, nanga safri-ati, a no so? Suma fu wi no ben o wani dwengi ensrefi moro? Gado yeye e meki wi abi bun fasi di e tyari wini kon gi wi, gi wi osofamiri, èn gi wi gemeente. Wi musu tan du muiti fu abi den fasi di a santa yeye e meki sma abi, fu di nowan sma kan taki dati a e sori ala den fasi disi ala ten.

17. Fa wi kan du moro muiti fu sori den fasi di a yeye e meki sma abi?

¹⁷ A de wan koni sani fu aksi wisrefi: A de so taki den sani di wi e taki èn den sani di wi e du e sori taki a santa yeye e tiri wi? Den e sori taki wi abi den fasi di a santa yeye e meki sma abi? (2 Kor. 13:5a; Gal. 5:25) San wi musu du te wi si taki wi abi yepi fanowdu fu man kisi son fasi di a yeye e meki sma abi? Wi kan du moro muiti fu meki a santa yeye tiri wi, so taki wi kan sori den fasi disi trutru. Dati meki wi musu gebroiki Bijbel nanga den tra buku fu wi fu ondrosuku ala den fasi disi wan-fru-wan. Dan wi o si fa wi kan sori den na ini wi aladei libi. Baka dati, wi musu du moro muiti fu sori den fasi disi. * Te wi e si fa Gado en yeye abi krakti tapu wi libi èn a libi fu wi Kresten brada nanga  sisa, dan wi o si krin fu san ede wi musu meki a santa yeye tiri wi.

Yu e meki Gado yeye tiri yu?

18. San wi kan leri fu a fasi fa Yesus ben e meki Gado yeye tiri en?

¹⁸ Bijbel e taki dati Gado en santa yeye ben abi furu krakti na Yesus tapu di a ben de wan libisma. A ben wani taki a santa yeye tiri en. Te a santa yeye ben sori en fu du wan sani, a ben e gi yesi èn a ben e du dati (Mark. 1:12, 13; Luk. 4:14). Na dati yu e du tu?

19. San wi musu du efu wi wani taki a santa yeye tiri wi?

¹⁹ Te now ete Gado yeye abi krakti tapu a frustan nanga na ati fu sma di wani taki a tiri den. Fa yu kan meki a yeye tiri yu, so taki yu tan waka na tapu a reti pasi? Begi Yehovah doronomo meki a gi yu en santa yeye èn meki a yepi yu fu gi yesi na a yeye. (Leisi Efeisesma 3:14-16.) Yu kan sori taki yu wani a santa yeye fu tiri yu te yu e studeri Bijbel di Gado meki sma skrifi nanga yepi fu a santa yeye (2 Tim. 3:16, 17). Gi yesi na a koni rai di skrifi na ini Bijbel èn meki a santa yeye sori yu san fu du. Te yu e du den sani disi, dan yu e sori taki yu e bribi trutru taki Yehovah na a sma di man tiri yu na a moro bun fasi na ini na ogri grontapu disi.

[Futuwortu]

Yu e memre den prenspari tori?

• Fa a santa yeye kan abi krakti tapu wi libi?

• San na fo sani di musu meki wi wani taki Gado yeye tiri wi?

• Fa yu kan meki a santa yeye tiri yu, so taki yu tan waka na tapu a reti pasi?

[Aksi fu a tori disi]

[Prenki na tapu bladzijde 15]

Gado yeye ben abi furu krakti tapu Yesus libi

[Prenki na tapu bladzijde 17]

Gado yeye abi krakti tapu a frustan nanga na ati fu sma di wani taki a tiri den