Gado yeye tiri sma na ini a fosi yarihondro èn na ini a ten disi

„Na a srefi yeye e meki den sma du ala den sani disi.”​—1 KOR. 12:11.

1. Fu sortu sani wi o taki na ini na artikel disi?

A PINKSTERFESA fu a yari 33 ben de wan span dei. Dati ben de a dei di Gado meki santa yeye kon na tapu den futuboi fu en! (Tori 2:1-4) Sensi a dei dati Gado bigin tiri en pipel na wan tra fasi. Na ini na artikel fosi a wan disi, wi luku wan tu fasi fa Gado yeye yepi den futuboi fu en fu du muilek sani èn fu du sani finifini soleki fa Gado ben taigi den. Ma fu san ede wi kan taki dati Gado ben e tiri den futuboi fu en na ini a fosi yarihondro tra fasi leki den wan fosi a ten fu den Kresten? Fa Gado santa yeye e tiri Kresten na ini a ten disi? Meki wi poti prakseri na den tori disi.

„Luku, mi na a umasrafu fu Yehovah!”

2. San Maria ben sabi fu a santa yeye?

² Maria ben de na ini a sodrokamra na ini  Yerusalem tu di Gado meki en santa yeye kon na tapu den futuboi fu en (Tori 1:13, 14). Ma sowan 30 yari na fesi, a ben si kaba sortu kefalek sani Yehovah en yeye kan du. Di Yehovah ben o seni en Manpikin fu hemel kon na grontapu, a poti a libi fu en Manpikin na ini a muru fu Maria. Na so Maria kon de nanga bere aladi a ben de wan nyunwenke ete. „Na santa yeye” ben meki a kon de nanga bere.​—Mat. 1:20.

3, 4. Sortu fasi fu denki Maria ben abi èn fa wi kan de leki en?

³ Fu san ede Maria kisi a bigi grani dati? Baka di na engel taigi Maria san Yehovah wani fu en, Maria taki: „Luku, mi na a umasrafu fu Yehovah! Meki sani pasa nanga mi soleki fa yu taki” (Luk. 1:38). A sani di Maria taki e sori sortu sma a ben de. A ben de klariklari fu du iniwan sani di Yehovah wani. A no aksi na engel san sma ben o denki fu en te den ben o si en nanga a bere èn a no ben frede taki Yosef no ben o wani trow nanga en moro. Nanga den wortu „mi na a umasrafu fu Yehovah”, Maria sori taki a ben e frutrow dorodoro tapu Yehovah.

⁴ Yu e firi son leisi taki a frantwortu di yu abi na ini Gado organisâsi hebi tumusi? A bun te ibriwan fu wi aksi ensrefi: ’Mi abi ala frutrow taki Yehovah o meki sani waka bun soleki fa a wani? A de so trutru taki mi de klariklari fu du iniwan sani di Yehovah wani mi fu du?’ Yu kan de seiker taki Gado e gi en yeye na den wan di e frutrow en nanga den heri ati èn di e gi yesi na en leki a Moro Hei Tiriman.​—Tori 5:32.

Santa yeye ben yepi Petrus

5. Fa a santa yeye yepi Petrus, fosi a Pinksterfesa fu a yari 33?

⁵ Neleki Maria, na apostel Petrus ben si nanga en eigi ai sortu kefalek sani Gado santa yeye du, fosi a Pinksterfesa fu a yari 33. Yesus ben gi en nanga den tra apostel a makti fu puru ogri yeye na sma tapu (Mark. 3:14-16). Wi kan frustan taki Petrus gebroiki a makti disi aladi Bijbel no e taki furu fu dati. Petrus ben si a krakti fu Gado tu di a ben man waka na tapu a Se fu Galilea, di Yesus kari en fu kon na en. (Leisi Mateyus 14:25-29.) A no de fu taki dati Petrus ben abi a frutrow taki a santa yeye ben o yepi en fu du bigi sani. Ma a no teki langa fosi a santa yeye ben o meki Petrus nanga den tra disipel du tra sani.

6. San Gado yeye meki Petrus du na a Pinksterfesa fu a yari 33 èn baka dati?

⁶ Na a Pinksterfesa fu a yari 33, Petrus nanga den tra sma drape kisi a makti fu taki den tongo fu den trakondre sma di ben kon na Yerusalem. Baka dati Petrus opo tanapu èn a bigin taki nanga den sma di ben kon makandra (Tori 2:14-36). Son tron Petrus ben e frede èn a ben e du sani sondro fu denki. Ma baka di a kisi santa yeye, a kisi deki-ati fu preiki aladi a ben e kisi frufolgu èn aladi sma ben taigi en fu tapu nanga a preikiwroko (Tori 4:18-20, 31). Gado gebroiki en yeye tu fu meki Petrus sabi spesrutu sani (Tori 5:8, 9). A santa yeye gi en krakti srefi fu gi wan sma wan opobaka.​—Tori 9:40.

7. Sortu sani di Yesus ben e leri sma, Petrus kon frustan, baka di a salfu nanga santa yeye?

⁷ Srefi fosi a Pinksterfesa Petrus ben man frustan furu sani di Yesus ben e leri sma (Mat. 16:16, 17; Yoh. 6:68). Ma fosi a Pinksterfesa a no ben e frustan son sani di Yesus ben e leri sma. Fu eksempre, Petrus no ben frustan taki Krestes ben o de wan yeye te a ben o kisi wan opobaka baka dri dei. A no ben e frustan tu taki a Kownukondre fu Krestes ben o de na ini hemel (Yoh. 20:6-10; Tori 1:6). Petrus no ben sabi taki libisma ben kan tron yeye èn taki den ben o man tiri na ini wan Kownukondre na hemel. Ma baka di Petrus salfu nanga santa yeye, a kisi a howpu fu go na hemel èn a ben man frustan den sani di Yesus ben taki fu a tori disi.

8. Sortu sani den salfuwan èn „den tra skapu” sabi?

 ⁸ Baka di den disipel fu Yesus kisi santa yeye, den kon frustan den sani di den no ben man frustan fosi. A santa yeye meki den skrifiman fu den Kresten Griki Buku fu Bijbel skrifi èn fruklari den tumusi moi sani di Yehovah abi na prakseri fu du, so taki wi kan kisi wini fu dati (Ef. 3:8-11, 18). Na ini a ten disi den wan di salfu nanga santa yeye èn „den tra skapu” kan ondrosuku èn frustan den srefi tru tori disi (Yoh. 10:16). Yu no de nanga tangi taki a santa yeye yepi yu fu sabi èn frustan den sani disi di de na ini Gado Wortu?

„Santa yeye kon na tapu” Paulus

9. Sortu sani Paulus ben man du nanga yepi fu a santa yeye?

⁹ Pikinmoro wán yari baka a Pinksterfesa fu a yari 33, Gado gi wan tra sma santa yeye. A sma dati ben de Saulus di sma kon sabi bakaten leki Paulus. Gado yeye meki a du sani di e tyari wini kon gi wi te now ete. A santa yeye meki na apostel Paulus skrifi 14 buku fu Bijbel. Neleki fa Gado yeye ben yepi Petrus, na so a ben yepi Paulus tu fu frustan èn skrifi krin san a wani taki fu libi na hemel èn fu abi wan skin di no man dede èn di no man pori. Nanga yepi fu a santa yeye Paulus ben man dresi sma, a ben man puru ogri yeye na sma tapu, èn a ben man gi dedesma wan opobaka srefi! Ma a ben kisi krakti fu a santa yeye fu du wan moro prenspari sani di futuboi fu Gado na ini a ten disi e du tu aladi den no kisi santa yeye na wan wondru fasi.

10. Sortu krakti a santa yeye ben abi tapu a fasi fa Paulus ben e taki?

¹⁰ Fu di „santa yeye kon na tapu” Paulus, meki a no ben frede fu opo taki teige wan towfruman di ben e gens en. Disi ben naki na ati fu a moro prenspari granman fu Siprus di ben e arki san Paulus ben e taigi a towfruman! A granman dati teki a tru bribi „fu di a ben fruwondru fu den leri fu Yehovah” (Tori 13:8-12). A krin taki Paulus ben sabi heri bun taki na soso Gado en yeye ben kan meki a taki nanga deki-ati san tru (Mat. 10:20). Bakaten a aksi a gemeente na Efeise fu begi gi en, so taki a ben ’man fruteri a bun nyunsu sondro fu frede’.​—Ef. 6:18-20.

11. Fa a santa yeye ben e tiri Paulus?

¹¹ A santa yeye no ben yepi Paulus nomo fu taki sondro frede. Son leisi a ben tapu en tu fu taki na son presi. Te Paulus ben e go na son presi fu preiki, dan na a santa yeye ben e tiri en. (Tori 13:2; leisi Tori 16:6-10.) Te now ete Yehovah e gebroiki en yeye fu tiri a preikiwroko. Neleki Paulus, na so ala futuboi fu Yehovah di e gi yesi na en e du muiti fu preiki fayafaya sondro fu frede. Na ini a ten disi Gado no e gebroiki en yeye fu tiri wi leki fa a ben du dati na a ten fu Paulus. Ma wi kan de seiker taki a e gebroiki en yeye te now ete fu „hari” reti-ati sma kon na a tru bribi.​—Yoh. 6:44.

„Difrenti fasi de fa a yeye e wroko”

12-14. A de so taki a yeye fu Gado e meki ala den futuboi fu Gado du a srefi sani? Tyari disi kon na krin.

¹² A no de fu taki dati den futuboi fu Yehovah  na ini a ten disi e kisi furu deki-ati te den e leisi fa Yehovah blesi a gemeente fu den salfuwan na ini a fosi yarihondro. Na a ten dati a santa yeye ben gi den Kresten a krakti fu man du spesrutu sani. Paulus ben taki fu den sani disi di a skrifi a gemeente na ini Korente. A taki: „We, sma man du difrenti sani, ma na wán yeye nomo de. Difrenti diniwroko de, ma toku na wán Masra nomo de. Difrenti fasi de fa a yeye e wroko, ma toku wán Gado nomo de di e yepi ala sma fu du ala den wroko disi” (1 Kor. 12:4-6, 11). Iya, a santa yeye kan meki difrenti futuboi fu Gado du difrenti sani soleki fa Gado wani. A „pikin ipi” fu Krestes nanga den „tra skapu” man kisi santa yeye (Luk. 12:32; Yoh. 10:16). Ma a no ala ten a e wroko na a srefi fasi tapu ibriwan fu den na ini a gemeente.

¹³ Fu eksempre, nanga yepi fu a santa yeye den e poti owruman na wroko (Tori 20:28). Ma a no ala sma di salfu nanga santa yeye na owruman na ini a gemeente. Sobun, san disi e sori? A e sori taki Gado yeye kan meki difrenti sma na ini a gemeente du difrenti sani.

¹⁴ A yeye di e meki den salfuwan frustan taki ’Gado teki den leki en manpikin’, na a srefi yeye di Yehovah gebroiki fu gi en wan-enkri Manpikin wan opobaka, so taki a ben kan libi na hemel sondro fu dede. (Leisi Romesma 8:11, 15.) Na a srefi yeye dati Yehovah gebroiki fu meki hemel nanga grontapu (Gen. 1:1-3). Yehovah gebroiki a srefi yeye dati fu gi Besaleyel spesrutu koni fu meki den sani fu a tabernakel. A gebroiki a srefi yeye fu gi Simson bigi krakti fu du ala sortu kefalek sani èn nanga yepi fu a srefi yeye dati Petrus ben man waka na tapu watra. Sobun, te wan sma e meki Gado yeye tiri en, dan dati no de a srefi leki te wan sma salfu nanga a yeye fu Gado. Te wan sma salfu nanga a santa yeye fu Gado, dan dati na wán fu den fasi fa a yeye fu Gado e wroko. Na Gado e bosroiti suma a wani salfu nanga en yeye.

15. Gado o salfu sma nanga santa yeye fu ala ten? Tyari disi kon na krin.

¹⁵ Ala ten a ben de so, taki Gado yeye meki den futuboi fu en du difrenti sani. Sma ben e kisi santa yeye kaba dusundusun yari fosi Gado bigin salfu sma nanga santa yeye. Gado bigin salfu sma nanga santa yeye na a Pinksterfesa na ini a yari 33, ma a no o du dati fu ala ten. Te fu kaba a no o salfu sma nanga santa yeye moro. Ma toku a o tan yepi en pipel nanga yepi fu en santa yeye, so taki den kan du en wani fu têgo.

16. San den futuboi fu Gado e du now nanga yepi fu en yeye?

¹⁶ Sortu spesrutu sani e pasa na grontapu nanga yepi fu Yehovah en santa yeye? Openbaring 22:17 e taki: „A santa yeye nanga a trowmisi e tan taki: ’Kon!’ Ibri sma di e yere disi, meki a taki: ’Kon!’ Ibri sma di watra e kiri en, meki a kon. Meki ibri sma di wani, kon dringi fu a watra di e gi libi èn di de fu kisi fu soso.” Gado yeye e meki Kresten na ini a ten disi tyari a boskopu disi gi „ibri sma di wani”, so taki den kan kisi a watra disi di e gi libi. Den salfu Kresten e teki fesi fu du a wroko disi. Ma den tra skapu e wroko makandra nanga den fu tyari a boskopu disi. Ala tu grupu e wroko nanga a srefi santa yeye fu klari a wroko disi. Ala tu grupu gi densrefi abra na Yehovah èn den sori disi di den dopu „na ini a nen fu a Tata, fu a Manpikin, èn fu a santa yeye” (Mat. 28:19). Den alamala e meki Gado yeye abi krakti tapu den libi, so taki den kan kisi den fasi di a yeye e meki sma kisi (Gal. 5:22, 23). Neleki den salfuwan, den tra skapu e meki Gado yeye yepi den. Nanga yepi fu Gado yeye den e du ala muiti fu libi wan krin libi soleki fa Gado wani.​—2 Kor. 7:1; Openb. 7:9, 14.

Tan aksi Gado fu gi yu santa yeye

17. Fa wi kan sori taki wi abi a yeye fu Gado?

¹⁷ Sobun, awinsi yu abi a howpu fu libi fu  têgo na hemel noso na grontapu, Yehovah kan gi yu „a krakti di bigi pasa marki” fu tan dini en te na a kaba, so taki yu kan kisi san a pramisi (2 Kor. 4:7). Kande sma o spotu yu te den e si yu e preiki a bun nyunsu fu a Kownukondre. Ma hori na prakseri taki ’efu sma e kosi yu fu Krestes nen ede, dan yu de koloku, fu di disi e sori taki yu abi a yeye fu Gado nanga a glori fu en’.​—1 Petr. 4:14.

18, 19. Fa Yehovah o yepi yu nanga yepi fu en santa yeye èn san yu wani du ala ten?

¹⁸ Nanga en heri ati Gado e gi santa yeye na den wan di e aksi en fu kisi dati trutru. A santa yeye e yepi yu fu du sani moro bun, èn a e meki yu kisi na angri tu fu du ala san yu man fu dini Gado. „Na Gado e wroko na ini unu. Èn na En e gi unu a wani nanga a krakti fu du den sani san e gi En prisiri” (Fil. 2:13, Nyun Testamenti). Efu wi kisi santa yeye èn efu wi du muiti fu „tan hori steifi na a wortu di e gi libi”, dan ’nanga frede èn nanga beifi wi o tan meki muiti fu kisi frulusu’.​—Fil. 2:12, 16.

¹⁹ Yu kan de seiker taki Gado yeye o yepi yu. Fu dati ede, meki muiti fu du ala san Yehovah e aksi yu fu du, du yu wroko moro bun èn aksi Yehovah fu yepi yu (Yak. 1:5). A o gi yu san yu abi fanowdu fu man frustan en Wortu, a o sori yu fa fu libi nanga den problema fu na aladei libi, èn a o yepi yu fu preiki a bun nyunsu. ’Tan aksi, dan yu sa kisi. Tan suku, dan yu sa feni. Tan naki na tapu a doro, dan a doro sa opo gi yu’ èn yu o kisi a santa yeye tu (Luk. 11:9, 13). Iya, tan aksi Yehovah fu de leki den fositen èn disiten futuboi fu en di tan gi yesi na en èn di meki en santa yeye tiri den.

Yu kan tyari disi kon na krin?

• Sortu fasi fu denki di Maria ben abi, wisrefi musu abi fu kan kisi blesi?

• Fa Gado yeye ben e tiri Paulus?

• Fa Gado yeye e tiri en futuboi na ini a ten disi?

[Aksi fu a tori disi]

[Prenki na tapu bladzijde 24]

Gado yeye ben yepi Paulus fu no frede fu taki nanga wan towfruman

[Prenki na tapu bladzijde 26]

Na ini a ten disi santa yeye kan yepi Kresten awinsi sortu howpu den abi