Mi kisi blesi fu di mi ben de klariklari fu tyari kenki kon

Soleki fa James A. Thompson fruteri

Mi gebore na a zuidsei fu Amerkankondre na ini 1928. Na a ten dati wan wèt ben de na Amerkankondre taki blakaman nanga wetiman no ben musu moksi. Efu yu no ben e gi yesi na a wèt dati, yu ben kan go na strafu-oso, noso moro ogri sani ben kan pasa nanga yu.

NA A ten dati na son presi na Amerkankondre, blakaman nanga wetiman ben musu de na ini aparti gemeente fu Yehovah Kotoigi. Yu ben abi sosrefi kring-opziener nanga distrikt-opziener gi den blakaman gemeente èn gi den wetiman gemeente. Na ini 1937 mi papa tron grupu-dinari fu a blakaman gemeente na ini Chattanooga na Tennessee. (Now den e kari a grupu-dinari, fesiman fu a skin fu owruman.) Henry Nichols ben de a grupu-dinari fu a wetiman gemeente.

Di mi ben yongu, mi ben lobi sidon na a balkon na bakasei fu wi oso fu arki mi papa nanga Brada Nichols te den ben e taki. Mi no ben e frustan ala san den ben e taki, ma mi ben lobi fu sidon nanga mi papa te den ben e taki fa den ben kan du a preikiwroko moro bun na ini a situwâsi disi pe blakaman nanga wetiman no ben musu moksi.

Fosi a ten dati wan sari sani ben pasa na ini wi famiri na ini 1930. Mi mama di ben abi 20 yari nomo, dede. Na so mi papa wawan ben musu sorgu gi mi sisa Doris di ben abi fo yari èn gi mi di ben abi tu yari na a ten dati. Mi papa no ben dopu tumusi langa, ma a ben go na fesi na ini na anbegi esi-esi.

Sma di ben de bun eksempre gi mi

Na ini 1933, papa miti wan lobi-ati Kresten sisa di ben nen Lillie Mae Gwendolyn Thomas. A no teki langa fosi den trow. Den ala tu ben de heri bun eksempre gi mi nanga Doris fu di den ben e dini Yehovah fayafaya.

 Na ini 1938 den meki bekènti taki den gemeente no ben o hori verkiezing moro fu poti owruman na wroko, ma na a edekantoro na ini Brooklyn na New York ben o du dati now. Den ben aksi ala gemeente fu Yehovah Kotoigi fu horibaka gi a bosroiti disi. Di wan tu sma na ini a gemeente fu Chattanooga no ben wani horibaka gi a bosroiti disi, Papa sori den krin taki a e horibaka gi a bosroiti fu na organisâsi nanga en heri ati. Ala ten mi mama ben e horibaka gi mi papa èn na eksempre fu den yepi mi te na a dei fu tide.

Dopu èn a furuten diniwroko

Na ini 1940 wan tu sma na ini a gemeente yuru wan bus, dan den go na a kongres di ben o hori na ini Detroit na Michigan. Wan tu fu den dopu na a kongres dati. Mi ben e preiki sensi mi ben abi feifi yari èn mi ben lobi fu go na preikiwroko. Dati meki sonwan fu den brada nanga sisa aksi densrefi fu san ede mi no dopu.

Di den aksi mi, mi taigi den: „Mi no e frustan ala sani di abi fu du nanga dopu.” Mi papa ben yere sani mi taki èn a fruwondru fu dati. Sensi a ten dati a du furu muiti fu yepi mi frustan san dopu ben wani taki èn fu san ede a prenspari. Fo mun baka dati, tapu 1 oktober 1940 di a ben kowru srefisrefi, mi dopu na ini wan kriki na wan boitipresi na Chattanooga.

Di mi ben abi 14 yari, mi bigin pionier te mi ben abi skoro fakansi. Mi ben e go preiki na ini pikin foto na Tennessee èn na a distrikt Georgia di ben de krosibei fu Tennessee. Mi ben gwenti fu opo fruku mamanten, dan mi ben e sreka wan sani fu nyan bakadina èn mi ben e teki a bus noso a loko fu siksi yuru mamanten di ben e go na a presi pe mi ben wani preiki. Mi ben e drai kon baka siksi yuru mofoneti. Nofo tron mi ben nyan a nyanyan fosi bakadina doro. Mi ben abi moni, ma mi no ben man go na ini den wenkri fu bai nyanyan fu di mi na wan blakaman. Wan leisi di mi go na ini wan wenkri fu bai wan ijsje, den taigi mi fu gowe. Ne wan weti uma di ben abi switifasi tyari wan ijsje kon gi mi na dorosei.

Bakaten di mi ben go na wan moro hei skoro, moro nanga moro sma na a zuidsei fu Amerkankondre bigin opo densrefi teige a seti disi taki blakaman nanga wetiman no ben musu moksi. Organisâsi soleki NAACP di ben e horibaka gi den reti fu blakaman, ben e gi den pikin na skoro deki-ati fu opo taki gi den reti fu den. Den ben e gi wi deki-ati fu tron memre fu na organisâsi disi tu. A skoro fu mi èn wan tu tra skoro pe soso blakaman pikin ben e go, ben wani taki ala pikin na skoro ben musu tron memre fu NAACP. Den ben e dwengi mi fu tron wan memre tu fu „horibaka gi wi eigi pipel”, soleki fa den ben taki. Ma mi weigri fu du dati èn mi fruteri den taki Gado no lobi a wan sma moro a trawan awinsi a sma na blakaman, wetiman noso wan tra ras. Dati meki mi e si Gado leki a sma di o lusu a problema disi.​—Yoh. 17:14; Tori 10:34, 35.

Syatu baka di mi kaba a skoro disi, mi bosroiti fu froisi go na New York. Ma di mi ben de na pasi mi go luku wan tu mati fu mi na ini Philadelphia na Pennsylvania. Mi ben leri sabi den na wan kongres. A gemeente na Philadelphia ben de a fosi gemeente pe mi ben si taki blakaman, wetiman nanga sma fu tra ras ben e kon makandra. Di a kring-opziener kon drape, a kari mi kon na wan sei, dan a taigi mi taki mi abi wan prati na a konmakandra di ben o kon. Disi meki en moro makriki gi mi fu teki a bosroiti fu tan drape.

Wan fu den sma di tron wan mati fu mi na ini Philadelphia, ben de wan yongu sisa di nen Geraldine White. Bakaten mi ben e kari en Gerri. A ben sabi Bijbel bun èn a ben sabi taki nanga den sma di a ben miti na ini a preikiwroko. San ben  prenspari gi mi, na taki a ben wani tron wan pionier neleki mi. Wi trow tapu 23 april 1949.

Wan kari fu go na Gilead

Sensi a bigin wi bosroiti fu go na a Gileadskoro, so taki wi ben kan go leki zendeling na wan tra kondre. Dati meki wi kenki wan tu sani na ini wi libi, so taki wi ben kan go na a Gileadskoro. Syatu baka dati den aksi wi fu go na Lawnside na ini New Jersey, dan wi go na Chester na ini Pennsylvania èn te fu kaba wi go na Atlantic City na ini New Jersey. Di wi ben de na ini Atlantic City wi ben trow tu yari kaba, sobun wi ben kan go na a Gileadskoro. Ma toku den no gi wi wan kari fu go. Fu san ede?

Syatu baka 1950 lanti ben seni kari furu yongu man fu go wroko leki srudati èn fu go feti nanga Korea. A gersi leki a lantikantoro na ini Philadelphia no ben lobi Yehovah Kotoigi fu di Kotoigi no e teki sei na ini feti. Bakaten wan krutuman taigi mi taki den FBI-skowtu ondrosuku mi libi fu luku efu trutru mi no e teki sei na ini feti èn den kon si taki disi de tru. Fu dati ede, tapu 11 yanuari 1952 krutubangi taki dati mi ben kan wroko leki preikiman èn mi no ben abi fu tron srudati.

Na ini augustus fu a yari dati, mi nanga Gerri kisi wan kari fu go na a di fu 20 klas fu a Gileadskoro di bigin na ini september. Di wi ben de na a skoro, wi ben e wakti fayafaya fu sabi pe den ben o seni wi go. Mi sisa Doris ben go na a di fu 13 klas fu a Gileadskoro èn den ben seni en go na Brasyonkondre. Ma mi nanga Gerri fruwondru di den seni wi fu du kringwroko na den blakaman gemeente na ini Alabama na a zuidsei fu Amerkankondre! Wi ben sari pikinso, bika wi ben wani go na wan tra kondre trutru.

A fosi gemeente pe wi go ben de Huntsville. Di wi doro drape wi go na a oso fu a Kresten sisa pe wi ben o tan. Di wi ben e puru wi lai, wi yere a e taki na a telefon: „Den pikin doro.” Wi ben abi 24 yari nomo, ma wi ben gersi moro yongu srefi. A heri pisi ten di wi ben e du kringwroko drape den tan kari wi „den pikin”.

Sma ben gwenti kari a zuidsei fu Amerkankondre a Bijbel Kontren, fu di pikinmoro ala sma drape ben abi furu lespeki gi Bijbel. Dati meki wi ben gwenti hori takimakandra na a fasi disi:

(1) Wi ben e taki syatu fu den problema na grontapu.

(2) Wi ben e sori den fa wan lusu o kon soleki fa Bijbel e taki.

(3) Wi ben e sori den san Bijbel e taki dati wi musu du.

Baka dati wi ben e gi den wan buku di ben e sori den san Bijbel e taki moro fu a takimakandra di wi ben abi. Fu di wi ben man hari a prakseri fu furu sma na a fasi disi, meki den aksi mi fu hori wan demo fu disi na a „Nieuwe-Wereldmaatschappij”-kongres di ben hori na ini 1953 na ini New York.

A no langa baka dati, na a waran ten fu a yari 1953, mi ben musu go leki distrikt-opziener na den kring fu den blakaman gemeente na a zuidsei fu Amerkankondre. A kontren pe wi ben  musu go ben de a heri pisi fu Virginia te na Florida èn te na a west-sei fu Alabama nanga Tennessee. Iya, distrikt-opziener nanga kring-opziener ben musu de klariklari fu du ala sortu sani. Fu eksempre, nofo tron wi ben musu tan na ini oso di no ben abi watra na inisei èn wi ben musu wasi na ini wan isri tobo na bakasei fu na onfu na ini a kukru. Koloku dati ben de a moro waran presi na ini na oso!

Fa wi ben du fu di wi na blakaman

Fu di wi ben musu du wi wroko na a zuidsei fu Amerkankondre, meki wi ben musu denki bun fosi wi du sani èn wi ben musu wroko nanga koni. Blakaman no ben kan go wasi krosi na den presi pe wetiman ben e go wasi krosi. Fu dati ede te Gerri ben go drape, a no ben e taki dati den krosi na fu en, ma na fu „Misi Thompson”. Dati meki furu sma ben e denki taki a ben e wroko gi „Misi Thompson”. Te den distrikt-opziener ben o sori a felem De Nieuwe-Wereldmaatschappij in actie, mi ben e bèl go na den presi di e yuru sani, dan mi ben aksi fu yuru wan bigi duku gi „Masra Thompson”. Na so mi ben kan go teki a duku gi „Masra Thompson” bakaten. Ala ten wi ben e sori lespeki gi den sma èn nofo tron wi ben kan du wi wroko sondro problema.

Wan tra problema ben de tu na a kontren dati. Den sma fu a zuidsei fu Amerkankondre nanga den wan fu a noordsei no ben e bumui nanga makandra. Wan leisi wan koranti skrifi taki James A. Thompson, Jr., fu a Watchtower Bible and Tract Society of New York ben o hori wan lezing na wan kring konmakandra. Son sma ben denki taki den wortu „of New York” ben wani taki dati na mi ben de fu New York. Wi ben yuru a zaal fu wan skoro fu hori a konmakandra, ma di den sma fu a skoro yere disi den broko a kontrakti di wi ben abi nanga den. Ma di mi fruteri den taki mi ben go na skoro na ini Chattanooga, den gi wi primisi fu hori wi kring konmakandra na ini a zaal.

Na a pisi ten fu 1955 a problema fu den blakaman nanga den wetiman ben kon moro bigi èn son tron den ben e du ogri nanga makandra srefi. Na wan tu distrikt kongres na ini 1954, son Kotoigi no ben lobi en srefisrefi taki nowan blaka brada ben hori wan lezing. Ma wi gi den blaka brada fu wi deki-ati fu abi pasensi. A yari baka dati den gi mi wan lezing na a kongres. Baka dati den ben e poti moro nanga moro blaka brada fu hori lezing na den kongres na zuidsei.

Bakaten blakaman nanga wetiman no ben e feti nanga makandra so furu moro na a zuidsei èn safrisafri yu ben kon abi gemeente pe blakaman nanga wetiman ben e moksi. Dati meki son preikiman ben musu go na tra gemeente, den kontren fu den gemeente ben kenki, èn den brada di ben e teki fesi ben kisi tra frantwortu. Son blaka brada nanga weti brada no ben lobi a nyun seti disi. Ma furu trawan ben agri nanga a nyun seti disi fu di den no lobi a wan sma moro a trawan, neleki wi hemel Tata. Fu taki en leti, furu fu den ben de bun mati fu makandra awinsi den blaka noso weti. Na ini wi famiri wi ben ondrofeni disi kaba na ini a pisi ten fu 1930 nanga 1940 di mi ben pikin ete.

Wi go na wan tra presi

Na ini yanuari 1969 mi nanga Gerri kisi a kari fu go na Gayana na ini Zuid-Amerika. Nanga prisiri wi teki a kari disi. Fosi dati wi go na Brooklyn na ini New York pe den leri mi fu teki fesi na ini a preikiwroko na Gayana. Wi doro drape na ini yuli 1969. Baka ala den yari di wi du a kringwroko  nanga a distriktwroko, disi ben de wan bigi kenki gi wi fu di wi ben o tan na wán presi nomo. Gerri ben de moro furu na ini a preikiwroko leki zendeling èn mi ben e wroko na a bijkantoro.

Mi ben e du ala sortu wroko drape. Mi ben e koti grasi, mi ben e prati den buku gi den 28 gemeente di ben de drape èn mi ben e skrifi brifi gi den tu fu seni go na a edekantoro na ini Brooklyn. Mi ben e wroko sowan 14 te 15 yuru wan dei. Wi ala tu ben musu wroko tranga, ma wi ben lobi en. Di wi doro na Gayana, 950 preikiman ben de drape, ma now 2500 preikiman de.

Wi ben lobi a waran weer nanga den switi froktu nanga gruntu, ma san ben gi wi trutru prisiri na fu leri den sma drape fu Gado Kownukondre. Den sma disi ben abi sakafasi èn den ben e angri fu kon sabi san Bijbel e leri. Nofo tron Gerri ben e hori 20 Bijbelstudie wan wiki èn furu fu den sma di wi studeri nanga den teki dopu. Bakaten sonwan fu den tron pionier nanga gemeente owruman èn trawan go na a Gileadskoro srefi fu tron zendeling.

Tra problema, spesrutu fu di wi kon owru

Na ini 1983 mi papa nanga mama na Amerkankondre ben abi yepi fanowdu. Mi, Doris nanga Gerri ben kon makandra fu taki fu a tori disi. Ne Doris di ben e dini 35 yari leki zendeling na ini Brasyonkondre, taki dati a ben o go fu sorgu gi den. A taki dati a moro bun efu wán zendeling libi a wroko fu en na presi fu tu. Di a papa nanga mama fu wi dede, Doris tan na ini Chattanooga èn a e dini leki spesrutu pionier drape.

Na ini 1995 datra taigi mi taki mi abi prostaatkanker èn mi ben abi fu go na Amerkankondre baka. Wi go tan na Goldsboro na ini North Carolina fu di a ben de na mindri Tennessee pe mi famiri e tan nanga Pennsylvania pe Gerri en famiri e tan. A kanker fu mi kon saka pikinso. Fu di wi no man du so furu moro, den brada taki dati wi kan du san wi man aladi wi na spesrutu pionier ete na ini a gemeente na ini Goldsboro.

Te mi e prakseri ala den 65 yari di mi du furuten diniwroko, mi de nanga tangi trutru taki Yehovah blesi mi nanga Gerri fu di wi ben de klariklari fu tyari kenki kon fu man dini en. David ben abi leti di a skrifi fu Yehovah: „Te sma tai hori na yu, dan yusrefi o tai hori na den.”​—2 Sam. 22:26.

[Prenki na tapu bladzijde 3]

Mi papa nanga Brada Nichols ben de bun eksempre gi mi

[Prenki na tapu bladzijde 4]

Mi nanga Gerri de fu go na a Gileadskoro, 1952

[Prenki na tapu bladzijde 5]

Baka a Gileadskoro den seni wi fu du kringwroko na a zuidsei fu Amerkankondre

[Prenki na tapu bladzijde 6]

Kring-opziener, distrikt-opziener nanga den wefi fu den e sreka fu go na wan distrikt kongres pe blakaman nanga wetiman ben o de makandra, 1966

[Prenki na tapu bladzijde 7]

A ben de wan prisiri fu dini leki zendeling na Gayana