No meki siki puru yu prisiri

FA A ben o de efu yu e firi brokosaka doronomo noso efu yu siki so te, taki yu e winsi ibri dei taki yu no ben abi fu pasa a dei? Kande yu e firi leki Yob srefi, di ben taki: „A moro bun fu dede leki fu libi na ini a pori skin disi” (Yob 7:15). Fa a ben o de efu yu ben o firi so ala ten, furu yari langa?

Na so a ben de nanga Mefiboset, a manpikin fu Yonatan di ben de a mati fu Kownu David. Di Mefiboset ben abi feifi yari, a ’fadon èn a kon lan’ (2 Sam. 4:4). Ma san ben meki en moro hebi gi en, na taki sma lei gi en bakaten taki a no ben wani horibaka gi Kownu. A sani dati meki taki a lasi wan pisi gron fu en. Ma a no ben meki a siki fu en, den lei di trawan fruteri fu en, èn den tra takru sani di pasa nanga en puru a prisiri fu en. Dati de wan moi eksempre gi wi.​—2 Sam. 9:6-10; 16:1-4; 19:24-30.

Na apostel Paulus na wan tra moi eksempre gi wi. Wan leisi a skrifi taki a ben abi wan problema di ben de leki ’wan maka na ini en skin’ (2 Kor. 12:7). Kande a maka disi ben de wan siki di a ben abi, noso kande a ben hati en taki son sma no ben e bribi taki en na wan trutru apostel. Ma awinsi sortu problema a ben abi, a ben musu feni wan fasi fu libi nanga a pen èn a sari di a ben e firi.​—2 Kor. 12:9, 10.

Na ini a ten disi son futuboi fu Gado abi siki di no man dresi èn di e meki den firi swaki ala ten. Trawan e firi brokosaka doronomo. Di Magdalena ben abi 18 yari, datra taigi en taki a abi a siki di den e kari SLE (systemic lupus erythematosus). A siki disi e meki taki a skin e feti nanga ensrefi, a e pori difrenti pisi na ini a sma en skin èn nofo tron a e kiri a sma. Magdalena taki: „Mi ben frede srefisrefi. Baka wan pisi ten mi kon siki moro nanga moro. Mi inibere bigin gi mi problema te mi ben e nyan, mi kisi soro na ini mi mofo èn mi kon siki na mi gorogoro tu.” Ma Izabela abi wan tra problema di sma no e si wantewante. A taki: „Sensi mi pikin, mi e firi brokosaka doronomo. A siki disi e meki taki wantronso mi e bigin bruya, dan mi no man blo bun èn mi e kisi krampu na mi bere. Dati meki ala ten mi weri.”

Fa fu libi nanga siki

Te wan sma abi wan siki noso a e firi swakiswaki ala ten, a kan denki taki nowan sani na ini a libi kan gi en prisiri. Te dati pasa nanga yu, teki yu ten èn luku bun fa yu libi de trutru. Kande a no makriki fu frustan taki son sani de di yu no man du. Magdalena taki: „A siki fu mi e kon ogri dei fu dei. Nofo tron mi weri tumusi fu komoto na bedi. Son leisi mi e firi pikinso bun, ma tra dei mi no man du noti. A sani disi e meki taki son tron mi no man du san mi ben abi na prakseri fu du. San e hati mi trutru, na taki mi no man du so furu moro gi Yehovah leki fosi.”

Zbigniew taki: „Mi abi rheuma, èn o moro mi e kon owru, o moro mi e kon swaki. A siki e  pori den skrufu fu mi skin. Son leisi te a pen hebi trutru, mi no man du srefi pikinpikin sani di sma e du ala dei. A sani dati e meki mi firi sari.”

Wan tu yari pasa, datra taigi Barbara taki a abi wan sweri na en edetonton èn a sweri dati e kon moro bigi. Barbara taki: „Sani bigin kenki na ini mi skin esi-esi. Mi no e firi fu du noti, mi e kisi ede-ati furu tron èn mi no man poti prakseri na wan sani tumusi langa. Fu di mi kon si taki mi no man du son sani moro, meki mi ben abi fu go prakseri tu sortu kenki mi musu tyari kon na ini mi libi.”

Ala den sma disi na sma di e dini Yehovah nanga den heri ati. A moro prenspari sani gi den, na fu du a wani fu en. Den e frutrow tapu Gado dorodoro, èn a e yepi den trutru.​—Odo 3:5, 6.

Fa Yehovah e yepi?

Te wan sani e moro wi fu wan langa pisi ten, dan wi no musu denki taki a sani dati e pasa nanga wi fu di Gado no feni wi bun (Sari 3:33). Prakseri san pasa nanga Yob aladi a ben de „wan bun man di lobi retidu” (Yob 1:8). Gado no e du ogri nanga sma fu tesi den (Yak. 1:13). Ala siki e kon fu di wi fosi afo Adam nanga Eva sondu, awinsi na siki di no man dresi, noso awinsi wi e firi brokosaka doronomo.​—Rom. 5:12.

Ma Yehovah nanga Yesus o yepi reti-ati sma ala ten (Ps. 34:15). Spesrutu na ini muilek situwâsi, wi e kon sabi Gado leki ’wi kibripe èn wi fortresi’ (Ps. 91:2). Te wi de na ini den sortu situwâsi disi èn wi no man feni wan lusu makriki, dan san kan yepi wi fu no lasi wi prisiri?

Begi: Neleki den reti-ati futuboi fu Gado fu owruten, yu srefi kan begi wi hemel Tata èn trowe yu hebi na en tapu (Ps. 55:22). Te yu e du dati, dan yu o kisi „a freide fu Gado di bigi moro iniwan sani di libisma man frustan”. A freide disi ’o kibri yu ati nanga yu frustan’, sobun yu o abi wan korostu firi (Fil. 4:6, 7). Fu di Magdalena e frutrow tapu Gado, meki a e begi doronomo èn dati e yepi en fu libi nanga a siki fu en di e meki a firi swaki. A taki: „Mi e taigi Yehovah ala san de tapu mi ati. Disi e meki taki mi no e broko mi ede so furu moro  èn mi kan prisiri baka. Now mi e frustan trutru san a wani taki fu frutrow tapu Gado ibri dei.”​—2 Kor. 1:3, 4.

Te yu e begi Yehovah, a kan gi yu krakti nanga yepi fu en santa yeye, en Wortu, nanga wi Kresten brada nanga sisa. Yu no musu fruwakti taki Gado o du wan wondru fu puru a siki di yu abi. Ma yu kan abi a frutrow taki a o gi yu a koni nanga krakti fu man libi nanga iniwan problema di yu abi (Odo 2:7). A o tranga yu fu di a o gi yu „krakti di bigi pasa marki”.​—2 Kor. 4:7.

Famiri: A kan de wan bigi yepi te yu famiri di e tan nanga yu e sori taki den lobi yu èn taki den e broko den ede nanga yu trutru. Ma hori na prakseri taki a e hati den tu fu si fa yu e pina. Kande den srefi e firi sari tu fu di den no man yepi yu. Toku den de nanga yu awinsi a no e go bun. Te yu e begi makandra nanga den, dan dati kan yepi yu fu firi korostu.​—Odo 14:30.

Luku san Barbara taki fu na umapikin fu en nanga den tra yongu sisa na ini a gemeente: „Den e yepi mi na ini a preikiwroko. A faya di den abi gi a preikiwroko e gi mi prisiri.” Zbigniew e warderi en trutru taki en wefi e yepi en. A taki: „A e du furu fu den wroko na oso. A e yepi mi tu fu weri mi krosi, èn nofo tron a e tyari mi tas te wi e go na den Kresten konmakandra èn na ini a preikiwroko.”

Kresten brada nanga sisa: Te wi de nanga wi brada nanga sisa, dan wi e kisi deki-ati nanga trowstu. Ma fa a de efu yu no man go na den konmakandra fu di yu siki? Magdalena taki: „Den brada nanga sisa na ini a gemeente e poti den konmakandra tapu cassette-lolo, so taki mi kan arki den bakaten. Nofo tron den e bèl mi tu fu aksi mi sortu tra sani den kan du fu yepi mi. Den e seni brifi tu fu gi mi deki-ati. Mi si taki den e prakseri mi èn taki den e broko den ede nanga mi, èn dati e yepi mi fu horidoro.”

Izabela di e firi brokosaka doronomo, taki: „Mi abi furu ’papa’ nanga ’mama’ na ini a gemeente di e arki mi èn di e pruberi fu frustan fa mi e firi. A gemeente de leki mi famiri èn drape mi e firi korostu èn prisiri.”

Den wan di e kisi tesi musu sorgu taki den no tan den wawan, ma den musu ’moksi  nanga trawan’. Den musu lobi fu de nanga den brada nanga sisa na ini a gemeente (Odo 18:1). Te den e du disi, den kan gi trawan furu deki-ati. Kande yu no wani fruteri den brada nanga sisa san yu abi fanowdu. Ma den o breiti te yu e taigi den krin san na yu problema. Disi o gi den na okasi fu ’sori lobi sondro fu hoigri’ (1 Petr. 1:22). Yu kan aksi den fu tyari yu go na den konmakandra, fu wroko nanga den na ini a preikiwroko, noso fu taki pikinso nanga den. A no de fu taki dati wi no musu dwengi den fu du sani gi wi, ma te den yepi wi, wi musu de nanga tangi.

No denki takru fu a situwâsi fu yu: A moro prenspari sani di yu musu hori na prakseri efu yu wani abi prisiri aladi yu abi wan siki di no man dresi, na taki nofo tron a de na yu efu yu wani abi prisiri. Te yu e prakseri soso sani di e meki yu firi sari, dan ala ten yu o denki takru fu a situwâsi fu yu. Bijbel e taki: „Wan sma di no e firi brokosaka esi man tyari a siki fu en, ma suma kan tyari den hebi fu wan sma di lasi-ati?”​—Odo 18:14.

Magdalena taki: „Mi e du ala muiti fu no poti tumusi furu prakseri na den problema fu mi. Mi e pruberi fu nyan bun fu den dei te mi e firi moro bun. A e gi mi deki-ati tu te mi e leisi ondrofenitori fu sma di tan dini Gado aladi den abi siki di no man dresi.” Izabela e kisi deki-ati te a e prakseri fa Yehovah lobi en èn fa Yehovah e warderi san a e du. A taki: „Mi e firi taki wan sma abi mi fanowdu èn dati e meki taki mi wani libi go doro. Mi abi wan moi howpu tu.”

Zbigniew taki: „A siki fu mi leri mi fu abi sakafasi èn fu gi yesi. A e leri mi fu du sani nanga koni èn fu si sani leki fa den de trutru. Boiti dati, a e yepi mi fu gi sma pardon nanga mi heri ati. Mi leri fu dini Yehovah nanga prisiri sondro fu sari misrefi. Fu taki en leti, mi kisi deki-ati fu du moro gi Yehovah.”

No frigiti taki Yehovah e poti prakseri na yu trutru èn a e si fa yu e horidoro. A sabi fa yu e firi èn a e broko en ede nanga yu. A no o ’frigiti a wroko di yu du nanga a lobi di yu sori gi a nen fu en’ (Hebr. 6:10). Yu kan bribi a pramisi di a e gi ala sma di abi lespeki gi en. A taki: „Mi no o libi yu kwetikweti èn noiti mi o gowe fu yu.”​—Hebr. 13:5.

Efu yu e firi brokosaka son leisi, prakseri a moi howpu di yu abi fu libi na ini wan nyun grontapu. Heri esi a ten o doro te yu eigi ai o si fa Gado Kownukondre o tyari blesi kon gi sma na grontapu!

[Faki/​Prenki na tapu bladzijde 28, 29]

Den e tan preiki aladi den abi wan siki di no man dresi

„Now mi abi wan sma fanowdu fu yepi mi te mi e waka. Sobun, mi wefi, wan brada, noso wan sisa e yepi mi te mi e waka na ini a preikiwroko. Fu man taki nanga sma, mi e pruberi fu hori na prakseri san mi o taki èn sortu Bijbeltekst mi o gebroiki.”​—Jerzy, di e siki na en ai.

„Mi e preiki nanga yepi fu telefon èn mi e skrifi brifi fu preiki gi sma. Te den wani sabi moro, dan mi e skrifi den doronomo. Di mi ben de na ati-oso, dan ala ten mi ben e poti mi Bijbel nanga wan tu buku na sei mi bedi. Dati yepi mi fu bigin furu moi takimakandra nanga sma.”​—Magdalena, di abi wan siki di den e kari SLE.

„Mi lobi preiki oso fu oso, ma te mi no man, mi e bèl sma fu preiki gi den.”​—Izabela, di e firi brokosaka doronomo.

„Mi lobi fu tyari gobaka èn fu yepi trawan nanga Bijbelstudie. Te mi e firi pikinso bun, dan mi e go preiki oso fu oso.”​—Barbara, di abi wan sweri na en edetonton.

„Te mi e go na ini a preikiwroko, mi e tyari wan pikin lekti tas. Mi e tan na ini a preikiwroko solanga mi man tyari a pen.”​—Zbigniew, di abi rheuma.

[Prenki na tapu bladzijde 30]

Yonguwan nanga owruwan kan gi trawan deki-ati