Yu e memre disi ete?
Yu e memre disi ete?
Yu e memre den tori di yu leisi na ini den lasti Waktitoren di kon na doro? We, luku efu yu kan gi piki tapu den aksi di e kon now:
• Suma ben de Olivétan èn fu san ede a bun fu sabi sortu wroko a du?
Na a Fransiman Pierre Robert den ben e kari Olivétan. Na ini a di fu 16 yarihondro di sma ben e opo densrefi teige kerki, a man disi vertaal Bijbel na ini Fransitongo. A ben gebroiki a wortu „opziener” na presi fu a wortu „beskopu” èn a wortu „gemeente” na presi fu a wortu „kerki”. Na difrenti presi a ben skrifi „Yehovah”, sobun a nen fu Gado.—1/9, bladzijde 18-20.
• Gado ben taigi den Leifisma: „Mi na a famirigudu fu unu.” San den wortu disi wani taki?
Ibriwan fu den tra lo fu Israel ben kisi wan pisi gron leki famirigudu, ma a „famirigudu” fu den Leifisma ben de Yehovah (Num. 18:20). Na presi fu kisi wan pisi gron na ini a kondre, den kisi a grani fu du wan spesrutu wroko. Ma ala ten Yehovah sorgu taki den kisi san den ben abi fanowdu na ini a libi. Na ini a ten disi, den sma di abi a grani fu du wan wroko di e meki Kownukondre afersi go na fesi, kan de seiker taki den o kisi den sani di den abi fanowdu na ini a libi.—15/9, bladzijde 7, 8, 13.
• Fa wi du sabi o ten den Babilonsma teki owruten Yerusalem abra?
Historia skrifiman e fruteri difrenti sani fu den kownu fu Babilon èn fu a ten di den ben e tiri, ma furu fu den sani disi no e kruderi nanga makandra. Ma sabiman e agri taki Kownu Sirus II teki Babilon abra na ini 539 fosi Krestes. A yari disi na wan prenspari yari na ini a historia. Den Dyu ben kon fri èn den ben kan drai go baka na den mamakondre. Den doro drape na ini a yari 537 fosi Krestes. Bijbel e taki dati den ben de na ini katibo 70 yari langa. Sobun, a musu fu de so, taki den Babilonsma teki Yerusalem abra na ini 607 fosi Krestes (2 Kron. 36:21, 22; Yer. 29:10; Dan. 9:1, 2).—1/10, bladzijde 26-31.
• San kan yepi wan Kresten fu bosroiti efu a sani di a wani du fu abi prisiri, na wan bun sani?
Te yu wani sabi efu a sani di yu wani du fu abi prisiri, na wan bun sani èn wan sani di e plisi Gado, dan a bun fu aksi yusrefi: San na a sani di mi wani du? O ten mi o du dati? Nanga suma mi o de?—15/10, bladzijde 9-12.
• Fu san ede a fowtu fu puru bere?
A libi santa gi Gado èn a e si wan pikin na ini en mama bere leki wan sma di de na libi (Ps. 139:16). A Wèt di Gado gi Moses ben sori taki wan sma ben musu kon na fesi krutu efu a ben meki taki wan pikin di de na ini en mama bere ete kisi mankeri. Sobun, efu wan sma kiri wan pikin di no gebore ete, dan a sma dati na wan kiriman (Eks. 21:22, 23).—1/11, bladzijde 6.
• Fa a tori fu Odo 7:6-23 kan yepi wi fu kakafutu gi a firi fu luku porno?
A tekst dati e taki fu wan yonkuman di ben e waka na ini wan strati pe wan huru-uma ben e tan èn a ben sabi dati. Ne na uma kori en. Na ini a ten disi wi musu luku bun taki wi no go na presi tapu Internet pe wi kan si prenki noso felem di e sori sani di abi fu du nanga seks. A prenspari srefisrefi fu begi Gado fu yepi wi, fosi wi si den sortu sani disi tapu Internet.—15/11, bladzijde 9, 10.
• Fa wi du sabi taki grontapu o de ete baka 2012?
Wan owruten Maya kalender di e sori difrenti pisi ten, taki fu a kaba fu grontapu. Son sma e bribi taki a kalender disi e sori taki grontapu o kisi pori na ini a yari 2012. Ma a sani disi no kan, fu di Yehovah meki grontapu fu sma libi na tapu. Bijbel e taki dati grontapu o tan fu ala ten (Preik. 1:4; Yes. 45:18).—1/12, bladzijde 10.
