Na ini Louisville, na Kentucky, Amerkankondre, ala sma bigin luku a furuten preikiman Charlotte White di a waka kon nanga wan kofru di abi banti.

DISI pasa na ini a yari 1908. A no de fu taki dati furu sma na ini a foto ben e luku Sisa White di ben e lolo en Dawn Mobile. Disi ben de wan nyun sortu kofru di ben abi banti. „Furu sma ben e taki fu a kofru” na so a taki, „èn ala sma ben e luku mi”.

Den Bijbelstudenti, soleki fa sma ben kari Yehovah Kotoigi fosi, ben frustan o prenspari a de fu fruteri tra sma den moi tru tori di den kon sabi fu di den studeri Bijbel fayafaya. Furu fu den Bijbelstudenti leri den tru tori fu Bijbel nanga yepi fu den buku di ben nen Millennial Dawn (bakaten den buku disi kisi a nen Studies in the Scriptures). Den Kresten di ben man go na ala sei èn di ben wani du dati, ben e prati den buku disi gi iniwan sma di ben angri fu leisi den. Den ben e kari den buku disi „Yepisani gi Bijbelstudenti” èn den ben e go na difrenti foto, dorpu, nanga boitipresi fu prati den gi sma.

Na ini 1908, Sisa White nanga tra fayafaya Kownukondre preikiman ben e prati den buku disi. Den siksi Millennial Dawn buku ben kostu 1,65 Amerkan dala nomo. Na presi fu gi den ososma den buku wantewante, den preikiman ben e teki den nen fu den sma di ben wani den buku èn bakaten den ben e drai go baka fu tyari den buku gi den. Nofo tron den ben e du dati te ala sma ben kisi moni kaba. Den Kotoigi ben aksi soso a moni di ben de fanowdu fu druk den buku. Wan man di ben gens a wroko fu wi ben krutu srefi taki sma ben e gi so pikinso moni te den ben kisi den buku disi!

Malinda Keefer e memre taki son leisi sma ben e aksi en sowan tu hondro noso dri hondro buku wan  wiki. Ma fu di so furu sma ben wani den buku disi, meki wan problema kon. A di fu siksi buku ben abi 740 bladzijde kaba! „Feifitenti buku ben wegi 18 kilo” na so The Watch Tower ben taki. A sani disi „ben hebi tumusi”, spesrutu gi den sisa.

Fu man meki en makriki gi den preikiman fu tyari den buku gi sma, Brada James Cole meki wan sortu pikin wagi gi den kofru. A ben fasi wan tu isri tiki na so wan fasi taki yu ben kan fow en kon moro pikin èn a poti tu banti gi den. Now Brada James Cole no ben abi fu syow someni hebi dosu nanga buku moro. A taki: „Mi no o broko mi baka.” Na a kongres di den Bijbelstudenti hori na ini 1908 na ini Cincinnati, Ohio, Brada Cole sori den tra brada a nyun sani di a meki, èn ala sma ben breiti nanga dati. Na ala tu sei fu den isri tiki fu a wagi, wan knopo ben de pe a nen Dawn-Mobile ben skrifi na tapu, fu di moro furu na den Millennial Dawn buku den preikiman ben e tyari na ini a kofru. Den brada nanga sisa ben musu leri waka nanga a kofru disi, ma fosi yu denki den ben sabi tyari a kofru nanga wán anu nomo. Na so den ben man tyari moro buku na ini wan kofru. Yu ben kan poti a kofru moro hei noso moro lagi, èn den banti ben e lolo srefi na tapu santi pasi. Baka a preikiwroko, den preikiman ben kan fow den rubber banti kon na seisei fu a kofru, so taki den ben kan opo en te den ben e waka go na oso, noso te den ben e sidon na ini wan wagi.

Den sisa di ben e du furuten diniwroko ben kisi wan Dawn-Mobile sondro taki den abi fu pai gi dati. Tra sma ben musu pai 2,50 Amerkan dala gi wan. Sisa Keefer di yu e si tapu a prenki dyaso ben sabi tyari a Dawn-Mobile so bun nanga wán anu, taki a ben man tyari wan tra tas nanga buku na ini en tra anu. Na wan fu den foto na ini Pennsylvania na Amerkankondre, pe furu sma ben e wroko na ini mijn, Sisa Keefer ben feni furu sma di ben wani buku. Dati meki a ben e abra wan broki dri noso fo leisi wan dei fu tyari den buku gi den sma.

Na ini 1987, wan man di e frei opolani meki wan kofru nanga banti, èn na ini a ten disi yu kan si furu sma nanga den kofru dati na opolanipresi noso na strati pe furu sma e waka. Ma sowan 100 yari pasa, fayafaya Bijbelstudenti ben abi a Dawn-Mobile kaba. Den ben lobi en te sma ben e luku fa den ben e waka nanga a Dawn-Mobile na ini a preikiwroko fu prati den tumusi moi tru tori fu Bijbel.

[Prenspari pisi na tapu bladzijde 32]

Sisa Keefer ben e abra wan broki dri noso fo leisi wan dei fu tyari buku gi sma

[Prenspari pisi na tapu bladzijde 32]

Preikiman no ben abi fu syow den hebi buku moro