Den preiki Gado Wortu sondro fu frede!

Tru Kresten abi deki-ati trutru èn den no frede fu du a wroko fu den awansi sma ben e gens den. Wi e si disi te wi e leisi a buku ’Grondig getuigenis afleggen’ van God’s Koninkrijk („Gi kotoigi finifini” fu a Kownukondre fu Gado) èn a buku Jehovah’s Getuigen ​— Verkondigers van Gods Koninkrijk (Yehovah Kotoigi​—Preikiman fu Gado Kownukondre). Neleki den Kresten brada nanga sisa fu wi na ini a fosi yarihondro, wi e begi Yehovah fu gi wi en yeye èn fu yepi wi fu fruteri a boskopu fu en sondro frede.​—Tori 4:23-31.

Wan brada ben skrifi fu a preikiwroko fu wi na a pisi ten fu a Fosi Grontapufeti: „Den futuboi fu Gado ben e prati a buku The Finished Mystery fayafaya. A buku disi ben de a di fu seibi buku fu Studies in the Scriptures. Noiti ete someni fu wan buku prati na ini wan syatu pisi ten. Na ini 1918, Kownukondre Nyunsu nr. 1 kon na doro. Baka dati, yu ben abi Kownukondre Nyunsu nr. 2 di ben fruteri fu san ede lanti no ben wani taki wi prati a buku The Finished Mystery. Baka dati, yu ben abi Kownukondre Nyunsu nr. 3. Den salfu brada nanga sisa ben prati den buku disi na ala sei. A ben teki bribi nanga deki-ati fu man prati den Kownukondre Nyunsu.

Na ini a ten disi, nyun Kownukondre preikiman e kisi leri fa fu preiki, ma a no ala ten disi ben de so. Wan Pôlsu brada na ini Amerkankondre e memre a fosi leisi di a go na ini a preikiwroko na ini 1922. A taki: „Mi no ben sabi fa fu pristeri wan buku gi wan sma èn mi ben man taki pikinso Ingrisitongo nomo. Ne mi doro na wan kantoro fu wan datra. Mi naki na tapu a doro èn wan ati-oso zuster opo a doro. Noiti mi o frigiti a sani disi. Mi ben breiti, ma mi ben e frede tu. Di mi opo mi tas, ala den buku fadon leti na fesi na ati-oso zuster. Mi no sabi san mi taki, ma toku mi ben man libi wan buku gi en. Di mi ben gowe fu drape, mi ben abi moro deki-ati èn mi ben firi taki Yehovah blesi mi. A dei dati, mi ben man libi furu buku gi sma na ini a pasi dati pe furu bisnis kantoro ben de.”

Wan sisa taki: „Na a pisi ten fu 1933, furu brada ben abi wagi nanga bigi boksu di den ben e gebroiki fu prati a Kownukondre boskopu.” Wan leisi en nanga wan Kotoigi trowpaar ben e preiki na a bergikontren fu California, na Amerkankondre. A fruteri: „A brada ben rèi wan fu den sortu wagi disi go na tapu den bergi èn wi ben tan na ondrosei na ini a foto. Di a bigin prei a boskopu a ben gersi leki a boskopu ben kon fu hemel. Den sma na ini a foto ben suku na ala sei fu pe a boskopu komoto, ma den no ben man feni noti. Baka di a brada kaba prei a boskopu, wi go na den sma fu preiki gi den. Mi ben wroko nanga tu sma di ben abi den sortu wagi disi di ben abi bigi boksu, èn mi kan taigi yu taki furu sma no ben wani yere a boskopu di wi ben e prei. Ma toku den ben abi fu yere den lezing disi di wi ben e drai, fu di den boksu ben de so tranga taki den ben e yere a boskopu te na ini den oso srefi. Wi kan si taki ala ten Yehovah  gebroiki den yoisti sani na a yoisti ten fu prati a boskopu. Wi ben musu abi deki-ati fu man prati a boskopu na so wan fasi, ma ala ten wi ben abi bun bakapisi èn wi ben man gi Yehovah nen glori.”

Na ini a pisi ten fu 1930 nanga 1940 wi ben e gebroiki gramofon na ini a preikiwroko. Disi na wan sortu masyin pe yu ben kan drai plaat di ben abi Bijbel-lezing na tapu. Wan Kresten sisa e memre fa a ben de. A taki: „Wan leisi wan yongu sisa ben e preiki oso fu oso nanga a gramofon. Di a bigin drai a plaat na wan sma en mofodoro, a man fu na oso ati bron so te, taki a skopu a gramofon puru na a stupu. Ma nowan fu den plaat broko. Dri man di ben e nyan na ini wan truck na strati ben si san pasa. Ne den kari a sisa fu kon drai a plaat gi den èn den teki wan tu buku fu en tu. Dati ben meki ala sani kon bun baka.” Wan sma ben musu abi deki-ati fu man pasa den sortu tesi disi.

A srefi sisa taki tu: „Mi e memre di wi bigin prati tijdschrift na strati na ini 1940. Fosi dati, wi ben e waka na ini wan grupu fu prati a boskopu. Den brada nanga sisa ben e waka na ini wan rij na sei strati nanga bigi bord pe sani ben skrifi soleki ’Kerki na wan trapu èn wan kruka bisnis’ èn ’Dini Gado nanga Krestes a Kownu’. Na a srefi ten den ben e prati traktaat èn den sma no ben abi fu pai gi dati. Wan sma ben musu abi deki-ati fu man du a preikiwroko na den fasi disi, ma den ben meki sma kon sabi san na a nen fu Yehovah èn suma na en pipel.”

Wan tra sisa taki: „A ben muilek srefisrefi fu prati tijdschrift na strati na ini den pikin foto. Disi ben de so spesrutu te furu sma ben e gens den Kotoigi. . . . Wi ben musu abi furu deki-ati fu go tanapu na wan uku fu wan strati aladi wi ben e hori den tijdschrift na ini wi anu, dan wi ben e taki bun tranga san wi ben leri fu taki na den sortu okasi disi. Ma aladi a preikiwroko ben muilek so, toku wi ben e du dati ala satra èn wi no ben misi wan dei makriki. Son leisi den sma ben abi switifasi. Ma son leisi sma di ben de nanga atibron ben e kon na ini grupu fu tapu skreki gi wi èn wanwan leisi wi ben abi fu waka gowe safri so taki den no du wi ogri.”

Yehovah Kotoigi ben kisi furu frufolgu na a pisi ten fu a di fu Tu Grontapufeti, ma toku den tan du den wroko sondro fu frede. Fu 1 december 1940 te go miti 12 yanuari 1941 den Kotoigi ben abi wan spesrutu preikiwroko di ben teki 43 dei langa. Na ini den dei dati sowan 50.000 preikiman na ini Amerkankondre prati sowan aiti milyun pikin buku. Den ben kari a pisi ten dati a „Deki-ati” Preikiwroko Ten.

Furu fu den owruwan na ini Gado en organisâsi e memre heri bun fa den ben musu abi deki-ati fu du son sani. Sonwan fu den e memre taki omeni yari langa, den ben gwenti taki wan sani di ben sori o furu deki-ati den ben abi. Den ben lobi taki ’Preiki fayafaya te na a kaba!’ Wi no sabi sortu tra sani wi o du ete fu tyari a boskopu di Gado gi wi fu tyari fosi na ogri grontapu disi kon na wan kaba. Ma nanga a yepi fu Gado wi o tan preiki Yehovah en wortu nanga bribi èn deki-ati.

[Prenspari pisi na tapu bladzijde 9]

Ala ten sma ben musu abi deki-ati fu man preiki fu Gado Kownukondre